लुका 6 - चेपाङयेसु धोओ दिनको प्रभु खेसास्याउना ( मति १२:१-८ ; मर्कुस २:२३-२८ ) 1 यहुदि धोओ दिनहाङ येसु गहुङराङको ल्याम स्याउति आल्सास्याउधय खेतो। येसुको चेलालमइ गहुङको बाला काह्उति क्रुतइ न्युत्ति जेःसा लागआकाय। 2 ओउ च्यउति केहि फरिसिलमइ येसुको चेलालमकाय ह्वताथास, “यहुदि धोओ दिनहाङ निको नेम-कानुनइ जाह्ङ्सास्याउल त तोओ कामलम निङइ धइति जाह्ङ्तेनानि?” 3 येसुइ ओउमयकाय तोसास्यावा, “राजा दाउद र ओउको होयालम योङक्राइतोक बेलाहाङ राजा दाउदइ दोह जाह्ङो खेतो निङ पह्रओ नाःल? 4 ओउ परमेस्वरको किमभित्र पोका, अनि परमेस्वरकाय भेति बयो लाङ त्याल्ति जेःआकान र होयालमकायमा जेःसा बयाकान। निको नेम-कानुन अनुसार पुजारिलमबाहेक अरु सुइमा ओउ लाङ जेःसा स्यावाक्ल।” 5 अनि येसुइ इ नोःराय द्युम्ताक्धय एत तोसास्यावा, “ङा मान्ताको चोः यहुदि धोओ दिनको प्रभु खेनाङ।” कुइच्या रोगइ क्रुत सुह्यो मान्ताकाय येसुइ स्याक्ताक्सास्यावो ( मति १२:९-१४ ; मर्कुस ३:१-६ ) 6 फेरि अर्को यातज्यो यहुदि धोओ दिनहाङ येसुइ सभाकिमहाङ आल्ति स्यान्सास्यावा। ओहाङ ङोइसय क्रुत सुह्यो मान्तामा खेतो। 7 केहि धर्मगुरु र फरिसिलमइ येसुकाय गाल बइसाकाय तुसलम बोःङ्धय खेइतो, ओउतझ्यान्ते येसुइ ओउ मान्ताको क्रुतकाय यहुदि धोओ दिनहाङ स्याक्ताक्नउ या त दाह्य्ति ओउमय योधय खेइतो। 8 तर ओउमयको मनको कुरा चिःति येसुइ क्रुत सुह्यो मान्ताकाय तोसास्यावा, “नाङ चिङ र इहाङ ङ्हा वाङ।” रेह्न्तोले चिङ्ति ओउ मान्ता ङ्हाताङ आला। 9 अनि येसुइ ओउमयकाय तोसास्यावा, “ङाइ निङकाय ह्वत्नेनाङ्स, ‘निको नेम-कानुनइ यहुदि धोओ दिनहाङ दोह जाह्ङ्सा पेतो स्याउना त दाह्य्ना? पेओ जाह्ङु त तोनउ या पेमालो? स्याक्ताकु त तोनउ या सातु?’” 10 अनि येसुइ ओउमय जुदाकाय वरिपरि योआक्तिको ओउ मान्ताकाय तोसास्यावा, “नाङको क्रुत प्योताकु।” ओउइ लयको क्रुत प्योआकास र स्याक्माआ। 11 एत च्यउति फरिसि र धर्मगुरुलम आन जोक्तो रिस वाङाकाय “द्याह निइ येसुकाय दोह हाइनि?” त दाह्य्ति लयमय नोःकायाकाय। येसुइ बाह्र जना मुख्य चेलालमकाय छ्युह्ङ्सास्यावो ( मति १०:१-४ ; मर्कुस ३:१३-१९ ) 12 ओउ समयहाङ येसु प्राथना जाह्ङ्साको लागि दान्दाताङ आल्सास्यावा र ओहाङ परमेस्वरकुस प्राथना जाह्ङ्ति याह्दिङभरि हुत्सास्यावा। 13 जब न्याम स्याङा, येसुइ लयको चेलालमकाय लयकताङ गोत्सास्यावा र ओउमयमध्ये बाह्र जनाकाय छ्युह्ङ्सास्यावा, अनि ओउमयकाय मुख्य चेलालम त दाह्य्ति मय्ङ्सास्यावा— 14 येसुइ पत्रुस त दाह्य्ति मय्ङ्सास्यावो सिमोन, ओउको हउ अन्द्रियास, याकुब, युहन्ना, फिलिप, बार्थोलोमय, 15 मति, थोमा, अल्फायसको चोः याकुब, देसभक्त त तोओ सिमोन, 16 याकुबको चोः यहुदा, र लोन्हे येसुकाय बिस्वासघात जाह्ङो यहुदा इस्करियोत। येसुइ नाःतो मान्तालमकाय स्याक्ताक्सास्यावो ( मति ४:२३-२५ ) 17 जब येसु मुख्य चेलालमकुस ब्रकले दान्दासय काःम्ताङ ग्ल्युह्ङ्ति वाङ्सास्यावा, लयको अरु नाःतो चेलालमकुस येसु दनिहाङ चिङसास्यावा। ओहाङ यहुदिया छेत्रको जुदा थाउसय र यरुसलेम सहरसय अनि समुन्द्रको छेउहाङ परओ तुरोस र सिदोन सहरसय नाःतो मान्तालम वाङ्ति ओहाङ हुमो खेइतो। 18 ओउमय येसुको स्यानराय साइलाङ र ल-लयको रोगलमसय स्याक्लाङ वाङो खेइतो। पेमालो ग्वालामइ ङाइति दुख च्यवो मान्तालममा वाङाकाय र स्याकाकाय। 19 जुदा मान्तालमइ येसुकाय धिन्सा बोःङ्नितो, धइतिदाह्य्सा येसुकसय जिःङ बाहिर ग्ल्युह्ङ्ति वाङ्धय खेतो र ओउमय जुदाले स्याकितो। चोङाइसितो र लिह्सितो ( मति ५:२-१२ ) 20 ओहाङसयको येसुइ लयको चेलालमकाय योति तोसास्यावा, “‘निङ गरिबलम आन चोङाइजेःन, धइतिदाह्य्सा ओउमयखे परमेस्वर राज्यको मान्तालम खेनय। 21 निङ देङे योङक्रायोलममा चोङाइजेःन, धइतिदाह्य्सा निङ कोस्तेनय। निङ देङे र्याओलममा चोङाइजेःन, धइतिदाह्य्सा निङ आसति निःतेनय।’ 22 यदि मान्तालमइ निङकाय ङा मान्ताको चोःकाय बिस्वास जाह्ङोझ्यान्ते हेला जाह्ङ्तेनय, इन्कार जाह्ङ्तेनय, आन पेमातो तोतेनय, र दुस्त त म्हर्ति निङकाय बेइजत जाह्ङ्तेनय त खेयाकायमा निङ आन झाक्ति चोङाइजेःन। 23 ओउत स्याउतोकहाङ आसजेःन र चोङाइति स्याह्जेःन, धइतिदाह्य्सा निङको लागि लाङकाहाङ ताह्ङो इनाम गमो मुना। ओउतहाइतिले निङकाय सतावोलमको पुर्खालमइ उहिलेको अगमबक्तालमकायमा ओउतले सताउनितो। 24 ‘तर निङ देङे धनि स्यावोलमकायखे धिक्कार! धइतिदाह्य्सा निङइ सुखको दिन दोःति खायो मुना। 25 निङ देङे कोसोलमकाय धिक्कार! धइतिदाह्य्सा निङ योङक्रायले स्याउतेनय। निङ देङे निःओलमकाय धिक्कार! धइतिदाह्य्सा निङ दुख दोःति र्यातो स्याउतेनय। 26 जब जुदा मान्तालमइ निङको बारेहाङ लुङ्ति नोःनय निङकाय धिक्कार! धइतिदाह्य्सा एतहाइतिले निङको पुर्खालमइमा स्याताहा अगमबक्तालमकाय लुङ्नितो।’” बइरिकायमा राप्सा परना ( मति ५:३८-४८ ) 27 “तर ङाको स्यानराय सायो निङकाय ङाइ तोनेनाङ्स, लयको बइरिलमकाय राप्नु, र लयकाय हेला जाह्ङोलमकाय पेतो जाह्ङ्नु, 28 निङकाय प्रःनोलमकाय आसिक बइनु, र पेमातो जाह्ङोलमकाय प्राथना जाह्ङ्नु। 29 यदि कुनय मान्ताइ नाङकाय यातज्यो गेरहाङ प्र्याङ्तेना त खेया, अर्को गेरमा हिल्ति त्याकु। यदि कुनय मान्ताइ नाङको क्रमनाय आःल्नउ त खेया, भोतोमा आःल्सा बयु। 30 निङकाय दोह थोकलम तेयामा जुदाकायले बइनु, र जब निङको मालताल कुनय मान्तालमइ आःल्नानि, आःलोलमकसय फेरि द्याःन्ति तेलाम। 31 अरुलमइ निङकाय गतहाइति बेबहार जाह्ङोते निङ झाक्तेनय, ओउतले निङइमा अरुलमकाय जाह्ङ्नु। 32 यदि निङइ लयकाय रापोलमकाय मात्र राप्तेनानि त खेया, निङकाय दोह फाइदा स्यावा र? आखिर पापिलमइमा ता लयकाय रापोलमकाय ओउतले राप्नानि! 33 फेरि लयकाय पेतो जाह्ङोलमकाय मात्र पेतो जाह्ङ्तेनानि त खेया, निङकाय दोह फाइदा स्यावा र? आखिर पापिलमइमा ता ओउतले जाह्ङ्नानि! 34 यदि पाय्क्सा खायोकाय मात्र रिन बइतेनानि त खेया, निङकाय दोह फाइदा स्यावा र? आखिर पापिलमइमा ता पाय्क्सा खायो पापिलमकाय रिन बइनानि! 35 ओउत खेल, लयको बइरिलमकाय राप्नु र ओउमयकाय पेतो बेबहार जाह्ङ्नु, र द्याःन्ति बइपाताङ त म्हर्मात रिन बइनु। ओउत जाह्ङ्तेनानि त खेया, निङ ताह्ङो इनाम दोःतेनय, र निङ जुदासय ताह्ङो प्रभु परमेस्वरको सन्तान स्याउतेनय। धइतिदाह्य्सा परमेस्वरइ बइगुनि र दुस्तकायमा योःन्ति योसास्याउना। 36 निङको लाङका आपा योःन्मय स्यावोलेखाले निङमा योःन्मय स्याउन।” अरुकाय न्याय जाह्ङ्लाम ( मति ७:१-५ ) 37 “अरुकाय गाल बइलाम, अनि परमेस्वरइमा निङकाय गाल बइतेइलि। र अरुकाय दोसि जाह्ङ्लाम, अनि परमेस्वरइमा निङकाय दोसि जाह्ङ्तेइलि। अरुकाय छेमा बइनु, अनि परमेस्वरइमा निङकाय छेमा बइसास्याउना। 38 अरु मान्तालमकाय बइनु, अनि परमेस्वरइ निङकायमा बइतेनय। परमेस्वरइपाय निःङ्ति-निःङ्ति प्रसस्त मात्राहाङ झ्युइति बइसास्याउना। गाउ नापइ अरुकाय बइतेनानि, ओउ नापइले निङमा दोःतेनय।” 39 अनि येसुइ ओउमयकाय इ ल्हाकरायमा तोसास्यावा, “यातचाक मिक च्यउमालोइ अर्को मिक च्यउमालोकाय स्याःल्ति लात्सा खायुलु। यदि ओउइ ओउत हाइनउ त खेया, निसचाकमा खाल्ताहाङ परनाच। 40 सु चेला खेयाकायमा लयको गुरु भन्दा ताह्ङ्तो स्याउलेल, तर जुदा चेलालम, जब ओउमयइ तालिम लेःति भ्यानय, अनि ओउमय लयको गुरु लेखाले स्याउनय। 41 धइति नाङइ लयको हउको मिकहाङ सिङका च्यउतेनउ, तर लयको मिकको घ्यालसिङखे च्यउतेउलु? 42 नाङइ लयको मिकको घ्यालसिङले च्यउतेउलु त खेया, ‘अ हउ य, नाङको मिकहाङ मुओ सिङका ङाकाय त्याल्सा बइचि’ त दाह्य्ति गतते तोसा खाइनउ? निङ गनमार्यालम! ङ्हाखे लयको मिकको घ्यालसिङ त्युःल्ति वाइनु, ओहाङसय लयको हउको मिकको सिङका त्याःल्साकाय पेतो च्यउसा खाइतेनानि।” सिङ र ओउको साय ( मति ७:१६-२० ; १२:३३-३५ ) 43 “पेओ सिङइ पेमालो साय सायुलु र पेमालो सिङइमा पेओ साय सायुलु। 44 गाउ सिङ खेयामा ओउको सायसय तह्य्सा खाइना। चुःसिङसय न्यामसाय काह्उल न ता ल्याङ्सिसय धाकसायले काह्उना। 45 पेओ मान्तालमइ लयको पेओ ल्हुङतुकहाङ त्युह्म्तिगमो पेओ कुराले त्याल्नानि, र पेमालो मान्तालमइ लयको पेमालो ल्हुङतुकहाङ त्युह्म्तिगमो पेमालो कुराले त्याल्नानि। धइतिदाह्य्सा दोह कुराइ ल्हुङतुक ब्लिङो मुना ओउ कुराले मान्तालम नोःनय।” किम जाह्ङो निसचाक बुद्दिमानि र मुर्ख मान्ताको ल्हाकराय ( मति ७:२४-२७ ) 46 “ङाइ तोओ कुराले जाह्ङ्तेनिलि त खेया, निङइ ङाकाय धइति ‘प्रभु, प्रभु’ त तोतेनानाङ्स? 47 ङाकहाङ वाङ्ति ङाको नोःराय सायो र ङाइ तोओ ग्याओ मान्ताखे गत स्याउना, ङाइ निङकाय तोनेनाङ्स। 48 ओउपाय यातज्यो किम जाह्ङो मान्ता लेखाले खेना, ओउइ ज्युह्म्तो द्याःउति लयको किमको तोस सिलाबाङहाङ जाह्ङाकान। जब होह्ङ्रोक तिः होति वाङा, ओउ तिःइ ओउ किमकाय ओल्सा खायुलु, धइतिदाह्य्सा ओउ किम पेतो जाह्ङो खेतो। 49 तर ङाको नोःराय साइतिमा पालन जाह्ङ्मालोखे तोस पेतो द्याःउमात किम जाह्ङो मान्ता लेखा स्याउना। जब तिः वाति होह्ङ्रोक तिः होति वाङ्ना ओउको किम ओल्ति गादाबादा त स्याउना!” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.