1 Chan 2 - Chahta Holisso Holitopa 1886

Klaist ʋt pi a pelʋt isht pi anumpuli, 1; 3 ai ahlit Chihowa ya̱ ithana hokʋto im anumpa ʋlhpisa ya̱ holitobli hoke. 9 Pitibapishi ha̱ il oh i̱ hullashke; 15 yohmikmʋt yakni imma hokʋno keyu kashke; 18 na yoshubli a̱ ahah! il im ahnashke.

¹ Ʋm ʋlla chipunta ʋhleha ma! hʋch ik ashʋcho ka chi̱ mak o̱, ilʋppa puta ka pit hʋchi̱ holissochi lishke. Micha hatak nana hosh ashʋchi hokma, isht anumpuli ʋt Chisʋs Klaist achukma yʋt I̱ki a̱ itikba pim anta hoke.

² Yʋmmak osh na pim ai ashʋchika ya̱, ʋlhtoba kʋt pishno pimmi hak bano keyu, amba yakni moma nan ashʋchi aiena ka oklu̱ha ʋlhtoba mak oke.

³ Micha im anumpa ʋlhpisa yak o̱ e holitobli hok mak osh, yʋmma il ithaiyana ho mʋhli kʋt isht il akostininchi hoke.

⁴ Kʋna hosh yʋmma ithana li, achi hosh, anonti im anumpa ʋlhpisa ya̱ holitobli keyu hokʋto, holabi; micha nan ai a̱hlika yʋt anukfoyuka keyu mak oke.

⁵ Amba kʋna hosh yʋmma im anumpa ha̱ holitobli hokʋto, mihi yosh Chihowa ya̱ i hullo ai a̱hli fehna hoke. Ilʋppak o̱ yʋmma il ibai achʋfa kʋt isht il akostininchi hoke.

⁶ Kʋna hosh yʋmmak oka ai iba foyuka, miha hokʋto, ilap mak kia, yʋmmʋt kaniohmit a̱ya tok mak o̱, a chohmit a̱ya he tuk oke.

⁷ Itibapishi li ʋhleha ma! anumpa ʋlhpisa himona nana ho̱ pit hʋchi̱ holissochi li keyu; amba anumpa ʋlhpisa sipokni ʋmmona kash inli ho̱ hʋchin tonlʋt isht auehinchi tok ash oke. Anumpa ʋlhpisa sipokni ʋt anumpa ʋmmona kash inli ho̱ haklot isht hʋsh auehinchi tok ak oke.

⁸ Ai okhlilika yʋto ant ia ma, himak okʋno tohwikeli a̱hli mak osh tommi hoka, anonti anumpa ʋlhpisa himona, yʋmmak okʋt ilapo, micha hʋchishno aiena hokʋno a̱hli mak o̱ pit hʋchi̱ holissochi lishke.

⁹ Kʋna hosh atohwikelika yo̱ anta li, achi cha, itibapishi ha̱ i̱ nukkilli kʋt, himonasi ak kia ai okhlilika yo̱ a̱ya moma hoke.

¹⁰ Kʋna hosh itibapishi ha̱ i̱ hullo hokʋto, mihi yosh atohwikelika yo̱ ahanta; yohmi cha kaniohmit ai ibetʋbla hi ʋt ik im iksho mak oke.

¹¹ Amba kʋna hosh itibapishi ha̱ i̱ nukkilli hokʋto, ai okhlilika yo̱ ahanta cha, ai okhlilika yo̱ noho̱wa; yohmi ma okhlilika kʋt nishkin a̱ tʋmmoli hatuk o̱, kanima yo̱ ia kʋt ithana keyu hoke.

¹² Ʋlla chipunta hʋchia ma! yʋmma hohchifo pulla ho̱ na hʋchim ai ashʋchika yʋt isht a hʋchi kashofa hatuk oka, pit hʋchi̱ holissochi lishke.

¹³ I̱ki hʋchia ma! ʋmmona makinli ho̱ ahanta tok yʋmmak ash hʋsh ithaiyana hatuk oka, pit hʋchi̱ holissochi lishke. Hatak himita hʋchia ma! nan okpulo atukma hʋsh imaiyachi hatuk oka, pit hʋchi̱ holissochi lishke. Ʋlla chipunta hʋchia ma! I̱ki a̱ hʋsh ithaiyana hatuk oka, pit hʋchi̱ holissochi lishke.

¹⁴ I̱ki hʋchia ma! ʋmmona makinli ho̱ ahanta tok yʋmmak ash hʋsh ithaiyana hatuk oka, pit hʋchi̱ holissochi li tuk oke. Hatak himita hʋchia ma! hʋsh hlampko, yohmi ma Chihowa, im anumpa hʋt a hʋchi anukfoyuka, micha nan okpulo atukma hʋsh imaiyachi aiena hatuk oka, pit hʋchi̱ holissochi̱ li tuk oke.

¹⁵ Yakni a̱, micha nana kʋt yakni paknaka a̱sha ka hʋch ik i̱ hullo kashke. Hatak nana hosh yakni a̱ i̱ hullo hokma, I̱ki i̱ hullo kʋt yʋmma anukfoyuka keyu hoke.

¹⁶ Yakni a̱sha kʋto moma, haknip nan isht anushkunna, micha nishkin nan isht anushkunna, mikmʋt yakni pakna nan ai isht ilefehnʋchi aiena kʋt I̱ki ak o̱ a minti ho̱ keyu; amba yakni ak o̱ a minti hoke.

¹⁷ Micha yakni ʋt, mikmʋt nan ai isht anushkunna aiena hokʋto, ant a̱yʋt kʋnihi̱ya hoke; amba Chihowa nan aiahni yak o̱ a yʋmohmi hosh ahanta hokʋto, antʋt bilia hoke.

¹⁸ Ʋlla chipunta ma! ai ishtaiyopi mak oke: yohmi ka Klaist im asanali ʋt a̱ya hi oka, hʋsh haklo tok mak o̱, himonasi ak kia Klaist im asanali ʋt lauʋt aiasha; yohmi ho̱ ont ai ishtaiyopi ka isht il akostininchishke.

¹⁹ Yʋmmak ash ot a pi̱ filʋmmit kocha wiha tok; yohmi kia yʋmmʋt a hʋpibai achʋfa tok o̱ keyu hoke; yʋmmʋt pishno ak o̱ a hʋpibai achʋfa tok okmʋt, a hʋpibai afo̱ka na bilia he tuk pulla chishke: amba yʋmmʋt moma kak osh a hʋpibai achʋfa ho̱ keyu hatuk ʋt otʋna chi̱ kak osh a hʋpi̱ filʋmmit kocha wiha tok oke.

²⁰ Amba hʋchishno yokʋto Shilombish Holitopa ak o̱ hʋsh im ai ahama tuk osh nan oklu̱ha ka hʋsh ithanʋshke.

²¹ Nan ai a̱hlika ya̱ hʋch ik ithano hatuk o̱, pit hʋchi̱ holissochi li ho̱ keyu, amba yʋmma micha holabi hʋt achʋfona kia nan ai a̱hlika ya̱ ahalaia keyu aiena ka hʋsh ithana kak atuk oke.

²² Kʋta hosh holabi yo̱? amba Chisʋs ak osh Klaist mak atuk a̱ keyu achi kak oke. I̱ki micha Ushi aiena ka i̱ yimmi keyukmʋt, yʋmmak osh Klaist im asanali mak oke.

²³ Kʋna hosh Ushi a̱ i̱ yimmi keyukmʋt, yʋmmak osh I̱ki a̱ pit ahalaia keyu mak oke; amba Ushi a̱ i̱ yimmi hokʋto I̱ki a̱ ib ahalaia ak inli hoke.

²⁴ Yohmi hoka nana ka hʋsh haklo ʋmmona tok yʋmmʋt a hʋchi anukfoyukashke. Nana ka hʋsh haklo ʋmmona tok yʋmmʋt a hʋchi anukfoyuka hokma, hʋchishno mʋt Ushi, mikmʋt I̱ki aiena ka hʋsh ai ibafoyuka hi oke.

²⁵ Micha nana miha kʋt ai okcha̱ya bilia ilʋppak o̱ pim issa tok oke.

²⁶ Na hʋchi yoshubli ʋhleha ha̱ ai immʋchi kʋt yakohmi kak o̱ pit hʋchi̱ holissochi li tuk oke.

²⁷ Amba yʋmma nana hʋsh ai im ahama tuk amo a hʋchi anukfoyuka; yohmi ka hatak osh nana hʋchim abʋcha he hʋsh ahni ka̱ keyu; amba nan ahama yʋmmak ash inli kak osh nana moma ka a hʋchim abʋchi kʋt ai a̱hli, holabi keyu; yohmi ka na hʋchim abʋchi tuk ash fehna ka yʋmma hʋsh ai ibafoyuka hi oke.

²⁸ Yohmi ka inta! ʋlla chipunta ma! yʋmmak o̱ hʋsh ai iba foyukashke; yohmi tuk o̱ yʋmmak ash ot ant haiakakma, il anukcheto cha, mihintikma itikba ma a ik pi hofahyo kashke.

²⁹ Yʋmmak okʋt ai ʋlhpiesa yo̱ hʋsh akostininchi hokmʋt, ai ʋlhpiesa ho̱ a yʋmohmi hokʋto, momʋt yʋmmak o̱ isht a toba yo̱ hʋsh akostininchishke.