खबरदुत 16 - चेपाङपावल र सिलासकुसि तिमोथि आलो 1 पावल सिलासकुस दर्बि सहर स्याउधय फेरि लुस्त्राताङ आला, र ओहाङ यातचाक तिमोथि त मय्ङ्ओ बिस्वासि खेतो। ओउको आमा यहुदि बिस्वासि खेतो, तर आपाखे ग्रिक खेतो। 2 लुस्त्रा र आइकोनियनको बिस्वासिलमइ तिमोथिको बारेहाङ पेओ कुरा जाह्ङ्नितो। 3 पावलइ लयको यात्राहाङ तिमोथिकायमा ब्रकले लात्ति आःल्सा चाहओ खेतो। ओउतझ्यान्ते पावलइ तिमोथिकाय खतना जाह्ङाकान, धइतिदाह्य्सा ओहाङको जुदा यहुदिलमइ ओउको आपा ग्रिक खेना त दाह्य्ति चिःओ खेइतो। 4 अनि ओउमय अरु जातिको बिस्वासिलमइ पालन जाह्ङ्साको लागि यरुसलेमहाङ मुओ मुख्य चेलालम र अगुवालमइ निर्नय जाह्ङो कुरालम स्यान्धय सहर-सहरहाङ आलाकाय। 5 ओउतझ्यान्ते मन्दलिलम बिस्वासहाङ बल्यो स्याउधय आलाकाय र दिनमले माहा नाःतो मान्तालमइ प्रभु येसुहाङ बिस्वास जाह्ङाकानि। त्रोआसहाङ पावलको दर्सन 6 पावल, सिलास र तिमोथिखे एसिया इलाकाहाङ परमेस्वरको आखर प्रचार जाह्ङ्सा चाहओ खेइतो, तर पबित्र ग्वालामइखे ओउमयकाय अनुमति बइसास्याउल। ओउतझ्यान्ते ओउमय फ्रिगिया र गलातियाको छेत्र स्याउधय आलाकाय। 7 जब ओउमय माइसिया छेत्रको सानहाङ दाहाकाय, ओउमयइ बेथानियाको इलाकाताङ आल्सा कोसिस जाह्ङाकानि, तर येसुको ग्वालामइ ओउमयकाय ओहाङ आल्सा अनुमति बइसास्याउल। 8 ओउतझ्यान्ते ओउमय माइसिया छेत्र स्याउधय समुन्द्रको किनारहाङ परओ त्रोआस सहरताङ आलाकाय। 9 ओउ याह्दिङ पावलइ यातज्यो दर्सन च्यवाकान। ओउइ दर्सनहाङ माकेदोनिया इलाकाको यातचाक मान्ता चिङाक्तिको “माकेदोनियाहाङ वाङ्ति निकाय सहयोग जाह्ङ्सास्याउपाना” त दाह्य्ति बिन्ति जाह्ङ्धयमुओ च्यवाकान। 10 पावलइ ओउ दर्सन च्यउनातासले, ओहाङको मान्तालमकाय परमेस्वरको पेओ खबर प्रचार जाह्ङ्साको लागि परमेस्वरइले निकाय गोत्सास्यावो खेना त दाह्य्ति चिःति नि माकेदोनियाताङ आल्सा निर्नय जाह्ङालाङ्सु। फिलिप्पि सहरको लिदिया त तोओ मोम्चोइ येसुहाङ बिस्वास जाह्ङो 11 अनि नि तिः जहासहाङ लह्नाक्तिको त्रोआससय सामोथ्राकेको तापुताङ आलालाङ्सु, र स्याह्ङ्लो पल्तखे नि नियापोलिस त तोओ सहरहाङ दाहालाङ्सु। 12 ओहाङसयको नि रोमि सासकलमको अधिनहाङ मुओ माकेदोनिया इलाकाको मुख्य सहर फिलिप्पिताङ वाह्ति आलालाङ्सु। अनि नि ओउ सहरहाङ केहि दिनच्युककाय मुआलाङ्सु। 13 यहुदि धोओ दिनखे नि सहरको बाहिर नदिको किनारताङ आलालाङ्सु, धइतिदाह्य्सा ओहाङ प्राथना जाह्ङ्साको लागि यहुदिलम हुमो थाउ मुना खेचा त दाह्य्ति नि म्हरो खेङसुतो। नि ओहाङ च्युःङालाङ्सु र ओहाङ हुम्तिमुओ केहि मोम्चोलमकुस नोःसा फाःङालाङ्सु। 14 निको कुरा सायोलममध्ये यातचाकको मय्ङ्खे लिदिया खेतो, र ओउ थिआतिरा सहरसय फिलिप्पिहाङ वाङ्ति ङाःलो रङको नायलमको बेपार जाह्ङुतो। ओउखे अरु जातिको मोम्चो खेतो र ओउइ परमेस्वरको भक्ति जाह्ङुतो। अनि पावलको कुराकाय ध्यान बइति साइसा र बिस्वास जाह्ङ्साको लागि परमेस्वरइ ओउकाय सहयोग जाह्ङ्सास्यावा। 15 जब ओउ र ओउको माचरलमइ बप्तिस्मा लेःआकानि, अनि ओउइ निकाय एतदाह्य्ति बिन्ति जाह्ङाताङ्सु, “यदि निङइ ङाकाय प्रभुहाङ दोङ्सिले बिस्वासि त म्हर्तेनय त खेया, ङाको किमहाङ वाङ्ति मुसास्याउपाना।” ओउइ माहा जोक्तो कर जाह्ङोझ्यान्ते ओउको कुराहाङ नि सहमत स्यावालाङ्सु। पावल र सिलासकाय फिलिप्पि सहरको झेलकनहाङ काओ 16 यात दिन नि प्राथना जाह्ङो थाउताङ आल्धय खेङसुतो, निइ दुस्त ग्वालामइ ङाःयो यातचाक नोकर्नि मोम्चोकाय क्रुसालाङ्सु। ओउइ दुस्त ग्वालामको जिःङइ मान्तालमको लोन्हे स्याउसाखेओ कुरा तोति बइति लयको मालिकलमको लागि नाःतो थेपो कमाउति बयुतो। 17 ओउ मोम्चो पावल र निकाय गुह्ल्ति वाङा र एतदाह्य्ति हिह्आ, “इ मान्तालमखे जुदासय ताह्ङो प्रभु परमेस्वरको सेवकलम खेनय, र ओउमयइ निङकाय गतहाइति मुक्ति दोःना त दाह्योको बारेहाङ तोधय मुनय।” 18 नाःतो दिनसम्मले ओउ मोम्चोइ ओउतताह्ङो बेबहार जाह्ङोझ्यान्ते पावल आन साःवाकास र द्याह्नाक्तिको ओउ मोम्चोकहाङ मुओ दुस्त ग्वालामकाय तोआकान, “येसु ख्रिस्तको मय्ङहाङ ङाइ नाङकाय ओउकसय ग्ल्युह्ङ्सा आग्या बइनेनाङ।” ओउच्युक खेरले ओउ दुस्त ग्वालाम ग्ल्युह्ङ्ति पाह्य्माआ। 19 जब ओउ मोम्चोको मालिकलमइ ओउमयको नाःतो थेपो कमावो मउका वायो कुरा चिःआकानि, ओउमयइ पावल र सिलासकाय चुम्ति सासकलम मुओ बजारको चोकहाङ आःलाकानि। 20 ओउमयइ ओउनिसकाय सहरको हाकिमिलमको ङ्हा दाकाक्तिको एत दाह्याकाय, “इ मान्तानिस यहुदि खेनाच, र इनिसइ निको सहरहाङ ताह्ङो समस्या वान्धय मुनाच। 21 इनिसइ निको नेम-कानुनको बिरोतहाङ रितिथितिलम स्यान्धय मुनाच, र निखे रोमको मान्ता स्यावोझ्यान्ते इनिसइ स्यानो रितिथिति सुइकार जाह्ङ्सा खाइतह्य्निलि।” 22 अनि मान्तालमको हुलइ पावल र सिलासकाय आक्रमन जाह्ङ्सा फाःङाकानि। ओहाङसयको हाकिमिलमइ पावल र सिलासको लावनाय क्रेत्ति वायाकानि र ओउनिसकाय सिङको दाङ्गइ घान्सा आग्या जाह्ङाकानि। 23 दाह्तो घानाक्तिको ओउनिसकाय झेलकनहाङ कुङाथाच, र इनिसकाय क्रउसा खाइमातोसम्म कुङ्ति गमु त दाह्य्ति झेलकनको हाकिमिकाय आग्या जाह्ङाथय। 24 ओउतताह्ङो आग्या दोःआपछि हाकिमिइ ओउनिसकाय झेलकनको जुदासय भित्रको कोथाहाङ आःलाक्तिको सिङको ताह्ङो थिङ्गुराहाङ दोम काति गमाथाच। 25 ल्हाक-याह्दिङहाङ पावल र सिलास प्राथना जाह्ङ्धय परमेस्वरको भजन मेधय खेचतो, र झेलकनहाङ कुङ्तिगमो अरु मान्तालमखे साइधयमुओ खेइतो। 26 अचानक ओहाङ ताह्ङो रइसिओ ल्याङ वाङा, र झेलकनको तोसलम रिह्ङ्सा फाःङाकानि। ओउच्युक खेरले जुदा दह्य्लोलम फोलाकाय, र झेलकनहाङ कुङ्तिगमो जुदा मान्तालमको साङ्लालम फासाकाय। 27 जब झेलकनको हाकिमि च्योका, ओउइ झेलकनको दह्य्लोलम फोलो च्यवाकान। झेलकनहाङ कुङ्तिगमो मान्तालम क्रवाकाय त म्हर्ति लयइ लयकायले सात्सा बिचार जाह्ङाक्तिको नाःसुइ त्युलाकान। 28 तर पावलइ ओउकाय हिह्ति तोआकान, “नाङइ लयकाय दोह पेमातोमा जाह्ङ्जेलाम, धइतिदाह्य्सा नि जुदाले इहाङ मुनाङ्सु।” 29 झेलकनको हाकिमि बत्ति तेआ र रेह्न्तोले तन्ति भित्रको कोथाहाङ पोका, अनि रयोझ्यान्ते रिह्ङ्धय पावल र सिलासको दोमहाङ खुङा। 30 ओहाङसयको ओउइ ओउनिसकाय बाहिर ग्ल्युनाक्तिको ह्वताथाच, “अ हजुरनिस, मुक्ति दोःसाको लागि ङाइ दोह हाइसा परनाङ?” 31 ओउनिसइ तोआकाचु, “प्रभु येसुहाङ बिस्वास जाह्ङ्सास्याउपा, नाङ र नाङको माचरलमइमा मुक्ति दोःतेनय।” 32 ओहाङसयको ओउनिसइ झेलकनको हाकिमि र ओउको किमको जुदा माचरलमकायमा प्रभुको आखर तोआकाचु। 33 ओउ ल्हाक-याह्दिङको समयहाङले झेलकनको हाकिमिइ ओउनिसकाय आःलाक्तिको ओउनिसको चालम हुर्ति बयाथाच। अनि रेह्न्तोले ओउ र ओउको जुदा माचरलमइ बप्तिस्मा लेःआकानि। 34 ओहाङसयको ओउइ पावल र सिलासकाय लयको किमहाङ आःलाक्तिको केहि जेःगालम बयाथाच। अनि ओउ झेलकनको हाकिमि र ओउको जुदा माचरलम माहा जोक्तो आसआकाय, धइतिदाह्य्सा ओउमयइ परमेस्वरहाङ बिस्वास जाह्ङो खेइतो। 35 तर जब बिहान स्यावा, ओउ मान्तानिसकाय फेति ल्होकु त दाह्य्ति सहरको हाकिमिलमइ केहि सिपाहिलमकाय आग्या बइति ल्होकाकानि। 36 ओउतझ्यान्ते झेलकनको हाकिमिइ पावलकाय तोआथय, “सहरको हाकिमिलमइ नाङ र सिलासकाय फेसाको लागि आग्या ल्होको मुना। द्याह निङ्जि ल्हुङ धोमाइति पाह्य्ज।” 37 तर पावलइ सिपाहिलमकाय तोआकान, “निचिमा रोम देसको मान्ताले खेनाङ्च, र निचिको दोह गल्ति नाःमाखामा सहरको हाकिमिलमइ निचिकाय मान्तालमको ङ्हा घान्ताकाक्तिको झेलकनहाङ कुङाताङ्च। अनि देङेखे ओउमय निचिकाय गोप्पेहाङ फेसा चाहनय? अह, ओउत जुगाङमा स्याउल, रोमि हाकिमिलम लयमयले इहाङ वाङाक्तिको निचिकाय त्याल्सा परना।” 38 सिपाहिलमइ ओउ कुरा सहरको हाकिमिलमकाय ल्हाक्ति छ्यानाकानि। अनि जब ओउमयइ पावल र सिलासमा रोमि मान्ताले खेनाच त दाह्यो कुरा सायाकानि, ओउमय माहा जोक्तो रयाकाय। 39 ओउतझ्यान्ते ओउ हाकिमिलम वाङाक्तिको ओउनिसकुस छेमा तेआकाय। अनि ओउमयइ ओउनिसकाय झेलकनसय त्यालाक्तिको निको सहर फेति पाह्य्सास्याउपाना त दाह्य्ति बिन्ति जाह्ङाकानि। 40 पावल र सिलास झेलकनसय ग्ल्युह्ङापछि लिदियाको किमताङ आलाकाच। ओहाङ ओउनिसइ बिस्वासिलमकाय क्रुसाकाचु, र ओउमयकाय हउसलाको आखर स्यानाक्तिको सहर फेआकाचु। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.