1 Hlessalonian 4 - Chahta Holisso Holitopa 1886

Chihowa anukfoyuka kʋt i̱ shahlit ma̱ha̱ya hi a̱ atohnohonchi, 1; 9 iti̱ hullo, 11 nuktanlʋt ilap nan isht ai ʋtta he tok akbano ho̱ ahni; 14 illit falamʋt tani, mikmʋt anonti Klaist ʋt minta hi a̱ isht anumpuli.

¹ Yʋmohmi ka anonti itibapishi li ʋhleha ma! Chitokaka Chisʋs puyulla ho̱ isht e hʋchim anumpohonli kʋt, yʋmmʋt kaniohmit a̱yʋt Chihowa ya̱ hʋsh yukpala hi osh hʋsh pi a haponaklo tok ʋt, yʋmohmit chitot isht i̱ shahli fehnʋt hʋsh ma̱ha̱ya he ak o̱ e hʋchim asilhhʋshke.

² Chitokaka Chisʋs pulla ho̱ anumpa ʋlhpisa nana ho̱ e hʋch ima tok a̱ hʋsh ithaiyana hokʋt.

³ Nan ashʋchi ik hʋchim iksho ilʋppak osh Chihowa im anukfila hoka, yʋmmʋt na haui hʋchik ahalaio ka he;

⁴ Micha hʋsh moyuma kʋt nan ashʋchi iksho, micha holitobli hosh, kaniohmit im ai ʋlhto ya̱ iesha he ʋt ithana hi ak oke.

⁵ Haknip nan ai ahni isht haui toba keyu hosh, Chentail ʋt Chihowa ik ithano ka ik chohmo kashke:

⁶ Hatak nana kia atablit itibapishi ha̱ nana hoh kia ik haksecho kashke; Chitokaka yʋt yʋmma chohmi ka im apesʋt na hotopa onocha he oka, yʋmma cha̱shpo ma ahah! hʋsh im ahna he, atokolit e hʋchim anoli tok.

⁷ Chihowa yʋt a liteha yo̱ a pi atokoli tok keyu, amba nan il ai ashʋchi iksho ka hi ak atuk oke.

⁸ Yʋmohmi ka kʋna kia shitilemakmʋt, hatak o̱ shitilema keyu, amba Chihowa yʋmmʋt ilap Shilombish Holitopa ya̱ pima tok ak oke.

⁹ Amba itibapishi it i̱ hulla he imma hokʋno isht hʋchi̱ holissochi la hi a̱ hʋsh ahna he keyu: hʋchishno ak inli hosh it i̱ hulla hi okʋto Chihowa yak o̱ hʋsh im ai ithʋna tuk oka.

¹⁰ Yohmi kʋt il itibapishi moma Masetonia moma ai asha ka hʋsh i̱ yʋmohmi mʋhli hoke: yohmi kia il itibapishi ʋhleha ma! isht i̱ shahlit hʋsh ma̱ha̱ya hi ak o̱ e hʋchim asilhhʋshke.

¹¹ Micha na fehna ahnit nuktaiyalʋt, nana ilap isht ai ʋtta he bieka ho̱ yʋmihchi, micha ilap ibbak ak inli ho̱ isht toksahanla hi ilʋppak o̱ e hʋchim apesa tok ak oke:

¹² Yʋmohmi hosh kocha a̱sha ka ai ʋlhpiesa ho̱ hʋsh i̱ yʋmohmi cha, nana kia ik hʋch im ono kʋt iksho kashke.

¹³ Yohmi kia itibapishi li ʋhleha ma! nusi ʋhleha ak okʋno hʋch ik im ithano ka he ahni li keyu, inla yʋt nana ai okcha̱ya pisa he ik ahno yo̱, chohmit ik hʋchi nukha̱klo ka he ak oke.

¹⁴ Chisʋs ʋt illi tuk osh falamʋt tani tok a̱ pi yimmi hokma, yʋmmak inli ho̱ chohmit kʋna hosh Chisʋs a̱ ibafoyukʋt nusi tok okʋno Chihowa hʋt iba tanicha hi oka.

¹⁵ Chihowa im anumpa pulla ho̱ ilʋppa e hʋchim achi hoka, yʋmmʋt Chisʋs ʋt ʋlakma, pishno ʋt pi okcha̱yʋt il a̱sha tuk ʋt, nusi tok a̱ il in ti̱kba he keyu hoke.

¹⁶ Chitokaka yʋt ilap ak inli hosh na shakapa, enchil i̱ mi̱ko im anumpa ola, micha Chihowa im isht pu̱fa chinto ohonla ho̱ a pehliechit ʋba mintit ʋla hi oka; mikma Klaist a̱ ibafoyukʋt illi tuk ʋt ti̱kba tana hi oke.

¹⁷ Yohmi mak inli ho̱ pi okcha̱yʋt il a̱sha kʋt, hoshonti ata̱ya shutik takla Chitokaka ya̱ il ai afama chi̱ ka, yʋmmak ash aieninchit pisht ia hi oke: yʋmohmi ho̱ Chitokaka takla ya̱ il a̱sha na bilia hi oke.

¹⁸ Yʋmohmi hoka, anumpa ilʋppa puta kak o̱ isht hʋsh it i̱ hopohlahanlashke.