1 Hlessalonian 5 - Chahta Holisso Holitopa 1886

Nan ʋhlpisa chinto nitak a̱ kaniohmit Klaist ʋt ʋla he anoli, 1; 12 nan im abʋchi, micha nana ka achukma he bano ho̱ ahnit, apesahanchi puta ka holitobla he i̱ miha; mihmʋt nan inla isht ai im anukfila he ʋhlpesa ka aieninchit achi.

¹ Yohmi kia itibapishi li ʋhleha ma! himak a pilla nitak nan a kaniohma he puta imma hokʋno isht hʋchi holis sochi la hi a̱ hʋsh ahna he keyushke.

² Chitokaka i̱ nitak ʋt hu̱kopa yosh ninak o̱ a̱ya ho̱ chohmit ʋla hi okʋno, hʋchishno ak inli kʋt hʋsh ithana fehna hoka.

³ Achukma bieka, tʋnʋp ʋt iksho, okla ahanchikma, yohmikmak o̱ yohma chi̱ ik ahno ta̱kla ho̱ na palʋmmi kʋt onʋtula kʋt, ohoyo ʋlla esha chi̱ kʋt nukhʋmi ka chiyuhma hi oka; mikma hlakofa he keyu hoke.

⁴ Yohmi kia itibapishi li ʋhleha ma! hu̱kopa yo̱ chohmit nitak yʋmmʋt hʋchi sakka chi̱ ka, ai okhlilika yo̱ hʋsh a̱ya keyushke.

⁵ Hʋsh moma kʋt atohwikeli ka im ʋlla hʋchia, micha nitak im ʋlla hʋchia hoke; ninak, micha ai okhlileka yo̱ pia keyu hoke.

⁶ Yʋmohmi ka inla yo̱ chohmit ik hʋpi nuso kashke; amba o̱kchʋt ahah! il ahnashke.

⁷ Kʋna hosh nusi hokʋto ninak ak o̱ nusi; mikma nan ishkot haksi hokʋto ninak ak o̱ haksi hoka.

⁸ Amba nitak o̱ pia hokʋto ahah! ahnit, na yimmi ikkishi alata, micha nan i̱ hullo ma isht hʋsh foyuka, micha noshkobo isht ompoholmo ai okcha̱ya pisa he ahni ya̱ il ieshashke.

⁹ Chihowa yʋt ai i̱ nukkilli yo̱ a pim apesa tok keyu, amba pin Chitokaka Chisʋs Klaist pulla ho̱ ai okcha̱ya il isha chi̱ hatok oka.

¹⁰ Yʋmmʋt pi ʋlhtobʋt illi tok, yohmi ka pi o̱kcha hokmá, pi nusi hokmá, nana kia iba takla il ahanta hi atok.

¹¹ Yʋmohmi hoka hʋsh yʋmohmi ak inli hatuk ʋt, it im anumpulit iti hopohlahanlit, hʋsh iti hlampkohonchashke.

¹² Micha itibapishi li ʋhleha ma! hʋchin toksahanlit, Chitokaka pulla ho̱ hʋchi pehliechit, ahah! hʋsh ahna he hʋchi anukfohki ya̱, hʋsh ithaiyana he;

¹³ Micha toksahanli pulla kak o̱ holitoblit hʋsh im anukfilli fehna hi a̱ e hʋchim asilhhʋshke. Micha hʋchishno bi̱ka hʋsh it i̱ kanashke.

¹⁴ Yohmi ka itibapishi li ʋhleha ma! ilapunla yʋt isht im ahleka hinla ka hʋsh im anoli, chu̱kʋsh ielli ma hʋsh hopohlahanlit, chu̱kʋsh ik hlampko hʋsh hlampkohonchit, hatak puta ka chu̱kʋsh isht hʋsh i̱ nuktaiyala he ak o̱ e hʋchi nukfohkishke.

¹⁵ Yohmi ka hʋsh ahni na kʋna kia nana ik achukmo ka nana ik achukmo mak inli ho̱ hatak nana kia ik i̱ yʋmihcho kashke; amba hʋchishno ak inli, micha hatak puta ka isht im achukma kak o̱ hʋsh iakaiya na biliashke.

¹⁶ Hʋchi yukpa na biliashke.

¹⁷ Anumpa ilbʋsha hʋsh anumpuli kʋt hʋch ik isso kashke.

¹⁸ Nana puta ka yak oke, hʋsh ai ahnashke; Klaist Chisʋs pulla kak o̱ Chihowa hʋt ilʋppa hʋchim ai ahni hoka.

¹⁹ Shilombish a̱ hʋsh mosholichi ná.

²⁰ Shilombish anukfoyukʋt anumpuli ka hʋsh shitilema ná.

²¹ Nana moma ka imomaka hʋsh pisashke; nana kʋt achukma ka kʋllochit hʋsh ieshashke.

²² Nana ik achukmo ahomba moma ka ik hʋchi ahalaio kashke.

²³ Mikma it i̱ nanaiya yʋt a mihinti Chihowa ak inli hosh ai oklu̱hʋchit hʋchi kashofashke; micha Chihowa ya̱ im asihi̱hla li kʋt, hʋchi shilombish, micha hʋchim anukfila, micha hʋchi haknip aiena kʋt anumpa onʋtula ikshochit hʋchi ieshit, pin Chitokaka Chisʋs Klaist ʋt ai ʋla hi a̱ hʋch isht onakbano ai ahni lishke.

²⁴ Nana miha kʋt ai a̱hlichi yosh hʋchi hoyo kʋt, yʋmmʋt yʋmihcha chi̱ ak inli hoke.

²⁵ Itibapishi li ʋhleha ma! anumpa ilbʋsha isht hʋsh pi anumpohonlashke.

²⁶ Hʋsh itibapishi puta ka su̱ksowa holitopa yo̱ isht hʋsh ai okpʋchashke.

²⁷ Chitokaka pulla ho̱ holisso ilʋppa il itibapishi holitopa ʋhleha ha̱ hʋsh im it anumpohonla he ak o̱ hʋchi̱ miha lishke.

²⁸ Pin Chitokaka Chisʋs Klaist nan isht i̱ kana yʋt hʋchi anukfoyukashke. Amen.