Biblia Todo Logo
Bìoball air-loidhne

- Sanasan -

खबरदुत 28 - चेपाङ


पावलकुस नि माल्‍ताको तापुहाङ मुओ

1 नि पेतोकुसिले पाखाहाङ दाहापछि ओउ तापुखे माल्‍ता खेना त दाह्‍य्‌ति निइ तह्‍य्‌सा खायालाङ्‍सु।

2 ओउ तापुको रइथाने मान्‍तालमइ निकाय योःन्‌ति बेबहार जाह्‍ङाताङ्‍सु। ओउबेलाहाङ तिः वाङ्‌ति न्‍यामझ्‍युङतो स्‍यावोझ्‍यान्‍ते म्‍हेः म्‍हुत्‍ति बयाताङ्‍सु, र स्‍वागत जाह्‍ङाताङ्‍सु।

3 पावलइ गोसिङ हुम्‍ति यात तोक जाह्‍ङाकान र ओउ वान्‍ति म्‍हेःहाङ काआकान, र म्‍हेःको धाहोको कारनइ ओहाङसय यातज्‍यो बिखालु रु ग्‍ल्‍युह्‍ङ्‌ति वाङ्‌ति ओउको क्रुतहाङ पोःलोआथय।

4 ओहाङको रइथाने मान्‍तालमइ पावलको क्रुतहाङ बिखालु रुइ पोःलोति गमो च्‍यउति लयमय एतदाह्‍य्‌ति तोकायाकाय, “इ मान्‍ताखे पक्‍कामा ज्‍यानमारा स्‍याउसा परना, समुन्‍द्रसयपाय दल्‍तिले वाङा तर न्‍यायको देउताइखे इकाय सातोले स्‍यावा।”

5 तर पावलइखे ओउ रुकाय म्‍हेःहाङ ह्राह्‍न्‌ति काआकान, र ओउकाय दोह पेमातोमा स्‍याउलेल।

6 ओउ मान्‍तालमइखे पावलको क्रुत माङ्‌ति अचानकले कोह्‍न्‌ति सिलेना या त म्‍हर्‌ति ल्‍युह्‍ङ्‌ति मुआकाय। तर ज्‍याःङ्‍तो समयसम्‍म ल्‍युह्‍ङ्‌तिमा ओउकाय दोह पेमातोमा स्‍याउमालो च्‍यउति, “इ मान्‍तापाय देउताले खेना” त दाह्‍य्‌ति ओउमय दाह्‍याकाय।

7 ओहाङ नि मुओ थाउ द्‍याङ्‍तो पब्‌लियस त मय्‍ङ्‍ओ ओउ तापुको यातचाक मुखियाको राङलम खेतो। ओउइ निकाय म्रोतिले लयको किमहाङ स्‍वागत जाह्‍ङाताङ्‍सु, र सुम दिनसम्‍म नि ओउको पाहुना स्‍याउति मुआलाङ्‍सु।

8 पब्‌लियसको आपाखे अयो र न्‍योलक्‍लिः ओत्‍ति बिरामि स्‍यावोझ्‍यान्‍ते न्‍हापहाङ एङ्‌तिमुओ खेतो। पावल ओउको कोथाहाङ पोकाक्‍तिको ओउकाय प्राथना जाह्‍ङाकान, र ओउको तालाङहाङ लयको क्रुत झाम्‍ति ओउकाय स्‍याक्‍ताकाकान।

9 एतहाइति स्‍याको चिःति ओउ तापुहाङ याको जुदा बिरामिलम वाङाकाय र पावलइ ओउमयकायमा स्‍याक्‍ताकाकान।

10 ओउमयइ निकाय नाःतो थोकलम बइति मान जाह्‍ङाताङ्‍सु, र जब नि ओउ थाउकाय फेति तिः जहासहाङ लह्‍न्‌ति वाह्‍सा तयार स्‍यावालाङ्‍सु, ओउमयइ निको लागि ल्‍यामहाङ चाहओ थोकलममा तिः जहासहाङ काति ल्‍होकाताङ्‍सु।


पावलकुस नि माल्‍ताको तापुसय रोम सहरताङ आलो

11 माल्‍ता तापुहाङ मुओ सुम महिना लोन्‍हे, अलेक्‍जेन्‍द्रिया सहरसय वाङ्‌ति झ्‍युङकाले समयसम्‍म माल्‍ताहाङले मुओ यातज्‍यो तिः जहासहाङ नि लह्‍नालाङ्‍सु। ओउ तिः जहासको ङ्‍हाहाङखे जिउस देउताको जउल्‍या चोःनिस क्‍यास्‍तर र पोलक्‍स निसपुःचाको अङ्‌सि खोपओ खेतो।

12 निखे यात्रा जाह्‍ङ्‌ति सुराकुसाय त तोओ मयो सहरहाङ दाह्‍ति सुम दिनसम्‍म ओहाङले मुआलाङ्‍सु।

13 अनि ओहाङसय आल्‍ति नि रेगियन त तोओ सहरहाङ दाहालाङ्‍सु। र स्‍याह्‍ङ्‍लो पल्‍तखे दखिनसय माःरु वाङोझ्‍यान्‍ते चित्‍सयलोखे नि पतिओलि सहरहाङ दाहालाङ्‍सु।

14 ओहाङ निइ प्रभुहाङ बिस्‍वास जाह्‍ङो केहि हउचोङ-पुःचोङलमकाय क्रुसालाङ्‍सु, र ओउमयइ निकाय यात साताच्‍युककाय लयमयकुस मुसाको लागि बिन्‍ति जाह्‍ङाताङ्‍सु। अनि यात सातालोन्‍हे नि रोमताङ वाङालाङ्‍सु।

15 अनि प्रभुहाङ बिस्‍वास जाह्‍ङो केहि हउचोङ-पुःचोङलमखे नि वाङ्‍धयमुओ चिःति निकाय क्रुस्‌लाङ अप्‍पियसको बजारसम्‍म वाङाकाय र अरुखे सुम भत्‍ति-पसल त तोओ बजारसम्‍म वाङाकाय। पावलइ ओउमयकाय च्‍यवापछि परमेस्‍वरकाय धन्‍नेबाद बयाकान र नाःतो साहस दोःआ।


पावल रोम सहरहाङ

16 जब नि रोमहाङ दाहालाङ्‍सु, पावलकाय यातचाक सिपाहिको वास्‍ताहाङ एकानले मुसा अनुमति बयाथय।

17 सुम दिन लोन्‍हे पावलइ ओहाङको रइथाने पाको अगुवालमकाय क्रुस्‍काइसाको लागि गोताकान। ओउमय यात थाउहाङ हुमापछि पावलइ ओउमयकाय तोआकान, “ङाको इस्राएलि होयालम, ङाइ निको मान्‍तालमको बिरोतहाङ अथबा निको पुर्‌खालमकसय दोःओ रितिथितिको बिरोतहाङ दोह पेमातोमा जाह्‍ङो नाःङल। तर ङाकाय यरुसलेमहाङ पक्रआक्‍तिको रोमि सासकलमकहाङ सुम्‍पआताङ्‍स।

18 केरकार जाह्‍ङ्‌ति भ्‍याआपछि ओउमयइ ङाकाय फेतिल्‍होक्‍सा बोःङो खेइतो, धइतिदाह्‍य्‌सा ङाइ सिसासम्‍मको दोह पेमातो जाह्‍ङोमा ओउमयइ ङाइसा खाइनिलि।

19 तर रोमि सासकलमइ ङाकाय फेओ पाको अगुवालमइ चाहआकिलि, ओउतझ्‍यान्‍ते ङाइ लयको मुद्‍दा छिनोफानो जाह्‍ङ्‌ति बइसाको लागि रोमि माहाराजाकाय बिन्‍ति जाह्‍ङ्‍सा कर लागआलाङ, र ङा लयको मान्‍तालमकाय दोह गाल बइसामा चाहओ नाःआक्‍ङल खेतो।

20 ओउतझ्‍यान्‍ते ङाइ निङकाय क्रुस्‍सा र इ कुरा तोसाको लागि निङकाय गोतो खेनाङ। नि इस्राएलिलमइ आसा-भरोसा जाह्‍ङो वाङ्‍साखेओ ख्रिस्‍तकहाङ ङाइ बिस्‍वास जाह्‍ङोझ्‍यान्‍ते देङे ङा इ साङ्‍लाहाङ पाःन्‌तिमुओ मुनाङ।”

21 ओउमयइ पावलकाय तोआथय, “निइपाय नाङको बारेहाङ यहुदियासय दोह चिथिमा दोःओ नाःङसुलु, र इहाङ दाह्‍तिवाङो निको सु मान्‍तालमइमा नाङको बिरोतहाङ दोह पेमातोमा नोःओ नाःइलि।

22 तर निखे नाङको बिचारलम साइसा चाहनाङ्‍सु, धइतिदाह्‍य्‌सा जुदा थाउलमहाङ मान्‍तालमइ नाङको इ नया समुहको बिरोतहाङ नोःओ कुराखे निइ चिःओ मुनाङ्‍सु।”

23 ओहाङसयको ओउमयइ पावलको कुरा साइसाको लागि अर्‌को दिन दोकाकानि, र ओउ दिनहाङ ओउको कुरा साइलाङ नाःतो यहुदिलम ओउ मुओ थाउहाङले वाङाकाय। ओउइ बिहानहाङसय राह्‍मसम्‍मले परमेस्‍वरको राज्‍यको बारेहाङ ओउमयकाय स्‍यानराय बयाकान, अनि परमेस्‍वरइ मोसा दुवारा बइसास्‍यावो नेम-कानुनसय र अगमबक्‍तालमको कितापलमसय तोति येसुको बारेहाङ ओउमयकाय चिःताक्‍सा कोसिस जाह्‍ङाकान।

24 ओउइ तोओ कुराहाङ गच्‍युक मान्‍तालमइ बिस्‍वास जाह्‍ङाकानि, तर गच्‍युक मान्‍तालमइखे बिस्‍वास जाह्‍ङ्‌निलि।

25 ओउमय यात-अर्‌काको कुराहाङ सहमत स्‍याउसा खाइनिलि, ओउतझ्‍यान्‍ते ओउमय ओहाङसय ग्‍ल्‍युह्‍ङ्‌ति पाह्‍य्‌धय मुतोकहाङ पावलइ ओउमयकाय अन्‍तिम कुरा तोआथास, “पबित्र ग्‍वालामइ यसय्‍या अगमबक्‍ता दुवारा निङको पुर्‌खालमकाय तोसास्‍यावो कुरा दोङ्‌सिले सत्‍य खेना।

26 धइतिदाह्‍य्‌सा एतदाह्‍य्‌ति तोओ मुना, ‘आल, र इ मान्‍तालमकाय तोउ— “निङइ साइसापाय साइतेनानि, तर गलमा चिःतेनिलि। निङइ योसापाय योतेनानि, तर गलमा च्‍यउतेनिलि।

27 धइतिदाह्‍य्‌सा इ मान्‍तालमको ल्‍हुङतुक चाक्‍तो स्‍यावो मुना, र ओउमयको नो साइसा खाइमातो दुन्‍तो स्‍यावो मुना, र ओउमयको मिक च्‍यउसा खाइमातो राक्‍तिगमो मुना। ओउत खेमाया, ओउमयको मिकइ च्‍यउचानि खेतो, र ओउमयको नोइ साइचानि खेतो, र ओउमयको ल्‍हुङतुकइ चिःचानि खेतो। अनि ओउमय ङाकताङ द्‍याह्‍न्‌चय खेतो, र ङाइ ओउमयकाय स्‍याक्‍ताक्‍चाङ खेतो।”’”

28 अनि पावलइ कुरा द्‍युम्‍ताक्‍धय एत तोआकान, “ओउतझ्‍यान्‍ते निङइ इ कुरा चिःति गम्‍नु, द्‍याह परमेस्‍वरको मुक्‍तिको आखर अरु जातिको मान्‍तालमकहाङ ल्‍होको मुना, र ओउमयइले साइनानि।”

29 [पावलइ इ कुरा तोति भ्‍याआपछि, यहुदिलम लयमयले बाद-बिबाद जाह्‍ङ्‍कायधय ग्‍ल्‍युह्‍ङ्‌ति पाह्‍याकाय।]

30 पावल रोमहाङ निस बर्‌ससम्‍म लयको थेपो खर्‌च जाह्‍ङ्‌तिले मुआ, अनि ओउइ ओहाङ लयकाय क्रुस्‌लाङ वाङो जुदा मान्‍तालमकाय स्‍वागत जाह्‍ङुतो।

31 ओउइ परमेस्‍वरको राज्‍यको बारेहाङ साहसकुसि प्रचार जाह्‍ङुतो र प्रभु येसु ख्रिस्‍तको बारेहाङ स्‍यानुतो, तर सुइमा ओउकाय रोकसा कोसिस जाह्‍ङाक्‍निलि खेतो।

© 2024 (Active), Mother Tongue Translators Society and Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan