२ तीमोथी 4 - चेपाङ1 ख्रिस्त येसु लयको राज्य तयार जाह्ङ्साको लागि राजाको रुपहाङ द्याह्न्ति वाङ्सास्याउतोक बेलाहाङ, ओउ बेलासम्म सिधाङ्मालो र ङ्हाखाले सितिखायो मान्तालम जुदाकायले न्याय जाह्ङ्सास्याउना। ओउतझ्यान्ते परमेस्वर र ख्रिस्त येसुको ङ्हा ङाइ नाङकाय इ आग्या बइनेनाङ— 2 परमेस्वरको आखर मान्तालमकाय प्रचार जाह्ङु। प्रचार जाह्ङ्साको लागि बेलाहाङमा कुबेलाहाङमा तयार स्याउति मुअ। मान्तालमइ गल्ति जाह्ङ्तोकहाङ सुधार जाह्ङु, र फेरि गल्ति जाह्ङ्मासाको लागि थतु, अनि पेओ काम जाह्ङ्साको लागि हउसला बयु। तर मान्तालमकाय पेओ स्यानराय बइतोकहाङखे धइरे स्याउतिले स्यानु। 3 धइतिदाह्य्सा मान्तालमइ परमेस्वरको सत्य स्यानरायकाय साइमालो समयमा वाङ्लेना। ओउमयखे लयको इच्छ्याको लोन्हे लागनय, र ओउमयइ लयमयको इच्छ्या अनुसारको कुरा तोतिबयो स्याताहा गुरुलमको कुराकाय साइनानि। 4 ओउमयपाय सत्य कुरा साइसाको होन्त स्याताहा विनराय साइसाखे झाक्लेनय। 5 तर नाङइखे हरेक अबस्थालमहाङमा लयको मनकाय अनुसासनहाङ गमु। प्रभुको लागि दुख दोःसाकाय नाङ जुगाङमा रइलाम। बरु अरु मान्तालमकाय पेओ खबर प्रचार जाह्ङु, र परमेस्वरइ नाङकाय बइसास्यावो सेवाको कामकाय पुरा जाह्ङु। 6 ङाको रुवाङखेपाय ङ्हाखाले बलिदानको लागि बेदिहाङ गम्तिखायो मुना, र ङाको सिसाखेओ दिनखे द्याङ्तोले दाह्तिखायो मुना। 7 ङाइ पेतोकुसिले युद्ध जाह्ङालाङ। ङाइ तनो काम द्योकालाङ, र ङाइ बिस्वासकाय दल्ताक्ति गमो मुनाङ। 8 द्याहखे ङाको लागि धार्मिक्ताको मुकुत गमो मुना। निको धर्मि न्यायधिस प्रभुइ लय द्याह्न्ति वाङ्सास्याउतोक बेलाहाङ ओउ मुकुत ङाकाय बइसास्याउना, र ओउ मुकुतखे ङाकाय मात्र खेमात, प्रभु द्याह्न्ति वाङ्साखेओ ल्यामकाय चोङाइति योतिमुओ जुदाकायले बइसास्याउलेना। पावलको अन्तिम कुरा 9 तिमोथि, नाङखे खाइच्युकसम्म रेह्न्तोले ङाकाय क्रुस्लाङ वाङ। 10 देमासइ इ रुवाङको चोङाइसिओ थोकलमकाय रापोझ्यान्ते ङाकाय फेआक्तिको थेसलोनिके सहरताङ आला। क्रेसेन्सखे गलातियाताङ र तितसखे दलमातिया छेत्रताङ आला। 11 इहाङ ङाकुस लुका मात्र मुना। नाङ वाङ्तोकहाङ मर्कुसकायमा लात्ति वाङ, धइतिदाह्य्सा ओउइखे ङाइ जाह्ङो सेवाको कामहाङ सहयोग जाह्ङ्लेनउ। 12 ङाइ तुखिकसकाय एफिसस सहरताङ ल्होको मुनाङ। 13 त्रोआस सहरहाङ याको कार्पसकहाङ ङाइ यातज्यो क्रमनाय फेतिगमो खेङतो, नाङ इताङ वाङ्तोकहाङ ओउ क्रमनाय ङाकाय वान्ति बइचि। नाङ वाङ्तोकहाङ कितापलम लात्ति वान्साकाय म्हेःलाम, र बिसेस जाह्ङ्ति छालाको किताप वान्साखे जुगाङमा म्हेःलाम। 14 ताम्बको काम जाह्ङो यातचाक अलेक्जेन्दर त मय्ङ्ओ मान्ताइ ङाकाय माहा दुख बयाताङ, तर ओउइ जाह्ङो कामको न्यायखे प्रभुइले जाह्ङ्सा स्याउना। 15 ओउ मान्ताकसयखे नाङमा होसियार स्याउति मुअ, धइतिदाह्य्सा निइ जाह्ङो प्रचारको जुदा कुराकाय ओउइ माहा जोक्तो बिरोत जाह्ङो मुना। 16 यातम् पल्त न्याय जाह्ङ्साको लागि ङाकाय न्यायधिसकहाङ आःल्तोकहाङ, ङाकाय सहयोग जाह्ङ्लाङ सुमा वाङिलि, र ओउ बेलाहाङ जुदाइले ङाकाय त्यागआताङ्स। ओउ कुराको गालखे ओउमयकाय परजेलाम। 17 तर ङाकाय सहयोग जाह्ङ्साको लागि ङाको पासहाङ प्रभु खेसास्याउतो। प्रभुइले ङाकाय बल बइसास्यावोझ्यान्ते ङाइ पेतोकुसि पेओ खबर प्रचार जाह्ङ्सा खायालाङ, र अरु जातिको जुदा मान्तालमइले ओउ साइसा दोःआकाय। ओउतहाइति प्रभुइ ङाकाय जाःको म्होतोङसय दल्ताक्सास्यावा। 18 मा, प्रभुइले ङाकाय जुदा खालको पेमालो थोकलमसय दल्ताक्सास्याउलेना, र पेतोकुसि सुरछ्या बइति लयको लाङकाको राज्यहाङ वान्सा स्याउलेना। परमेस्वरकाय जुदा महिमा सधयको लागि स्याउति मुपाना। आमेन। पावलको अन्तिम अभिबादन 19 प्रिस्किला र अकिलास, अनि ओनेसिफरसको जुदा माचरलमकाय ङाको अभिबादन मुना त दाह्य्ति तोति बयु। 20 इरास्तसखे कोरिन्थ सहरहाङले मुआ, तर त्रोफिमसखे बिरामि स्यावोझ्यान्ते ङाइ ओउकाय मिलेतस सहरहाङले फेति गमालाङ। 21 नाङखे खाइच्युकसम्म झ्युङकाले समय भन्दा ङ्हाले वाङ्सा कोसिस जाह्ङु। युबुलस, पुदेस, लिनस, क्लउदिया, र इहाङ मुओ जुदा बिस्वासि हउचोङ-पुःचोङलमइ नाङकाय अभिबादन ल्होको मुना। 22 तिमोथि, प्रभु येसु ख्रिस्त नाङकुसि मुसास्याउपाना। अनि परमेस्वरको अनुग्रहखे निङ जुदाकुसिले स्याउपाना। आमेन। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.