1 Kolinhlian 13 - Chahta Holisso Holitopa 1886

¹ Hatak im anumpa ilaiyuka puta, mikmʋt enchil puta im anumpa ho̱ isht anumpuli li hoh kia, nan i̱ hullo yʋt ik sʋm ikshokmʋt, tʋli lakna ohonla, keyukmʋt tʋli kʋsa kʋsahahanchi ak inli ho̱ holba li hoke.

² Yohmi ka Shilombish anukfoyukʋt anumpuli na holhpela ka ieshi li, micha nan ik otano ki tok moma ka akostininchi li, micha nan ithana moma ka ieshi li, yohmi cha na yimmi moma ma ieshi li, yohmi hokʋt nʋnih hochito puta ka kanʋllichi la hinla kia, nan i̱ hullo yʋt ik sʋm iksho hokmʋto, nana ho̱ sia keyu hoke.

³ Yohmikmʋt nana ʋm a̱sha moma kash ilbʋsha ya̱ im iti yopelachi li, micha sa haknip mʋt lua chi̱ ho̱ im issa li; yohmi kia nan i̱ hullo yʋt ik sʋm iksho hokmʋto, nana ho̱ isht ʋm ai achukma keyu hoke.

⁴ Nan i̱ hullo yʋt na hotopali ya̱ i̱ sʋlaha, micha nan i̱ kana yoke; nan i̱ hullo yʋt nana potʋnnot i̱ nukkilli keyu; nan i̱ hullo yʋt ilap inli ka isht ilauata keyu, ile chahʋchi keyu.

⁵ Ilefehnʋchi hosh inla ya̱ hofahyali keyu, ilap immi yo̱ hoyo keyu, nan ik kanihmo ka nokowa keyu; nan ik ʋlhpeso anukfilli keyu.

⁶ Nan ik ʋlhpeso isht ai yukpa keyu, amba nan a̱hli yo̱ isht ai yukpa yoke.

⁷ Nana moma ka ompohomo, nana moma ka yimmi, nana moma kʋt ʋlhpesa chi̱, aha̱nit a yimmi, nana moma kʋt ant ik sʋm ai yohmí, aha̱ni.

⁸ Nan i̱ hullo yokʋto nitak nana ont ai iksho ka he keyu: amba Shilombish anukfoyukʋt anumpuli yokmá, nana hatuk kia yʋmmak okʋto ont ai iksho ka hi oke; anumpa ilaiyuka ithaiyana yokmá, nana tuk kia yʋmmak okʋto ont issa hi oke; nan ithana yokmá, nana hatuk ʋt ont akshot kʋnia hi oke.

⁹ Ik onancho hosh il ithaiyana hosh, anonti ik onancho hosh Shilombish anukfoyukʋt il anumpuli hoke.

¹⁰ Yohmi kia nana ont ai a̱hli yʋmmʋt ʋla chi̱, yohmi hokmʋno nana ik ono yʋmmak atuk ʋt ont ai ikshot kʋnia hi oke.

¹¹ Ʋlla sa tomba mʋt, ʋlla yo̱ chohmit anumpuli li tok; ʋlla yo̱ chohmit nana akostininchi li tok; ʋlla yo̱ chohmit nana anukfilli li tok; yohmi tok kia hatak ont toba li mʋt, ʋlla nana im akaniohmi yash kanchi li tok.

¹² Himonasi yokʋno ik onanchot a pisa yo̱ hlopullechit e pisa: yohmi kia yʋmmak fokak mak o̱ nashuka bi̱ka il iti̱ pihi̱sa hi oke: himonasi yokʋno ak onancho hosh ithana li; yohmi kia himmak o̱ himonasi ya̱ sʋthaiyana kak inli ho̱ chohmit ithaiyana la hi oke.

¹³ Yohmi ka himonasi yokʋno na yimmi, ai okcha̱yʋt bilia pisa he ahni, nan i̱ hullo, tuchina ilʋppak ash osh takali hoke: yohmi kia ilʋppak ash moma i̱ shahli hokʋto nan i̱ hullo yak oke.