खबरदुत 21 - चेपाङपावल यरुसलेमताङ आलो 1 एफिससको अगुवालमकाय बिदाइ जाह्ङ्ति भ्याआपछि, तिः जहासहाङ लह्न्ति नि कोस त तोओ तापुहाङ दाहालाङ्सु। स्याह्ङ्लो पल्तखे नि रोदस तापुहाङ दाहालाङ्सु, अनि ओहाङसय नि पतारा सहरताङ आलालाङ्सु। 2 ओहाङ निइ फोनिकेताङ आलो यातज्यो तिः जहास ङाःयालाङ्सु, ओउतझ्यान्ते नि ओहाङले लह्नाक्तिको आलालाङ्सु। 3 जब नि साइप्रस तापु च्यवो थाउहाङ दाहालाङ्सु, ओउको दखिनसय स्याउति नि सिरियाताङ आलालाङ्सु। नि तुरोस सहरहाङ न्यासालाङ्सु, धइतिदाह्य्सा तिः जहासइ लातो मालताललम ओहाङ क्लाःसा परओ खेतो। 4 ओहाङ निइ केहि बिस्वासिलमकाय क्रुसालाङ्सु अनि यात सातासम्म ओउमयकुसले मुआलाङ्सु। ओउ बिस्वासिलमइ पबित्र ग्वालामको जिःङ दोःति पावलकाय यरुसलेमताङ आल्लाम त दाह्य्ति बिन्ति जाह्ङाथय। 5 तर जब निको ओहाङ मुसा परओ समय द्योका, ओउमयकसय वेङ्कायाक्तिको नि लयको ल्यामताङ वाहालाङ्सु। ओउमय ल-लयको माचालम, चोः चोःद्याङलम लात्ति निकुसि सहरको बाहिर तिःको किनारसम्मले वाङाकाय, ओहाङ निइ क्र्योःङ घ्रुस्ति प्राथना जाह्ङालाङ्सु। 6 ओहाङसयको नि यात-अर्काकुस बिदाइ जाह्ङ्कायाक्तिको तिः जहासहाङ लह्नालाङ्सु, अनि ओउमयखे ल-लयको किमताङ द्याह्नाकाय। 7 तुरोससय तिः जहासको यात्रा जाह्ङ्ति नि तोलेमाइस त तोओ सहरहाङ दाहालाङ्सु। ओहाङ निइ बिस्वासिलमकाय अभिबादन जाह्ङाक्तिको ओउमयकुस यात दिन मुआलाङ्सु। 8 अनि स्याह्ङ्लो पल्तखे ओहाङसय बिदाइ जाह्ङ्ति नि कयसरिया सहरहाङ दाहालाङ्सु। ओहाङ नि फिलिप त मय्ङ्ओ यातचाक प्रचारकको किमहाङ मुआलाङ्सु, ओउखे यरुसलेमहाङ सहयोगिको रुपहाङ छ्युह्ङो सात जनालम मध्येको यातचाक खेतो। 9 ओउको प्लय जना बिह्या जाह्ङ्धाङ्मालो चोःद्याङलम खेइतो, र ओउमय परमेस्वरको आखर नोःइतो। 10 ओहाङ नि केहि दिनसम्म मुतोक बेलाहाङ, अगाबस त मय्ङ्ओ यातचाक अगमबक्ता यहुदियासय ओहाङ दाह्तिवाङा। 11 ओउ निकहाङ वाङ्ति पावलको तोःङनाय आःलाक्तिको लयको दोम-क्रुत पाःनाकास। अनि ओउ एत दाह्या, “पबित्र ग्वालाम एत दाह्य्सास्याउना— ‘इ तोःङनायको मालिककायखे यरुसलेमहाङ यहुदिलमइ एतहाइतिले पाःन्नानि, र अरु जातिको मान्तालमको क्रुतहाङ सुम्पति बइनानि।’” 12 जब निइ इ कुरा सायालाङ्सु, नि र ओहाङ मुओ अरु मान्तालमइमा पावलकाय यरुसलेमताङ आल्लाम त दाह्य्ति बिन्ति जाह्ङालाङ्सु। 13 तर ओउ दाह्या, “निङ एतहाइति र्याति धइति ते ङाकाय ल्हुङतुकहाङ दुखि जाह्ङ्तेनानाङ्स? ङा यरुसलेमहाङ आल्ति झेलकनहाङ परसा मात्र खेल, प्रभु येसुको लागि सिसामा तयार मुनाङ।” 14 निइ पावलकाय सम्झाउति ओउको मन परिवर्तन जाह्ङ्सा खाइङसुलु, ओउतझ्यान्ते निइ “प्रभुको इच्छ्या पुरा स्याउपाना” त दाह्य्ति ङइमात मुआलाङ्सु। 15 ओहाङ केहि समय मुति हुतापछि, नि लयमयको मालताल तयार जाह्ङाक्तिको यरुसलेमताङ आलालाङ्सु। 16 कयसरियाको केहि बिस्वासिलममा निकुसले वाङाकाय, र ओउमयइ निकाय साइप्रससय वाङो मनासोन त मय्ङ्ओ पुरानो बिस्वासिको किमहाङ बास मुलाङ लात्ति आःलाताङ्सु। पावलइ याकुबकाय क्रुसो 17 जब नि यरुसलेमहाङ दाहालाङ्सु, बिस्वासिलमइ निकाय म्रोतिले स्वागत जाह्ङाताङ्सु। 18 स्याह्ङ्लो पल्तखे पावल निकुसिले याकुबकाय क्रुस्लाङ आला। ओहाङ यरुसलेमको मन्दलिको जुदा पाको अगुवालममा वाङाकाय। 19 पावलइ ओउमयकाय अभिबादन जाह्ङाकान, अनि परमेस्वरइ लयको सेवाको काम दुवारा गतहाइति अरु जातिको मान्तालमको माझहाङ काम जाह्ङ्सास्यावा त दाह्योको बारेहाङ ओउमयकाय जुदा ल्हाक्ति छ्यानाकान। 20 ओउको कुरा सायापछि ओउमय जुदाइले परमेस्वरको प्रसङ्सा जाह्ङाकानि। अनि ओउमय दाह्याकाय, “पावल हउ य, गच्युक हजारउ यहुदिलमइ प्रभुहाङ बिस्वास जाह्ङो मुना त दाह्यो कुरा नाङइ योसा खाइतेनउ, र ओउमयइ परमेस्वरइ मोसा दुवारा बइसास्यावो नेम-कानुनकायमा पेतोकुसि पालन जाह्ङ्नानि। 21 अरु जातिको मान्तालमको देसहाङ याको यहुदिलमकाय ‘परमेस्वरइ मोसा दुवारा बइसास्यावो नेम-कानुन पालन जाह्ङ्सा परल, बालाख चोःलमको खतना जाह्ङ्सा परल, र यहुदि रितिथितिमा मानसा परल’ त दाह्य्तिताङ नाङइ स्यान्तेनउ त दाह्यो कुरा ओउमयइमा सायो मुनय। 22 द्याह निइ दोह हाइसा परनातहि? नाङ इहाङ दाह्तिवाङो मुना त दाह्यो कुरा ओउमयइ चिःलेनानि। 23 ओउतझ्यान्ते नाङइ दोह जाह्ङ्सा परना त दाह्यो कुरा निइ तोनाङ्सु। परमेस्वरकुसि बाचा जाह्ङो प्लय जना मान्तालम इहाङ निकुसले मुनय। 24 नाङ इमयकुस मन्दिर आल्ति सुद्ध स्यावो कामहाङ भाक लेःउ, र नाङइ ओउमयकाय बइसा परओ थेपो बइति ओउमयको म्याङ खुर्ताकु। एतहाइति नाङइ परमेस्वरइ मोसा दुवारा बइसास्यावो नेम-कानुन पालन जाह्ङो च्यउति नाङकाय गाल बयो दोह कुरामा सत्य खेल त दाह्य्ति ओउ गाल बयो बिस्वासिलमइ चिःपानानि। 25 तर प्रभुहाङ बिस्वास जाह्ङो अरु जातिको मान्तालमकायखे ‘निइ निर्नय जाह्ङालाङ्सु, मुर्तिलमकाय बयो जेःगालम जेःलाम, बेभिचारसय दल्ति मुन, वुइ जेःलाम, अनि पाल्ति सात्मालो र वुइ वाइमालो पसुलमको माःय जेःलाम’ त दाह्य्ति चिथि लेखति ल्होको खेनातहि।” 26 ओउतझ्यान्ते ओउमयइ तोओ कुराकाय ग्याति स्याह्ङ्लो पल्त पावलइ ओउ प्लय जना मान्तालमकुस सुद्ध स्यावो कामहाङ भाक लेःआकान। ओहाङसयको ओउइ सुद्ध स्यावो दिन गल पुत्ना, र ओउमयको लागि बइसा परओ भोक गल स्याउना त दाह्यो कुरा मन्दिरहाङ आल्ति पुजारिलमकाय तोआकान। पावलकाय मन्दिरहाङ पक्रओ 27 भाकल जाह्ङो सात दिन पुत्साले लागओ खेतो, एसिया इलाकासय वाङो केहि यहुदिलमइ पावलकाय मन्दिरहाङ च्यवाथय। ओउमयइ मान्तालमको हुल हुमाक्तिको पावलकाय चुमाकानि। 28 ओउमय जोक्तो हिह्ति एत दाह्याकाय, “इस्राएलको मान्तालम, निकाय सहयोग जाह्ङ्ताङ्सु। जुदा थाउको निको यहुदि मान्तालम, परमेस्वरइ मोसा दुवारा बइसास्यावो नेम-कानुन, र निको मन्दिरको बिरोतहाङ नोःओ इ मान्ताले खेना। उच्युक मात्र खेल, इ मान्ताइ बाहिरसय अरु जातिको मान्तालमकाय मन्दिरहाङ वान्ति इ पबित्र थाउकायमा असुद्ध जाह्ङो मुना।” 29 (धइतिदाह्य्सा ओउमयइ एफिसस सहरसय वाङो त्रोफिमसकाय पावलकुसि यरुसलेम सहरहाङ च्यवाकानि। र पावलइ ओउकाय निको मन्दिरभित्र पोसाकान त म्हर्ति ओउमय एत दाह्यो खेइतो।) 30 अनि इ कुराइ जुदा सहरभरिले हलचल स्यावा, र जुदा थाउसय मान्तालम वाङ्ति नाःतो हुमाकाय। ओउमयइ पावलकाय पक्रआक्तिको मन्दिरको आङ्गनसय बाहिर तानति ग्ल्युनाकानि। अनि ओउच्युक खेरले मन्दिरको पालेलमइ दह्य्लो राकाकानि। 31 मान्तालमको हुलइ पावलकाय सात्साले लागओ खेइतो, ओउबेलाहाङले यरुसलेम सहरहाङ हलचल स्यावो मुना त दाह्यो कुराको खबर रोमि सेनाको हाकिमिकहाङ दाहा। 32 ओउ रेह्न्तोले सेनालम र कप्तानलमकाय लाताक्तिको मान्तालमको हुलताङ आला। जब मान्तालमको हुलइ सेनाको हाकिमिकाय लयको सेनालम लात्ति लयमयकताङ वाङ्धयमुओ च्यवाकानि, अनि ओउमयइ पावलकाय घान्सा फेआकानि। 33 ओउ सेनाको हाकिमि पावलको द्याङ्तो आलाक्तिको पावलकाय पक्रआकान, अनि ओउकाय निसज्यो साङ्लाइ पाःन्साको लागि लयको सेनालमकाय आग्या जाह्ङाकान। अनि ओउइ मान्तालमको हुलकाय ह्वताकान, “इ मान्ता सु खेना, र इ मान्ताइ दोह जाह्ङाकान?” 34 मान्तालमको हुलको केहि मान्तालम यातज्यो कुरा अनि अरु मान्तालमखे अर्कोले कुरा जाह्ङ्ति हिह्आकाय। ओहाङ ओउतताह्ङो कुरा स्यावोझ्यान्ते खासहाङ दोह स्यावो खेतो त दाह्यो कुराले सेनाको हाकिमिइ चिःसा खायुलु, ओउतझ्यान्ते ओउइ पावलकाय ब्यारेकताङ लात्ति आःल्नु त दाह्य्ति लयको सेनालमकाय आग्या जाह्ङाकान। 35 जब पावल ब्यारेकको तेकनहाङ दाहा, मान्तालमको हुल माहा जोक्तो रिस वाङोझ्यान्ते सेनालमइ पावलकाय च्युन्ति आःलाकानि। 36 ओउ मान्तालमको हुलखे “ओउकाय सात्साले परना” त दाह्य्ति हिह्धय पावलको लोन्हे-लोन्हे वाङाकाय। पावलइ मान्तालमको हुलकाय लयको हक लेःति तोओ 37 सेनालमइ पावलकाय ब्यारेकभित्र लात्ति आःल्सा लागओ बेलाहाङ, ओउइ सेनाको हाकिमिकाय ग्रिक भासाहाङ तोआकान, “दोह ङाइ नाङकाय केहि कुरा तोसा खाइनेनाङ?” सेनाको हाकिमिइ ग्याह्ङ्ति ओउकाय तोआथय, “ए! नाङइ गतहाइति ग्रिक भासा नोःसा चिःतेआकान? 38 दोह नाङ केहि समय ङ्हा आतङ्क जाह्ङ्सा सुरु जाह्ङो, र प्लय हजार आतङ्ककारिलमकाय अगुवाय जाह्ङ्ति सुमा याक्मालो थाउताङ लात्ति आःलो मिस्रि अगुवा खेतेल र?” 39 पावल त्याङा, “खेल, ङा ओउ मान्ता खेङल। तर ङाखे किलिकिया इलाकाको बिसेस सहर तार्ससहाङ नाःओ यहुदि मान्ता खेनाङ। ङाको बिन्ति मुना, इ मान्तालमकाय केहि कुरा तोसाको लागि ङाकाय अनुमति बइसास्याउपा।” 40 अनि सेनाको हाकिमिइ ओउकाय नोःसा अनुमति बयाथय, ओहाङसयको पावलइ ब्यारेकको तेकनहाङ चिङाक्तिको मान्तालमकाय ङइमात मुन त दाह्य्ति क्रुतइ इसारा जाह्ङाकान। जब ओउमय ङइमात मुआकाय, अनि पावलइ ओउमयकाय ओउमयको लयको आर्मेइक भासाहाङले एतदाह्य्ति तोसा फाःङाकान— |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.