1 Kolinhlian 12 - Chahta Holisso Holitopa 1886

¹ Yʋmohmi ka itibapishi li ʋhleha ma! Shilombish imma ka hʋch ik akostinincho ka hi a̱ ak hʋchim ahnoshke.

² Chentail hʋchia hʋt na hʋsh anukfoyuka hosh na holbʋt toba ik anumpulo puta ilʋppa hʋsh im oho̱na kʋt hʋsh ithaiyanʋshke.

³ Yʋmohmi ka hatak nana kia Chihowa imi Shilombish anukfoyuka hosh anumpuli kʋt, Chisʋs a̱ na kallakshi yo̱ hochifa he keyu hoke: yohmikma hatak kʋna kia Chisʋs ʋt Chitokaka yoke, acha he keyu, amba Shilombish Holitopa yak osh anukfoyuka hok mak ahinla ka hʋch ithʋnanchi lishke.

⁴ Yohmi ka na hʋlbina ilaiyuka kʋt ai asha; yohmi kia Shilombish mihi ash inli hoke.

⁵ Mikma nan isht ʋtta mʋt im ilaiyuka; yohmi kia Chitokaka yokʋto mihi ash inli hoke.

⁶ Mikma na toksʋli mʋt im ilaiyuka hoke; yohmi kia Chihowa mihi ash inli hosh ilʋppa moma ka hatak moma ka anukfohkichi hoke.

⁷ Yohmi ka Shilombish nan isht otʋni ho̱ hatak moma kʋt isht ai ʋlhpiesa hi osh habena hoke.

⁸ Shilombish pulla ho̱ na hopoyuksa anumpa ha̱ achʋfa kʋt anukfoyuka hoke; inla yato Shilombish yʋmmak inli ho̱ nan ithana anumpa ha̱ anufoyuka hoke.

⁹ Inla mʋt Shilombish mihi ash inli pulla ho̱ na yimmi ha̱ ishi: mikma inla mʋt Shilombish mihi ash inli pulla ho̱ na hlakofichi hʋlbina ka ishi hoke.

¹⁰ Inla yʋt na fehna puta yʋmihcha hi ʋt ishi; inla mʋt Shilombish anukfoyukʋt nan ithʋnancha hi ʋt ishi; inla mʋt chukʋsh im anukfila puta akostininchi yo̱ ishi; inla mʋt anumpa ilaiyuka anumpula he ʋt ishi; inla mʋt anumpa ilaiyuka toshola hi ʋt ishi ka Shilombish pulla kak oke.

¹¹ Shilombish achʋfa mihi ash inli kak osh hatak moma ka kanimi ho̱ im ai ahni aiyuka hosh na yakohmi puta kash im it a kʋshkolit anukfohkichi hoke.

¹² Haknip okʋto achʋfa, yohmi kia yʋmma ai immi hokʋto in laua; mikma haknip achʋfa yʋmma ai immi moma kʋt laiyawa kia, haknip achʋfa hoke; yohmi ka Klaist ak kia ilʋppak inli ho̱ chohmi hoke.

¹³ Shilombish achʋfa pulla ho̱ momʋt isht il a baptismot haknip achʋfa e toba; Chu, keyukmʋt Chentail pia hokmá, yuka, keyukmʋt yuka keyu yo̱ pia hokmá, nana tuk kia momʋt Shilombish achʋfa il ibai ishi yo̱ e toba hatuk.

¹⁴ Haknip ʋt ai immi im achʋfa keyu, amba laua hoka.

¹⁵ Iyi yʋt, Ʋno ʋto ibbak sia keyu hokʋt, haknip ai immi sia keyu; achi hokmʋto, yohmi kia yʋmmʋt haknip a̱ ai immi keyu ho̱?

¹⁶ Mikma haksobish ʋt, Ʋno ʋto nishkin sia keyu hokʋt, haknip ai immi sia keyu hoke; achi hokmʋto, yohmi kia yʋmmʋt haknip a̱ ai immi keyu ho̱?

¹⁷ Yohmikma haknip moma kʋt nishkin okma, katima yak osh na haklo ya hinla ho̱? moma kak osh na haklo yokma, katima yak osh na hu̱wa ya hinla ho̱?

¹⁸ Yohmi ka himonasi yokʋno Chitokaka yʋt yakohma hinla, ahni mak osh, ai immi hash achʋfa aiyukali mominchit haknip ash ai iba fohkichishke.

¹⁹ Yohmi ka moma kak osh ai immi achʋfa hokmʋno, katima yak osh haknip a hinla ho̱?

²⁰ Yohmi ka himonasi yokʋno ai immi yʋt laua: yohmi kia haknip okʋto achʋfa hoke.

²¹ Yohmi ka nishkin ʋt ibbak a̱, Nana ka ak chi̱ sʋbʋnnoshke, im acha he keyu: keyukmʋt anonti iyi yash o̱, Nana ka ak chi̱ sʋbʋnnoshke, noshkobo hʋt im acha he keyu hoke.

²² Keyú, yʋmma i̱ shahli, haknip ai immi ilʋppak ash osh ik hlampko fehna ahoba kia ai ʋlhpiesa hoke.

²³ Yohmi ka haknip ai immi ilʋppak ash kanima ka holitopa ik lauwo pim ahoba kia, ilʋppak ash o̱ holitopa i̱ shahli fehna il ima hoke: mikmʋt a pim aluma̱ka imma hokʋno i̱ shahlichit e shemʋchi hoke.

²⁴ Isht a pi aiokli imma hokʋno shema yʋt isht im ai ʋlhpesa keyu hoke: yohmi ka Chihowa hʋt haknip a̱ iti fohkit apoksiachi mʋt, kanimi kʋt ik alauwo ke tuk ash holitobli kʋt i̱ shahlichi fehna hoke.

²⁵ Yohmi na haknip ash ita kʋshkoa iksho ka hi atok; amba ai it immi hash osh ahah! it im ahna he ak atok oke.

²⁶ Yohmi ka haknip ai immi achʋfa hatuk ʋt ilbʋsha hokma, haknip ai immi moma kak osh ibai ilbʋsha hoke: mihma ai immi achʋfa kʋt holitopa hokma, moma kʋt ibai yukpa hoke.

²⁷ Yohmi ka Klaist haknip o̱ hʋchia, micha yʋmmak ash o̱ ai immi ka a kashampa ai yuka hʋchia hoke.

²⁸ Yohmi ka Chihowa hʋt kanimi ka atokolit chʋch a hiohlichi; ʋmmona ka apostel, atukla ka Shilombish anukfoyukʋt anumpuli; atuchina ka ʋbanumpa isht ithʋnanchi; mikmʋt na fehna puta yʋmihchi, mikmʋt na hlakofichi holhpela, nan apelʋchi, chʋch pehlichi, anumpa ilaiyuka anumpuli puta kak oke.

²⁹ Moma kak osh apostel o̱? keyukmʋt moma kak osh Shilombish anukfoyukʋt anumpuli yo̱? keyukmʋt moma kak osh ʋbanumpa isht ithʋnanchi yo̱? keyukmʋt moma kak osh na fehna puta yʋmihchi yo̱?

³⁰ Moma kak osh na hlakofichi holhpela ha̱ ishi ho̱? keyukmʋt moma kak osh anumpa il aiyuka anumpuli ho̱? keyukmʋt moma kak osh anumpa ilaiyuka tosholi yo̱?

³¹ Yohmi ka na holhpela puta achukma i̱ shahli kak o̱ ishi ka hʋsh ahni fehnashke. Yohmi kia na fehna kʋt i shahli ho̱ hʋchim anoli lishke.