खबरदुत 14 - चेपाङपावल र बर्नबास आइकोनियन सहरहाङ 1 पावल र बर्नबास आइकोनियन सहरहाङ दाहाक्तिको ओहाङको सभाकिमहाङ आल्ति प्रचार जाह्ङ्सा फाःङाकाचु, र ओहाङमा एन्तिओखिया सहरहाङ स्यावोलेखाले नाःतो यहुदि र अरु जातिको मान्तालमइ प्रभुहाङ बिस्वास जाह्ङाकानि। 2 तर प्रभुहाङ बिस्वास जाह्ङ्मालो यहुदिलमइखे अरु जातिको मान्तालमकाय कुल काति रिस वाङ्ताकाक्तिको बिस्वासिलमको बिरोत जाह्ङ्ताकाकानि। 3 पावल र बर्नबासखे प्रभुको अनुग्रहको बारेहाङ साहसकुसि प्रचार जाह्ङ्धय आइकोनियनहाङ, नाःतो समयसम्म मुआकाच। प्रभुइ ओउनिसकाय ग्याह्ङ्सिओ कामलम जाह्ङ्सा जिःङ बइति ओउनिसइ प्रचार जाह्ङो आखर सत्य खेना त दाह्य्ति प्रमानित जाह्ङ्सास्यावा। 4 तर आइकोनियनको मान्तालम निसभाकहाङ वेङाकाय। केहि मान्तालम यहुदिलमको लोन्हे लागआकाय र केहि मान्तालमखे मुख्य चेलानिसको लोन्हे लागआकाय। 5 अनि केहि अरु जातिको मान्तालम र यहुदिलम लयमयको अगुवालमकुस मिलति पावल र बर्नबासकाय बाङइ आप्ति सात्सा निर्नय जाह्ङाकानि। 6 जब ओउनिसइ इ कुरा चिःआकाचु, ओउनिस आइकोनियन सहरसय रेह्न्तोले क्रउति लुकोनिया छेत्रको लुस्त्रा र दर्बि सहर र ओहाङको वरिपरिको छेत्रहाङ दाहाकाच। 7 र ओउनिसइ ओउ छेत्रलमहाङमा परमेस्वरको पेओ खबर प्रचार जाह्ङाकाचु। पावल र बर्नबास लुस्त्रा र दर्बि सहरहाङ 8 लुस्त्रा सहरहाङ यातचाक खोन्द्या मान्ता खेतो, र ओउखे आमाइ नाःओहाङसयले खोन्द्या स्यावोझ्यान्ते वाह्साले खायाकुलु। 9 ओउखे पावलको भासन साइधय च्युःङ्तिमुओ खेतो। पावलइ ओउकाय ताङ्ति योआकान, र रोगसय स्याक्साको लागि ओउकुस बिस्वास मुना त दाह्य्ति पावलइ चिःआकान। 10 ओउतझ्यान्ते पावलइ ताह्ङो हाउनयहाङ ओउकाय हिह्ति तोआथय, “लयको दोमहाङ चिङ!” अनि ओउ मान्ता क्र्यानोक्त चिङा र वाह्सा फाःङाकान। 11 जब मान्तालमको हुलइ पावलइ जाह्ङो ओउ कुरा च्यवाकानि, ओउमयइ लयमयको लुकोनियन भासाहाङ एतदाह्य्ति हिह्सा फाःङाकानि, “देउतालमपाय मान्ता स्याउति निकहाङ वाङाकाय।” 12 ओउमयइ बर्नबासकाय जिउस देउता त दाह्य्ति मय्ङ्आकानि र पावलकायखे मुख्य बक्ताझ्यान्ते हर्मेस देउता त दाह्य्ति मय्ङ्आकानि। 13 जिउस देउताको मन्दिरखे सहरको मुल दह्य्लो द्याङ्तो खेतो, र ओउ मन्दिरको पुजारि र मान्तालमको हुलइ पावल र बर्नबासको लागि भोक बइसा चाहओ खेइतो। ओउतझ्यान्ते पुजारिइ केहि बाछो स्याःलम र रोको मालालम लात्ति सहरको मुल दह्य्लोहाङ दाहा। 14 जब ओउमयइ जाह्ङ्सा बोःङो कुरा खबरदुतनिस बर्नबास र पावलइ चिःआकाचु, ओउनिसइ ल-लयको लावनाय क्रेताक्तिको मान्तालमको हुलको माझहाङ तन्ति आल्ति एतदाह्य्ति हिह्आकाच, 15 “होयालम, निङइ धइति एतताह्ङो काम जाह्ङ्धय मुतेनय? निचिमा निङ लेखाताह्ङो मान्ताले खेनाङ्च। निचिपाय निङइ बेकारको कामलम फेति फेलबाङ, ल्हाउदयबाङ, समुन्द्र र ओउमयहाङ नाःओ जुदा थोकलम जाह्ङ्सास्यावो जिउदो परमेस्वरकताङ द्याह्न्न त दाह्य्ति परमेस्वरको पेओ खबरको घोसना जाह्ङ्लाङ इहाङ वाङो खेनाङ्च। 16 ङ्हाको समयलमहाङपाय परमेस्वरइ जुदा जातिको मान्तालमकाय ल-लयको रितिथिति अनुसारले याक्सा बइसास्यावा, 17 तर पे-पेओ कामलम जाह्ङ्ति खेयाकायमा ङा निङकहाङ मुनाङ त दाह्य्ति लयको प्रमान बइसास्यावा। परमेस्वरइ लाङकासय तिः वाताक्ति निङकाय सहि समयहाङले उब्जनि बइसास्याउना, र परमेस्वरइ जेःगा-तुङ्गा बइति निङको ल्हुङतुककाय आससितो जाह्ङ्सास्याउना।” 18 इ कुरा तोआक्तिको लयनिसको लागि बइसा बोःङो भोककाय पावल र बर्नबासइ बल्ल-तल्ल रोकसा खायाकाचु। 19 ओहाङसयको पिसिदिया छेत्रको एन्तिओखिया र आइकोनियन सहरसय केहि यहुदिलम लुस्त्राहाङ दाह्तिवाङाकाय। ओउ यहुदिलमइ लुस्त्राको मान्तालमकाय पावलको बिरोत जाह्ङ्सा र आक्रमन जाह्ङ्साकाय उन्चो लावाकानि। ओउमयइ पावलकाय बाङइ आपाकानि र द्याहपाय सिआ त म्हर्ति सहरसय बाहिर ह्रयुत्ति क्लाःआकानि। 20 तर जब बिस्वासिलम पावलको वरिपरि हुम्लाङ दाहाकाय, पावल चिङा र सहरताङ द्याह्न्ति आला। अनि ओउखे स्याह्ङ्लो पल्त बर्नबासकुस दर्बि सहरताङ आला। पावल र बर्नबास सिरियाको एन्तिओखियाताङ द्याह्नो 21 पावल र बर्नबासइ दर्बि सहरको मान्तालमकाय परमेस्वरको पेओ खबर प्रचार जाह्ङ्ति नाःतो मान्तालमकाय चेला जाह्ङाकाचु। अनि ओउनिस ओहाङसय लुस्त्रा, आइकोनियन स्याउधय पिसिदियाको एन्तिओखियाताङ द्याह्नाकाच। 22 ओउनिसइ बिस्वासिलमकाय बिस्वासहाङ बल्यो स्याउति मुसाकाय हउसला बयाकाचु, अनि ओउनिसइ ओउमयकाय “परमेस्वरको राज्यको मान्ता स्याउसाको लागि ङ्हा निइ नाःतो दुख-कस्तलम च्यउसाले परना” त दाह्य्ति स्यानाकाचु। 23 पावल र बर्नबासइ हरेक मन्दलिको लागि केहि अगुवालम छ्युह्ङाकाचु, र उपाङ मुति प्राथना जाह्ङाक्तिको ओउ अगुवालमकाय लयमयइ बिस्वास जाह्ङो प्रभुको चरनहाङ सुम्पआकाचु। 24 ओहाङसयको ओउनिस पिसिदियाको छेत्र स्याउधय पामफिलिया इलाकाहाङ दाहाकाच। 25 र पामफिलियाको पर्गा सहरहाङ प्रचार जाह्ङाक्तिको ओउनिस अतालिया सहरताङ आलाकाच। 26 ओहाङसयको ओउनिस तिः जहासहाङ लह्न्ति लयनिसको यात्रा सुरु स्यावो सिरियाको एन्तिओखियाताङले द्याह्नाकाच। ओउ सहरको बिस्वासिलमइले ओउनिसकाय परमेस्वरको अनुग्रहहाङ सुम्पति प्रचारको कामहाङ ल्होको खेतो, र देङे ओउनिसइ ओउ काम पुरा जाह्ङाक्तिको द्याह्न्ति दाहाकाच। 27 ओउनिस एन्तिओखियाहाङ द्याह्न्ति दाहापछि, मन्दलिको जुदा बिस्वासिलमकाय गोत्ति यात थाउहाङ हुमाकाचु। अनि परमेस्वरइ गतहाइति लयनिस दुवारा काम जाह्ङ्सास्यावा र गतहाइति अरु जातिको मान्तालमकाय येसुहाङ बिस्वास जाह्ङ्ताक्सास्यावा त दाह्यो जुदा कुरा ल्हाक्ति छ्यानाकाचु। 28 ओहाङसयको ओउनिस नाःतो महिनासम्मले अरु बिस्वासिलमकुसि एन्तिओखियाहाङ मुआकाच। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.