1 Kolinhlian 11 - Chahta Holisso Holitopa 1886

¹ Ʋno ʋt Klaist a̱ iakaiya sia akinli ho̱ chohmit, siakaiya hʋchia hashke.

² Yʋmohmi ka itibapishi li ʋhleha ma! nana moma isht hʋs sʋthaiyana, mikmʋt nan ʋlhpisa holitopa moyuma ka hʋch ichi̱ma li tuk a̱ hʋsh holitobli hoka, hʋchi ahninchi lishke.

³ Yohmi ka hatak moma i̱ noshkoboka yʋt Klaist ak okma; anonti ohoyo ha̱ i noshkoboka yʋt hatak ak oke; mikma Klaist i̱ noshkoboka yʋt Chihowa yak oka, hʋsh ithana he ak o̱, hʋchim ahni lishke.

⁴ Hatak moma kʋt anumpa ilbʋsha anumpuli, keyukmʋt Shilombish o̱ anukfoyukʋt anumpuli kʋt, noshkobo hʋt im o̱ hlipia hokmʋt, ilap noshkobo ha̱ hofahyali hoke.

⁵ Amba ohoyo moma kʋt noshkobo o̱ hlipia keyu hosh, anumpa ilbʋsha anumpuli, keyukmʋt Shilombish o̱ anukfoyukʋt anumpuli hokmʋt, noshkobo yash o̱ hofahyali hoke, yʋmmak okʋt noshkobo i̱ sha̱fa yak inli ho̱ chiyuhmi hoka.

⁶ Ohoyo hʋt noshkobo ompoholmo keyukmʋt, pa̱shi ak kia ʋlmashke; yohmi kia pa̱shi ʋlmo, keyukmʋt sha̱fa kak okmá, nana ka ohoyo hʋt isht a hofahya hinla hokma, noshkobo hʋt ompoholmashke.

⁷ Chihowa ya̱ a hoyulba na isht a holitopa hoka, hatak ʋt noshkobo ha̱ nan o̱ hlipela he ʋlhpesa keyu mʋhlishke: amba hatak a̱ isht im a holitopa yokʋto ohoyo ak oke.

⁸ Hatak ʋt ohoyo ak o̱ a toba tok keyu, amba ohoyo ak osh hatak ak atok oka.

⁹ Mikmʋt hatak ʋt ohoyo ak atuk pulla mak o̱ toba tok keyu, amba ohoyo ak osh hatak ak atok oke.

¹⁰ Yʋmohmi kak o̱ ohoyo hʋt enchil ʋhleha ak pulla kak oka, noshkobo hʋt ompoholma he ʋlhpesa hoke.

¹¹ Yohmi kia ohoyo hʋt iksho ka hatak ʋt anta he keyu, mikma hatak ʋt anta he keyu, mikma hatak ʋt iksho ka ohoyo hʋt anta he keyu, Chitokaka yʋt im ahni hoke.

¹² Ohoyo hʋt hatak ak o̱ a toba yatuk o̱, yʋmmak inli ho̱ chohmit hatak ʋt ohoyo pulla kak o̱ atoba hoke; yohmi ka nana puta kʋt Chihowa ak o̱ atoba hoke.

¹³ Hʋchishno ak inli hosh anukfillit ho pesá; ohoyo hʋt noshkobo ompoholmo keyu hosh Chihowa im ilbʋshʋt anumpuli yʋmmʋt ʋlhpesa ho̱?

¹⁴ Hatak ʋt pa̱shi ʋt falaia hokmʋt, ishit hofahya ka nan isht anukfilli kak oh kia nan hʋchi ithʋnanchi keyu ho̱?

¹⁵ Amba ohoyo hʋt pa̱shi ʋt i̱ falaia hokmʋt, isht im a holitopa hoke; ilap pa̱shi ʋt noshkobo isht ompoholma hi o̱ ishi tok oka.

¹⁶ Yohmi kia kʋna hosh a̱ sanali kak o̱ bʋnna ahoba kia, pishno yukʋto yʋmma chohmi kʋt ik pim iksho chatuk; mikmʋt Chihowa in chʋch a hiohli kʋt yʋmma chohmi kʋt ik im iksho chatuk oke.

¹⁷ Yohmi ka achukma i̱ shahli kak o̱ keyu, amba okpulo i̱ shahla chi̱ hosh mintit hʋsh itʋnaha kak o̱, ak hʋchim ahnincho ilʋppak osh hʋchim anoli lishke.

¹⁸ Ʋbanumpuli iksa yosh ant hʋsh ai itʋnaha kʋt, nana ʋmonna ka ita kʋshkoʋt hʋsh ma̱ya ka haklo lishke: yohmi kʋt sai yimmi chohmishke.

¹⁹ Yohmi ka hʋch ik itibachʋfo kak o̱ pulla chi̱, yohmik mak o̱ kʋna hosh ai a̱hli hok mak osh hʋch itin takla ya̱ otaiyana hi oke.

²⁰ Yohmi ka a miha chʋfa ho̱ ant hʋsh ai itʋnaha, ilʋppak osh Chitokaka im opiaka impa ya̱ ʋpa ho̱ keyu hoke.

²¹ Hʋsh impakmʋt, hʋsh moma kʋt hʋchim opiaka impa yatuk kak illa ho̱ ti̱kba hʋsh ishishke: yohmi hatuk o̱ achʋfa kʋt hohchʋfokma, anonti inla yato nan ishkot haksishke.

²² Yakeh! ai impa he, mikmʋt ai ishka he aiena chuka yʋt ik hʋchim iksho ho̱? keyukmʋt Chihowa in chʋch hʋsh shitilema cha, anonti kʋna hosh nana kʋt ik im iksho ke tuk yʋmmak ash kia hʋsh hofahyala chi̱ hosh hʋsh yohmi ho̱? Nanta ho̱ hʋchim achi la chi̱ ho̱? ilʋppak a̱sh o̱ isht hʋchi ahninchi la chi̱ ho̱? isht hʋchi ahninchi li keyushke.

²³ Chitokaka ya̱ im ishi li tuk mihi yo̱ hʋch ihi̱ma li; yohmi ka Chitokaka Chisʋs ʋt tʋnʋp ibbak fohka chi̱ ninak yʋmmak inli mʋt pʋska ya̱ ishi tok.

²⁴ Mihmʋt yʋmmak ash ot ʋba pit isht aiokpʋchi cha, pʋska yash boshullichi mʋt, Ieshi cha, ho ʋpá; ilʋppʋt sa haknip osh hʋchi̱ boshulli hoke: hʋs sʋthana chi̱ kʋt ilʋppak o̱ hʋsh yʋmihchashe, achi tok.

²⁵ Yʋmmak ash inli ho̱ chohmichit opiaka impa ishi hayosh, isht ishko ash kia yʋmmak ash ot ishi mʋt, Ilʋppʋt nan ʋlhpisa himona ʋm issish o̱ isht ai a̱hli toba hoke; ilʋppak o̱ hʋsh yʋmihchi cha, yʋmmak ash hʋsh ishko aiyukakmʋt, hʋs sʋthaha̱nashke.

²⁶ Pʋska ilʋppa hʋsh pa aiyuka, mikmʋt isht ishko ilʋppa hʋsh ai ishko aiyuka aiena kʋt, Chitokaka illi tok a̱ hʋsh otʋnihinchi na yʋmmak atuk ʋt ʋla hayashke.

²⁷ Yʋmohmi ka kʋna hosh yohma he ai ʋlhpiesa keyu hosh, pʋska ilʋppak ash ʋpa chi̱, mikmʋt Chitokaka im isht ishko ilʋppak ash ai ishka chi̱ aiena hokmʋt, mihi yosh Chitokaka haknip, micha im issish ita tuklo ka ik holitoblot nan isht i̱ palʋmmi mak a hi oke.

²⁸ Yohmi ka hatak okʋt anukfillit ik ile pisá: yʋmohmi cha mihi yosh pʋska yash ik pá, mikmʋt isht ishko yash ik ai ishkó.

²⁹ Kʋna hosh ai ʋlhpiesa keyut yʋmmak ash ʋpa, micha ishko aiena kʋt Chitokaka haknip ash ik akostinincho hokʋt, mihi yosh ilap nan isht im ʋlhpisa hi o̱ yʋmmak ash ʋpa, micha ishko aiena hoke.

³⁰ Ilʋppa yakohmi kak o̱ ik sitopo, micha abeka aiena kʋt laua hosh hʋchim ai asha; mihma laua kʋt nusi hoke.

³¹ Pishno ak inli kʋt il il akostininchi hatuk okmʋt, nan isht pim ʋlhpisa hi atuk keyu.

³² Yohmi ka nan isht pim ʋlhpisa kʋt, yakni ya̱ ai itʋpehʋt ik pi̱ palʋmmo ka chi̱ kʋt, isht pi achukma chi̱ hosh Chitokaka ya̱ il im afʋma hoke.

³³ Yomohmi hoka itibapishi li ʋhleha ma! hʋsh impa chi̱ hosh hʋsh itʋnahakmʋt, it i̱ hullot hʋsh iti hoyashke.

³⁴ Yʋmohmi ka itʋnahʋt nan isht hʋchim ʋlhpisa chi̱ kʋt, kʋna hosh hohchʋfo hokʋto, mihi yosh in chuka yak o̱ ik ai impá. Nana inla ka yatuk okʋno ona lik mak osh, apoksiachi la hi oke.