1 Kolinhlian 1 - Chahta Holisso Holitopa 1886

Ʋbanumpuli Kolinhla a̱sha tuk a̱ Pal ʋt pit ai okpʋchi, mihmʋt Chihowa ya̱ aiokpʋchi, 1; 10 itibachʋfʋt ma̱ya he i̱ miha; 12 itakashapʋt ma̱ya tuk a̱ nan i̱ miha. 18 Aka a nahopoyuksa yʋt nan isht a hopoyuksa ka; 21 nan ik ahobo ʋbanumpa isht anumpuli kak o̱ Chihowa yʋt isht okpaninchi: 26 na hopoyuksa, micha nan i̱ shahli aiena kak osh ʋlhtoka keyu, amba ik hopoyukso, ik hlampko, aiena kak osh ʋlhtoka.

¹ Pal, Chihowa nan ai ahni atuk pulla mak o̱ Chisʋs Klaist im apostel ʋlhtoka tok, micha il itibapishi Soshlenes ita tuklo kʋt,

² Chihowa in chʋch Kolinhla a hikia, Chisʋs Klaist ak atuk pulla kak o̱ isht a kashofʋt, ʋbanumpuli ʋlhtoka tok, micha pin Chitokaka Chisʋs Klaist ʋt yʋmma, micha pishno il ita tuklo ka pimmi hatuk o̱ hohchifo ha̱ anukchietot hoho̱yot kanima moma ai asha aiena ka pit i̱ holissohonchishke.

³ Isht i̱ kana, micha isht it i̱ nanaiya aiena Pi̱ki Chihowa, micha Chitokaka Chisʋs Klaist ita tuklo ka a mihinti kʋt hʋchi anukfoyukashke.

⁴ Yohmi ka Chisʋs Klaist ak atuk pulla kak o̱ Chihowa hʋt ilap isht i̱ kana ya̱ hʋch ima hatuk oka, an Chihowa ya̱ hʋchishno yak atuk pulla mak o̱ yak oke im ai ahni li̱ biliʋshke.

⁵ Yohmi ho̱ nan oklu̱ha kʋt yʋmmak o̱ isht a hʋchin laua hosh isht anumpuli puta, micha nan ithana puta kʋt isht a hʋchim aienʋshke.

⁶ Yakohmi hosh Chisʋs Klaist nan isht atokowa yash osh hʋchishno a̱ isht ai a̱hli hatuk oke.

⁷ Yohmi hosh na hʋlbina nana kia ik ai ono ho̱ hʋsh ishi tuk keyu hatuk osh; pin Chitokaka Chisʋs Klaist ʋt otaiyana hi a̱ hʋsh hoho̱yo hoke.

⁸ Yʋmmak ash inli hosh hʋchi ai a̱hlihinchit ont ai ʋhli ka isht hʋch ona hi oke: yohmi ho̱ pin Chitokaka Chisʋs Klaist i̱ nitak fehna ka anumpa isht a hʋchi onʋtula hi ʋt iksho ka hi oke.

⁹ Chihowa hʋt ai a̱hli yoke, yʋmmak o̱ ilap Ushi pin Chitokaka Chisʋs Klaist a̱ ai ib ai eshi isht a hʋchi ʋlhtoka hatuk oke.

¹⁰ Yohmi ka itibapishi li ʋhleha ma! nana a miha chʋfa ho̱ isht hʋsh anumpula he, mikmʋt ai it i̱ filʋmmi puta kʋt ik hʋchim iksko ka he; amba nana hosh ai ahni kʋt hʋchim anukfila hʋt ai a̱hli fehnʋt hʋsh it ibafoyuka he mak o̱, pin Chitokaka Chisʋs Klaist isht a hochihi̱fo hosh hʋchim ai ahni lishke.

¹¹ Itibapishi li ʋhleha ma! nan itachowa yʋt hʋchin takla a takali ka, Kloe in chuka chʋfa yosh ʋm anoli hatuk oke.

¹² Yohmi ka hʋsh moma kʋt, Ʋno ak osh Pal ai achʋfa sia; anonti, Ʋno mʋt Apollos ai achʋfa sia; mikma, Ʋno ʋto Sefas ai achʋfa sia; yohmik ma, Ʋno ʋto Klaist ai achʋfa sia; hʋsh achi ilʋppak o̱ achi lishke.

¹³ Klaist ʋt ita kʋshkoa ho̱? hʋchishno atuk mak o̱ Pal ak osh ititaiyukhʋna ai illi tok o̱? keyukmʋt Pal i̱ hohchifo ho̱ isht hʋchi baptismo tok o̱?

¹⁴ Hʋsh kanima kia ak hʋchi baptismocho hosh Klispʋs, micha Kaiʋs ita tuklo bano tok a̱ yak oke, Chihowa ha̱ im ai ahni lishke.

¹⁵ Yohmi hatuk o̱ ʋno ak inli a̱ hohchifo ho̱ isht baptismochi li tok a̱, hʋsh kanima kia hʋsh acha he keyushke.

¹⁶ Mikmʋt Stefanʋs in chuka chʋfa ak kia baptismochi li tok; inla yano baptismochi likmá, nana tuk ʋt ak ithanoshke.

¹⁷ Baptismochi la hi o̱, Klaist ʋt si atokoli tok keyu hoka, amba ʋbanumpa isht anumpuli la he ak atok: anumpa hopoyuksa ya he atuk keyu, yohmi hokma Klaist im ititaiyukhʋna yʋt nan ai a̱hla he keyu hoke.

¹⁸ Ititaiyukhʋna isht anumpuli yokʋt kʋna hosh ilbʋshʋt illa chi̱ yʋmmak o̱ ik im ahobo yoke: amba okcha̱ya chi̱ pishno ak okʋno Chihowa nan isht im ai a̱hli yoke.

¹⁹ Nan imponna isht a hopoyuksa yokʋno okpʋni la chi̱, mikmʋt nan ithana nan isht akostininchi yano akshochi la chi̱, achi hosh holihi̱so hatok oke.

²⁰ Katima yak o̱ na‐hopoyuksa yʋt anta ho̱? katima yak o̱ na‐holissochi yʋt anta ho̱? yakni ilʋppa nan isht ai it i̱ ponaklo yʋto katima yak o̱ ma̱ya ho̱? yakni ilʋppa isht a hopoyuksa ya̱ Chihowa hʋto ik ahobalecho hatuk keyu̱?

²¹ Nan isht a hopoyuksa hosh Chihowa hʋt nan atahli tok kia, yakni ʋt ilap hopoyuksa kak osh Chihowa ya̱ isht ik ithano ma, ʋbanumpa isht anumpuli ik ahobo kia, kʋna hosh yimmi hokʋno mihi yo̱ Chihowa hʋt ʋlhpesa, ahnit isht okchalinchi yoke.

²² Chu okla hʋt nan isht atokowa asihi̱hla, mikma na hopoyuksa yo̱ Klik ʋto hoho̱yoshke:

²³ Yohmi kia pishno ʋto Klaist ititaiyukhʋna ai illi tok a̱ isht il anumpohonli ka, Chu okla hokʋno isht ai im ibetʋbli yokmʋt, anonti Klik okʋno nan ik im ahobo yoke;

²⁴ Yohmi kia Chu okla, mikmʋt Klik okla ita tuklo ka kanima hosh ʋlhtoka hokʋno mihi yo̱ Chihowa nan isht im ai a̱hli, micha Chihowa nan isht im ahopoyuksa Klaist a̱ isht il im anumpohonlishke.

²⁵ Chihowa nan isht ik im ahobo yʋt hatak okʋno hopoyuksa kʋt i̱ shahli hoka; micha Chihowa yʋt isht ik a hlampko ahoba kia hatak okʋno hlampko kʋt i̱ shahli hoke.

²⁶ Itibapishi li ʋhleha ma! hʋchishno ʋto hʋchi ʋlhtoka hokʋto yakni pakna a hopoyuksa yʋt ik lauwo, nan isht ai a̱hli i̱shi kʋt ik lauwo, hatak holitompa aiena kʋt ik lauwo hosh ʋlhtoka ka hʋsh pisʋshke:

²⁷ Yohmi kʋt ilap hopoyuksa ya̱ hofahyala chi̱ kʋt Chihowa hʋt yakni ilʋppa nana ik ahobo puta ka atokoh hatuk; micha nana hlampko yʋmma hofahyala chi̱ kʋt yakni ilʋppa ik a hlampko yo̱ Chihowa hʋt atokoli hatuk:

²⁸ Mikmʋt nana kʋt yakni ilʋppa ik a holitopo, micha nana kʋt yʋmma ik ai ahobo aiena ka, Chihowa hʋt atokoli hatuk; a̱hli, yohmi kʋt nana a̱sha tuk a̱ akshocha chi̱ kʋt nana kʋt iksho ke tuk a̱ atokoli hatuk:

²⁹ Yohmi ho̱ hatak nana kia Chihowa itikba ya̱ ai ilauata he atuk keyu hoke.

³⁰ Yohmi kia hʋchishno ʋto yʋmmak atuk mak o̱ Klaist Chisʋs a̱ hʋsh ibai achʋfa ka yʋmmak o̱ Chihowa pulla kak o̱ isht pi a hopoyuksa, micha isht pi ai ʋlhpiesa, micha isht pi a kashofa, micha isht pi ai ʋlbi yoke:

³¹ Yohmi ka holisso hatuk oka, Kʋna kia ilauata hokmʋt, Chitokaka yak o̱ isht ik ilauatá.