खबरदुत 19 - चेपाङपावल एफिसस सहरहाङ 1 जब अपोल्लोस कोरिन्थ सहरहाङ खेतो, पावलखे वारको भेक स्याउधय एफिससहाङ दाहा। ओहाङ दाहापछि ओउइ केहि बिस्वासिलमकाय क्रुसाकान। 2 अनि ओउइ ओउमयकाय ह्वताकान, “निङइ प्रभु येसुहाङ बिस्वास जाह्ङ्तोक बेलाहाङ, दोह निङइ पबित्र ग्वालाम दोःतेआकाय?” ओउमय त्याङाकाय, “पबित्र ग्वालाम मुसास्याउना त दाह्यो कुरापाय निइ सायोमा नाःङसुलु।” 3 अनि पावलइ ह्वताकान, “ओउतखेया निङइ गतताह्ङो बप्तिस्मा ते लेःतेआकानि त?” ओउमय त्याङाकाय, “निइपाय युहन्नाको बप्तिस्मा लेःआलाङ्सु।” 4 पावलइ तोआकान, “युहन्नाको बप्तिस्माखे पापको पस्तापको लागि खेना। तर युहन्ना लयइले लयसय लोन्हे वाङ्साखेओ यातचाककाय बिस्वास जाह्ङ्नु त दाह्य्ति तोओ मुना, ओउखे येसु खेसास्याउना।” 5 जब ओउमयइ ओउ कुरा सायाकानि, ओउमयइ प्रभु येसुको मय्ङहाङ बप्तिस्मा लेःआकानि। 6 अनि पावलइ हरेक बिस्वासिलमको तालाङहाङ क्रुत झाम्ति प्राथना जाह्ङाकान, र ओउमयकहाङ पबित्र ग्वालाम वाङ्सास्यावा। ओहाङसयको ओउमयइ अरु नउलो भासालमहाङ नोःसा र परमेस्वरको आखर प्रचार जाह्ङ्सा फाःङाकानि। 7 ओउमय जुदा जाह्ङ्ति लगभग बाह्र जनाच्युककाय खेइतो। 8 पावल यहुदि सभाकिमहाङ आल्ति मान्तालमकाय सुम महिनासम्म परमेस्वरको राज्यको बारेहाङ साहसकुसि प्रचार जाह्ङ्धय ओउमयकाय चिःताक्सा कोसिस जाह्ङाकान। 9 तर ओउमय मध्येको केहिलमखे चाको मनकोझ्यान्ते बिस्वास जाह्ङ्निलि, र ओउमयइ मान्तालमको ङ्हाहाङले प्रभुको ल्यामको बारेहाङ दुस्त कुरा नोःआकाय। ओउतझ्यान्ते पावलइ यहुदि सभाकिम आल्साले फेआकान र बिस्वासिलमकायमा लयकुसिले लात्ति आःलाकान, अनि ओउइ दिनमले तुरान्नस त तोओ मान्ताको पाथसालाहाङ आल्ति बहस जाह्ङ्सा फाःङाकान। 10 पावलइ ओहाङ निस बर्ससम्मले स्यानो काम जाह्ङाकान, ओउतझ्यान्ते एसिया इलाकाहाङ याको यहुदिलम र अरु जातिको जुदा मान्तालमइ प्रभुको आखर सायाकानि। स्केवासको चोःलम 11 परमेस्वरइ पावलकाय माहा ग्याह्ङ्सिओ कामलम जाह्ङ्साको लागि जिःङ बइसास्यावा। 12 मान्तालमइ पावलइ प्रयोग जाह्ङो रुमाल अथबा पछेउरालम लात्ति आःल्ति बिरामिलमकहाङ झाम्नितो। अनि जुदा बिरामिलम ल-लयको रोगसय स्याकितो र ओउमयकहाङ मुओ दुस्त ग्वालामलममा ओउमयकसय ग्ल्युह्ङ्ति पाह्य्इतो। 13 केहि यहुदिलमइमा वरिपरिको थाउलमताङ आल्ति प्रभु येसुको मय्ङ लेःति दुस्त ग्वालामलमकाय रुःन्ति ल्होक्सा कोसिस जाह्ङ्नितो। ओउमयइ दुस्त ग्वालामकाय “ङाइ नाङकाय पावलइ प्रचार जाह्ङो येसुको मय्ङहाङ ग्ल्युह्ङ्ति पाह्य्सा आग्या जाह्ङ्नेनाङ” त दाह्य्ति तोनितो। 14 एतताह्ङो कामखे स्केवास त मय्ङ्ओ यहुदि मुख्य पुजारिको सात जना चोःलमइ जाह्ङ्नितो। 15 तर दुस्त ग्वालामइ ओउमयकाय तोआथास, “ङाइ येसुकाय तह्य्नाङ, र पावलको बारेहाङमा चिःओ मुनाङ, तर निङखे सु खेतेनय?” 16 अनि ओउ दुस्त ग्वालामइ ङाःयो मान्ता ज्योस्ति आलाक्तिको ओउमयकाय आक्रमन जाह्ङाकान, र ओउमयको लावनाय क्रेत्ति वायाकान। अनि ओउमयखे ज्यानभरि चा लात्ति ओउ किमसय सोहले तन्ति क्रवाकाय। 17 ओउ घतनाखे एफिससहाङ याको यहुदि र अरु जातिको मान्तालमइमा चिःआकानि। अनि ओउमय जुदाले रइसा फाःङाकानि, र प्रभु येसुको मय्ङको प्रसङ्सा जाह्ङाकानि। 18 बिस्वास जाह्ङो नाःतो मान्तालम वाङ्ति जुदा मान्तालमको ङ्हाहाङले ल-लयइ जाह्ङो पेमालो कामलमको पस्ताप जाह्ङाकानि। 19 तुनामुना जाह्ङो नाःतो मान्तालमइ ल-लयको चतकि कितापलम वान्ति जुदा मान्तालमको ङ्हाहाङले म्हेःहाङ फुःति वायाकानि। ओउतहाइति फुःति वायो कितापको मोल हिसाब जाह्ङ्धार्ना पचास हजार चान्दिको ध्याकच्युक स्यावो खेतो। 20 एतहाइति प्रभुको आखर ताह्ङो जिःङकुसि हरेक थाउहाङ फइलिधय आला। देमेत्रियसइ पावलको बिरोतहाङ आतङ्क जाह्ङो 21 लोन्हे इ जुदा कुरालम स्याउति भ्याआपछि, पावलइ यरुसलेम आल्सासय ङ्हा माकेदोनिया र अखइया इलाकाताङ आल्सा इच्छ्या जाह्ङाकान। ओउ दाह्या, “यरुसलेम आलापछि, ङा रोम सहरमा आल्साले परनाङ।” 22 ओउतझ्यान्ते ओउइ लयको सहयोगि होयानिस तिमोथि र इरास्तसकाय माकेदोनियाताङ ल्होकाकान। तर लयखे केहि दिनको लागि एसिया इलाकाको एफिसस सहरहाङले मुआ। 23 ओउतोक बेलाहाङ प्रभुको ल्यामको बिसयकाय लेःति एफिससहाङ ताह्ङो समस्या स्याउलाङ वाङा। 24 यातचाक देमेत्रियस त मय्ङ्ओ चान्दिको काम जाह्ङो मान्ताइ आर्तेमिस देबिको मन्दिरको मुर्ति जाह्ङो काम जाह्ङुतो। ओउइ नाःतो कामदारलमकाय काम जाह्ङ्सा बइतिगमो खेतो। 25 ओउतझ्यान्ते ओउइ ओउ कामदारलम र ओउतताह्ङो काम जाह्ङो अरु मान्तालमकायमा गोताक्तिको एतदाह्य्ति तोआकान, “होयालम, निइ जाह्ङो इ कामसयले निइ नाःतो थेपो कमाउनातह्य्नि। 26 तर पावलइ एफिससहाङ मात्र खेमात एसिया इलाकाभरिले, मान्ताको क्रुतइ जाह्ङो देउतालमखे देउताले खेल त दाह्य्ति गतहाइति नाःतो मान्तालमकाय होम्ति द्याःनाकान त दाह्यो कुरा निङइ च्यवो र सायोले मुतेनय। 27 इखे निको बेपार पेमातो स्याउना त दाह्य्ति मात्र खेल, तर महान् देबि आर्तेमिसको मन्दिरमा बेकामको स्याउना र जुदा एसिया र सङ्सारको मान्तालमइ मानधय वाङो आर्तेमिस देबिको महानतामा म्हेत्ति वाइना त दाह्यो कुराको समस्या खेना।” 28 जब कामदारलमइ इ कुरा सायाकानि, ओउमय जोक्तो रिस वाङ्ति एतदाह्य्ति हिह्सा फाःङाकानि, “एफिसिलमको देबि आर्तेमिस महान् खेसास्याउना।” 29 अनि रेह्न्तोले एफिसस सहरभरि आतङ्क स्यावा। नाःतो मान्तालम यातजुत स्याउति वाङाकाय र माकेदोनियाहाङ याको पावलको निसचाक होयानिस गायस र अरिस्तार्खसकाय चुम्ति सहरको सभा जाह्ङो ताह्ङो थाउताङ लात्ति आःलाकानि। 30 पावल लयले मान्तालमको हुलको ङ्हा आल्सा बोःङाकान, तर बिस्वासिलमइ ओउकाय आल्सा बइथाल। 31 एसिया इलाकाको केहि अगुवालमखे पावलको होया खेइतो। ओउमयइमा पावलकाय “मान्तालमको हुलको ङ्हा जुगाङमा आल्लाम” त दाह्य्ति बिन्ति जाह्ङो खबर ल्होकाथय। 32 सहरको ताह्ङो सभाहाङ वाङो केहि मान्तालम यातज्यो कुरा जाह्ङ्ति हिह्आकाय, र अर्को मान्तालमखे अर्कोले कुरा जाह्ङ्ति हिह्आकाय, र ओहाङ वाङो गच्युक मान्तालइखे दोह कारनइ वाङो त दाह्य्तिले चिःओ नाःआकिलि। 33 मान्तालमको हुलसय केहि यहुदिलमइखे अलेक्जेन्दरकाय ङ्हा ल्होकाक्तिको घतनाको बारेहाङ केहि कुरा नोःसाको लागि तोआकानि। अनि ङइमात मुताक्साको लागि ओउइ क्रुतइ इसारा जाह्ङाक्तिको नोःसा कोसिस जाह्ङाकान। 34 तर जब मान्तालमको हुलइ ओउपाय यहुदि खेना त दाह्य्ति चिःआकानि, ओउमय निसघन्त च्युककाय “एफिसिलमको देबि आर्तेमिस महान् खेसास्याउना” त दाह्य्ति हिह्तिले मुआकाय। 35 अनि लोन्हे सहरको हाकिमि वाङाक्तिको मान्तालमको हुलकाय ङइमात मुताकाकान। ओउ दाह्या, “एफिससको मान्तालम, एफिसिलमको सहरखे महान् देबि आर्तेमिसको मन्दिर र लाङकासय वाङो ओउको मुर्तिको सुरछ्या जाह्ङो सहर खेना त दाह्यो कुरा निङ जुदाइ चिःओले मुतेनय। 36 सु मान्तालमइमा इ कुराको इन्कार जाह्ङ्सा खाइनिलि। ओउतझ्यान्ते निङ जुदा ङइमातले मुसा परना र मुर्ख कामलम जाह्ङ्सास्याउलेल। 37 निङइ इहाङ वानो इ मान्तालमइ निको मन्दिरलम कुःओमा नाःइलि र निको देबिको बिरोतहाङ दोह पेमातो नोःओमा नाःइलि। 38 यदि देमेत्रियस र ओउको कामदारलमकुस कुनय मान्ताको बिरोतहाङ उजुरि मुना त खेया, निकुसि अदालत मुना र न्यायधिसलममा मुलेनय, ओहाङले आल्ति ओउमय गाल बइकायपनय। 39 तर ओउसयमा अझले नाःतो केहि कुरा निङ चाहतेनय त खेया, ओउ कुराखे निङइ सहरको सभाहाङले वान्ति छलफल जाह्ङ्सा परना। 40 धइतिदाह्य्सा तेन आतङ्क सुरु जाह्ङोको गालखे रोमि सरकारइ निकायले बइचातहि खेतो। दोह कारन नाःमाखामा निइ जाह्ङो इ कामको बारेहाङ रोमि सरकारकाय निइ दोह कुरामा तोसा खायाक्तह्य्निलि खेतो।” 41 इ कुरा तोति भ्याआपछि ओउइ ओहाङ हुमो जुदा मान्तालमकाय बिदाइ जाह्ङ्ति ल्होकाकान। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.