1 Chan 1 - Chahta Holisso Holitopa 1886

Klaist a̱ isht anumpuli, mihmʋt yʋmma anonti Iki itatuklo ka ibachʋ fʋt nan im anukfila he miha, 1; 5 nan ib achʋfa ilʋppa yakohmi kʋt nan isht il aiyukpa hokmʋt, atohwekinli ka il ai itanowa he; 9 mikmʋt na pim ai ashʋchika puta ka il il anohonlikma, pi̱ kashofa hinla.

¹ Ai okcha̱ya anumpa yʋmmak osh ʋmmona ka ahanta tok mak o̱ e haha̱klot, pi nishkin a̱ isht e pihi̱sʋt, il o̱ hopo̱koho̱yo tok, micha pibbak ʋt pʋshohonli tok mih mak oke.

² Ai okcha̱ya yʋmmʋt haiaka na e pihi̱sa tuk osh atokowa anolit, Ai okcha̱ya bilia yʋmmʋt I̱ki a̱ takla ahanta chatuk mak osh, ant pi̱ haiaka tok a̱ e hʋchim anoli hoke.

³ Hʋchishno mʋt hʋsh pibai achʋfa he mak o̱, nana ka e pihi̱sa tuk, micha e haha̱klo tuk aiena kʋt e hʋchim anoli hoke: yohmi kʋt pishno ʋt I̱ki, micha Ushi Chisʋs Klaist aiena kak o̱ il ibai achʋfa mʋhli hoke.

⁴ Mikmʋt nana a hʋchi yukpʋt alotowa he mak o̱, yakohmi ka pit e hʋchi̱ holissochishke.

⁵ Yohmi ka Chihowa yʋt tohwikelika, micha yʋmma okhlilika yʋt atakali iksho kʋmohmi aiena ilʋppak o̱ anumpa yʋmma il ai i̱ haponaklo tuk mak osh e hʋchim anolishke.

⁶ Yʋmmak oka pit il ibai achʋfa, il achi hosh, anonti ai okhlilika yo̱ il itʋnowa hokmʋt, e holabi; micha nan ai a̱hlika mʋno a pi yʋmohmi keyu hoke.

⁷ Amba yʋmmak okʋt atohwikelika yo̱ anta hoka, pishno ʋt atohwikelika yo̱ il itʋnowa hokmʋto, iloh it ibai achʋfa. Yohmikma Ushi Chisʋs Klaist im issish ʋt nan ai ashʋchika ya̱ mominchit a hʋpi kashofi hoke.

⁸ Nan ai ashʋchika yʋt ik pim iksho, il achi hokmʋt, peh il ile haksichi: micha nan ai a̱hlika yʋt pi anukfoyuka keyu mak oke.

⁹ Na pim ai ashʋchika ya̱ il il im anohonli hokma, yʋmmak okʋt ai a̱hli achukmʋt, ai ʋlhpiesa hatuk osh na pim ai ashʋchika ya̱ pi̱ kanʋllichi; micha nan ik ai ʋlhpeso ka mominchit pi̱ kashofa hinla hoke.

¹⁰ Nana il ai ashʋchika chatuk keyu, il achi hokmʋt, yʋmmak oka holabi il ikbi; mikma im anumpa hʋt pi anukfoyuka keyu mak oke.