1 Kolinhlian 10 - Chahta Holisso Holitopa 1886

Chu okla nan isht im ʋlhpisa holitopa, 1, 7 Chu okla nan isht im apalʋmi tok a̱ nan isht il ithana he tuk. 21 Chitokaka im ai impa ya̱ Setan o̱ im ai impa kiloh ikbo kashke. 24 Il itibapishi im anukfila ha̱ il it im ahnicha he tok.

¹ Yakohmi ka itibapishi li ʋhleha ma! pin tikba ʋhleha hʋt kaniohmit moma kʋt hoshonti ha̱ ai i̱ nutakʋt a̱yʋt, anonti momʋt okhʋta ho̱ a hlopulli tok a̱ hʋch ik ithano ka hi a̱, hʋchim ai ahni li keyushke.

² Yohmi ka Moses a̱ im antia chi̱ kʋt hoshonti, micha okhʋta ita tuklo kash o̱ isht a baptismo tok.

³ Mihma il impa shilombish imma a miha chʋfa ho̱ momʋt ʋpa tok.

⁴ Mihmʋt nan ishko shilombish imma a miha chʋfa ho̱ momʋt ishko tok. Tʋli chito shilombish imma yʋmmak ash okla ai ishko tok a̱ yʋmmak ash ot iakaiya tok oka; yohmi ma Tʋli chito yʋmmʋt Klaist mak atok oke.

⁵ Yohmi kia yʋmma kashampa laua ka Chihowa yʋt isht ik i̱ ahno fehna tok; illit yakni haiaka ya̱ okla a fimimpa tok oka.

⁶ Yohmi ka nana yakohmi kʋt nan isht a pim ʋlbʋcha hi atuk; yʋmohmi hokʋt okla nan anushkunna tok ak inli ho̱ chokmit nan ik ʋlhpeso puta ka kil anushkunno ka he atuk oke.

⁷ Okla hʋt binohma̱yʋt impʋt, nan ishkot wakaya cha, a hihlʋchi tok, achi kʋt holisso hoka; kanima kʋt yohmi hatok a̱ chohmit nan holbʋt toba aiokpʋchi hʋchia keyu kashke.

⁸ Mihmʋt kanimi kʋt itinluma̱ka tuk osh, nitak achʋfa ka tahlepa sipokni pokoli tuklo akocha tuchinʋt ak‐akoha tok ʋhleha ha̱ chohmit kil itinluma̱ko kashke.

⁹ Mihmʋt kanimi kʋt Klaist imomaka pisa tuk osh, sinti o̱ isht ai illi tok ʋhleha ha̱ chohmit Klaist a imomaka ke peso kashke.

¹⁰ Mihmʋt kanimi kʋt ik im ʋlhpesot na mihachi tuk osh, nan okpʋni o̱ isht ai okpuloka tok ʋhleha ha̱ chohmit, na hʋch ik mihacho kaskke.

¹¹ Yohmi ka isht a pim ʋlbʋcha hi a̱ ilʋppa puyuta kʋt yʋmmak ash o̱ ai i̱ yʋmohmi tok: yohmi tuk osh yʋmmak atok ʋt isht a pim achukma chi̱ mak o̱ holisso ma, yakni ont ai ʋhli hʋt pishno ak o̱ pim ʋlʋshke.

¹² Yʋmohmi hoka kʋna hosh, Hiki̱a li, ahni kʋt, mihi yosh ik itulo ka chi̱ kʋt ahah! ahnashke.

¹³ Nana imomaka pisa nana hosh hʋchi onʋtula he keyu; amba hatak moma ka ai onʋtuyula chatuk chohmi kʋt yʋmmak oke; yohmi kia Chihowa yʋt ai a̱hli, yʋmmʋt nan hʋsh a lauecha he ont ia hokʋno imomaka hʋchi pisa hi a̱ ahna he keyu hoke; amba yʋmmak ash hʋsh a lauecha chi̱ ka nana imomaka pisa yʋt hʋchi ontuyulakma, a hlakofa he ata̱ya ya̱ hʋchim ikba he ak inli hoke.

¹⁴ Yʋmohmi hoka a̱ kana a̱ holitopa ʋhleha ma! na holbʋt toba ai okpʋchi hʋsh i̱ filʋmmashke.

¹⁵ Hatak hopoyuksa yo̱ hʋchi chohmichit anumpuli lishke; nana ho̱ achi li ka anukfillit hʋsh akostininchashke.

¹⁶ Isht ishko holitopa mihi yo̱ Chihowa isht il aiokpʋchi kʋt, yʋmmʋt Klaist im issish a̱ isht itibai ishi keyu ho̱? Pʋska e boshullichi ka, yʋmmʋt Klaist haknip a̱ isht itibai ishi keyu ho̱?

¹⁷ Pishno ʋt pi laua kia, pʋska achʋfa, anonti haknip achʋfa pia hoke; pʋska achʋfa yʋmma momʋt iloh itibai ishi hokʋt.

¹⁸ Islael okla haknip imma hokʋno ho pesá; kʋna hosh ʋba nan isht aiokpʋchi nipi yo̱ ai ʋpa kʋt, yʋmmʋt alta ya̱ itibai ishi keyu ho̱?

¹⁹ Yohmi ka nanta ho̱ achi li ho̱? na holbʋt toba yʋmmʋt nana hoke; mikmʋt na holbʋt toba nana ho̱ isht aiokpʋcha chi̱ ho̱ imma ka yʋmmʋt nana hoke, achi li ho̱? keyú.

²⁰ Amba nana ho̱ Chentail okla hʋt ʋba isht aiokpʋchi kʋt, nan isht a hullo okpulo yak o̱ isht aiokpʋchi kʋt, Chihowa yak okʋno keyu, achi li hoke: yohmi hokʋt nan isht a hullo okpulo ya̱ hʋsh ibai isha hi o̱, hʋchim ahni li keyushke.

²¹ Chitokaka im isht ishko, mikmʋt nan isht ahullo okpulo im isht ishko it aieninchit hʋsh ai ishka he keyushke: mikmʋt Chitokaka im ai‐impa, mikmʋt nan‐isht ahullo okpulo ʋhleha im ai‐impa it aieninchit hʋsh ibai achʋfa he keyushke.

²² Chitokaka ya̱ il anukhobelʋchi na pi̱ nuktʋhla hinla ho̱? yʋmma hlampko kʋt il i̱ shahli ho̱?

²³ Nana moma kʋt isht ʋm ai ʋlhpiesa, yohmi kia nana moma kak osh isht achukma he keyu; nan moma kʋt isht ʋm ai ʋlhpiesa, yohmi kia nana moma kak osh achukmalechi keyu hoke.

²⁴ Hatak kʋna kia ilap nan isht im ai ʋlhpiesa he ak bano ho̱ ik hoyo kashke; amba hatak moma kʋt inla nan isht im ai ʋlhpiesa he yak ashke.

²⁵ Nipi a chumpa ya̱ nana hosh a kʋnia tuk a̱, yʋmma nan isht il akostininchi pulla kak o̱ nana ik a ponaklot, hʋsh pashke.

²⁶ Yakni moma, micha awaya moma kʋt Chitokaka immi hoke.

²⁷ Kanimi kʋt na yimmi keyu hosh ont hʋsh ibai impa he hʋchim ahni hokma, ia hi a̱ hʋsh ahni hokmʋt; nana hosh hʋchin tikba ya̱ talaiakma nan isht il akostininchi pulla kak o̱ nana ik a ponaklot, hʋsh pashke.

²⁸ Yohmi kia kʋna hosh, Na holbʋt toba isht aiokpʋcha hi o̱ ilʋppa im issa tok a̱ hʋchim achikma, na hʋchim anoli tuk yʋmmak pulla, mikmʋt nan isht il akostininchi aiena pulla kak o̱ hʋshpa ná; yakni micha ai immi moma aiena kʋt Chitokaka immi hoke.

²⁹ Nan isht il akostininchi achi li ka, chimmi ak o̱ keyu, amba yʋmmak ash oke; nan isht ʋm ai ʋlhpisa hosh yʋmihchi li ka, nanta katiohmi ho̱ inla nan isht il akostininchi hosh si onochi ho̱?

³⁰ Chihowa nan isht i̱ kana pulla ho̱ ibai ishi li hokmʋt, yʋmmak oka yak oke isht ahni li ka, nanta katiohmi ho̱ nan ik ʋlhpeso yo̱ isht a si anumpa cho?

³¹ Yʋmohmi hoka hʋsh impa, keyukmʋt na hʋsh ishko, keyukmʋt nana ho̱ hʋsh yʋmihchi hokmʋt, Chihowa isht a holitopa chi̱ ho̱, mominchit hʋsh yʋmohmashke.

³² Achʋfona kia Chu ak okmá, keyukmʋt Chentail ak okmá, keyukmʋt Chihowa in chʋch ak okmá, nana kia hʋch ik ibetʋblicho kashke.

³³ Hatak moma ka nana moma ka yukpali kʋt, ʋno nan isht ʋm ai ʋlhpiesa hi o̱ hoyo li keyu; amba la̱wa yʋmmʋt okcha̱ya chi̱ ka, isht im ai ʋlhpiesa hi o̱ hoyo li ka hʋsh chiyuhmashke.