1 Chan 4 - Chahta Holisso Holitopa 1886

Nan ithʋnanchi moma kak o̱ i yimma he keyu amba Chihowa im anumpa ho̱ isht imomaka pisa hi a̱ i̱ miha, 1; 7 nana hosh kaniohmi kak o̱ il it i̱ hulla hi a̱ lauachit nan isht miha.

¹ Holitopa ʋhleha ma! hopaii ilahobi lauʋt yakni a̱ atiapa hatuk oka, shilombish a̱ u̱hʋlinchit hʋchi yimmi na; amba Chihowa yak o̱ a minti hokma, nana tukmá, shilombish puta kash imomakachit hʋsh pisashke.

² Ilʋppak o̱ Chihowa im Shilombish a̱ isht hʋsh akostininchishke; shilombish ʋt, Chisʋs Klaist ʋt haknip a̱sha hosh ʋla tok a̱ atokoli hokʋto, Chihowa ak o̱ a minti bano hoke.

³ Mikma shilombish ʋt, Chisʋs Klaist ʋt haknip a̱sha hosh ʋla tok a̱ atokoli keyu hokʋto, Chihowa ak o̱ a minti keyu bano hoke; micha ilʋppak osh shilombish Klaist i̱ sanali, yʋmmʋt a̱ya hi a̱ hʋsh ha̱klo tok a̱, anonti himonasi kak kia yakni paknaka ya̱ aiasha ka mak oke.

⁴ Ʋlla chipunta ma! Chihowa ak o̱ immi hʋchia; yohmi hosh yʋmmak ash hʋsh imaiyachi tok; hʋchishno a̱ a hʋchi anukfoyuka kak osh yakni paknaka ya̱ anta kʋno i̱ shahli hatuk okʋt.

⁵ Yʋmmak ash ot yakni ak o̱ ai ibai achʋfa; yohmi hatuk osh yakni ak o̱ isht anumpuli ma, yakni ʋt i̱ haponakloshke.

⁶ Pishno ʋt Chihowa ak o̱ immi hʋpia hoke; kʋna hosh Chihowa ya̱ ithana hokmʋto, hʋpi̱ haponaklo: kʋna hosh Chihowa ya̱ immi keyu hokʋto, ik hʋpi̱ haponakloshke. Ilʋppak o̱ shilombish ai a̱hli, mikmʋt shilombish na yoshubli aiena ka isht il akostininchishke.

⁷ Holitopa ʋhleha ma! nan i̱ hullo ʋt Chihowa ak o̱ a minti hoka, iloh it i̱ hullashke: micha kʋna hosh i̱ hullo hokʋt moyumʋt Chihowa ak o̱ isht a toba; micha Chihowa ya̱ ithana mak oka.

⁸ Kʋna hosh nan ik i̱ hullokmʋt, Chihowa ya̱ ik ithano mak oke. Chihowa ak okʋto nan i̱ hullo mak oka.

⁹ Yʋmmak atuk mak o̱ pishno ʋt isht pi okcha̱ya hi a̱ Chihowa yʋt Ushi achʋfa illa yatuk a̱ yakni a̱ auet kanchi tok oka, ilʋppak o̱ Chihowa yʋt auet hʋpi̱ hullo ka isht ai otʋni tok oke.

¹⁰ Pishno ak osh Chihowa ya̱ il i̱ hullo tok o̱ keyu, amba ilap ak osh pishno a̱ pi̱ hullo cha, na pim ai ashʋchika yʋt isht ʋlhtoba hi a̱, Ushi a̱ auet kanchi tok ilʋppak osh nan i̱ hullo mak oke.

¹¹ Holitopa ʋhleha ma! Chihowa yʋt pi̱ hullo kʋt yak ohmi tok okma, pishno ak kia iloh it i̱ hulla he ʋlhpesa hoke.

¹² Hatak achʋfa kia nitak nan ash Chihowa ya̱ pisa tok keyushke. Pishno ʋt iloh it i̱ hullo hokma, Chihowa yʋt hʋpi anukfoyuka; yohmikma yʋmma il i̱ hullo kʋt ai a̱hli mak oke.

¹³ Yʋmmak okʋt imi Shilombish a̱ ai isht pima tok oka, pishno ʋt yʋmma il ibai achʋfakma, anonti ilap mʋt pibai achʋfa ka ilʋppak o̱ isht il ai akostininchi hoke.

¹⁴ Micha pishno ʋt e pihi̱sa mak osh yakni a̱ okchalinchi a he I̱ki ʋt Ushi a̱ auet kanchi tok a̱ atokowa il anohonlishke.

¹⁵ Kʋna hosh Chisʋs ʋt Chihowa ya̱ Ushi yoke, achi hoka, Chihowa ak osh yʋmma anukfoyuka ma, anonti ilap mʋt Chihowa ya̱ anukfoyuka hoke.

¹⁶ Mikmʋt pishno a̱ Chihowa ʋt pi̱ hullo ka il akostininchi, micha pi yimmi aiena tok. Chihowa ʋt nan i̱ hullo hoke: yohmi ka kʋna hosh nan i̱ hullot ahanta hokʋt, Chihowa ak o̱ ai ib anukfoyukakma, anonti Chihowa mʋt ilap a̱ ai ib anukfoyuka hoke.

¹⁷ Nan ʋlhpisa nitak fehnakma pi nukwa̱ya iksho ka he ʋt ilʋppak o̱ nan il i̱ hullo kʋt isht ai a̱hli hoke: ilap ʋt kaniohmi ka, pishno mʋt yʋmmak inli ho̱ chohmi hosh yakni ilʋppa il a̱sha hokʋt.

¹⁸ Nan i̱ hullo ka nukshopa hʋt iksho hoke; amba nan i̱ hullo a̱hlika yʋt nukshopa ha̱ kohchit kanchi yoke; na nukshopa hʋt issikkopali yoka. Kʋna hosh nukshompa hokʋto nan i̱ hullo kʋt ai a̱hli ho̱ keyu mak oke.

¹⁹ Ilap ak osh ti̱kba pi̱ hullo tok oka, pishno ʋt yʋmma il i̱ hulloshke.

²⁰ Hatak ʋt Chihowa ya̱ i hullo li, achi hosh anonti itibapishi ha̱ i̱ nukkilli hokmʋt, yʋmmʋt holabi yoke. Itibapishi ha̱ pi̱sa kʋt ik i̱ hullo kʋto, anonti katiohmi hosh Chihowa pisa chatuk keyu kʋt yʋmma i̱ hulla hinla cho?

²¹ Kʋna hosh Chihowa ya̱ i̱ hullo hokʋto, itibapishi ma i̱ hullo ak inla he anumpa ʋlhpisa ilʋppa yʋmmak osh pima tok oke.