मर्कस् 14 - चेपाङयेसुकाय सात्सा जालसाजि ( मति २६:१-५ ; लुका २२:१-२ ; युहन्ना ११:४५-५३ ) 1 छुत्काराको छ्यात र खमिर कामालो लाङको छ्यात दाह्सासय निस दिन ङ्हा, मुख्य पुजारिलम र धर्मगुरुलमइ येसुकाय सुइमा चिःमातो सुतुक्त पक्रआक्तिको सात्साकाय मउका बोःङ्धय खेइतो। 2 तर ओउमय एत दाह्याकाय, “निइ इ काम छुत्काराको छ्यातको बेलाहाङ जाह्ङ्सास्याउल, धइतिदाह्य्सा मान्तालमइ उपद्र जाह्ङ्सा खाइनानि।” येसुकाय बेथानियाहाङ अभिसेक जाह्ङो ( मति २६:६-१३ ; युहन्ना १२:१-८ ) 3 जब येसु बेथानिया गाउहाङ कुनय समय कोह्र्चाइ ङाःयो यातचाक सिमोन त मय्ङ्ओ मान्ताको किमहाङ जेःगा जेःसास्याउधय खेतो, ओउबेलाहाङले यातचाक मोम्चो यातज्यो सिमबाङ ब्लिङतो म्हक-म्हक त बासना वाङो अत्तर लात्ति ओहाङ दाह्तिवाङा। ओउ महङ्गो अत्तरखे जतामसि त तोओ सुद्ध बोतसय जाह्ङो खेतो। ओउ मोम्चोइ ओउ सिमबाङ फोल्ति म्हक-म्हक त बासना वाङो अत्तर येसुको तालाङहाङ ल्यान्ति बयाकान। 4 ओहाङ मुओ केहि मान्तालमखे रिस वाङ्ति लयमय एतदाह्य्ति नोःकायाकाय, “इ मोम्चोइ उच्युक महङ्गो अत्तर धइति खेरो वायो खेचा? 5 इ अत्तर विःन्याकाय सुम सय चान्दिको ध्याक भन्दामा नाःतो वाङ्चा खेतो र ओउ थेपो गरिबलमकाय वेःति बइसा खाइचा खेतो।” ओहाङसयको ओउमयइ ओउ मोम्चोकाय जान्सा फाःङाकानि। 6 तर येसुइ तोसास्यावा, “ओउकाय जान्लाम! निङ धइति ओउकाय सताउधय मुतेनय? ओउइ ङाको लागि माहा पेओ काम जाह्ङो मुना। 7 दोहमा नाःमालो गरिब मान्तालमपाय निङकुस सधयले स्याउनय, र निङ झाको गाउ बेलाहाङ खेयाकायमा निङइ ओउमयकाय सहयोग जाह्ङ्सा खाइतेनानि। तर ङाखेपाय निङकुस सधयभरि ब्रक्त स्याउलेङल। 8 इ मोम्चोइ लयइ जाह्ङ्सा खायोसम्मले जाह्ङाकान। इ मोम्चोइ तेसहाङ पाह्म्सासय ङ्हाले ङाको ज्यानकाय म्हक-म्हक त बासना वाङो अत्तर ल्यान्ति तयार जाह्ङो मुना। 9 दोङ्सिले ङाइ निङकाय तोनेनाङ्स, पेओ खबर प्रचार स्यावो सङ्सारभरिको जुदा थाउहाङ, इ मोम्चोको सम्झना स्याउलेना, र ओउइ जाह्ङो कामको बारेहाङ तोलेना।” येसुकाय धोका बइसा यहुदाको सहमत ( मति २६:१४-१६ ; लुका २२:३-६ ) 10 ओहाङसयको बाह्र जना मुख्य चेलालम मध्येको यातचाक यहुदा इस्करियोत त मय्ङ्ओ चेलाखे, येसुकाय पक्रति धोका बइसाको लागि मुख्य पुजारिलमकहाङ आला। 11 अनि जब ओउमयइ ओउ कुरा सायाकानि, ओउमय आन आसआकाय र ओउकाय थेपो बइसा बाचा जाह्ङाकानि। ओहाङसयको ओउइ येसुकाय गतहाइति पक्रति ओउमयकाय सुम्पति बइसाखाइना त दाह्य्ति मउका योसा फाःङाकान। येसुइ लयको चेलालमकुस छुत्काराको छ्यातको भोस जेःसास्यावो ( मति २६:१७-२५ ; लुका २२:७-१४ , २१-२३ ; युहन्ना १३:२१-३० ) 12 खमिर कामालो लाङको छ्यातको यातम् दिनहाङ छुत्काराको छ्यातको लागि भेदाको पाथो भोक बइसा परतो। येसुको चेलालमइ ओउकाय ह्वताथय, “निइ नाङको लागि इ छुत्काराको छ्यातको भोस गाहाङ आल्ति तयार जाह्ङो ते नाङ चाहसास्याउना?” 13 अनि येसुइ चेलालम मध्येको निसचाककाय एतदाह्य्ति तोति यरुसलेमताङ ल्होक्सास्यावा, “सहरहाङ आल्ज, ओहाङ निङ्जिइ पोमहाङ तिः लातो यातचाक मान्ताकाय क्रुस्तेनाजु। ओउकाय गुह्ल्ति आल्ज, 14 र ओउ गाउ किमहाङ पोक्ना, ओउ किमको मालिककाय तोजु, ‘निको गुरुइ एतदाह्य्ति तोसास्यावो मुना, “ङाइ लयको चेलालमकुस मुति छुत्काराको छ्यातको भोस जेःसाकाय पाहुना कोथा गाहाङ मुना?”’ 15 अनि ओउइ निङ्जिकाय त्याःउको चोताहाङ ङ्हाले पेतोकुसि तयार जाह्ङ्तिगमो ताह्ङो कोथा छ्यान्तेनाज। ओहाङले निको लागि भोस तयार जाह्ङ्जु।” 16 ओहाङसयको ओउ निसचाक चेलानिस सहरताङ आलाकाच र जुदा कुरा येसुइ तोसास्यावो लेखाले ङाःयाकाचु, अनि ओउनिसइ छुत्काराको छ्यातको भोस ओहाङले तयार जाह्ङाकाचु। 17 राह्म स्याउतोक बेलाहाङ येसु लयको बाह्र जना मुख्य चेलालमकुस ओउ किमहाङ दाह्ति वाङ्सास्यावा। 18 ओउमय तेबुलको वरिपरि च्युःङ्ति जेःधय मुतोकहाङ येसुइ ओउमयकाय तोसास्यावा, “दोङ्सिले ङाइ निङकाय तोनेनाङ्स, ङाकुस जेःधयमुओ निङ मध्येको यातचाकइले ङाकाय चुम्ताक्ति धोका बइनाताङ।” 19 एत साइति चेलालम आन दुखि स्यावाकाय, अनि या-यातचाकइ पालोकुसले येसुकाय ह्वताथय, “गुरु, ङापाय पक्कामा खेङल ने, खेल र?” 20 येसुइ ओउमयकाय तोसास्यावा, “ओउखे निङ बाह्र जना चेलालममध्ये ङाकुसले इ ताह्ङो कचउरासय जेःधयमुओ यातचाक खेना। 21 धइतिदाह्य्सा ङा मान्ताको चोःपाय धर्मसास्त्रहाङ लेखओ अनुसार सिसाले परनाङ, तर धिक्कार ओउ मान्ताकाय, सुइ ङाकाय चुम्ताक्ति धोका बइनाताङ। बरु ओउ मान्तापाय आमाको कोखसय नाःमालो खेयाकायले ओउको लागि माहा पेतो स्याउचा खेतो।” प्रभु-भोस ( मति २६:२६-३० ; लुका २२:१४-२० ; १ कोरिन्थि ११:२३-२५ ) 22 येसु र ओउको चेलालम जेःधय मुतोक बेलाहाङ येसुइ लाङ रोःत्सास्यावा र परमेस्वरकाय धन्नेबाद बइति लाङ फह्न्सास्यावा, अनि चेलालमकाय बइधय तोसास्यावा, “इ लाङ त्याक्नु, धइतिदाह्य्सा इखे ङाको ज्यान खेना।” 23 ओहाङसयको येसुइ धाकसायको रसको यातज्यो कचउरा च्युन्सास्यावा र ओउको लागि परमेस्वरकाय धन्नेबाद बइसास्यावा। अनि येसुइ ओउ कचउरा लयको चेलालमकाय बइसास्यावा र ओउमय जुदाइ ओउ कचउरासयले तुङाकानि। 24 अनि येसुइ तोसास्यावा, “इ धाकसायको रसको कचउराइखे ङाको वुइ जनाउनउ। ङाको वुइखे बलिदानको रुपहाङ नाःतो मान्तालमको लागि होलेना, र इ वुइइखे परमेस्वरइ लयको मान्तालमकुस जाह्ङ्सास्यावो बाचाकाय पक्का जाह्ङ्लेनउ। 25 दोङ्सिले ङाइ निङकाय तोनेनाङ्स, ङाइ लोन्हे परमेस्वरको राज्यहाङ धाकसायको रस तुङ्माच्युकसम्म, द्याहहाङसय ङाइ धाकसायको रस जुगाङमा तुङ्लेङल।” 26 ओहाङसयको ओउमय यातज्यो भजन मेति भ्याआक्तिको जयतुन दान्दाताङ आलाकाय। पत्रुसको इन्कारको बारेहाङ येसुइ ङ्हाले तोसास्यावो ( मति २६:३१-३५ ; लुका २२:३१-३४ ; युहन्ना १३:३६-३८ ) 27 ल्यामहाङ आल्धयमुतोकहाङ येसुइ लयको चेलालमकाय तोसास्यावा, “निङ जुदाले ङाकाय फेति क्रउतेनय। धइतिदाह्य्सा परमेस्वरइ धर्मसास्त्रहाङ एतदाह्य्ति तोसास्यावो मुना, ‘ङाइ गोथालोकाय सात्नाङ, अनि भेदालम छरपस्त स्याउलेनय।’ 28 तर ङा सिओसय उह्ति च्योकापछि, ङा निङसय ङ्हा गालिलताङ आल्नाङ अनि ओहाङले निङकाय क्रुस्नेनाङ्स।” 29 तर पत्रुसइ येसुकाय तोआकान, “यदि जुदाइले नाङकाय फेतेना त खेयाकायमा, ङाइखे नाङकाय जुगाङमा फेलेनेङल।” 30 येसुइ ओउकाय तोसास्यावा, “पत्रुस, दोङ्सिले ङाइ नाङकाय तोनेनाङ, स्याह्ङ बिहान भाल्या वाः निसपल्त गोःसासय ङ्हा, नाङइ ङाकाय तह्य्ङल त दाह्य्ति सुमपल्त ते इन्कार जाह्ङ्तेनाचि।” 31 तर ओउ कुराहाङ जुगाङमा सहमत स्याउमात पत्रुसइ येसुकाय एतदाह्य्ति जवाफ बयाकान, “यदि ङा नाङकुस सिसाले परनाङ त खेयाकायमा, ङाइ नाङकाय तह्य्ङल त दाह्य्तिखे सुकायमा तोलेनेङल।” अनि अरु जुदा चेलालममा ओउतदाह्य्तिले दाह्याकाय। येसुइ गेतसमनिको बगइचाहाङ प्राथना जाह्ङ्सास्यावो ( मति २६:३६-४६ ; लुका २२:३९-४६ ) 32 ओहाङसयको येसु लयको चेलालमकुस गेतसमनि त तोओ बगइचाताङ आल्सास्यावा, अनि येसुइ ओउमयकाय तोसास्यावा, “ङाइ प्राथना जाह्ङ्च्युकसम्म निङ इहाङले मुन।” 33 अनि येसुइ पत्रुस, याकुब र युहन्नाकायखे लयकुसले आःल्सास्यावा। येसु माहा जोक्तो दुखि र निरास स्याउसास्यावा। 34 ओउतझ्यान्ते येसुइ ओउमयकाय तोसास्यावा, “ङा माहा जोक्तो दुखि स्यावोझ्यान्ते, ङा सिओलेखाले स्यावो मुनाङ। निङ जागराम स्याउति इहाङले मुन।” 35 येसु ओउमयकसय मइतो लोक्तो आल्सास्यावा, अनि साःहाङ क्र्योःङ घ्रुस्ति खुःङाक्तिको सम्भब स्याउच्युकसम्म वाङ्साखेओ दुख लयकहाङ परताक्मासाको लागि प्राथना जाह्ङ्सास्यावा। 36 येसुइ तोसास्यावा, “अब्बा, अ ङाको आपा, नाङको लागिपाय जुदा थोक सम्भब स्याउलेना। इ दुखको कचउरासय ङाकाय दल्ताक्सास्याउपाना। तर ङाको इच्छ्या खेल, नाङको इच्छ्याखे पुत्तो स्याउपाना।” 37 ओहाङसयको येसु द्याह्न्तोकहाङ सुम जना चेलालमकायमा एःन्तिमुओ ङाइसास्यावा। येसुइ पत्रुसकाय ह्वत्सास्यावा, “सिमोन, नाङपाय एःन्धयले मुतेना? दोह नाङ यातघन्त च्युककाय एःन्मात, ङाकुस जागराम मुसा खाइतेउलु?” 38 येसुइ ओउमयकाय तोसास्यावा, “परिछ्याहाङ परमासाको लागि जागराम स्याउति प्राथना जाह्ङ्नु। धइतिदाह्य्सा ग्वालामपाय दोङ्सिले तयार मुलेना, तर ज्यानखे कमजोर मुना।” 39 ओउमयकाय फेआक्तिको येसु फेरि द्याह्न्ति आल्सास्यावा, र ङ्हाको लेखाले प्राथना जाह्ङ्सास्यावा। 40 ओहाङसयको येसु चेलालमकताङ द्याह्न्ति वाङ्सास्यावा, र ओउमयकाय फेरिले एःन्तिमुओ ङाइसास्यावा, धइतिदाह्य्सा ओउमयकाय माहा जोक्तो एःन्बुसइ ङाःयो खेतो। अनि येसुकाय दोह जवाफ बइसा त दाह्यो कुराले ओउमयइ चिःनिलि। 41 जब येसु सुमम् पल्त ओउमयकहाङ द्याह्न्ति वाङ्सास्यावा, अनि येसुइ ओउमयकाय तोसास्यावा, “दोह निङ अझले एःन्ति आराम जाह्ङ्धय मुतेनय? द्याह एःन्ति आराम जाह्ङो समय द्योका, धइतिदाह्य्सा योनु, ङा मान्ताको चोःकाय पापिलमको क्रुतहाङ सुम्पसा परओ बेला वाङ्तिखायो मुना। 42 द्याह चिङ्न, आलि। योनु, ङाकाय पक्रति धोका बइसाखेओ मान्ता इहाङ दाह्तिले खायो मुना।” येसुकाय पक्रओ ( मति २६:४७-५६ ; लुका २२:४७-५३ ; युहन्ना १८:३-१२ ) 43 येसु नोःसा स्याउधय मुतोकहाङले, येसुको बाह्र जना चेलालम मध्येको यातचाक यहुदा त मय्ङ्ओ चेला ओहाङ दाह्तिवाङा। मुख्य पुजारिलम, धर्मगुरुलम र पाको अगुवालमइ ल्होको मान्तालमको यातज्यो हुलमा नाःसुइ र दाङ्ग लात्ति ओउकुस वाङो खेइतो। 44 येसुकाय धोका बयो यहुदाइ ङ्हाखाले ओउमयकाय एतदाह्य्ति तोतिखायो खेतो, “गाउखे मान्ताकाय ङाइ तुःम्ति अभिबादन जाह्ङ्नाङ, ओउले निङइ पक्राउ जाह्ङ्सा परओ मान्ता खेना। अनि पेतोकुसि सुरछ्या बइति लात्ति आःल्नु।” 45 यहुदा ओहाङ दाह्नातासले येसुकहाङ आल्ति “अ गुरु” त दाह्य्ति तोआक्तिको तुःम्ति अभिबादन जाह्ङाकान। 46 अनि ओउकुस वाङो अरु मान्तालमइखे येसुकाय चुमाक्तिको पक्राउ जाह्ङाकानि। 47 तर येसुकुस मुओ मान्तालम मध्येको यातचाकइखे लयको नाःसुइ त्यालाक्तिको ताह्ङो पुजारिको नोकरकाय पालाकान, र ओउको नो तात्ति वायाकान। 48 ओहाङसयको येसुइ ओउ मान्तालमकाय तोसास्यावा, “ङाकाय पक्राउ जाह्ङ्साको लागि नाःसुइ र दाङ्गलम लात्ति वाङ्साकाय, दोह ङा अपराधि खेनाङ र? 49 ङा सधय दिनमले मन्दिरहाङ आल्ति स्यान्तोक बेलाहाङ निङकुसले स्याउङतो, धइति निङइ ङाकाय ओउ बेलाहाङ पक्राउ जाह्ङ्तेनिलि? तर इ कुरालमखे ङाको बारेहाङ धर्मसास्त्रइ तोओ कुरालम पुत्साको लागि स्याउधयमुओ खेना।” 50 ओहाङसयको जुदा चेलालम येसुकाय फेआक्तिको तन्ति क्रवाकाय। 51 यातज्यो पेओ खालको सुतिको क्रमनाय लावओ यातचाक जवान गोय्चो येसुको लोन्हे गुह्ल्ति वाह्धय खेतो। ओउमयइ ओउकायमा पक्रसा बोःङाकानि, 52 तर ओउइ लयको लावनाय फेति वायाक्तिको सोहले तन्ति क्रवा। येसुकाय यहुदि ताह्ङो सभाको ङ्हा वानो ( मति २६:५७-६८ ; लुका २२:५४-५५ , ६३-७१ ; युहन्ना १८:१३-१४ , १९-२४ ) 53 ओहाङसयको ओउमयइ येसुकाय ताह्ङो पुजारिको किमहाङ लात्ति आःलाथय, अनि ओहाङखे जुदा मुख्य पुजारिलम, पाको अगुवालम, र धर्मगुरुलम हुम्तिमुओ खेइतो। 54 पत्रुस लोक्तोसयले येसुकाय गुह्ल्धय आल्ति ताह्ङो पुजारिको किमको आङ्गनहाङ दाहा। ओहाङ ओउ पालेलमकुस च्युःङ्ति म्हेः गाःर्धयमुओ खेतो। 55 मुख्य पुजारिलम र यहुदि ताह्ङो सभाको जुदा सदस्यलमइ येसुकाय सात्साको लागि येसुको बिरोतहाङ केहि प्रमानलम जुर्याउसा बोःङ्धय खेइतो, तर ओउमयइ दोह प्रमानमा ङाइसा खाइनिलि। 56 नाःतो मान्तालमइ येसुकाय स्याताहा गाल बयाकानि, तर ओउमयइ बयो गभाइ यात-अर्काकुस जुगाङमा ब्राःङ्लेल। 57 ओहाङसयको लोन्हे, केहि मान्तालम चिङाक्तिको येसुको बिरोतहाङ एतदाह्य्ति स्याताहा गाल बयाकानि— 58 “‘मान्तालमइ जाह्ङो इ परमेस्वरको मन्दिरकाय ङाइ भङ्ति वाइनाङ, अनि मान्तालमको सहयोग बिनाले सुम दिनहाङ अर्को मन्दिर जाह्ङ्नाङ’ त दाह्य्ति इ मान्ताइ दाह्यो कुरा निइ सायालाङ्सु।” 59 तर ओउमयइ बयो स्याताहा गालको इ गभाइमा ब्राःङ्लेल। 60 ओहाङसयको ताह्ङो पुजारिइ ओउमयको ङ्हा चिङाक्तिको येसुकाय ह्वताथय, “नाङ लयको पक्छेहाङ धइति दोह कुरामा नोःतेल? ओउमयइ नाङको बिरोतहाङ गाल बयो कुरा दोह नाङइ साइतेउलु?” 61 तर येसु दोहमा नोःमात, ङइमातले मुसास्यावा। ताह्ङो पुजारिइ येसुकाय फेरिले ह्वताथय, “दोह नाङ, निइ आराधना जाह्ङो प्रभु परमेस्वरको चोः ख्रिस्त खेतेना?” 62 येसुइ जवाफ बइसास्यावा, “मा, ओउ ङाले खेनाङ। अनि निङइ ङा मान्ताको चोःकाय जुदा जिःङ नाःओ प्रभु परमेस्वरको ङोइसय च्युःङ्तिमुओ, र फेलबाङको मुसहाङ वाङ्धयमुओ च्यउतेनानि।” 63 जब ताह्ङो पुजारिइ एतताह्ङो कुरा सायाकान, ओउ आन रिस वाङ्ति लयको लावनाय क्रेत्ति वायाकान र एत दाह्या, “निकाय इसय नाःतो अरु प्रमान धइति चाहना र? 64 इ मान्ताइ परमेस्वरको अपमान जाह्ङो निङ जुदाइले साइतेआकानि। द्याह निङको निर्नय दोह स्याउना त?” अनि जुदा मान्तालम येसुकाय सात्साले परना त दाह्यो कुराहाङ सहमत स्यावाकाय। 65 केहि मान्तालमइ येसुकाय द्युःर्सा फाःङाकानि, र येसुको मिकहाङ नायइ पाःनाक्तिको क्रुतइ घान्धय एत दाह्याकाय, “अ अगमबक्ता, निकाय तोताङि नाङकाय सुइ घान्तेआ?” अनि पालेलमइमा येसुकाय घान्धय लात्ति आःलाथय। पत्रुसइ येसुकाय इन्कार जाह्ङो ( मति २६:६९-७५ ; लुका २२:५६-६२ ; युहन्ना १८:१५-१८ , २५-२७ ) 66 पत्रुस किमको काःम आङ्गनहाङ मुतोक बेलाहाङले ताह्ङो पुजारिको यातचाक नोकर्नि ओहाङ वाङा। 67 जब ओउइ पत्रुसकाय म्हेः गाःर्ति च्युःङ्तिमुओ च्यवाकान, ओउकाय ताङ्ति योआक्तिको एतदाह्य्ति तोआकान, “नाङमा नासरतको येसुकुसले त खेतेतो ने, खेल र?” 68 तर पत्रुसइ ओउ कुराकाय इन्कार जाह्ङ्धय एत दाह्या, “ङाइ चिःङल, नाङ दोह कुरा दाह्य्धय मुतेना?” ओहाङसयको पत्रुस किमको मुल दह्य्लोताङ आला, अनि ओउच्युक खेरले भाल्या वाः गोःमाआ। 69 ओउ नोकर्निइ फेरिले पत्रुसकाय दह्य्लोहाङ चिङ्तिमुओ च्यउति ओहाङ चिङ्तिमुओ अरु मान्तालमकाय तोआकान, “इ मान्तामा येसुको चेलालम मध्येको यातचाक खेलेना।” 70 तर पत्रुसइ इ कुराकायमा फेरिले इन्कार जाह्ङाकान। यातछिन लोन्हे ओहाङ चिङ्तिमुओ केहि मान्तालमइमा पत्रुसकाय तोआथय, “दोङ्सिले नाङमा येसुको चेलालम मध्येको यातचाक खेतेना, धइतिदाह्य्सा नाङमा ता गालिलिले खेतेना नि।” 71 ओहाङसयको पत्रुसइ तोआकान, “ङाइ बाचा जाह्ङ्ति दाह्य्नाङ, ङा दोङ्सिले नोःधय मुनाङ। ङाइ तोओ कुरा स्याताहा खेना त खेया, परमेस्वरइ ङाकाय दन्द बइपाताङ। धइतिदाह्य्सा निङइ तोओ इ मान्ताकाय ङाइ दोङ्सिले तह्य्ङल।” 72 अनि ओउच्युक खेरले निसम् पल्त भाल्या वाः गोःमाआ, र “निसपल्त भाल्या वाः गोःसासय ङ्हा, ङाइ ओउकाय तह्य्ङल त दाह्य्ति नाङइ सुमपल्त ते इन्कार जाह्ङ्तेनाचि” त दाह्य्ति येसुइ तोसास्यावो कुराकाय पत्रुसइ सम्झआकान। अनि पत्रुस माहा दुख साइति र्यासा फाःङाकान। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.