खबरदुत 1 - चेपाङ1 ङाको राप्तो होया थियोफिलस, येसुइ लयको काम सुरु जाह्ङ्सास्यावो समयहाङसय लेःति परमेस्वरइ येसुकाय लाङकाताङ आःल्सास्यावो बेलासम्म येसुइ जाह्ङ्सा र स्यान्सास्यावो जुदा कुराको बारेहाङ ङाइ ङाको यातम् कितापहाङ लेखतिखायो मुना। 2 परमेस्वरइ येसुकाय लाङकाताङ आःल्सासय ङ्हा लयइ छ्युह्ङ्सास्यावो मुख्य चेलालमकाय येसुइ पबित्र ग्वालाम दुवारा आग्या जाह्ङ्सास्यावा। 3 दुख दोःति क्रुसहाङ सिओको लोन्हे चालिस दिनभित्रहाङ येसु लयको चेलालमको ङ्हा नाःतो पल्त थासास्यावा, र लय दोङ्सिले स्याको कुरा ओउमयकाय नाःतो तरिकासय प्रमान बइसास्यावा। र येसुइ ओउमयकाय परमेस्वरको राज्यको बारेहाङमा तोसास्यावा। 4 यातपल्त येसु मुख्य चेलालमकुस जेःसाकाय मुसास्याउधार्ना ओउमयकाय एतदाह्य्ति आग्या बइसास्यावा, “ङाइ निङकाय ङ्हाले तोओ अनुसार ङाको आपाइ बाचा जाह्ङ्सास्यावो बरदान ल्होक्माच्युकसम्म निङ यरुसलेम फेति गाताङमा आल्लाम। 5 धइतिदाह्य्सा युहन्नाइ तिःको बप्तिस्मा बयाकान, तर केहिदिन लोन्हे निङखे पबित्र ग्वालामको बप्तिस्मा दोःतेनय।” परमेस्वरइ येसुकाय लाङकाताङ आःल्सास्यावो 6 जब मुख्य चेलालम येसुकुस ब्रक्त खेइतो, ओउमयइ येसुकाय ह्वताकानि, “अ प्रभु, दोह नाङइ इ समयहाङले निकाय रोमिलमको बन्धनसय छुत्कारा बइति निको इस्राएल राज्य निकाय फेरि द्याःन्ति बइसास्याउना या?” 7 येसुइ ओउमयकाय तोसास्यावा, “ओउ दिन र समयलम दोक्सा अधिकार परमेस्वर आपाकहाङ मात्र मुना, र ओउखे गल स्याउना त दाह्य्ति निङकाय चिःसाको लागि खेलेल। 8 तर जब पबित्र ग्वालाम निङकहाङ वाङ्सास्याउना, निङ जिःङ दोःतेनय। अनि जुदा मान्तालमकाय ङाको बारेहाङ तोति यरुसलेमहाङ, यहुदियाको जुदा थाउहाङ, सामरियाहाङ र ल्हाउदयबाङको जुदा थाउहाङमा निङ ङाको साछि स्याउतेनय।” 9 येसुइ इ कुरा तोति भ्याआपछि, ओउमयइ योति मुतोकहाङले परमेस्वरइ येसुकाय लाङकाताङ आःल्सास्यावा, र मुसइ बोःमोझ्यान्ते ओउमयइ येसुकाय च्यउसा खाइनिलि। 10 येसु पाह्य्सास्यावो लाङकाताङ ओउमय अझले त्याउति योधय खेइतो, अनि अचानक भाम्तो प्लिह्ङो नाय लावओ निसचाक मान्ता ओउमयको द्याङ्तो चिङाकाच। 11 ओउनिसइ तोआकाचु, “अ गालिलको मान्तालम, निङ धइति इहाङ चिङ्ति फेलबाङताङ त्याउति योधय मुतेनय? गतहाइति निङकसय परमेस्वरइ येसुकाय लाङकाताङ आःल्सास्यावो निङइ च्यउतेआकानि, ओउतहाइतिले यात दिन ओउ येसु द्याह्न्ति वाङ्सास्याउना।” यहुदाको होन्त मतियासकाय छ्युह्ङो 12 ओहाङसयको मुख्य चेलालम जयतुन दान्दासय यरुसलेमताङ द्याह्नाकाय। ओउ दान्दाखे सहरसय यात किलोमितरच्युक लोक्तो खेतो। 13 ओउमय यरुसलेम दाहाकाय, अनि लयमय मुओ किमको त्याःव चोताहाङ लह्न्ति यातज्यो कोथाहाङ हुमाकाय। ओहाङ हुमो मुख्य चेलालमखे पत्रुस, युहन्ना, याकुब, अन्द्रियास, फिलिप, थोमा, बार्थोलोमय, मति, अल्फायसको चोः याकुब, देसभक्त त तोओ सिमोन र याकुबको चोः यहुदा खेइतो। 14 ओउ मुख्य चेलालमइखे येसुकाय गुह्ल्ति वाहो मोम्चोलम, येसुको आमा मरियम, र येसुको हउलमकुस हुमाक्तिको यातय मनको स्याउति प्राथना जाह्ङ्नितो। 15 यात दिन बिस्वासिलम यात सय बिस जनाच्युक हुमो खेइतो, र पत्रुसखे ओउमयको ङ्हा नोःसाको लागि चिङा, 16 र एतदाह्य्ति तोआकान, “ङाको राप्तो बिस्वासि होयालम, येसुकाय पक्रओ मान्तालमकाय अगुवाय जाह्ङो यहुदाको बारेहाङ तोओ धर्मसास्त्र पुत्साले परतो। ओउखे उहिलेखा पबित्र ग्वालामइ राजा दाउदको म्होतोङसय ङ्हाले तोसास्यावो खेतो। 17 यहुदामा नि मध्येकोले यातचाक खेतो, र निकुस ब्रक्त मुति परमेस्वरको सेवा जाह्ङ्साको लागि येसुइ ओउकायमा छ्युह्ङ्सास्यावो खेतो।” 18 (ओउ यहुदाइ लयको अधर्मको कमायसय यातज्यो राङ दोःआ, र ओउ राङहाङले सोःर्ताङ तालाङ जोन्ति ग्लेति सिआ अनि ओउको तुक पक्ति योङ्क्लिःतुकपुन स्रादाबादा त स्यावा। 19 इ कुराखे यरुसलेमहाङ याको जुदा मान्तालमइ चिःआकानि, ओउतझ्यान्ते ओउमयइ ओउ राङको मय्ङ लयको भासाहाङ “हाकेलदमा” त दाह्य्ति गमाकानि। ओउको मानेखे “वुइको राङ” खेना।) 20 पत्रुसइ एतदाह्य्तिमा तोआकान, “भजनसङ्ग्रहको कितापहाङ राजा दाउदइ एत लेखओ मुना, ‘ओउको किम दोहमा नाःमातो स्याउपाना, र ओहाङ याक्साकाय सुमा स्याउलाम।’ अनि एतमा लेखओ मुना, ‘ओउइ जाह्ङो कामको जिम्मेवारि अरुइले लेःपानानि।’ 21 ओउतझ्यान्ते द्याह निइ प्रभु येसु निकुस मुसास्याउधार्नाको जुदा समयहाङ निकुस ब्रकले मुओलम मध्येको यातचाककाय यहुदाको होन्त छ्युह्ङ्सा परलेना। 22 ओउखे येसुइ युहन्नाकसय बप्तिस्मा लेःओ समयहाङसय लेःति परमेस्वरइ येसुकाय निकसय लाङकाताङ आःल्सास्यावो बेलासम्म स्यावो खेसा परना। धइतिदाह्य्सा ओउ मान्ताखे निकुस ब्रकले येसु उह्ति च्योक्सास्यावोको साछि स्याउसा परलेना।” 23 ओहाङसयको ओहाङ हुमो बिस्वासिलमइ निसचाक मान्ताको मय्ङ ङ्हा वानाकानि। यातचाकखे बार्साबास त तोओ योसेफ खेतो, र मान्तालमइ ओउकाय युस्तस त दाह्य्तिमा चिःनितो। र अर्को मान्ताखे मतियास खेतो। 24 अनि ओउमय जुदाइ एतदाह्य्ति प्राथना जाह्ङाकानि, “अ प्रभु, नाङइ जुदा मान्तालमको ल्हुङतुकहाङ मुओ कुरा चिःसास्याउना। ओउतझ्यान्ते इ निसचाकमध्ये सुखेकाय नाङइ छ्युह्ङ्सास्यावो मुना निकाय छ्यान्ति बइसास्याउपाना, 25 ओउखे मुख्य चेला स्याउसा र लयको जिम्मेवारि फेति लयकाय ज्योओ थाउताङ पाह्यो यहुदाको जिम्मेवारि लेःति सेवाकाय जाह्ङ्सा खायो स्याउपाना।” 26 ओहाङसयको ओउमयइ ओउ निसचाकको मय्ङहाङ चित्था आपाकानि। अनि चित्थाखे मतियासको मय्ङहाङ परआ, र एतहाइति मतियासकायमा अरु एघार जना मुख्य चेलालमकुस मुख्य चेला स्याउसाको लागि छ्युह्ङाकानि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.