1 Chan 3 - Chahta Holisso Holitopa 1886

Chihowa yʋt ilap ushi yo̱ pihi̱kbi kʋt pi̱ hullo fehna, 1; 3 yʋmohmi hoka i̱ nan ʋlhpisa ya̱ e holitobla he tuk; 11 il iti̱ hulla he tuk.

¹ Chihowa ushi ʋhleha hʋpi hohchifa hi a̱ Pi̱ki ʋt nan i̱ hullo kʋt a kaniohmit hʋp i̱ hullo tok a̱ ho pesá: yohmi hatuk o̱ yakni ʋt pishno a̱ ik hʋp ithano; yʋmma ik ithano tok okʋt.

² Holitopa ʋhleha ma! himak okʋno Chihowa ushi hʋpia, yohmi kia e kaniohma hi a̱ himonasi kano ik otano ki̱shʋshke; amba yʋmmak osh ant haiakakma, pishno ʋt yʋmmak o̱ e holba hi ʋt il ithana, yʋmmʋt kaniohmi hatuk ma e pisa hi okʋt.

³ Yʋmma anukchieto hosh si yakohma he ahnit, yʋmmak ash ot kashofa achukma yatuk a̱ chiyuhmit momʋt ile kashofi hoke.

⁴ Kʋna hosh nana ashʋchi kʋt anumpa ʋlhpisa ma kobʋffi hoke: nan ai ashʋchika yak osh anumpa ʋlhpisa ya̱ kobʋffi hoka.

⁵ Yohmi ka yʋmmak okʋt pim ai ashʋchika ya̱ isht hʋpi̱ kancha chi̱ mak osh ant haiaka tok a̱ hʋsh ithana; micha yʋmma ai ashʋchika nana hosh atakali keyushke.

⁶ Kʋna hosh yʋmma ai iba foyuka hokʋto ashahanchi chatuk keyu; kʋna hosh ashahanchikmʋt, yʋmma pisa tuk keyukmʋt, anonti ithana tuk keyu aiena mak oke.

⁷ Ʋlla chipunta ma! hatak nana kia ik hʋchi yoshublo kashke: kʋna hosh nan ai ʋlhpiesa ya̱ a yʋmohmi hosh ahantakmʋt, ai ʋlhpiesa kʋt, yʋmmʋt ai ʋlhpiesa yatuk a̱, chohmi mak oke.

⁸ Kʋna hosh ashahanchi kʋt Setan ak o̱ ibai achʋfa mak oke: Setan ak okʋt ʋmmona mak inli ho̱ ashʋchit isht auehinchi tok oka. Setan ʋt nan ai isht ʋtta tok puta ka okpʋna chi̱ pulla kak osh Chihowa Ushi ʋt ant haiaka tok.

⁹ Kʋna hosh Chihowa ak o̱ isht a toba hokʋto ashahanchi chatuk keyu: yʋmma i̱ na nihi ʋt anukfoyuka hatuk o̱; micha yʋmmak okʋt Chihowa ak o̱ isht a toba hatuk okʋt, ashahancha he keyu hoke.

¹⁰ Ilʋppak o̱ Chihowa im ʋlla ʋhleha, mikmʋt Setan im ʋlla ʋhleha aiena kʋt isht ai otʋni hoke: kʋna hosh nan ai ʋlhpiesa ya̱ a yʋmohmi keyu, mikmʋt itibapishi ha̱ ik i̱ hullo aiena kʋt, Chihowa ak o̱ ai ibai achʋfa ho̱ keyu hoke.

¹¹ Iloh it i̱ hulla he anumpa ilʋppak o̱ ʋmmona mak inli ho̱ hʋsh haha̱klo tok.

¹² Nan okpulo a̱ ai ibai achʋfa cha, itibapishi ha̱ ʋbi tok Ken ak okʋno ke chohmo kashke. Micha nanta katiohmi ho̱ yʋmma ʋbi tok o̱? Ilapo nana a kaniohmi kʋto ai ʋlhpiesa keyu ma, itibapishi hʋto ai ʋlhpiesa kak a tok oke.

¹³ Itibapishi li ʋhleha ma! yakni ʋt hʋchi̱ nukkilli hokma, ik hʋchi nukhlakancho kashke.

¹⁴ Il itibapishi ʋhleha ha̱ il i̱ hullo hatuk osh, ai illika ya̱ a kohchʋt ai okcha̱ya ya̱ il ona kʋt il ithanʋshke. Kʋna hosh itibapishi ha̱ i̱ hullo keyu hokʋto, ai illika yo̱ anta hoke.

¹⁵ Kʋna hosh itibapishi ha̱ i̱ nukkilli kʋt, hatak ʋbi yoke: yohmi ka hatak ʋbi nana hak osh okcha̱yʋt bilia yʋt anukfoyuka keyu ka hʋsh ithanʋshke.

¹⁶ Pishno pulla hatuk mak o̱ ilap im ilhfiopak a̱ isht pi atobbi tok a̱ ilʋppa fehna ak o̱ Chihowa ʋt pi̱ hullo ka, isht il akostininchishke: yohmi ka pishno ʋt il itibapishi ʋhleha ha̱ pim ilhfiopak a̱ isht il atobba he ʋlhpesa hoke.

¹⁷ Amba kʋna hosh yakni ilʋppa nana isht il ai yʋkpa ʋt im a̱sha; yohmi hosh itibapishi hʋt ilbʋsha ho̱ pisa kʋt, yʋmmak ash i̱ nukha̱klo iksho; yohmikma Chihowa i̱ hullo kʋto katiohmit yʋmma anukfoyuka hinla cho?

¹⁸ Ʋm ʋlla chipunta ma! anumpa, micha isunlʋsh aiena kak bano ho̱ ishit kiloh it i̱ hullo kashke; amba nan isht ahanta, micha ai a̱hli mak ashke.

¹⁹ Micha ilʋppak o̱ nan ai a̱hli ka ya̱ il ibai achʋfa kʋt isht il akostininchi; mikmʋt pi chu̱kʋsh a̱ nuktalanlit itikba ya̱ il a̱sha hi oke.

²⁰ Pi chu̱kʋsh ʋt isht pi atokoli hokma, Chihowa ho kak heto pi chu̱kʋsh a̱ i̱ shahli, micha nana moma ka ithana hoke.

²¹ Holitopa ʋhleha ma! pi chu̱kʋsh ʋt isht pi atokoli keyu hokmʋno, Chihowa ya̱ il ai nanaiya mak oke.

²² Micha im anumpa ʋlhpisa ya̱ e holitobli, mikmʋt nana ka ilapʋt ai ahninchi ak o̱ a pi yʋmohmi aiena hatuk osh, nana ho̱ il asilhha kʋt, yʋmma il ai i̱ habena chatuk oke.

²³ Yohmi kʋt yʋmmak a hi o̱, anumpa ʋlhpisa ha̱ pima tok oka, Ushi Chisʋs Klaist hohchifo ha̱ pi yimmi cha, it i̱ hulla he aiena ilʋppak osh im anumpa ʋlhpisa mak oke.

²⁴ Micha kʋna hosh im anumpa ʋlhpisa ya̱ holitobli kʋt, yʋmmak o̱ ai ib achʋfakma, ilap mʋt yʋmma ai ibai achʋfa hoke: micha yʋmmʋt a pi nukfoyuka kʋt, yʋmmʋt Shilombish pima tok ilʋppak o̱ isht il akostininchi hoke.