लुका 9 - चेपाङयेसुइ बाह्र जना मुख्य चेलालमकाय प्रचारहाङ ल्होक्सास्यावो ( मति १०:५-१५ ; मर्कुस ६:७-१३ ) 1 येसुइ बाह्र जना मुख्य चेलालमकाय गोत्सास्यावा र जुदा खालको लानलमकाय क्रउताक्सा र बिरामिलमकाय स्याक्ताक्सा जिःङ र अधिकार ओउमयकाय बइसास्यावा। 2 अनि येसुइ परमेस्वरको राज्यको बारेहाङ प्रचार जाह्ङ्लाङ र बिरामिलमकाय स्याक्ताक्लाङ ओउमयकाय ल्होक्सास्यावा, 3 येसुइ ओउमयकाय तोसास्यावा, “निङको यात्राको लागि निङइ दोहमा आःल्लाम। ङोःल्साकाय दाङ्ग, मालताल लात्साकाय जाबि, जेःगा-तुङ्गा, थेपो र फेरसा नायमा आःल्लाम। 4 सु मान्तालमइ निङकाय स्वागत जाह्ङ्तेनय, ओउ गाउ फेति पाह्य्माच्युकसम्म ओउ यातज्यो किमहाङले मुन। 5 सु मान्तालमइ निङकाय स्वागत जाह्ङ्तेइलि, परमेस्वरइ न्याय जाह्ङ्सास्याउना त दाह्यो कुरा ओउ मान्तालमकाय चिःताक्साको लागि निङको दोमपाकको धाह्न् काहाक्तिको ओउमयको गाउ फेति वाह्न।” 6 ओहाङसयको येसुकसय वेङ्ति चेलालम गाउ-गाउहाङ परमेस्वरको पेओ खबर प्रचार जाह्ङ्लाङ आलाकाय अनि नाःतो थाउको बिरामिलमकायमा स्याक्ताकाकानि। राजा हेरोद एन्तिपास अलमल्ल स्यावो ( मति १४:१-१२ ; मर्कुस ६:१४-२९ ) 7 गालिल छेत्रहाङ राज्य जाह्ङो हेरोद एन्तिपासइ येसुइ जाह्ङ्सास्यावो कामलम भयभय त स्यावो कुरा सायाकान अनि हेरोद अलमल्ल स्यावा, धइतिदाह्य्सा गच्युक मान्तालमइ “बप्तिस्मा बयो युहन्ना सिओसय उह्ति च्योका” त दाह्य्इतो। 8 गच्युक मान्तालमइखे “एलिया अगमबक्ता थालाङ वाङा” त दाह्य्इतो अनि अरुइखे “उहिलेको अगमबक्तालममध्ये यातचाक थाआ” त दाह्य्इतो। 9 तर हेरोदइखे एत दाह्या, “युहन्नाको तालाङपाय ङाइले तात्ताकालाङ, तर इ मान्ताखे सुखेना इको बारेहाङ ङाइ एतताह्ङो कुरालम साइधय मुनाङ?” अनि ओउइ येसुकाय क्रुस्सा बोःङाकान। येसुइ पोङा हजार मान्तालमकाय जेःसा बइसास्यावो ( मति १४:१३-२१ ; मर्कुस ६:३०-४४ ; युहन्ना ६:१-१४ ) 10 जब येसुइ ल्होक्सास्यावो बाह्र जना मुख्य चेलालम प्रचार जाह्ङ्ति द्याह्नाकाय, अनि लयमयइ जाह्ङो जुदा कुरा येसुकाय ल्हाक्ति छ्यानाकानि। अनि येसुइ लयको चेलालमकाय लात्ति बेथसेदा गाउको सुमा याक्मालो थाउताङ आल्सास्यावा। 11 तर जब नाःतो मान्तालमको हुलइ ओउ कुरा चिःआकानि, ओउमय येसुकाय गुह्ल्ति आलाकाय। येसुइ ओउमयकाय स्वागत जाह्ङ्सास्यावा, र परमेस्वरको राज्यको बारेहाङ तोसास्यावा, र बिरामिलमकायमा स्याक्ताक्सास्यावा। 12 जब न्याम ब्लक्सा लागआ, ओउ बाह्र जना मुख्य चेलालम वाङ्ति येसुकाय तोआकानि, “इ मान्तालमकाय ल्होक्सास्याउपाना, र ओउमय वरिपरिको द्याङ्तो गाउखा आल्ति ल-लयकाय जेःगा-तुङ्गा र एःन्साकाय जोहो जाह्ङ्पानानि, धइतिदाह्य्सा इपाय सुमा याक्मालो थाउ खेना।” 13 तर येसुइ ओउमयकाय तोसास्यावा, “खेल, निङ लयमयइले इमयकाय जेःसा बइनु।” ओउमय त्याङाकाय, “प्रभु, निकुस पोङाज्यो लाङ र निसमोसा ङाः मात्र मुना। दोह निइ उच्युक नाःतो मान्तालमकाय जेःगा-तुङ्गा लेःति वान्चाङ्सु?” 14 ओहाङ गोय्चो मान्तालम मात्र पोङा हजार च्युककाय मुओझ्यान्ते ओउमय एतदाह्य्ति त्याङो खेइतो। येसुइ लयको चेलालमकाय तोसास्यावा, “खेल, मान्तालमकाय पचास-पचास जनाको समुहहाङ च्युःङ्ताक्नु।” 15 चेलालमइ मान्तालमकाय ओउतहाइतिले च्युःङ्ताकाकानि। 16 ओहाङसयको येसुइ पोङाज्यो लाङ र निसमोसा ङाः त्याक्सास्यावा, र लाङकाताङ त्याउति परमेस्वरकाय धन्नेबाद बइसास्यावा। अनि येसुइ लाङ फह्न्सास्यावा, र मान्तालमकाय वेःसाको लागि येसुइ लाङ र ङाःलम चेलालमकाय ल्हासास्यावा। 17 ओउमय जुदाइ तुक कोस्तो जेःआकानि, अनि चेलालमइ वेतिमुओ लाङ र ङाःलम हुम्धार्ना बाह्र सोल्हे स्यावा। येसुले ख्रिस्त खेसास्याउना त दाह्य्ति पत्रुसइ सुइकार जाह्ङो ( मति १६:१३-२० ; मर्कुस ८:२७-३० ) 18 यात दिन जब येसु एकानले प्राथना जाह्ङ्सास्याउधय खेतो, चेलालम येसुको द्याङ्तो वाङाकाय। येसुइ ओउमयकाय ह्वत्सास्यावा, “मान्तालमइ ङाकाय सु खेना त तोनाताङ्स?” 19 ओउमय त्याङाकाय, “केहि मान्तालमइखे बप्तिस्मा बयो युहन्ना खेना त दाह्य्नय, कोयइखे एलिया अगमबक्ता खेना त दाह्य्नय, अनि अरुलमइखे उहिलेको सुलाङ अगमबक्तालम मध्येको यातचाक सिओसय उह्ति च्योको खेचा त दाह्य्नय।” 20 येसुइ ओउमयकाय ह्वत्सास्यावा, “अनि निङखे ङा सुखे त म्हर्तेनय?” पत्रुस त्याङा, “नाङपाय परमेस्वरइ ल्होक्सास्यावो ख्रिस्त खेसास्याउतेना।” 21 अनि येसुइ ओउमयकाय इ कुरा सुकायमा तोलाम त दाह्य्ति आन जोक्तो दर्कति तोसास्यावा। येसुइ लयको दुख र सिमयको बारेहाङ तोसास्यावो ( मति १६:२१-२८ ; मर्कुस ८:३१—९:१ ) 22 येसुइ इ कुरामा तोसास्यावा, “ङा मान्ताको चोःइ आन नाःतो दुख च्यउसा परनाङ र पाको अगुवालम, मुख्य पुजारिलम, र धर्मगुरुलमइ ङाकाय इन्कार जाह्ङ्नाताङ्स अनि ङाकाय सात्नाताङ्स। तर सुम दिनहाङखे ङा फेरि सिओसय उह्ति च्योक्लेनाङ।” 23 अनि येसुइ ओउ जुदा मान्तालमकाय तोसास्यावा, “यदि निङ सुखेयामा ङाको चेला स्याउसा चाहतेनय त खेया, निङइ लयको मनको मात्र इच्छ्यालमकाय फेनु, र दिनमले लयको क्रुस लात्ति ङाको लोन्हे गुह्ल्ति वाङ्न। 24 यदि निङइ लयको रुवाङ स्याक्ताक्सा बोःङ्तेनानि त खेया, निङइ ओउ रुवाङ मिह्ताक्तेनानि। तर यदि निङइ लयको रुवाङ ङाको लागि बइतेनानि त खेया, निङइ ओउ रुवाङ दल्ताक्तेनानि। 25 मान्तालमइ लयकाय चाहओ जुदा थोकलम इ ल्हाउदयबाङहाङ दोःसा खाइनानि, तर ङाको चेला स्याउमात ओउमयइ लयको रुवाङ मिह्ताक्नानि त खेया, ओउमयकाय दोह फाइदा स्याउना र? 26 यदि निङ ङा र ङाको स्यानरायकुस रास्तेनय त खेया, ङा मान्ताको चोःइमा ङा लयको र परमेस्वर आपाको अनि पबित्र लाङकादुतलमको महिमाहाङ वाङ्धार्ना निङकाय लयको त तोसा रास्लेनाङ। 27 तर दोङ्सिले ङाइ निङकाय तोनेनाङ्स, परमेस्वरइ लयको मान्तालमकाय राज्य जाह्ङो च्यउमाच्युकसम्म इहाङ चिङ्तिमुओलममध्ये गच्युक जनाखे सिलेतेइलि।” येसुको रुप परिवर्तन स्यावो ( मति १७:१-८ ; मर्कुस ९:२-८ ) 28 इ कुरा तोओ यात साता लोन्हे पत्रुस, युहन्ना र याकुबकाय लात्ति येसु दान्दाहाङ प्राथना जाह्ङ्लाङ आल्सास्यावा। 29 प्राथना जाह्ङ्ति मुतोकहाङ येसुको खेन परिवर्तन स्यावा, र ओउको लावनाय आन भाम्तो प्लिह्ङ्तो स्यावा। 30 अचानक ओहाङ निसचाक मान्ता येसुको ङ्हा थाआकाच र येसुकुस नोःसा फाःङाकाचु। ओउनिसखे मोसा र एलिया खेचतो। 31 ओउनिसमा लाङकाको थोङोहाङ थाआकाच, र यरुसलेमहाङ येसुको सिमयको बारेहाङ येसुकुस नोःधय खेचतो। 32 पत्रुस र अरु निसचाक चेला भुह्ङ्ति एःन्तिमुओ खेइतो, जब ओउमय लेआकाय, येसुको महिमा र निसचाक मान्ता येसुकुस चिङ्तिमुओ च्यवाकानि। 33 ओउ निसचाक येसुकसय वेङ्ति पाह्य्सा बोःङ्धार्ना पत्रुसइ येसुकाय तोआकान, “अ गुरु, नि जुदा इहाङ मुसा आन पेतो स्याउसा खाइनउ। निइ इहाङ मुसाकाय सुमज्यो खोल्मा जाह्ङ्नाङ्सु, यातज्यो नाङकाय, यातज्यो मोसाकाय, र यातज्योखे एलियाकाय।” तर पत्रुसइ लय दोह नोःआलाङ त दाह्यो कुराले चिःसा खायुलु। 34 पत्रुस नोःति मुतोकहाङले मुस वाङ्ति ओउमयकाय बोःमाथास, र ओउ मुस वाङ्ति लयमयकायमा घम्सा लागओझ्यान्ते चेलालम आन जोक्तो रयाकाय। 35 अनि परमेस्वरइ ओउमयकाय तोसास्यावो यातज्यो हाउनय मुसभित्रसय एतदाह्य्ति वाङा, “इपाय ङाइ छ्युह्ङो ङाको चोः खेना, र इको आखरकाय निङइ साइसाले परना।” 36 जब हाउनय दिःआ, ओहाङ येसु एकान मात्र खेसास्याउतो। चेलालम ङइमात मुआकाय र ओउमयइ लय च्यवो कुरा ओउबेलाहाङ सुकायमा ल्हाक्ति छ्यान्निलि। दुस्त ग्वालामइ ङाःयो यातचाक गोय्चो मान्ताकाय येसुइ स्याक्ताक्सास्यावो ( मति १७:१४-१८ ; मर्कुस ९:१४-२७ ) 37 स्याह्ङ्लो येसु र ओउको सुम जना चेलालम दान्दासय ग्ल्युह्ङ्धय खेइतो, नाःतो मान्ताको हुल येसुकाय क्रुस्लाङ वाङाकाय। 38 अनि ओउ मान्तालमको हुलसय यातचाकइ हिह्ति गोःआकान, “अ गुरु, ङाइ नाङकाय सेवति तोनेनाङ, ङाको चोःकाय योःन्सास्याउपाना, धइतिदाह्य्सा इपाय ङाको यातज्योले चोः खेनाबताङ! 39 इकाय गलमा यातज्यो दुस्त ग्वालामइ ङाइनाथय र ओउ अचानक हिह्ना। ओउ दुस्त ग्वालामइ ओउकाय यउलन्ति वाह्ताक्नाथय र ओउको म्होतोङसय भोप ग्ल्युह्ङ्ना, अनि ओउको ज्यानहाङ चालम स्याउमाच्युककाय ग्वालामइ ओउकाय फेदय फेथाल। 40 ङाइ नाङको चेलालमकाय दुस्त ग्वालाम रुःन्ति ल्होक्साको लागि बिन्ति जाह्ङालाङ, तर ओउमयइ रुःन्ति ल्होक्साले खाइनिलि।” 41 येसुइ ओहाङ मुओ जुदा मान्तालमकाय तोसास्यावा, “निङपाय गतताह्ङो बिस्वास नाःमालो र भ्रस्त मान्तालम खेतेनय! ङा निङकुस गच्युक दिनकाय मुचाङ र? ङाइ निङको अबिस्वासकाय गच्युकसय सहति मुचाङ?” ओहाङसयको येसुइ ओउ गोय्चोको आपाकाय तोसास्यावा, “नाङको चोःकाय इताङ लात्ति वाङ।” 42 आपाखेइ चोःकाय लात्ति वान्तोकहाङ लानइ ओउकाय साहाङले प्लाह्ताक्ति यउलन्ति वाह्ताकाथय। तर येसुइ लानकाय थत्सास्यावा, र गोय्चोकाय स्याक्ताक्ति ओउको आपाकाय सुम्पति बइसास्यावा। 43 परमेस्वरको ताह्ङो जिःङ च्यउति जुदा मान्तालम ग्याह्ङाकाय। मान्तालम येसुको एतताह्ङो काम च्यउति ग्याह्ङ्ति मुतोकहाङले, येसुइ लयको चेलालमकाय तोसास्यावा, येसुइ फेरि लयको सिमयको बारेहाङ तोसास्यावो ( मति १७:२२-२३ ; मर्कुस ९:३०-३२ ) 44 “ङाइ निङकाय दोह कुरा तोसा बोःङ्धय मुनाङ निङइ ओउ कुरा घिःति साइनु। धइतिदाह्य्सा ङा मान्ताको चोःकाय पक्रति मान्तालमको क्रुतहाङ सुम्पति बइनानि।” 45 तर चेलालमइ एत तोओ दोह खेचा त दाह्य्ति चिःसा खाइनिलि। इ कुरा चिःसाकाय ग्यान बइमालोझ्यान्ते येसुइ तोसास्यावो कुरा ओउमयइ चिःसा खाइनिलि, र इको माने दोह खेना त दाह्य्ति येसुकाय ह्वत्सामा रयाकाय। साःरो सु खेना? ( मति १८:१-५ ; मर्कुस ९:३३-४० ) 46 ओउबेला बाह्र जना चेलालम मध्येहाङ सुखे साःरो त दाह्यो कुरा स्यावा। 47 येसुइ ओउमयको ल्हुङतुकको कुरा चिःति यातज्यो बालाखकाय लयको छेउहाङ चिङताकाकान, 48 अनि ओउमयकाय तोसास्यावा, “सुखेइ एतताह्ङो बालाखकाय ङाको मय्ङहाङ सुइकार जाह्ङ्नानि, ओउमयइ ङाकाय सुइकार जाह्ङ्नाताङ्स, अनि ङाकाय सुइ सुइकार जाह्ङ्नाताङ्स, ओउमयइ ङाकाय ल्होक्सास्यावो ङाको परमेस्वर आपाकाय सुइकार जाह्ङ्नानि। निङ मध्येहाङ सुखे जुदासय मइतो मुतेनय, ओउखे जुदासय ताह्ङो स्याउना।” 49 युहन्नाइ येसुकाय तोआथय, “गुरु, यातचाक मान्ताइ नाङको मय्ङहाङ लानलम रुःन्ति ल्होक्धयमुओ निइ च्यवालाङ्सु, अनि निइ ओउकाय एत हाइलाम त दाह्य्ति तोआलाङ्सु, धइतिदाह्य्सा ओउखे निको समुहको मान्ता खेआक्ल।” 50 येसुइ ओउकाय र अरु चेलालमकाय तोसास्यावा, “ओउकाय निङइ ओउत हाइलाम त दाह्य्ति तोलाम, धइतिदाह्य्सा सु निङको बिरोतहाङ नाःल, ओउखे निङकोले खेना।” सामरिलमइ येसुकाय स्वागत जाह्ङ्मालो 51 येसुको लाङका पाह्य्साखेओ समय द्याङ्तो दाह्तोकहाङ, येसुइ यरुसलेमताङ आल्साले बिचार जाह्ङ्सास्यावा। 52 अनि येसुइ लय भन्दा ङ्हा लयको खबरदुतलमकाय ल्होक्सास्यावा, अनि ओउमय आलाकाय र येसुको लागि जुदा कुरा तयार जाह्ङ्साकाय सामरिया छेत्रको यातज्यो गाउहाङ पोकाकाय। 53 तर येसु यरुसलेम आल्धय मुसास्याउना त दाह्यो कुरा चिःति सुइमा येसुकाय स्वागत जाह्ङ्निलि। 54 जब येसुको चेलानिस याकुब र युहन्नाइ इ कुरा चिःआकाचु, ओउनिसइ येसुकाय तोआकाचु, “प्रभु, लाङकासय म्हेः क्लाःति निइ ओउमयकाय ह्योःम्ताक्नि त नाङ म्हर्तेना या?” 55 तर येसुइ ओउनिसकताङ हिल्ति थत्सास्यावा। [अनि एत तोसास्यावा, “निङकहाङ गतताह्ङो मन स्याउसा परना, ओउपाय निङइ चिःओले नाःल। धइतिदाह्य्सा ङा मान्ताको चोःपाय मान्तालमकाय म्हेत्ताक्लाङ त दाह्य्ति खेल, तर ओउमयकाय स्याक्ताक्लाङ त दाह्य्ति वाङो खेनाङ।”] 56 ओहाङसय येसु लयको चेलालमकुस अर्को गाउताङ आल्सास्यावा। येसुकाय गुह्ल्ति वाह्सा झाको सुम जना मान्तालम ( मति ८:१९-२२ ) 57 येसु र ओउको चेलालम ल्यामहाङ आल्धयमुतोकहाङ, यातचाक मान्ता वाङ्ति येसुकाय तोआथय, “नाङ गाहाङ ते आल्सास्याउना ङामा नाङकाय गुह्ल्ति वाङ्नाङ।” 58 येसुइ ओउकाय तोसास्यावा, “स्याललम याक्साकाय ल्युमपुकलम मुना, बन वाःको छ्युतलम मुना, तर ङा मान्ताको चोःकोपाय आरामकुसि एःन्साकाय लयको थाउले नाःङल!” 59 अनि येसुइ अर्को मान्ताकाय तोसास्यावा, “ङाकाय गुह्ल्ति वाङ।” तर ओउ मान्ताइ येसुकाय तोआथय, “गुरु, ङ्हा आल्ति ङाको आपाको म्हाःङ पाह्म्सा बइचि।” 60 तर येसुइ ओउकाय तोसास्यावा, “ओउ ग्वालामहाङ सिओ म्हाःङलमइ लयको म्हाःङलमकाय लयमयइले पाह्म्पानानि। तर नाङखे आल्ति परमेस्वरको राज्यको प्रचार जाह्ङु।” 61 फेरि अर्को यातचाक मान्ताइ येसुकाय तोआथय, “गुरु, ङा नाङको लोन्हे गुह्ल्ति वाङ्नाङ, तर ङाकाय ङ्हा किम पाह्य्ति लयको माचरलमकाय दाम्सा बइसास्याउपाना।” 62 येसुइ ओउकाय तोसास्यावा, “सु खेयाकायमा होलोकाय क्रुतइ चुमाक्तिको काह्ताङ द्याह्न्ति योतिमुओ मान्ताखे परमेस्वरको राज्यको लागि काम लागलेल।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.