खबरदुत 10 - चेपाङपत्रुस र कर्नेलियस 1 कयसरिया सहरहाङ कर्नेलियस त मय्ङ्ओ यातचाक मान्ता याक्तो। ओउखे रोमि सेनाको इतालिया त तोओ पल्तनको कप्तान खेतो। 2 कर्नेलियस धर्मि मान्ता खेतो। ओउ र ओउको जुदा माचरलमइ परमेस्वरको भक्ति जाह्ङ्नितो। ओउइ म्रोतिले यहुदि गरिबलमकाय सहयोग जाह्ङुतो र परमेस्वरकाय सधय प्राथना जाह्ङुतो। 3 यात दिन हिदिङको सुम बजेताङ ओउइ यातज्यो दर्सन दोःआ। ओउइ परमेस्वरको यातज्यो लाङकादुत लयकताङ वाङ्तिमुओ च्यवाकान, र ओउकाय “कर्नेलियस” त दाह्य्ति गोःआथय। 4 कर्नेलियस जोक्तो ग्याह्ङा र लाङकादुतकाय योओको योओ स्यावा, ओउइ ह्वताकान, “प्रभु, इ जुदा दोह खेना र?” अनि लाङकादुतइ जवाफ बयाथय, “परमेस्वरइ नाङको प्राथना साइसास्यावो मुना र नाङइ गरिबलमकाय सहयोग जाह्ङो कुरा चिःसास्यावो मुना। 5 द्याह सिमोन पत्रुस त तोओ मान्ताकाय द्याःन्ति लात्ति वान्साको लागि केहि मान्तालमकाय योप्पाताङ ल्होकु। 6 सिमोन पत्रुस छालाको काम जाह्ङो सिमोनको किमहाङ मुना, ओउको किमखे समुन्द्रको किनारहाङ परना।” 7 जब कर्नेलियसकुस नोःओ लाङकादुत ओउकसय वेङ्ति पाह्या, ओउइ लयको किमहाङ काम जाह्ङो निसचाक नोकर र लयको र परमेस्वरको सेवा जाह्ङो यातचाक सिपाहिकाय गोताकान। 8 कर्नेलियसइ ओउ सुम जनाकाय जुदा कुरा ल्हाक्ति छ्यानाक्तिको ओउमयकाय योप्पाताङ ल्होकाकान। 9 अर्को दिन, हिदिङको समयहाङ ओउमय योप्पा सहर द्याङ्तो दाहाकाय। ओउच्युक खेरले पत्रुस प्राथना जाह्ङ्साको लागि किमको त्याःव लेङो छानाहाङ लह्ना। 10 ओउ आन योङक्रायो खेतो र केहि थोक जेःसा चाहतो। जब जेःगा-तुङ्गा तयार स्याउधयमुओ खेतो, ओउइ यातज्यो दर्सन च्यवाकान। 11 ओउइ लाङका फोलो र प्लय गोता चोङहाङ लाइ पाःनो घोको न्हापनाय लेखाताह्ङो केहि थोक लाङकासय ल्हाउदयबाङताङ क्लाःधयमुओ च्यवाकान। 12 ओउ न्हापनायहाङ नाःतो खालको पसुलम, जुदा खालको साःहाङ याको म-मयो प्रानिलम, र फेलबाङहाङ स्युङो वाःलम खेइतो। 13 अनि यातज्यो हाउनयइ ओउकाय तोआथय, “अ पत्रुस, चिङ! इलमकाय सात्ति जेःउ।” 14 तर पत्रुसइ तोआकान, “प्रभु, ओउत हाइसापाय ङाइ जुगाङले खाइङल। धइतिदाह्य्सा यहुदि नेम-कानुनइ अपबित्र अथबा असुद्ध त दाह्य्ति तोओ थोकलमपाय ङाइ गलमा जेःओ नाःल।” 15 फेरिले हाउनयइ ओउकाय तोआथय, “परमेस्वरइले सुद्ध जाह्ङ्सास्यावो दोह थोकलमकायमा असुद्ध त दाह्य्ति म्हर्लाम।” 16 ओउइ यातज्यो दर्सनले सुमपल्त च्यवाकान। ओहाङसयको ओउ न्हापनाय लाङकाताङ द्याःन्ति आःल्लेआ। 17 जब लयइ च्यवो दर्सनको माने दोह खेचा त दाह्य्ति पत्रुस ग्याह्ङ्तिमुओ खेतो, ओउच्युक खेरले कर्नेलियसइ ल्होको मान्तालम छालाको काम जाह्ङो सिमोनको किम तह्य्ति दह्य्लो ङ्हा चिङाकाय। 18 ओउमयइ ताह्ङो हाउनयहाङ हिह्ति गोःआकानि, “दोह सिमोन पत्रुस त मय्ङ्ओ मान्ता इहाङ मुना या?” 19 ओउच्युक खेरसम्मले पत्रुस इ दर्सनको माने दोह स्याउसा खाइनउ त दाह्य्ति सोचधय खेतो, अनि ग्वालामइ ओउकाय तोसास्यावा, “सायु, सुम जना मान्तालम नाङकाय बोःङ्धय मुनय। 20 ओउतझ्यान्ते तयार स्याउति काःम ग्ल्युह्ङ, र गतमा म्हर्मात ओउमयकुस आल, धइतिदाह्य्सा ओउमयकाय ङाइले ल्होको खेनाङ।” 21 ओहाङसयको पत्रुस काःम ग्ल्युह्ङा र ओउमयकाय तोआकान, “निङइ बोःङो मान्ता ङाले खेनाङ। निङ धइति इहाङ वाङो खेतेनय?” 22 ओउमय त्याङाकाय, “यातचाक कर्नेलियस त मय्ङ्ओ रोमि हाकिमिइ निकाय ल्होकाताङ्सु। ओउखे धर्मि मान्ता खेना र ओउइ परमेस्वरको भक्ति जाह्ङ्नउ, र जुदा यहुदि मान्तालमइ ओउकाय मान जाह्ङ्नाथय। कर्नेलियसइ नाङकसय खबर साइसा दोःपाना त दाह्य्ति परमेस्वरको पबित्र लाङकादुतइ ओउकाय लयको किमहाङ नाङकाय गोत्साको लागि तोसास्यावा।” 23 ओउतझ्यान्ते पत्रुसइ ओउ सुम जनाकाय ओउ याह्दिङ ओहाङले बास मुसाको लागि तोआकान। स्याह्ङ्लो दिन पत्रुस तयार स्याउति ओउमयकुस आला, र योप्पाको केहि बिस्वासिलममा ओउकुस ब्रकले आलाकाय। 24 चित्सयलो दिन ओउमय कयसरिया त तोओ सहरहाङ दाहाकाय। कर्नेलियसखे लयइ गोतो लयको मान्तालम र लयकुस जोक्तो मिलओ होयालमकुस ब्रक्त मुति पत्रुसकाय ल्युह्ङ्तिमुओ खेतो। 25 जब पत्रुस दाह्तिवाङा, कर्नेलियसइ ओउकाय अभिबादन जाह्ङाकान, र ओउको दोमहाङ खुःङ्ति ओउकाय सेवआकान। 26 तर पत्रुसइ ओउकाय एत तोधय चिङसा लावाकान, “चिङसास्याउपा, ङामा नाङ लेखाताह्ङो मान्ताले खेनाङ।” 27 पत्रुस कर्नेलियसकुस नोःधयले किमभित्र पोका, र ओहाङ ओउइ नाःतो मान्तालम हुम्तिमुओ क्रुसाकान। 28 पत्रुसइ ओहाङ हुम्तिमुओ मान्तालमकाय तोआकान, “निङइ चिःओले मुतेनय, यहुदि मान्तालमकाय अरु जातिको मान्तालमको किमहाङ पोक्सा र ओउमयकुस मिलसाकाय यहुदि नेम-कानुनइ अनुमति बयो नाःल। तर सु मान्तालमकायमा अपबित्र अथबा असुद्ध मानसा स्याउल त दाह्यो कुरा परमेस्वरइ ङाकाय छ्यान्सास्यावो मुना। 29 ओउतझ्यान्ते निङइ ङाकाय गोत्लाङ ल्होक्नातासले ङा गतमा म्हर्मात वाङालाङ। द्याह दाह्य्न, निङइ ङाकाय धइति गोत्लाङ ल्होको खेतेनय?” 30 कर्नेलियसइ तोआकान, “प्लय दिन ङ्हा, हिदिङको सुम बजेताङ ङा लयको किमहाङ प्राथना जाह्ङ्धय खेङतो। अचानक प्लिह्ङो नाय लावओ यातचाक मान्ता ङाको ङ्हा चिङा। 31 ओउइ ङाकाय तोआताङ, ‘अ कर्नेलियस, परमेस्वरइ नाङको प्राथना साइसास्यावो मुना र नाङइ गरिबलमकाय सहयोग जाह्ङो कुरा चिःसास्यावो मुना। 32 द्याह सिमोन पत्रुस त तोओ मान्ताकाय गोत्लाङ केहि मान्तालमकाय योप्पाताङ ल्होकु। सिमोन पत्रुस छालाको काम जाह्ङो सिमोनको किमहाङ मुना, र ओउको किमखे समुन्द्रको किनारहाङ परना।’ 33 ओहाङसयको ङाइ रेह्न्तोले नाङकाय गोत्लाङ मान्तालम ल्होकालाङ, र नाङमा पेतोकुसले वाङ्तेआ। देङे नि इहाङ परमेस्वरको ङ्हा, प्रभुइ नाङकाय बइसास्यावो आखर साइसाको लागि ल्युह्ङ्ति मुनाङ्सु।” पत्रुसको भासन 34 अनि पत्रुसइ ओउमयकाय तोआकान, “दोङ्सिले ङाइ चिःनाङ, परमेस्वरइ जुदा मान्तालमकाय यातय खालको बेबहार जाह्ङ्सास्याउना। 35 गाउखे जातिको मान्तालम खेयाकायमा परमेस्वरको सेवा जाह्ङो र पेओ काम जाह्ङोलमकुस परमेस्वर म्रोसा स्याउना। 36 इखे परमेस्वरइ इस्राएलको मान्तालमकाय ल्होक्सास्यावो पेओ खबरको खबर खेना, परमेस्वर र मान्तालमको माझहाङ येसु ख्रिस्त दुवारा मात्र धोमायो सम्भब स्याउलेना। ओउले जुदा मान्तालमको प्रभु खेसास्याउना। 37 युहन्नाइ मान्तालमकाय बप्तिस्मा लेःसाको लागि प्रचार जाह्ङापछि गालिल छेत्रसय सुरु स्याउति जुदा यहुदियाहाङ स्यावो घतनाको बारेहाङ निङइ चिःओले मुतेनय। 38 परमेस्वरइ नासरतको येसुकाय गतहाइति पबित्र ग्वालाम र जिःङ बइति छ्युह्ङ्सास्यावो खेतो त दाह्यो कुरामा निङइ चिःओले मुतेनय। अनि येसुइ जुदा थाउहाङ आल्ति पेओ कामलम जाह्ङ्सास्यावा र दुस्त सय्तानको अधिनहाङ परओलमकाय स्याक्ताक्सास्यावा, धइतिदाह्य्सा परमेस्वर येसुकुस खेसास्याउतो। 39 निखे येसुइ इस्राएल र यरुसलेमहाङ जाह्ङ्सास्यावो जुदा कामलमको साछि खेनाङ्सु। अनि यरुसलेमको अगुवालमइ येसुकाय क्रुसहाङ योकोति साताकानि। 40 तर परमेस्वरइ येसुकाय सुमम् दिनहाङ सिओसय उह्ति च्योक्ताक्सास्यावा र केहि मान्तालमकहाङ थाताक्सास्यावा। 41 जुदा मान्तालमइपाय येसुकाय च्यउनिलि, तर येसुको बारेहाङ अरु मान्तालमकाय ल्हाक्ति छ्यान्साको लागि परमेस्वरइ छ्युह्ङ्सास्यावो निइखे येसुकाय च्यवालाङ्सु। र येसु सिओसय उह्ति च्योक्सास्यावापछि नि ब्रक्त मुति जेःआलाङ्सु र तुङालाङ्सु। 42 मान्तालमकाय परमेस्वरको पेओ खबर प्रचार जाह्ङ्सा, अनि परमेस्वरइ येसुकाय सिओ र जिउदो मान्तालमको न्यायधिस जाह्ङ्सास्यावो मुना त दाह्य्ति साछि बइसाको लागि येसुइ निकाय आग्या जाह्ङ्सास्यावो मुना। 43 सु-सुइ येसुकाय बिस्वास जाह्ङ्नानि, ओउमयको पापलमखे येसुको मय्ङको जिःङसय छेमा स्याउलेना त दाह्य्ति जुदा अगमबक्तालमइ तोओ मुलेना।” अरु जातिको मान्तालमइ पबित्र ग्वालाम दोःओ 44 पत्रुस नोःति मुतोक बेलाहाङले ओउको कुरा साइतिमुओ जुदालमकहाङ पबित्र ग्वालाम वाङ्सास्यावा। 45 अरु जातिको मान्तालमकायमा पबित्र ग्वालामको बरदान बयो च्यउति पत्रुसकुस वाङो यहुदि बिस्वासिलम ग्याह्ङाकाय। 46 धइतिदाह्य्सा ओउ साइतिमुओलमइ अरु भासाहाङ नोःओ र परमेस्वरको प्रसङ्सा जाह्ङ्धयमुओ ओउमयइ सायो खेइतो। अनि पत्रुसइ ह्वताकान, 47 “निइ दोःओ लेखाले इ मान्तालमइमा पबित्र ग्वालाम दोःआकाय, द्याह इ मान्तालमकाय तिःको बप्तिस्मा बइसाकाय सुइ रोकसा खाइनानि र?” 48 ओउतझ्यान्ते पत्रुसइ ओउमयकाय येसु ख्रिस्तको मय्ङहाङ बप्तिस्मा लेःसाकाय आग्या जाह्ङाकान। अनि ओउमयइ केहि दिनच्युककाय लयमयकुस मुसाको लागि पत्रुसकाय बिन्ति जाह्ङाकानि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.