२ तीमोथी 3 - चेपाङअन्तिम दिनलमहाङ मान्तालमको अबस्था 1 तिमोथि, अन्तिमको दिनलमहाङ माहा रइसिओ दुखको समयलम वाङ्ना त दाह्यो कुराकाय नाङइ चिःति गमु। 2 धइतिदाह्य्सा ओउ दिनलमहाङ मान्तालमइ लयइ लयकाय र थेपोकाय मात्र राप्नानि, र ओउमय माहा जोक्तो मःन्नाइसि र ङाःरेउ स्याउनय। अनि ओउमय परमेस्वरको अपमान जाह्ङो र लयको आपा-आमाको कुराकाय माःनेमालो, बइगुनि र परमेस्वरको भक्ति जाह्ङ्मालो मान्ता स्याउनय। 3 ओउमयखे सुकायमा राप्मालो र सुकायमा छेमा बइमालो स्याउनय, अनि ओउमय अरुको बारेहाङ स्याताहा कुरा नोःओ र लयको मनकाय अनुसासनहाङ गम्मालो स्याउनय। ओउमय अरुकाय दुख बयो र पेओ कुराकाय हेला जाह्ङो स्याउनय। 4 ओउमयइ लयको होयालमकायले धोका बइनानि, एत हाइधार्ना लोन्हे दोह स्याउना त दाह्यो कुरा सोचमातले मुर्ख कामलम जाह्ङ्नानि, र अरु मान्तालमकाय भन्दा लयकायखे महत्वको ताःनाइसि। ओउतले ओउमयइ परमेस्वरकाय राप्सा भन्दामा लयको रुवाङ मोजमज्जाहाङ बिताउसा इच्छ्या जाह्ङ्नानि। 5 ओउमयइ लयमयकाय धर्मि मःन्नाइसि, तर लयमयकाय परमेस्वरको भक्ति जाह्ङ्ताको जिःङकायखे इन्कार जाह्ङ्नानि। ओउतताह्ङो मान्तालमकसयखे नाङ लयले दल्ति मुअ। 6 ओउमय मध्येको केहि मान्तालमखे अरु मान्तालमको किम-किमहाङ पोक्नय, अनि लयमयइ जाह्ङो पापको लिओ भारि र नाःतो खालको दुस्त इच्छ्यालमको बन्धनहाङ परओ मुर्ख मोम्चोलमकाय लयको अधिनहाङ गम्नानि। 7 ओउ मोम्चोलम केहि नया कुरा चिःसापाय चाहनय, तर सत्य कुराकायखे गलमा चिःसा खाइलेनिलि। 8 यान्नेस र याम्ब्रेसइ गतहाइति मोसाको बिरोत जाह्ङो खेचतो, ओउतले ओउ मान्तालमइमा सत्यको बिरोत जाह्ङ्नानि। ओउमयको मन भ्रस्त स्याउतिखायो मुना, र ओउमयइ जाह्ङो बिस्वासखे स्याताहा खेना। 9 तर ओउमयइ ओउतताह्ङो मुर्ख कामलम सधयभरि जाह्ङ्तिमुसा खाइलेनिलि, धइतिदाह्य्सा ओउ यान्नेस र याम्ब्रेसको लेखाले ओउमयको मुर्ख थोकलममा जुदा मान्तालमइ चिःलेनानि। तिमोथिकाय पावलको अन्तिम आग्या 10 तर तिमोथि, ङाइ मान्तालमकाय दोह स्यानराय स्यान्नाङ, ङा गतहाइति याक्नाङ, र ङाको रुवाङको उदेस्य दोह खेना त दाह्यो कुरापाय नाङइ चिःओले मुतेना। ओउतले ङाइ जाह्ङो बिस्वास, ङाइ सहओ कुरालम, ङाको रापमय, र ङाको धइरेतामा नाङइ चिःओले मुतेना। 11 एन्तिओखिया, आइकोनियन, र लुस्त्रा सहरलमहाङ ङाइ गच्युक दुख दोःआलाङ त दाह्यो कुरामा नाङइ पेतोकुसिले चिःओ मुतेना। तर ओउतताह्ङो दुखको अबस्थालमसयमा प्रभुइले ङाकाय दल्ताक्सास्यावो खेना। 12 ख्रिस्त येसुहाङ भक्ति जाह्ङ्ति याक्सा झाको जुदा मान्तालमइ सतावतको दुख दोःलेनय त दाह्यो कुराखे सत्यले खेना। 13 तर दुस्त र माःरेउ मान्तालमखे झन्-झन् पेमातो स्याउति आल्लेनय। ओउमयइ अरुकाय धोका बइनानि र ओउमयमा अरुकसय धोका दोःलेनय। 14 तर पेओ खबरको बारेहाङ नाङइ सु-सुकसय स्यानराय दोःतेआ त दाह्यो कुरापाय नाङइ चिःओले मुतेना। ओउतझ्यान्ते नाङखे धइरेताकुसिले ओउ कुराहाङ बिस्वास जाह्ङ्ति मुअ। 15 नाङपाय बालाख कालहाङसयले पबित्र धर्मसास्त्रको बारेहाङ स्यानराय दोःति हुर्कओ मान्ता खेतेना। ख्रिस्त येसुहाङ बिस्वास जाह्ङ्तोकहाङ मुक्ति दोःना त दाह्यो कुराको बुद्दिखे ओउ धर्मसास्त्रसयले दोःना। 16 जुदा धर्मसास्त्र परमेस्वरकसयले वाङो खेना। अनि इखे मान्तालमकाय सत्य कुरा स्यान्साको लागि, गल्ति जाह्ङोलमकाय अर्थि बइसाको लागि, गलत कुरालमसय सुधार जाह्ङ्साको लागि, र गतहाइति रुवाङहाङ पेतोकुसि याक्सा परना त दाह्य्ति तालिम बइसाको लागि पेतो स्याउलेना। 17 ओउतझ्यान्ते परमेस्वरको सेवा जाह्ङो मान्तालम जुदा खालको पेओ कामलम जाह्ङ्साको लागि ज्योतो स्याउपनय त दाह्य्तिले धर्मसास्त्र बयो खेना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.