खबरदुत 23 - चेपाङ1 पावलइ ताह्ङो सभाको मान्तालमकाय जुःति योआक्तिको तोआकान, “ङाको इस्राएलि हउचोङ-पुःचोङलम, तेनको दिनसम्म परमेस्वरको ङ्हा ङाइ लयको रुवाङ सुद्ध बिचारकुसिले हुतो खेनाङ।” 2 ओउत साइति ताह्ङो पुजारि हननियाइ पावलको छेउसय चिङ्तिमुओ मान्तालमकाय ओउको म्होतोङहाङ घान्साकाय आग्या जाह्ङाकान। 3 अनि पावलइ ओउकाय तोआकान, “नाङ भ्रस्त गनमार्या, नाङकायमा परमेस्वरइ घान्सा स्याउलेना। नाङ नेम-कानुन अनुसार ङाको न्याय जाह्ङ्साकाय ओहाङ मुतेना, र ङाकाय घान्साकाय आग्या बइति नाङ लयले नेम-कानुनको बिरोतहाङ आल्तेना।” 4 पावलको छेउसय चिङ्तिमुओ मान्तालमइ ओउकाय तोआथय, “दोह नाङ परमेस्वरको ताह्ङो पुजारिको अपमान जाह्ङ्तेनउ?” 5 पावल त्याङा, “ए! ङाको हउचोङ-पुःचोङलम, ओउपाय ताह्ङो पुजारि खेसास्याउना त दाह्यो कुरा ङाइ चिःओले नाःआक्ङल। धइतिदाह्य्सा धर्मसास्त्रहाङ लेखओ मुना, ‘नाङको मान्तालमको सासकको बिरोतहाङ नाङइ दुस्त कुरा नोःसा स्याउल।’” 6 जब पावलइ ओहाङ ताह्ङो सभाको केहि सदस्यलम सदुकि समुहको र केहि सदस्यलमखे फरिसि समुहको मुनय त दाह्यो कुरा चिःआकान, अनि ओउ हिह्ति एत दाह्या, “इस्राएलि हउचोङ-पुःचोङलम, ङाको पुर्खालम फरिसि स्यावोझ्यान्ते ङामा फरिसिले खेनाङ। सिओ मान्ता फेरि उह्ति च्योक्लेना त दाह्यो कुराहाङ ङाइ बिस्वास जाह्ङोझ्यान्ते देङे निङइ ङाको न्याय जाह्ङ्धय मुतेनय।” 7 पावलइ उच्युक तोनातासले फरिसि र सदुकिको माझहाङ बाद-बिबाद सुरु स्यावा, र ओउमय निस भाकहाङ वेङ्कायाकाय। 8 (धइतिदाह्य्सा सदुकिलमइ मान्ता सिओसय उह्ति च्योक्ना, अनि लाङकादुत र ग्वालाममा स्याउना त दाह्यो कुराहाङ बिस्वास जाह्ङाक्निलि, तर फरिसिलमइखे इ सुमज्यो कुराहाङमा बिस्वास जाह्ङ्नितो।) 9 ओउमय माहा जोक्तो हिह्सा फाःङाकानि, र फरिसि समुहको केहि धर्मगुरुलमइखे पावलकाय पाराङ्धय चिङ्ति एत दाह्याकाय, “निइपाय इ मान्ताइ दोह गल्ति जाह्ङोमा च्यउङसुलु। सायद पक्कामा ग्वालाम अथबा लाङकादुतइ ओउकुस नोःओ स्याउसा परना।” 10 ओउमयको बिबाद झन्-झन् नाःतो स्याउधय आलोझ्यान्ते ओउमयइ पावलकाय प्रुह्न्ति सात्चाथय त म्हर्ति सेनाको हाकिमि रया। ओउतझ्यान्ते ओउमयकहाङ आल्ति पावलकाय लात्ति वानाक्तिको ओउकाय ब्यारेकभित्र लात्ति आःल्नु त दाह्य्ति सेनाको हाकिमिइ लयको सेनालमकाय आग्या जाह्ङाकान। 11 ओउ याह्दिङ प्रभुइ पावलको छेउसय चिङ्ति तोसास्यावा, “पावल, साहस जाह्ङु। नाङइ गतहाइति इ यरुसलेमहाङ ङाको बारेहाङ गभाइ बइतेआकान, ओउतहाइतिले रोमहाङमा गभाइ बइसा परतेना।” केहि यहुदिलमइ पावलकाय सात्सा जालसाजि जाह्ङो 12 स्याह्ङ्लो बिहान केहि यहुदिलम गोप्पेहाङ क्रुस्कायाक्तिको यातज्यो योजना जाह्ङाकानि। पावलकाय सात्माच्युकसम्म निइ दोहमा जेःलाम र तुङ्लाम त दाह्य्ति ओउमयइ बाचा जाह्ङाकानि। 13 एतताह्ङो जालसाजि जाह्ङो मान्तालमखे चालिस जनासयमा नाःतो खेइतो। 14 ओहाङसयको ओउमयइ मुख्य पुजारिलम र पाको अगुवालमकहाङ आलाक्तिको एत तोआकानि, “निइ पावलकाय सात्माच्युकसम्म दोहमा जेःङसुलु त दाह्य्ति पक्का बाचा जाह्ङालाङ्सु। 15 ओउतझ्यान्ते निङ र ताह्ङो सभाको सदस्यलम मिलति रोमि सेनाको हाकिमिकाय तोनु, र ओउको मुद्दाको बारेहाङ निइ सहि कुरा चिःसा चाहओ मुना त दाह्य्ति बहाना जाह्ङ्ति ओउकाय ताह्ङो सभाहाङ लात्ति वान्ताक्नु। तर ओउकाय इहाङ लात्ति वान्तोकहाङ निइखे ओउकाय ल्यामहाङले सात्नाङ्सु।” 16 तर पावलको भानिसइ ओउमयको जालसाजिको बारेहाङ चिःआकान, अनि ओउ ब्यारेकभित्र आल्ति पावलकाय ल्हाक्ति छ्यानाकान। 17 अनि पावलइ कप्तानलम मध्येको यातचाककाय गोताक्तिको तोआकान, “इ जवान गोय्चोकाय सेनाको हाकिमिकहाङ लात्ति आःलु, धइतिदाह्य्सा इ गोय्चोइ केहि कुरा ओउकाय तोसा परओ मुना।” 18 ओहाङसयको कप्तानइ ओउकाय सेनाको हाकिमिकहाङ दाकाक्तिको तोआकान, “झेलकनहाङ मुओ पावलइ ङाकाय गोताक्तिको इ गोय्चोकाय नाङकहाङ लात्ति आःलु त दाह्य्ति तोआताङ, धइतिदाह्य्सा इ गोय्चोइ नाङकाय केहि कुराताङ तोसा परओ मुना।” 19 सेनाको हाकिमिइ ओउ गोय्चोकाय क्रुतहाङ चुम्ति मइतोकाय यातताङ आःलाक्तिको ओउकाय ह्वताथय, “नाङ ङाकाय दोह कुरा तोसा चाहतेना?” 20 ओउ गोय्चोइ तोआकान, “केहि यहुदिलमइ निइ पावलको मुद्दाको बारेहाङ सहि कुरा चिःसा चाहओ मुनाङ्सु त दाह्य्ति बहाना जाह्ङाक्तिको स्याह्ङ ताह्ङो सभाहाङ पावलकाय लात्ति वान त दाह्य्ति नाङकाय तोसा बोःङो मुनय। 21 तर ओउमयको कुरा साइलाम, धइतिदाह्य्सा चालिस जनासयमा नाःतो मान्तालम मिलति ल्यामहाङ नुक्ति मुआक्तिको ओउमयइ पावलकाय सात्सा जालसाजि जाह्ङो मुनय। ओउकाय सात्माच्युकसम्म निइ दोहमा जेःलाम र तुङ्लाम त दाह्य्ति ओउमयइ बाचा जाह्ङो मुनय। देङेखे ओउमय इ काम जाह्ङ्सा तयार स्याउति नाङको निर्नयकाय ल्युह्ङ्ति मुनय।” 22 इ कुरा सायापछि सेनाको हाकिमिइ ओउ गोय्चोकाय “नाङइ इ कुरा ङाकाय तोओ मुना त दाह्य्ति सुकायमा चिःताक्लाम” त दाह्य्ति दर्कति तोआक्तिको ल्होकाथय। पावलकाय कयसरियाताङ फेलिक्सकहाङ ल्होको 23 ओहाङसयको सेनाको हाकिमिइ लयको निसचाक कप्तानकाय गोत्ति तोआकान, “राह्मको नउ बजे कयसरियाताङ आल्साको लागि निस सय जना सिपाहिलम, सतरि जना घोदाहाङ लह्नो सेनालम, र निस सय जना भाला लातो सेनालमकाय तयार जाह्ङ्जु। 24 र पावलको लागिमा केहि घोदालमको बन्दोबस्त जाह्ङ्जु, र ओउकाय पेतो सुरछ्या बइति ताह्ङो हाकिमि फेलिक्सकहाङ पुर्याउजु।” 25 ओहाङसयको सेनाको हाकिमिइ एतदाह्य्ति चिथि लेखआकान— 26 “माननिय ताह्ङो हाकिमि फेलिक्स, ङा क्लउदियस लुसियसको तर्फसय नाङकाय अभिबादन— झोरालाङ। 27 केहि यहुदिलमइ इ मान्ताकाय पक्रआक्तिको सात्सा बोःङो खेइतो। तर ङाइ इ मान्तापाय रोमि मान्ता खेना त दाह्यो कुरा चिःआलाङ, ओउतझ्यान्ते केहि सेनालम लात्ति आलाक्तिको ङाइ ओउकाय दल्ताक्ति वानालाङ। 28 यहुदिलमइ ओउकाय दोह कारनइ गाल बयो त दाह्य्ति ङाइ चिःसा चाहओझ्यान्ते, ङाइ ओउकाय ओउमयको ताह्ङो सभाहाङ लात्ति आःलालाङ। 29 तर ओउकायपाय ओउमयको धार्मिक नेम-कानुनको बिसयहाङ मात्र गाल बयो खेना, र ओउइपाय सिसासम्म अथबा झेलकनहाङ पोक्सासम्मको दोह पेमातोमा जाह्ङो नाःल त दाह्यो कुरा ङाइ चिःआलाङ। 30 तर जब केहि यहुदिलमइ ओउकाय सात्सा जालसाजि जाह्ङो मुना त दाह्यो कुरा ङाइ चिःआलाङ, अनि रेह्न्तोले ङाइ ओउकाय नाङकताङ ल्होक्सा निर्नय जाह्ङालाङ। अनि ओउकाय गाल बयो मान्तालमकायमा नाङकहाङ आल्तिले ओउकाय मुद्दा बइनु त दाह्य्ति आग्या जाह्ङालाङ।” 31 ओहाङसयको सिपाहिलमइ सेनाको हाकिमिको आग्या अनुसार ओउ राह्मसयले पावलकाय एन्तिप्यात्रिस सहरसम्म लात्ति आःलाकानि। 32 स्याह्ङ्लो पल्तखे पावलकुस कयसरियाताङ आल्साको लागि घोदाहाङ लह्नो सेनालमकाय ओहाङले फेआक्तिको दोमइ वाहो अरु सेनालमखे लयको ब्यारेकताङ द्याह्नाकाय। 33 जब ओउमय कयसरियाहाङ दाहाकाय, अनि ओउमयइ ताह्ङो हाकिमि फेलिक्सकाय पावल र चिथि सुम्पति बयाकानि। 34 ओउ ताह्ङो हाकिमिइ चिथि पह्रति भ्याआपछि, पावलकाय “नाङ गाउ इलाकाको खेतेना?” त दाह्य्ति ह्वताथय। पावल त्याङा, “ङा किलिकियाको खेनाङ।” 35 अनि ताह्ङो हाकिमिइ ओउकाय तोआथय, “नाङकाय गाल बयो मान्तालम वाङापछि ङाइले नाङको मुद्दा योनाङ।” ओहाङसयको ओउइ पावलकाय हेरोदइ जाह्ङो दरबारहाङ गम्नु त दाह्य्ति लयको सिपाहिलमकाय आग्या जाह्ङाकान। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.