खबरदुत 9 - चेपाङसावलको रुवाङ परिवर्तन स्यावो ( खबरदुत २२:६-१६ ; २६:१२-१८ ) 1 ओउतोक बेलासम्ममा सावलइ प्रभुको चेलालमकाय सात्साको लागि रइसितो दाङ्क बइधय वाह्धयमुओ खेतो। ओउतझ्यान्ते ओउ ताह्ङो पुजारिकहाङ आला, 2 र लयको बारेहाङ परिचय खुलाउति दमस्कस सहरको सभाकिमलमको अगुवालमकाय चिथि लेखति बइचि त दाह्य्ति बिन्ति जाह्ङाकान। ओउइ इ कामखे प्रभुको ल्यामकाय सुइकार जाह्ङो गोय्चो अथबा मोम्चोलमकाय पक्रति यरुसलेमहाङ वान्सा चाहओझ्यान्ते जाह्ङो खेतो। 3 सावल दमस्कसको सहर द्याङ्तो दाह्सा लागओ बेलाहाङ, अचानक लाङकासय वाङो ज्योति ओउको वरिपरि प्लिह्ङा। 4 सावल साःहाङ तोना, र ओउकाय एतदाह्य्ति तोधयमुओ यातज्यो हाउनय ओउइ सायाकान, “सावल, सावल, नाङइ ङाकाय धइति ते सताउधय मुतेना?” 5 अनि ओउइ ह्वताकान, “प्रभु, नाङ सु खेसास्याउना र?” अनि ओउ हाउनय त्याङा, “ङा नाङइ सतावो येसु खेनाङ। 6 द्याह नाङ चिङ र सहरताङ आल, ओहाङ नाङइ दोह हाइसा परतेना त दाह्यो कुरा नाङकाय तोलेना।” 7 सावलकुस ब्रक आलो मान्तालमखे ग्याह्ङ्ति चिङ्ति मुआकाय, धइतिदाह्य्सा ओउमयइ हाउनयपाय सायाकानि तर सुकायमा च्यउसाले खाइनिलि। 8 सावल साःसय च्योका र लयको मिक फोलाकास, तर ओउइ दोह थोकमा च्यउसा खायुलु। ओउतझ्यान्ते ओउकुस वाङो मान्तालमइ ओउकाय क्रुतहाङ चुम्ति दमस्कसहाङ दाकाकानि। 9 अनि सुम दिनसम्म ओउ मिक च्यउमातो स्यावा, र ओउतोक बेलाहाङ ओउइ दोहमा जेउलु र तुङुलु। 10 दमस्कसहाङ हननिया त मय्ङ्ओ यातचाक बिस्वासि खेतो। प्रभुइ दर्सनहाङ ओउकाय एतदाह्य्ति तोसास्यावा, “अ हननिया!” ओउ त्याङा, “प्रभु, ङा साइधयले मुनाङ।” 11 अनि प्रभुइ ओउकाय तोसास्यावा, “तयार स्याव र ‘धेङो गल्लि’ त तोओ थाउहाङ आल, ओहाङ यहुदाको किमहाङ आल्ति तार्सस सहरसय वाङो सावल त मय्ङ्ओ यातचाक मान्ताको बारेहाङ ह्वतु। ओउ देङे ओहाङ प्राथना जाह्ङ्धय मुना। 12 हननिया त मय्ङ्ओ यातचाक मान्ता ओउकहाङ वाङो र फेरि च्यउसा खाइपनउ त दाह्य्ति ओउकहाङ क्रुत झामो दर्सन ङाइ ओउकाय छ्यानो मुना।” 13 हननियाइ जवाफ बयाकान, “तर प्रभु, ओउ मान्ता र ओउइ नाङको मान्तालमकाय यरुसलेमहाङ जाह्ङो माहा पेमालो दुस्त कामलमको बारेहाङ नाःतो मान्तालमइ ङाकाय तोओ मुना। 14 अनि ओउ नाङकाय बिस्वास जाह्ङो जुदा मान्तालमकाय पक्रसाको लागि मुख्य पुजारिलमकसय अधिकार दोःति दमस्कसहाङ वाङो मुना।” 15 तर प्रभुइ हननियाकाय तोसास्यावा, “आल, धइतिदाह्य्सा ङाको सेवा जाह्ङ्सा, र अरु जातिको मान्तालम, राजालम, र इस्राएलको मान्तालमकाय ङाको मय्ङ प्रचार जाह्ङ्साको लागि ङाइ ओउकाय छ्युह्ङो खेनाङ। 16 र ङाको मय्ङको कारनइ ओउइ गुच्युक दुख दोःसा परना त दाह्यो कुरा ङाइ ओउकाय छ्यान्लेनाङ।” 17 ओउतझ्यान्ते सावल मुओ यहुदाको किमभित्र हननिया पोका। हननियाइ सावलको तालाङहाङ क्रुत झाम्ति तोआकान, “सावल हउ य, नाङइ फेरि च्यउसा खाइतेपनउ, र पबित्र ग्वालामइ भरपुर स्याउतेपाना त दाह्य्ति ल्यामहाङ नाङको ङ्हा थासास्यावो प्रभु येसुइ ङाकाय ल्होक्सास्यावो खेना।” 18 हननियाइ ओउत तोनातासले सावलको मिकसय ङाःको काउ लेखाताह्ङो केहि थोक ग्लेआ, र ओउइ फेरि च्यउसा खायाकान। अनि ओउ चिङा र बप्तिस्मा लेःआकान। 19 ओहाङसयको ओउइ केहि जेःगा जेःआकान र ओउ बल्यो स्यावा। सावल बिस्वासिलमकुस केहि दिनच्युककाय दमस्कसहाङ मुआ। सावलइ दमस्कस सहरहाङ प्रचार जाह्ङो 20 ओहाङसयको ओउ रेह्न्तोले सभाकिमलमहाङ आल्ति “येसु परमेस्वरको चोः खेसास्याउना” त दाह्य्ति प्रचार जाह्ङाकान। 21 सावलको कुरा सायो जुदा मान्तालमइ ग्याह्ङ्ति एत दाह्याकाय, “येसुको मय्ङहाङ बिस्वास जाह्ङो मान्तालमकाय यरुसलेमहाङ सतावत जाह्ङो दोह इ मान्ताले खेल र? बिस्वासिलमकाय पक्रति मुख्य पुजारिलमकहाङ लात्ति आःल्साको लागि इहाङ वाङो दोह इले खेल र?” 22 तर सावलको प्रचार झन्-झन् जिःङकालि स्याउधय आला। येसुले ख्रिस्त खेसास्याउना त दाह्य्ति सावलइ प्रमान बयोझ्यान्ते दमस्कसहाङ याको यहुदिलमइ दोह जवाफमा बइसा खाइनिलि। 23 नाःतो दिन लोन्हे, केहि यहुदिलम मिलति सावलकाय सात्सा जालसाजि जाह्ङाकानि। 24 तर ओउमयको जालसाजिको बारेहाङ सावलइ चिःआकान। ओउकाय सात्साको लागि ओउमय दिन-याह्दिङ सहरको मुल दह्य्लोहाङ चुह्ति मुइतो। 25 तर याह्दिङको समयहाङ अरु केहि बिस्वासिलमइ ओउकाय यातज्यो दालोहाङ काआक्तिको सहरको पर्खालसय क्लाःति ल्होकाकानि। सावल यरुसलेम सहरहाङ 26 जब सावल यरुसलेमहाङ दाहा, ओउइ बिस्वासिलमकुस क्रुस्काइसा कोसिस जाह्ङाकान। तर ओउमय सावलकुस रयाकाय, धइतिदाह्य्सा ओउ दोङ्सिले प्रभुको चेला खेना त दाह्य्ति ओउमयइ बिस्वास जाह्ङ्साले खाइनिलि। 27 अनि बर्नबासइ सावलकाय मुख्य चेलालमकहाङ लात्ति आःलाकान। र गतहाइति दमस्कसताङ आल्धयमुतोकहाङ ल्यामहाङ ओउइ प्रभुकाय च्यवाकान, र प्रभुइ ओउकाय दोह त तोसास्यावा त दाह्यो कुरा बर्नबासइ ओउमयकाय तोआकान। र दमस्कसहाङ सावलइ गतहाइति साहसि स्याउति येसुको मय्ङहाङ प्रचार जाह्ङाकान त दाह्यो कुरामा ओउइ तोति बयाकान। 28 ओउतझ्यान्ते सावल मुख्य चेलालमकुस ब्रकले मुआ, र साहसि स्याउति प्रभुको मय्ङहाङ प्रचार जाह्ङ्धय ओउमयकुस यरुसलेमभरि वाह्सा फाःङाकान। 29 ओउइ ग्रिक भासा नोःओ केहि यहुदिलमकुसमा बहस जाह्ङाकान, तर ओउमयइखे सावलकाय सात्सा जालसाजि जाह्ङाकानि। 30 जब बिस्वासिलमइ ओउ कुरा चिःआकानि, ओउमयइ सावलकाय कयसरिया सहरहाङ आःलाकानि र ओहाङसय ओउको लयको गाउ तार्ससताङ ल्होकाकानि। 31 ओउतोक बेलाहाङ जुदा यहुदिया, गालिल र सामरिया छेत्रको मन्दलिलमहाङ सतावतलम स्याउसा फेओझ्यान्ते बिस्वासिलम धोमाइतो याकाकाय। ओउमयइ परमेस्वरकाय मान-सम्मान जाह्ङाकानि, अनि पबित्र ग्वालामकसय सान्तवना दोःति सङ्ख्याहाङ नाःधय आलाकाय। पत्रुसइ एनियास र दोर्कासकाय स्याक्ताको 32 पत्रुसइ वरिपरिको जुदा छेत्रहाङ यात्रा जाह्ङाकान, र यात्रा जाह्ङ्तोकहाङ लुद्दा गाउहाङ याको बिस्वासिलमकहाङ दाहा। 33 ओहाङ ओउइ एनियास त मय्ङ्ओ यातचाक मान्ताकाय क्रुसाकान, ओउखे कुइच्या रोगइ ङाःयोझ्यान्ते आथ बर्सहाङसय न्हापसयले च्योक्सा खायो नाःआक्ल। 34 पत्रुसइ ओउकाय तोआकान, “एनियास, येसु ख्रिस्तइ नाङकाय स्याक्ताक्सास्याउना। च्योक अनि लयको न्हाप मिलाउ।” ओउच्युक खेरले ओउ स्याक्ति चिङमाआ। 35 अनि लुद्दा गाउ र सारोन त तोओ छेत्रहाङ याको नाःतो मान्तालमइ एनियासकाय इताङ-उताङ वाह्तिमुओ च्यवाकानि, र ओउमयइ प्रभु येसुहाङ बिस्वास जाह्ङाकानि। 36 योप्पा त तोओ सहरहाङ तबिता त मय्ङ्ओ यातचाक बिस्वासि हउद्याङ खेतो। (ग्रिक भासाहाङ ओउको मय्ङ दोर्कास त खेतो, र ओउको मानेखे “कस्याः” खेना।) ओउइ लयको जुदा समय पे-पेओ काम जाह्ङ्ति र गरिबलमकाय सहयोग जाह्ङ्ति हुतुतो। 37 पत्रुस लुद्दाहाङ मुतोकहाङ ओउ मोम्चो बिरामि स्याउति सिआ। र ओउको म्हाङकाय जेसाक्तिको पाह्म्साको लागि तयार जाह्ङ्ति चोताको कोथाहाङ गमाकानि। 38 लुद्दा गाउखे योप्पा सहर द्याङ्तोले खेतो। ओउतझ्यान्ते जब योप्पाको बिस्वासिलमइ पत्रुस लुद्दाहाङ मुना त दाह्य्ति चिःआकानि, ओउमयइ निसचाक मान्ताकाय “अ हजुर, रेह्न्तोले निकहाङ वाङ्सास्याउपाना” त दाह्य्ति बिन्ति जाह्ङ्लाङ ल्होकाकानि। 39 ओहाङसयको पत्रुस ओउनिसकुस आला, र जब ओउ ओहाङ दाहा, ओउकाय त्याःउको चोताहाङ आःलाथय। ओहाङ नाःतो राङ्गि मोम्चोलम र्याधयमुओ खेइतो र दोर्कास स्याक्ति मुतोकहाङ लयमयको लागि ओउइ रुप्तिबयो लावनायलम पत्रुसकाय छ्यानाकानि। 40 पत्रुसइ ओउमय जुदाकाय कोथासय बाहिरताङ ल्होकाकान, अनि क्र्योःङ घ्रुस्ति प्राथना जाह्ङाकान र म्हाङकाय तोआकान, “अ तबिता, च्योक!” ओउइ लयको मिक फोलाकान, अनि जब ओउइ पत्रुसकाय च्यवाकान, ओउ च्योक्ति च्युःङ्तिमुआ। 41 पत्रुसइ ओउको क्रुतहाङ चुम्ति ओउकाय चिङताकाकान। अनि जुदा राङ्गि मोम्चोलम र बिस्वासिलमकाय भित्र गोताक्तिको तबिताकाय जिउदोले ओउमयको जिम्मा लावाकान। 42 इ कुराखे योप्पा सहरहाङ याको जुदा मान्तालमइ चिःआकानि, र नाःतो मान्तालमइ प्रभुहाङ बिस्वास जाह्ङाकानि। 43 पत्रुस नाःतो दिनसम्म योप्पाहाङले छालाको काम जाह्ङो सिमोन त मय्ङ्ओ मान्ताको किमहाङ मुआ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.