1 Hlessalonian 2 - Chahta Holisso Holitopa 1886

Ʋbanumpa hʋt kaniohmit Hlessalonika ya̱ ai anuhumpa ma, kaniohmit okla aiokpʋchi tok a̱ anoli, 1; 18 pisa ka bʋnna fehna, yohmi kia nana hosh kaniohmi kak o̱ ik im ono kʋt anoli.

¹ Itibapishi li ʋhleha ma! hʋchishno ak kia kaniohmit e hʋch iba chukowa ma, yʋmmʋt pilla tok keyu ka, hʋsh ithaiyana hoka:

² Yohmi ka ti̱kba ka pilbʋsha, micha Filippi okla hʋt pi hofahyali aiena tok a̱ hʋsh ithaiyanʋshke; yohmi ha ya pin Chihowa pulla ho̱ a nukwa̱ya keyut, achunanchit a lushummit ʋbanumpa ha̱ isht e hʋchim anumpohonli tok.

³ Ʋbanumpa isht e hʋchim anumpohonli kʋt, anumpa yoshubli, micha chu̱kʋsh litehli, micha i̱ kostinit haksichi atok keyu hoka;

⁴ Amba Chihowa ak osh ʋlhpesa ahnit ʋbanumpa ha̱ pibbak fohki tok oka, yʋmohmit il anumpuli hoke: hatak ak o̱ e yukpali keyu, amba Chihowa pi chu̱kʋsh a̱ pi̱sa yak oke.

⁵ Micha nitak nan ash o̱ na fehnʋchit il anumpuli tuk keyu, nan isht ahayuchi bʋnna hosh, nan il ilahobi ha tuk keyu ka hʋsh ithana hoke: Chihowa mʋt pi̱sa yoke.

⁶ Micha hatak ak o̱ a holitopa e hoyo tuk keyu, hʋchishno, micha inla yak oh kia tok keyu, Klaist im apostel pia hʋt hʋchi̱ wekit na hʋch im a hoyocha he ʋlhpesa kia, e yʋmohmi tuk keyu.

⁷ Amba hʋchi ta̱kla il a̱shwa mʋt, ik kʋllot, ʋlla ilaueli ʋt ipetʋt hofantichi chatuk a̱ e chohmi tuk oke:

⁸ Yʋmohmi hosh hiahnit e hʋchi̱ palata fehna hokʋt, ʋlhpesa ahnit Chihowa im anumpa ak bano keyu, amba pimi shilombish ak kia aieninchit e hʋch ima hinla tuk, hʋsh pi̱ holitopa fehna hoka.

⁹ Itibapishi li ʋhleha ma! toksahanlit hoyʋblit pilbʋsha tok a̱ hʋsh ithana hoke; achʋfona kia e hʋchi̱ weka chi̱ keyu kʋt, ninak, micha nitak, aiena ka toksahanlit Chihowa im anumpa ha̱ isht e hʋchim anumpohonli tok.

¹⁰ Hʋchishno, micha Chihowa ak kia kaniohmit chu̱kʋsh kashofʋt ai ʋlhpiesa, micha anumpa onʋtula he iksho ho̱ na yimmi ʋhleha hʋchia ha̱ hʋchi takla il a̱shwa tok a̱ atokolit pi anoli hʋchia hoke.

¹¹ Atohnochit, micha hopohlʋlit i̱ki yosh im ʋlla im anumpuli ak inli ho̱ e chohmi tuk a̱ hʋsh ithaiyana,

¹² Yohmi hokʋt ʋba apehlichika holitopa ya̱ hʋsh esha chi̱ ka, Chihowa, yʋmmak osh hʋchi hoyo tuk a̱, hʋsh im ai a̱hla he ak atuk.

¹³ Chihowa im anumpa ha̱ hʋsh pi̱ haponaklo mʋt, im anumpa nana ho̱ chohmichit hʋsh ishi keyu kʋt, amba ai a̱hli hoka, Chihowa im anumpa hoke, yʋmmʋt na yimmi hʋchia puta ka ai a̱hlit hʋchi atahli tuk ilʋppa pulla aiena kak o̱ Chihowa ya̱ yak oke il im ahni kʋt, il issa keyu hoke.

¹⁴ Itibapishi li ʋhleha ma! hʋchishno ʋt Chihowa in chʋch puta Klaist ibafoyuka hosh Chutea aiasha ka, iakaiya hʋsh toba tuk oke; hʋchishno ak kia Chu okla hʋt yʋmihchi tok a̱, hʋchim okla hʋt chohmichit hʋch ilbʋshali tok oka:

¹⁵ Yʋmmʋt Chitokaka, micha ilap i̱ hopaii puta atuk ak kia ʋbi tok osh, pishno ma pilbʋshali tuk oke: mihmʋt Chihowa yo̱ yukpali keyu mʋt, hatak moma ka im inla hoke:

¹⁶ Il im anumpuli na Chentail ʋt okcha̱ya chi̱ ka pim alʋmmi hoke; ilap nan ashʋchi alotola chi̱ kak osh yʋmohmi bilia chatuk okʋt, nan isht i̱ nukkilli ʋt onʋtula kʋt ont im ai oklu̱ha hoke.

¹⁷ Yohmi ka itibapishi li ʋhleha ma! nitak ik hopako ka nashuka yokʋno hʋchi̱ filʋmmichit pi ai ishi tuk, chu̱kʋsh ak okʋno keyu, yʋmohmi ho̱ isht i̱ shahli fehnʋt hʋchi nashuka ya̱ pisa pi bʋnna fehna tuk oke.

¹⁸ Yʋmohmi kak osh himonna, micha a tukla foka ka e hʋchim ona he, Pal fehna sia hʋt ʋm anukfila tuk; yohmi tuk kia Setan ʋt pi ataklʋmmi tok.

¹⁹ Yohmi ka nanta hak o̱ il isha he il ahni ho̱? nanta hak o̱ isht pi aiyukpa yo̱? nanta kak osh pim iachuka isht pi aiyukpa yo̱? Pin Chitokaka Chisʋs Klaist ʋt ʋlakma itikba ya̱ hʋchishno yak a he keyu̱?

²⁰ Hʋchishno ak o̱ isht pi a holitopa, micha isht pi aiyukpa yoka.