खबरदुत 5 - चेपाङहननिया र सफिरा पय्क्चाको घतना 1 हननिया त मय्ङ्ओ अर्को यातचाक मान्ता खेतो, ओउइ लयको माचा सफिराकुस मिलति लयको सम्पतिको यात भाक खेत विःनाकान। 2 तर लयको माचाको सहमतिहाङले केहि थेपोखे लयको लागि गमाकान, अनि अरु थेपोखे मुख्य चेलालमकाय आःल्ति ल्हाआकान। 3 अनि पत्रुसइ ओउकाय तोआकान, “अ हननिया, नाङइ लयकाय अधिनहाङ गम्ताक्साको लागि धइति सय्तानकाय अनुमति बइतेआकान? नाङइ पबित्र ग्वालामकाय धइति माःतेआकान? धइतिदाह्य्सा नाङइ लयको लागि केहि थेपो गमाक्तिको जुदा थेपो उच्युकले खेना त दाह्य्ति इहाङ वान्तेआकान। 4 दोह ओउ खेत विःन्सासय ङ्हामा नाङकोले सम्पति खेआक्ल र? अनि खेत विःनाक्तिको वाङो थेपोमा नाङको अधिकारहाङले स्यावाक्ल र? गतहाइति नाङइ एतताह्ङो कुरा लयको ल्हुङतुकहाङ सोचतेआकान? नाङइ मान्तालमकायपाय खेलेल, तर परमेस्वरकायले माःतेआकान!” 5 जब हननियाइ इ कुरा सायाकान, ओउ साःहाङ प्लाहा, र सिमाआ। अनि इ घतनाको बारेहाङ सायो जुदा मान्तालमको ल्हुङतुकहाङ रइसितो स्यावा। 6 अनि केहि जवान गोय्चोलम ङ्हा वाङाकाय, र ओउको म्हाङकाय नायइ पोतोलाकानि, अनि बाहिर लात्ति आःलाक्तिको पाह्माकानि। 7 अनि लगभग सुमघन्त लोन्हे ओउको माचा सफिरामा पोक्तिवाङा, तर ओउको पाचाको घतनाको बारेहाङ ओउइ दोहमा चिःओ नाःआक्ल। 8 पत्रुसइ ओउकाय ह्वताथय, “ङाकाय तोचि, दोह नाङ र नाङको पाचाइ उच्युक थेपोहाङले निङ्जिको खेतराङ विःनो खेतेनाज र?” ओउ त्याङा, “मा, ओउच्युकहाङले विःनालाङ्चु।” 9 पत्रुसइ ओउकाय तोआथय, “प्रभुको ग्वालामको जाच जाह्ङ्साकाय निङ्जि गतहाइतिते सहमत स्याउतेआकाज? योउ, नाङको पाचाकाय पाह्मो मान्तालम देङे दह्य्लोहाङले दाहाकाय, र ओउमयइ नाङकायमा ओउतहाइतिले पाह्म्लाङ लात्ति आःल्तेना।” 10 ओउतोक बेलाहाङले सफिरामा पत्रुसको ङ्हा प्लाहा र सिमाआ। अनि जवान गोय्चोलम भित्र पोक्ति वाङाकाय, र ओउकाय सिओ च्यउति ओउको म्हाङकाय बाहिरताङ लात्ति आःलाकानि र ओउकायमा ओउको पाचाकाय पाह्मो तेसहाङले ओउको छेउसय पाह्माकानि। 11 अनि मन्दलिको जुदा बिस्वासिलम र इ घतनाको बारेहाङ सायो जुदा मान्तालम माहा जोक्तोले रयाकाय। ग्याह्ङ्सिओ कामलम र चिनोलम 12 मुख्य चेलालमइ मान्तालमको माझहाङ नाःतो ग्याह्ङ्सिओ कामलम र चिनोलम जाह्ङाकानि। र जुदा बिस्वासिलम मन्दिरको सोलोमनको पिन्धि त तोओ थाउहाङ क्रुस्काइतो। 13 बाहिरको अरु मान्तालमखे सुइमा ओउमयकुस मिललाङ वाङ्सा साहस जाह्ङ्निलि, तर जुदा मान्तालमइ ओउमयकाय मान जाह्ङ्नितो। 14 नाःतो गोय्चो र मोम्चोलमइ प्रभुहाङ बिस्वास जाह्ङाकानि, र ओउमयमा बिस्वासिलमको समुहहाङ पाःआकाय। 15 मान्तालमइ बिरामिलमकाय लात्ति वान्नितो र ल्यामहाङ न्हाप न्हापाक्तिको ओहाङ इस्नितो। ओउखे पत्रुस वाह्धार्ना ओउको क्वालाङ बिरामिलमकहाङ परति बिरामिलम स्याक्पनय त दाह्य्ति गमो खेतो। 16 यरुसलेम वरिपरिको गाउ-सहरलमसय नाःतो मान्तालमइ बिरामिलम र दुस्त ग्वालामइ ङाःयो मान्तालमकाय लात्ति वानाकानि, र ओउमय जुदाले स्याकाकाय। मुख्य चेलालमकाय सतावत वाङो 17 ताह्ङो पुजारि र ओउको जुदा सदुकि होयालमइ मुख्य चेलालमकाय आन चोःर्सा फाःङाकानि। 18 ओउमयइ मुख्य चेलालमकाय पक्रआक्तिको झेलकनहाङ कुङाकानि। 19 तर ओउ याह्दिङ प्रभु परमेस्वरको यातज्यो लाङकादुत वाङ्ति झेलकनको दह्य्लो फोलाकान, र ओउमयकाय बाहिरताङ ग्ल्युन्ति वानाकान। अनि लाङकादुतइ ओउमयकाय तोआथास, 20 “आल्न, र मन्दिरको आङ्गनहाङ चिङ्न, अनि मान्तालमकाय इ नया रुवाङको बारेहाङ जुदाले तोतिबइनु।” 21 जब ओउमयइ इ कुरा सायाकानि, ओउमय बिहान सइबरले मन्दिरको आङ्गनहाङ पोकाकाय र मान्तालमकाय स्यान्सा फाःङाकानि। ताह्ङो पुजारि र ओउको होयालमइ इस्राएलको जुदा अगुवालमकाय ताह्ङो सभाहाङ गोताकानि। अनि झेलकनहाङ कुङ्तिगमो मुख्य चेलालमकाय सभाहाङ वान्साको लागि ओउमयइ आग्या जाह्ङाकानि। 22 तर जब मन्दिरको पालेलम झेलकनहाङ दाहाकाय, ओउमयइ ओहाङ मुख्य चेलालमकाय च्यउनिलि। ओउतझ्यान्ते ओउमय सभाहाङ दाहाकाय र एतदाह्य्ति तोआकानि, 23 “जब नि झेलकनहाङ दाहालाङ्सु, झेलकनहाङ पेतोकुस ताल्चा लावति गमो र पालेलम दह्य्लोहाङ चिङ्तिमुओ निइ ङाःयालाङ्सु। तर जब निइ दह्य्लो फोलालाङ्सु, निइ भित्र सुकायमा च्यउङसुलु!” 24 जब मुख्य पुजारिलम, र मन्दिरको पालेलमको कप्तानलमइ इ खबर सायाकानि, द्याह दोह स्याउना खेचा त दाह्य्ति ओउमय माहा जोक्तो लिह्लाङ फाःङाकानि। 25 अनि कुनय यातचाक मान्ता भित्र पोक्ति वाङा र ओउमयकाय तोआथास, “साइनु, निङइ झेलकनहाङ कातिगमो मान्तालमपाय मन्दिरको आङ्गनहाङ चिङ्ति मान्तालमकाय स्यान्धय मुनय।” 26 अनि कप्तानइ लयको मन्दिरको पालेलमकाय लात्ति मुख्य चेलालमकाय पक्रलाङ आला, र दोह दुखमा बइमात पक्रति वानाकानि, धइतिदाह्य्सा मान्तालमइ बाङइ आप्ति सात्सा खाइनानि त दाह्य्ति ओउमय रइतो। 27 ओउमयइ मुख्य चेलालमकाय भित्र पोस्ति वानाकानि र ताह्ङो सभाको ङ्हा चिङताकाकानि, र ताह्ङो पुजारिइ ओउमयकाय थत्ति तोआथास, 28 “निइ येसुको मय्ङहाङ फेरि सुकायमा दोहमा स्यान्लाम त दाह्य्ति निङकाय आग्या जाह्ङ्नेआलाङ्सु, तर योनु, निङइ इ दोह हाइतेआकानि! निङइपाय यरुसलेमभरिले लयको स्यानराय ब्लिङ्ताक्तेआकानि, झन् येसुकाय सातो गालमा निकाय बइसा कोसिस ते जाह्ङ्तेआकानि।” 29 तर पत्रुस र अरु मुख्य चेलालमइ जवाफ बयाकानि, “मान्तालमइ तोओसयपाय परमेस्वरइ तोसास्यावोले निइ साइनाङ्सु। 30 निङइ क्रुसहाङ योकोति सातो येसुकाय निको पुर्खालमको परमेस्वरइ सिओसय उह्ति च्योक्ताक्सास्यावो मुना। 31 अनि परमेस्वरइ येसुकाय राजकुमार र मुक्तिदाताको रुपहाङ लयको ङोइसयको सम्मानित थाउहाङ गम्सास्यावो मुना। इस्राएलको मान्तालमइ लयको पापकाय चिःति पस्ताप जाह्ङाक्तिको पाप छेमा दोःपनय त दाह्य्ति परमेस्वरइ एत जाह्ङ्सास्यावो खेना। 32 नि इ कुराको साछि खेनाङ्सु, ओउतले लयको आग्या पालन जाह्ङोलमकाय परमेस्वरइ बइसास्यावो पबित्र ग्वालाममा इ कुराको साछि खेसास्याउना।” 33 जब यहुदि सभाको सदस्यलमइ इ कुरा सायाकानि, ओउमय आन रिस वाङाकाय र मुख्य चेलालमकाय सात्सा निर्नय जाह्ङाकानि। 34 तर ओहाङ यातचाक गमलिएल त मय्ङ्ओ फरिसि खेतो र ओउ धर्मगुरु ताह्ङो सभाको सदस्यमा खेतो, र ओउकाय जुदा मान्तालमइ मान जाह्ङ्नितो। ओउ चिङा र केहि समयको लागि मुख्य चेलालमकाय बाहिर ग्ल्युन्सा आग्या जाह्ङाकान। 35 ओहाङसयको ओउइ ताह्ङो सभाको मान्तालमकाय तोआकान, “अ इस्राएलि होयालम, निङइ इ मान्तालमकाय दोह हाइसा बोःङ्धय मुतेनय, ओउ कुराहाङ होसियार स्याउन। 36 केहि समय ङ्हा थुदास त मय्ङ्ओ यातचाक मान्ताइ लयकाय ताह्ङो मान्ता त दाह्य्ति तोआकास, र लगभग प्लय सय जनाच्युक मान्तालम ओउको समुहहाङ वाङाकाय। तर ओउकाय साताथय, र ओउको लोन्हे गुह्ल्ति वाहोलममा छरपस्त स्यावाकाय, अनि जुदा आन्दोलनले मिह्तिवाया। 37 ओहाङसय मान्ता थेङो समयहाङ गालिलको यहुदा त तोओ मान्ता थालाङ वाङा, र नाःतो मान्तालम ओउको लोन्हे गुह्ल्ति वाहाकाय। तर ओउकायमा साताथय, र ओउको लोन्हे गुह्ल्ति वाहोलममा छरपस्त स्यावाकाय। 38 ओउतझ्यान्ते देङेको इ बिसयहाङखे ङाइ निङकाय सल्लाह बइनेनाङ्स, इ मान्तालमको बिरोतहाङ दोहमा पेमातो हाइलाम, बरु ओउमयकाय फेति बइनु। यदि ओउमयइ लयमयको योजना अनुसारले इ काम जाह्ङो खेयाकाय, ओउ लयले मिह्ति ज्याल्लेना। 39 तर यदि इ काम जाह्ङ्साकाय परमेस्वरइले आग्या जाह्ङ्सास्यावो खेयापाय, निङइ ओउमयकाय रोकसा खाइतेनिलि। निङपाय परमेस्वरको बिरोत जाह्ङोलेखाले स्याउतेनय।” यहुदि सभाको सदस्यलमइ गमलिएलको सल्लाह ग्याआकाय। 40 ओउमयइ मुख्य चेलालमकाय भित्र गोताकानि र ओउमयकाय कोर्राइ स्रापाकानि। अनि द्याह निङइ येसुको मय्ङहाङ सुकायमा दोहमा तोलाम त दाह्य्ति आग्या जाह्ङाक्तिको फेति ल्होकाकानि। 41 अनि मुख्य चेलालमखे “परमेस्वरइ निकाय येसुको मय्ङहाङ अपमान सहसा ज्योतो जाह्ङ्सास्यावा” त दाह्य्ति आन आसति ताह्ङो सभासय बाहिर ग्ल्युह्ङ्ति पाह्याकाय। 42 ओहाङसय ओउमयइ दिनमले मन्दिरहाङ र मान्तालमको किम-किमहाङ आल्ति येसुले मुक्ति बइसाखेओ ख्रिस्त खेसास्याउना त दाह्य्ति परमेस्वरको पेओ खबर प्रचार जाह्ङ्सा गलमा फेनिलि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.