खबरदुत 24 - चेपाङफेलिक्सको अदालतहाङ पावलकाय गाल बयो 1 पोङा दिन लोन्हे ताह्ङो पुजारि हननिया केहि पाको अगुवालम र तर्तुल्लस त मय्ङ्ओ वकिल लात्ति कयसरियाहाङ दाहा। ओउमय ताह्ङो हाकिमि फेलिक्सकहाङ आलाक्तिको पावलको बिरोतहाङ मुद्दा बयाकानि। 2 जब पावलकाय अदालतहाङ वानाकानि, अनि तर्तुल्लसइ पावलको बिरोतहाङ फेलिक्सको ङ्हा एत दाह्य्ति नोःसा फाःङाकान— “माननिय फेलिक्स, नाङइ बुद्दिमानि स्याउति निकाय सासन जाह्ङ्सास्यावोझ्यान्ते, निमा धोमाइतोकुसि स्याक्सा दोःओ मुनाङ्सु, र नाङइ नाःतो पेओ कामलम जाह्ङ्ति निको देसकाय सहयोग जाह्ङ्सास्यावो मुना। 3 निइ इ कुराको गल खेयाकायमा गाहाङ खेयाकायमा स्वागत जाह्ङ्नाङ्सु, र नाङकाय धन्नेबाद बइसामा चाहनाङ्सु। 4 ङा नाङको नाःतो समय लेःसा चाहङल, ओउतझ्यान्ते निको केहि कुरालम साइति बइसास्याउपा त दाह्य्ति ङा नाङकाय बिन्ति जाह्ङ्सा चाहनाङ। 5 निइ इ मान्ताकाय समस्या वानो मान्ता, र सङ्सारभरिको यहुदिलमको माझहाङ उपद्र जाह्ङो मान्ताको रुपहाङ ङाःयालाङ्सु। इखे नासरि त तोओ समुहको अगुवामा खेना, ओउमयइखे मान्तालमकाय स्याताहा स्यानराय स्यान्नितो। 6 इ मान्ताइ मन्दिरकाय अपबित्र जाह्ङ्सा बोःङ्धय खेतो, ओउतझ्यान्ते निइ इकाय पक्रआलाङ्सु। निइ इकाय निको नेम-कानुन अनुसारले न्याय जाह्ङ्सा बोःङो खेङसुतो, 7 तर सेनाको हाकिमि लुसियस वाङ्ति ओउकाय जबरजस्तिले निकसय लाति आःल्सास्यावा, र ओउको बिरोतहाङ गाल बयोलमकाय नाङकहाङ वाङ्सा आग्या जाह्ङ्सास्यावा। 8 यदि नाङइ इकाय ह्वत्सास्याउना त खेयाकायमा, निइ इकाय गाल बयो जुदा कुरालम सत्य खेना त दाह्य्ति नाङ लयइले चिःसास्याउलेना।” 9 तर्तुल्लसइ तोओ जुदा कुरा सत्यले खेना त दाह्य्ति पाको अगुवालमइमा सहमत जाह्ङाकानि। पावलइ लयको हक लेःति फेलिक्सकाय तोओ 10 ताह्ङो हाकिमि फेलिक्सइ पावलकाय क्रुतइ इसारा जाह्ङ्ति नोःअ त तोआकान, अनि पावल दाह्या, “अ हजुर, नाःतो समयहाङसय नाङइ इ देसको यहुदिलमको लागि न्याय जाह्ङ्धय वाङ्सास्यावो मुना त दाह्यो कुरा ङाइ चिःओ मुनाङ, ओउतझ्यान्ते ङाइ लयको बारेहाङ नाङकाय म्रोतिले तोनेनाङ। 11 ङा यरुसलेमको मन्दिरहाङ भक्ति जाह्ङ्लाङ आलो बाह्र दिन भन्दा नाःतो स्यावो नाःल त दाह्यो कुरा नाङ लयइले चिःसा खाइसास्याउना। 12 ङाकाय गाल बयो सु यहुदिलमइमा ङाइ मन्दिरहाङ कुनय मान्ताकुसि बाद-बिबाद जाह्ङो च्यवो नाःइलि, न ता ङाइ सभाकिमलमहाङ अथबा सहरको कुनय थाउहाङ मान्तालम हुम्ति उपद्र जाह्ङोले ओउमयइ च्यवाकानि। 13 ओउमयइपाय देङे ङाकाय गाल बयो कुराको प्रमान बइसामा खाइनिलि। 14 तर इ कुराकोखे ङाइ सुइकार जाह्ङ्नाङ, ओउमयइ स्याताहा स्यानराय त दाह्य्ति तोओ स्यानरायको पालन जाह्ङ्तिले ङाइ निको पुर्खालमको परमेस्वरको सेवा जाह्ङ्नाङ। अनि ङाइ परमेस्वरइ मोसा दुवारा बइसास्यावो नेम-कानुनहाङ लेखओ जुदा कुरालमहाङ र अगमबक्तालमको कितापलमहाङमा बिस्वास जाह्ङ्नाङ। 15 परमेस्वरइ धर्मि र अधर्मि जुदाकायले सिओसय उह्ति च्योक्ताक्सास्याउना त दाह्यो कुराहाङ इमयइ बिस्वास जाह्ङोलेखाले ङाइमा परमेस्वरहाङ ओउ कुराको बिस्वास जाह्ङ्नाङ। 16 ओउतझ्यान्ते ङाइ परमेस्वर र मान्तालमको ङ्हा सधय सुद्ध मनको स्याउसा कोसिस जाह्ङ्नाङ। 17 यरुसलेम फेति बाहिर मुओ नाःतो बर्स लोन्हे, ङा लयको मान्तालमको लागि केहि थेपो बइलाङ र परमेस्वरको लागि भोकलम बइलाङ ङा यरुसलेम आलो खेङतो। 18 सुद्ध स्यावो काम द्योकाक्तिको ङाइ इ कामलम जाह्ङ्ति मुतोक बेलाहाङ ङाकाय गाल बयो यहुदिलमइ मन्दिरहाङ ङाःयाताङ्स। ओहाङ ङाको वरिपरि दोह मान्तालमको हुलमा नाःआकिलि र दोह उपद्र स्यावोमा नाःआक्ल। 19 ओउ बेलाहाङ ओहाङ एसिया इलाकासय वाङो केहि यहुदिलममा खेइतो, यदि ङाको बिरोतहाङ ओउमयकुस केहि कुरा खेयाकायपाय ओउमयमा इहाङ स्याउचय खेतो। 20 अथबा इहाङ मुओ मान्तालमकायले ह्वत्सास्याउपाना, ओउमयको ताह्ङो सभाहाङ ङाको जाच जाह्ङ्धार्ना ङाको दोह गल्तिमा ओउमयइ च्यउनिलि त दाह्यो कुरा ओउमयइ तोसा खाइनानि। 21 ङाइ अदालतहाङ हिह्ति ‘सिओ मान्ता फेरि उह्ति च्योक्लेना त दाह्यो कुराहाङ ङाइ बिस्वास जाह्ङोझ्यान्ते देङे निङइ ङाको न्याय जाह्ङ्धय मुतेनय’ त दाह्य्ति तोओ कुराहाङ मात्र ओउमयइ ङाकाय गाल बइसा खाइनानि।” 22 फेलिक्सइ प्रभुको ल्यामको बारेहाङ पेतोकुस चिःउतो, ओउतझ्यान्ते ओउइ ओउदिनको मुद्दा द्युम्ताक्धय एत दाह्या, “जब रोमि सेनाको हाकिमि लुसियस इहाङ वाङ्ना, अनि ङाइ निङको इ मुद्दाको छिनोफानो जाह्ङ्ति बइनेनाङ्स।” 23 ओहाङसयको ताह्ङो हाकिमि फेलिक्सइ “पावलकाय सुरछ्या बइति गमु, तर ओउकाय केहि कुरा जाह्ङ्सा र ओउको होयालमकाय ओउको स्याहार जाह्ङ्सा अनुमति बयु” त दाह्य्ति कप्तानकाय आग्या जाह्ङाकान। पावल फेलिक्स र ओउको माचा द्रुसिल्लाको ङ्हा 24 केहि दिन लोन्हे ताह्ङो हाकिमि फेलिक्स लयको यहुदि माचा द्रुसिल्लाकाय लात्ति वाङा। अनि ओउइ पावलकाय गोताक्तिको ओउइ ख्रिस्त येसुको बारेहाङ तोओ कुरालम सायाकान। 25 जब पावलइ ओउनिसकाय “निखे परमेस्वरको नजरहाङ धर्मि स्याउति याक्सा परना, निइ लयको मनकाय अनुसासनहाङ गम्सा परना, र परमेस्वरइ न्याय जाह्ङ्साखेओ दिन वाङ्धय मुना” त दाह्य्ति तोआकान, अनि फेलिक्स रइतिझ्यान्ते पावलकाय एत तोआकान, “देङेकाय इच्युकले स्यावा, नाङ देङे इहाङसय पाह्य। जब मउका मिलना, ङाइ नाङकाय फेरि गोत्नेनाङ।” 26 पावलइ घुस बइनाताङ या त म्हर्ति फेलिक्सइ आसा जाह्ङो खेतो, ओउतझ्यान्ते ओउइ बेला-बेलाहाङ पावलकाय गोत्ति कुरा जाह्ङुतो। 27 निस बर्स लोन्हे फेलिक्सको होन्त पर्किअस फेस्तस ताह्ङो हाकिमि स्याउलाङ वाङा। तर फेलिक्सइखे यहुदिलमकाय आसताक्साको लागि पावलकाय झेलकनहाङले कुङ्ति गमाकान। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.