तीतस् 1 - चेपाङतितसकाय पावलको अभिबादन 1 इ चिथिखे परमेस्वरको सेवक अथबा येसु ख्रिस्तको खबरदुत ङा पावलको तर्फसय खेना। परमेस्वरइ छ्युह्ङ्सास्यावो मान्तालम गतहाइति परमेस्वरकहाङ बिस्वासिलो स्याउति मुसा परना, र गतहाइति परमेस्वर झाक्तो स्याउति याक्सा परना त दाह्यो सत्य कुरा ओउमयकाय चिःताक्साको लागि सहयोग जाह्ङ्लाङ परमेस्वरइ ङाकाय ल्होक्सास्यावो खेना। 2 इ सत्यइखे गलमा स्याताहा कुरा नोःसा स्याउमालो परमेस्वरइ सङ्सारको स्रिस्ति जाह्ङ्सा भन्दा ङ्हाखाले बाचा जाह्ङ्सास्यावो अजम्बरि रुवाङ दोःसाको लागि आसा गम्सा सहयोग जाह्ङ्लेनउ। 3 र देङेखे, मान्तालमइ लयको पेओ खबर चिःपानानि त दाह्य्ति परमेस्वरइ सहि समयहाङले निर्नय जाह्ङ्सास्यावा। ओउ आखर घोसना जाह्ङ्सा अधिकारखे परमेस्वरइ बिस्वास दुवारा ङाकाय सुम्पति बइसास्यावा, र निको मुक्तिदाता परमेस्वरइ आग्या जाह्ङ्सास्यावो अनुसारले ङाइ ओउ पेओ खबरको प्रचार जाह्ङ्नाङ। 4 तितस, निचिइ जाह्ङो बिस्वासखे यातज्योले खेओझ्यान्ते, ओउ बिस्वासहाङ नाङ ङाको लयको चोः लेखाले खेतेना। परमेस्वर आपा र निको मुक्तिदाता ख्रिस्त येसुइ नाङकाय अनुग्रह र धोमायो बइतेपाना। क्रेत तापुहाङ तितसको काम 5 निइ पुरा जाह्ङ्सा भ्याधाङ्मालो कामलम पुरा जाह्ङ्सा र ङाइ नाङकाय अर्थि बयो अनुसार जुदा सहरलमहाङ मन्दलिको अगुवालम छ्युह्ङ्साको लागि ङाइ नाङकाय क्रेत तापुहाङ फेति गमो खेङतो। 6 मन्दलिको अगुवाखे सुइमा गाल बइसा खाइमातो स्याउसा परना। ओउखे यातयज्यो मात्र माचाको पाचा स्याउसा परना, र ओउको चोः चोःद्याङलमखे लयको रुवाङ मोजमज्जा जाह्ङ्ति हुतो, अनुसासन नाःमालो खेमात प्रभुहाङ बिस्वास जाह्ङो स्याउसा परना। 7 धइतिदाह्य्सा मन्दलिको अगुवाखे परमेस्वरको काम जाह्ङो मान्ता स्यावोझ्यान्ते सुइमा पेमालो गाल बइसा खाइमातो स्याउसा परना। ओउखे ङाःरेउ अथबा रेह्न्तो रिस वाङो मान्ता स्याउसा स्याउल, अनि ओउ नाःतो ङोतिः तुङो अथबा कायकायो काम जाह्ङो अथबा धन-सम्पतिको लोभ जाह्ङो मान्तामा स्याउसा स्याउल। 8 बरु ओउखे पाहुनालमको सेवा-सत्कार जाह्ङो र पेओ कुराकाय मात्र झाको मान्ता स्याउसा परना। अनि ओउखे लयको मन र रुवाङकाय अनुसासनहाङ गम्साखायो, धर्मि र पबित्र मान्ता स्याउसा परना। 9 मन्दलिको अगुवाखे निइ स्यानो परमेस्वरको सत्य स्यानरायकाय पेतोकुसि बिस्वास जाह्ङ्ति मुसाखायो मान्ता स्याउसा परना। ओउतखेयाकाय मात्र ओउ, अरु मान्तालमकाय सत्य कुरा तोति हउसला बइसा, र सत्य आखरको बिरोतहाङ नोःओ मान्तालमकाय निङ स्याताहा खेतेनय त दाह्य्ति तोसा ज्योतो स्याउना। 10 धइतिदाह्य्सा ओहाङपाय अरुइ तोओ कुराकाय ग्यामालो, गेमालो कुरालमहाङ अनाबस्यक बहस जाह्ङो, र अरुकाय धोका बयो नाःतो मान्तालम मुनय। ओउमयखे बिसेस जाह्ङ्ति यहुदि नेम-कानुन अनुसार जुदा बिस्वासिलमइ खतना जाह्ङ्साले परना त दाह्यो समुहको मान्तालम खेनय। 11 तर नाङइखे ओउमयकाय ङइमात मुताक्सा परलेना, धइतिदाह्य्सा स्यान्साले स्याउमालो स्याताहा कुरालम स्यान्ति किमको जुदा माचरलमकाय ओउमयइ सत्य स्यानराय फेति ओउमयको स्याताहा स्यानरायहाङ बिस्वास जाह्ङ्ताको मुना। अनि ओउमयइखे थेपोको लागि मात्र ओउत जाह्ङो खेनय। 12 इखे यातपल्त ओउमयको अगमबक्तालम मध्येको यातचाकइ तोओलेखाले खेना, “क्रेत तापुको मान्तालम सधय स्याताहा नोःनय। ओउमयइ बन पसुलम लेखा बेबहार जाह्ङ्नानि, र ओउमय काम जाह्ङ्सा अल्सि ताःनय, तर जेःगाखे जेःनानि।” 13 ओउ क्रेतको अगमबक्ताइ तोओ तोरायखे सत्यले खेना। ओउतझ्यान्ते ओउ क्रेतको मान्तालमकाय माहा जोक्तो जान्ति तोउ, र ओउतस्याउतोक बेलाहाङ ओउमयकाय बिस्वासहाङ पेतो स्याउताक्साकाय नाङइ सहयोग जाह्ङ्सा खाइतेपनउ। 14 ओउमयइ यहुदिलमको स्याताहा विनरायलम साइसा र सत्यकाय फेति पाह्यो मान्तालमइ जाह्ङो आग्यालम पालन जाह्ङ्सा फेपानानि। 15 सुद्ध ल्हुङतुक नाःओ मान्तालमको लागिखे जुदा थोकले सुद्ध स्याउलेना। तर भ्रस्त र अबिस्वासिलमको लागिखे दोह थोकमा सुद्ध स्याउलेल, धइतिदाह्य्सा ओउमयको मन, र पेओ र पेमालो चिःओ ग्यानले भ्रस्त स्याउतिखायो स्याउना। 16 ओउतताह्ङो मान्तालमखे निइ परमेस्वरकाय चिःओ मुनाङ्सु त दाह्य्तिले नोःनय, तर ओउमयइ जाह्ङो कामलम दुवाराखे ओउमयइ परमेस्वरकाय चिःओ नाःइलि त दाह्य्ति चिःसा खाइना। ओउमय माहा पेमातो स्याउनय, र ओउमयइ परमेस्वरको आग्या पालन जाह्ङ्साकाय इन्कार जाह्ङ्नानि। अनि ओउमय पेओ काम जाह्ङ्साको लागि ज्योतो स्याविलि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.