1 Hlessalonian 1 - Chahta Holisso Holitopa 1886

Chʋch Hlessalonika a hikia ka ithanʋt ʋba isht anumpohonlit yak oke im ai ahni, 1; 5 mihmʋt Chihowa anukfoyuka a̱hli ahnit i̱ yimmi kʋt isht anumpuli.

¹ Pal, micha Silfanʋs, micha Timohliʋs aiena kʋt Hlessalonian chʋch I̱ki Chihowa, micha Chitokaka Chisʋs Klaist ibafoyuka ya̱ pit hʋchi aiokpʋchi kʋt, Pi̱ki Chihowa micha Chitokaka Chisʋs Klaist ita tuklo nan isht i̱ kana, micha nan isht it i̱ nanaiya ita tuklo kʋt hʋchi anukfoyukashke hʋchim ahnishke.

² Anumpa ilbʋsha il anumpulikmʋt, e hʋchi anohonlit, Chihowa ya̱ yak oke hʋsh moma ka isht e hʋchim aha̱ni hoke;

³ Pin Chitokaka Chisʋs Klaist ibafoyukʋt na hʋchi yimmi kʋt na hʋsh yʋmihchi, micha na hʋsh i̱ hullo aiena kʋt na hʋsh toksahanli, micha ai okcha̱ya pisa he ahnit nuktaiyalʋt hʋsh achunanchi aiena ka Chihowa Pi̱ki itikba ya̱ ithaiyanʋt e bilia hoke:

⁴ Micha itibapishi li ʋhleha ma! Chihowa i̱ holitopʋt im ai ʋlhtoka hʋchia ka il ithaiyana kak oke.

⁵ Pim ʋbanumpa hʋt anumpa illa hosh hʋchim a̱ya tok keyu, amba nan isht ai a̱hli, micha Shilombish Holitopa ai itibafoyuka aiena na na hʋchi yimmi fehna tok; yʋmohmit hʋchishno ak atuk mak o̱ kaniohmit hʋchi takla il a̱ya tok a̱ hʋsh ithaiyana ak inli hoka.

⁶ Yʋmohmi cha nan isht ai ilbʋsha la̱wa kia, Shilombish Holitopa ai yukpʋt ʋbanumpa ha̱ hʋsh aiokpʋchi cha, pish no, micha Chitokaka ya̱ im antia hʋsh toba tuk oke:

⁷ Yʋmohmi hokʋt na yimmi moma Masetonia, micha Akaia aiena ai asha kʋt im ai ithʋnʋt iakaiya hi o̱ hʋchia hoke.

⁸ Hʋchishno ak o̱ mʋhli ho̱ Chitokaka im anumpa annoa kʋt Masetonia, micha Akaia ak bano keyu, amba kanima moma kak kia, Chihowa hʋsh i̱ yimmi kʋt annoʋshke; yohmi ka pishno ʋt nana il acha he ʋlhpesa keyu hoke.

⁹ Micha yʋmma chohmi puta kak osh pi anoli kʋt, kaniohmit e hʋch iba chukowa tok; micha kaniohmit Chihowa a̱hli okcha̱ya ya̱ hʋsh im antia chi̱ hosh, na holba ya̱ i̱ filʋmmit Chihowa hʋsh im ona tuk a̱ anoli hoke.

¹⁰ Yohmi cha Ushi Chisʋs ʋt illi tuk a̱ falaminchit tanichi tok a̱, mihi yosh ʋba yakni minta chi̱ ka hʋsh hoho̱yo ka, yʋmmak osh nan isht i̱ nukkilli minti ka pi ahlakofichi tok mak oke.