1 Kolinhlian 14 - Chahta Holisso Holitopa 1886

¹ Nan i̱ hullo ya̱ achunanchit iakaiyʋt, ishi ka hʋchi bʋnnashke: mikmʋt Shilombish imma ka anukfoyuka chi̱ ka hʋchi bʋnnashke: yohmi kia Shilombish anukfoyukʋt hʋsh anumpula he ak osh ahni kʋt hʋsh i̱ shahlichashke.

² Kʋna hosh anumpa inla yo̱ anumpuli hokʋto, hatak o̱ im anumpuli keyu, amba Chihowa yak oke: kʋna hosh im akostininchi keyu hoka; yohmi kia Shilombish anukfoyuka hosh yʋmmak ash ot nana luma hatok puta ka anumpuli hoke.

³ Amba Shilombish anukfoyukʋt anumpuli hokʋto, hlampkohonchi, mikmʋt ai okcha̱ya he ahna chi̱ ka i̱ mihi̱ha, mikmʋt hopohlahanli, aiena hosh hatak puta im anumpuli hoke.

⁴ Kʋna hosh anumpa inla yo̱ anumpuli hokʋto, ilap illa isht achukmali hoke; amba kʋna hosh Shilombish anukfoyukʋt anumpuli hokʋto, chʋch a̱ hlampkohonchi hoke.

⁵ Hʋsh moma kʋt anumpa ilaiyuka hʋsh anumpula he ak o̱ hʋchim ahni li; yohmi kia Shilombish anukfoyukʋt hʋsh anumpula he ak o̱ hʋchim ahni li kʋt i̱ shahlichi li: kʋna hosh anumpa ilaiyuka anumpuli ka, chʋch ʋt achukmʋt i̱ shahlit hlampka chi̱ ka, yʋmmʋt tosholi keyukma, kʋna hosh Shilombish anukfoyukʋt anumpuli kak osh holitopa kʋt i̱ shahli hoke.

⁶ Yohmi ka itibapishi li ʋhleha ma! nana otʋninchi, keyukmʋt nana ithʋnanchi, keyukmʋt Shilombish anukfoyukʋt anumpuli, keyukmʋt nana abʋchi nana hosh anumpa ilaiyuka anumpuli la chi̱ hosh hʋchim ona li hokmʋto, nanta ho̱ isht hʋchi yukpali la hinla ho?

⁷ Yohmi ka nana kʋt fiopa iksho hosh ohonla kʋt, oskula hokmá, keyukmʋt hap okmá, nana ka ai ola kak osh it im ilaiyuka keyukmʋt, katiohmi kak osh oskula yokmá, keyukmʋt hap okmá, nana ho̱ ai ola kʋt otaiyana hinla ho̱?

⁸ Isht pu̱fa yʋt ola kʋt ik haiako hokma, kʋta hosh itiba chi̱ kʋt il atahla hinla cho?

⁹ Yʋmmak inli ho̱ hʋsh chiyuhmi kʋt anumpa akostinincha he kʋllo keyu ho̱ hʋsh anumpuli keyukma, katiohmi kak osh nana hosh anumpa tuk ʋt otʋna chi̱ ho̱? mahli ak o̱ hʋsh ai anumpuli ha chi̱ hoka.

¹⁰ Anumpa ola ilaiyuka laua kʋt yakni pakna ai asha, yʋmohmi chatuk; yohmi kia achʋfa kʋt nana ho̱ miha keyu kʋt iksho hoke.

¹¹ Yʋmohmi ka anumpa ola ka yʋmmak o̱ miha ka ak akostininchokma, kʋna hosh anumpuli yʋmmak ash o̱ im bʋlbaha sia mak a hi oke; mikma kʋna hosh anumpuli yʋmmak ash ot am bʋlbaha mak a hi oke.

¹² Yʋmmak inli ho̱ chohmit Shilombish imma ka ahnit hʋsh achilita hokʋt, chʋch a̱ hʋsh hlampkohoncha he yak osh hʋsh anukfillashke.

¹³ Yʋmohmi hoka anumpa inla yo̱ kʋna hosh isht anumpuli hokmʋt, yʋmmak ash toshola chi̱ kʋt ʋba ik asilhhá.

¹⁴ Anumpa inla yo̱ ʋba isht anumpuli li hokma, sa chu̱kʋsh ak osh ʋba asilhha hoke: yohmi kia ʋm anukfila hokʋto inla ya̱ nan im ʋni keyu hoke.

¹⁵ Yohmi ka katiohmi kak a chi̱ ho̱? chu̱kʋsh o̱ ʋba isht anumpuli la he, micha ʋm anukfila ho̱ ʋba isht anumpuli la he: mikmʋt chu̱kʋsh o̱ isht taloa la he, micha ʋm anukfila ho̱ isht taloa la hi oke.

¹⁶ Yʋmmak keyukma, Chihowa isht ish aiokpʋchi kia, kʋna kia nan ik ithano im ai o̱ binili binili hatuk ʋt, nana ho̱ ish achi ka akostininchi keyu kʋt, katiohmi kak osh yʋmmak ash osh yak oke ahnit, ʋba pit ish aiokpʋchi ka, Amen acha hinla ho̱?

¹⁷ A̱hli hosh yak oke ʋba pit ish aiokpʋchi ho mʋhli; yohmi kia inla yokʋno hlampkohonchi keyu hoke.

¹⁸ Anumpa inla anumpuli li kʋt, hʋsh moma ka hʋch i̱ shahlichi li kʋt, an Chihowa ya̱ yak oke im ahni lishke.

¹⁹ Yohmi kia chʋch itʋnaha ka inla ma̱ya ka ʋm anumpa ola ka nana isht im abʋchi la chi̱ kʋt, ʋm anukfila anumpa akostininchi tahlapi anumpuli li kak osh, anumpa inla tahlepa sipokni pokoli anumpuli ka ʋm i̱ shahlishke.

²⁰ Itibapishi li ʋhleha ma! nana akostininchi kʋt ʋlla chipunta yo̱ hʋch ik tobo kashke: yohmi kia nana ik ai ʋlhpeso hokʋno ʋllo̱si yo̱ hʋsh tobashke; yohmi kia nana akostininchi hokʋno hatak o̱ hʋsh tobashke.

²¹ Anumpa im inla, mikmʋt itiʋlbi inla hatuk o̱ okla ilʋppa isht anumpohonli la chi̱: ilʋppa moma yʋmohmi hoh kia okla ik sa haponaklo ka chi̱, Chitokaka yʋt achi hoke, achi kʋt nan ʋlhpisa ya̱ a holisso hoke.

²² Yohmi hoka anumpa inla anumpuli yʋt na yimmi ʋhleha ha̱ isht im atokowa keyu, amba kʋna hosh yimmi keyu kak oke; yohmi hoka Shilombish anukfoyuka kʋt anumpuli kak o̱ kʋna hosh yimmi keyu yʋmmak o̱ achukmali keyu, amba kʋna hosh yimmi kak oke.

²³ Yʋmohmi hoka chʋch moma kʋt miha chʋfa ho̱ ant ai itʋnaha cha, momʋt anumpa inla anumpuli aiyuka hokma, anonti nan ik ithano, mikmʋt nan ik yimmo aiena kak kia ai ʋlakmʋt, tasimbo yo̱ hʋchim acha hinla keyu̱?

²⁴ Amba moma kak osh Shilombish anukfoyukʋt anumpuli hokma, anonti na yimmi keyu, keyukmʋt nan ik ithano yosh ʋla hoh kia yimmit, momʋt anumpuli ka a̱hli ahnit anukfohka, yʋmmak ash ot moma kak o̱ nan isht ai im ʋlhpisa hoke.

²⁵ Yohmi ka yakohmi hosh chu̱kʋsh isht im anukfila anu̱kaka yʋt otaiyani yoke: yakohmi hok mak osh hlipia cha, yʋmmak ash ot Chihowa ya̱ aiokpʋchishke, mikmʋt Chihowa hʋt hʋch iba takla ho mʋhli hatuk a̱ anola hi oke.

²⁶ Yohmi ka itibapishi ʋhleha ma! nanta katiohmi ho̱? ant hʋsh itʋnahakmʋt, hʋsh moma kʋt ataloa yokmá, anumpa tosholi ak okmá, nana ho̱ hʋsh i̱shi aiyuka hosh ant hʋsh itʋnahʋshke. Isht achukma hi o̱ nana moma kʋt yʋmohmashke.

²⁷ Hatak kʋna hosh anumpa inla yo̱ anumpuli hokma, tuklo, keyukmʋt tuchina kʋno ont ik aiyo, yohmik mak o̱ it iakaiyashke; mikma achʋfa kak osh tosholi ashke.

²⁸ Amba tosholi iksho hokmʋno, ai itʋnaha ya̱ lumʋt binilashke: yohmi cha Chihowa, ilapo ak inli ita tuklonchit im anumpulashke.

²⁹ Shilombish anukfoyukʋt anumpuli ʋhleha hʋt tuklo, tuchinakma, nana kʋt anumpulikma, inla yokʋto a̱hli ho̱? ahnit anukfillit pisashke.

³⁰ I̱ bili̱kasi binili yʋmmak ash o̱ nana kʋt im otʋni hokma, ʋmmona kash ot nuktanlʋt binilashke.

³¹ Momʋt ithana cha, anonti moma kʋt isht im ai achukmʋt isht i̱ shahla chi̱ ka, Shilombish anukfoyukʋt hʋsh moma kʋt it iakaiya hosh hʋsh anumpula hinla hoke.

³² Shilombish anukfoyukʋt anumpuli ʋhleha im anukfila puyuta kʋt Shilombish anukfoyukʋt anumpuli ʋhleha hash o̱ i̱ nutaka yoke.

³³ Shakapʋt nan iti ataklʋma he Chihowa hʋt ahni keyu, amba ʋbanumpa anukfohka a̱hli im ai itʋnaha moma kak o̱ chohmit iti̱ nanaiya yak oke.

³⁴ Iksa itʋnahʋt ma̱ya ka hʋchim ohoyo hʋt lumʋt binohmayashke; yʋmmak okʋt anumpula he im ʋlhpesa keyu hoka; amba im antia he ak osh im ʋlhpesa hoka, nan ʋlhpisa yʋt yʋmmak o̱ achi ak inli hoke.

³⁵ Yohmi ka nana ho̱ ithʋna bʋnna hokmʋt, chuka ak inli kak o̱ i̱ hatak a̱ ai im aponaklashke: iksa itʋnahʋt ma̱ya ka ohoyo hosh anumpuli hokʋto nan isht im a hofahya hoka.

³⁶ Yakeh! Chihowa im anumpa hʋt hʋchishno ak o̱ a kohchʋt minti hatok o̱? keyukmʋt hʋchishno ak bano ho̱ hʋchim ona hatuk o̱?

³⁷ Hatak kʋna hosh ilap inli kʋt Shilombish anukfoyukʋt anumpuli yokma, keyukmʋt Shilombish holhpela ka isht anukfoyuka ho̱ mihi yosh im ahobakmʋt, pit hʋchi holissochi li tuk yʋmmʋt Chitokaka i̱ nan ʋlhpisa mak atuk a̱ akostininchit, a̱hli ahnashke.

³⁸ Amba kʋna hosh ik akostinincho hokʋto mihi yosh nan ik akostinincho kʋt imomashke.

³⁹ Yʋmohmi ka itibapishi li ʋhleha ma! Shilombish anukfoyukʋt anumpula he ishi ka bʋnnʋt hʋsh achilitashke; mikmʋt anumpa inla anumpuli ka hʋch ik im alammo kashke.

⁴⁰ Nana moma kʋt ai ʋlhpiesa, micha ai itiakaiyʋt anuktanla mak o̱ yʋmohmashke.