२ तीमोथी 2 - चेपाङख्रिस्त येसुको पेओ सिपाहि 1 ङाको लयको राप्तो चोः लेखाले ताह्ङो तिमोथि, परमेस्वरइ नाङको लागि येसु ख्रिस्तहाङ बइसास्यावो अनुग्रह दुवारा नाङ बल्यो स्याव। 2 नाःतो साछिलमको माझहाङ ङाइ स्यानो स्यानरायपाय नाङइ सायोले मुतेना। द्याहखे नाङइ ओउ स्यानराय अरु मान्तालमकायमा स्यान्सा खायो बिस्वासिलो मान्तालमकाय स्यानु। 3 ख्रिस्त येसुको पेओ सिपाहि लेखाले, नाङमा ङाकुसले दुख दोःसाको लागि तयार स्याव। 4 युद्धको लागि सेनाहाङ आलो सु मान्तालममा अरु कामलमहाङ लागइलि, धइतिदाह्य्सा ओउमयइपाय लयको कप्तानकाय आसताक्सा इच्छ्या जाह्ङ्लेनानि। 5 यदि कुनय मान्ताइ तनो बाजिहाङ भाग लेःनउ, तर पेतोकुसि नेमलम पालन जाह्ङुलु त खेयाखे ओउइ इनाम दोःसा खाइलेउलु। 6 खेतिको यातम् भाकखे ल्हप्रतिः पान्तोसम्म जोक्तो मेहेनत जाह्ङो किसानिइले दोःसा परना। 7 ङा दोह कुरा नोःधय मुनाङ त दाह्यो कुराकाय ध्यान बइति सोचउ, धइतिदाह्य्सा प्रभुइले नाङकाय इ जुदा कुरालम चिःसाकाय सहयोग जाह्ङ्सा स्याउना। 8 राजा दाउदको सन्तान येसु ख्रिस्त सिओसय उह्ति च्योक्सास्यावो कुराको सधय सम्झना जाह्ङु। ङाइ मान्तालमकाय प्रचार जाह्ङो पेओ खबरखे इले खेना, 9 र ओउ पेओ खबर प्रचार जाह्ङो कारनइले ङा देङे दुख दोःति मुनाङ र अपराधिको रुपहाङ झेलकनहाङ साङ्लाइ पाःन्तिगमो मुनाङ। तर परमेस्वरको आखरकायखे साङ्लाइ पाःन्सा खाइलेल। 10 ओउतझ्यान्ते परमेस्वरइ छ्युह्ङ्सास्यावो मान्तालमइ ख्रिस्त येसुहाङ मुक्ति र अजम्बरि महिमा दोःपनय त दाह्य्ति ङाइ जुदा कुरा सहनाङ। 11 इ कुराखे बिस्वास जाह्ङ्सा ज्योओ सत्य स्यानरायले खेना— “यदि नि ख्रिस्तकुसि सिनातहि त खेया, निमा ख्रिस्तकुसिले स्याक्नातहि। 12 यदि निइ दुख-कस्तलम सहनातह्य्नि त खेया, निमा ख्रिस्तकुसिले सासन जाह्ङ्नातह्य्नि। यदि निइ ख्रिस्तकाय इन्कार जाह्ङ्नातह्य्नि खेया, ख्रिस्तइमा निकाय इन्कार जाह्ङ्सास्याउलेना। 13 यदि नि ख्रिस्तको लागि बिस्वासिलो स्याउतहिलि त खेयाकायमा, ख्रिस्तखे निको लागि बिस्वासिलो स्याउसास्याउलेना, धइतिदाह्य्सा ख्रिस्तइ लयइ लयको स्वभाबकाय इन्कार जाह्ङ्सा खाइसास्याउलेल।” परमेस्वर दुवारा छ्युह्ङ्सास्यावो कामदार 14 तिमोथि, इ कुरालमको बारेहाङ जुदा मान्तालमकाय सम्झाउ, र सब्दलमकाय लेःति लयमय कायकायो काम जाह्ङ्लाम त दाह्य्ति परमेस्वरको ङ्हा दर्कति तोउ। ओउतताह्ङो बहसलमइखे सुकायमा फाइदा जाह्ङुलु, र ओउतताह्ङो कुरालमइ सायो मान्तालमकायमा बिनासहाङ दाक्नउ। 15 परमेस्वरको ङ्हा जोक्तो मेहेनत जाह्ङ्ति काम जाह्ङु, अनि परमेस्वरइ नाङकाय सुइकार जाह्ङ्सा खाइतेपाना। ओउको लागि नाङखे रास्सा परमातो परमेस्वरको सत्य आखर पेतोकुसि मान्तालमकाय स्यानो पेओ कामदार स्याव। 16 परमेस्वरकाय मान-सम्मान स्याउमालो पेमालो कुरा जाह्ङो मान्तालमकसय दल्ति मुअ, धइतिदाह्य्सा ओउतताह्ङो कुरालमइ मान्तालमकाय परमेस्वरकसय लोक्तो जाह्ङ्लेनउ। 17 ओउतताह्ङो कुरालमखे ज्यानहाङ सय्ङ्ति ज्यालो सयनचा लेखाले खेना। हुमेनियस र फिलेतसइ स्यानो स्यानरायमा ओउत ताह्ङोले खेना। 18 सिओसय उह्ति च्योको काम ङ्हाखाले स्याउतिखायो मुना त दाह्य्ति ओउनिसइ सत्यको ल्यामकाय फेआकाचु। एतहाइति ओउनिसइ केहि बिस्वासिलमको बिस्वासकायमा मिह्तो जाह्ङ्ताक्धय मुनाच। 19 तर परमेस्वरको मान्तालमकुसखे बल्यो तोस मुना र ओउ गलमा दगलेल। ओउ तोसहाङले परमेस्वरइ एतदाह्य्ति लेखसास्यावो मुना— “सु मान्तालमखे लयको खेनय त दाह्यो कुरा प्रभु परमेस्वर लयइले चिःसास्याउना” र “ङा प्रभु परमेस्वरको मान्ता खेनाङ त दाह्यो मान्तालमइखे पेमालो दुस्त कामलम जाह्ङ्सा फेसा परलेना।” 20 धनि मान्ताको किमहाङपाय सुन र चान्दिको मात्र खेल, सिङ र साःको भान्दाकुन्दालममा स्याउना। महङ्गो भान्दाकुन्दालमखे बिसेस छ्यातलमको बेलाहाङ प्रयोग जाह्ङ्नानि, र सस्तो भान्दाकुन्दालमखे दिनमले प्रयोग जाह्ङ्नानि। 21 ओउतझ्यान्ते यदि कुनय मान्ताइ लयकाय सुद्ध जाह्ङ्ति गम्नउ त खेया, ओउखे मान-सम्मानको लागि प्रयोग जाह्ङो बिसेस भान्दाकुन्दालम लेखा स्याउलेना। ओउ सुद्ध स्याउना, अनि ओउको मालिकइ ओउकाय पेओ कामलमहाङ प्रयोग जाह्ङ्साको लागि तयार जाह्ङ्नाथय। 22 ओउतझ्यान्ते लयको जवानिपनको पेमालो इच्छ्यालमकाय फेउ। अनि सुद्ध मनकुसि प्रभुको भक्ति जाह्ङो मान्तालमकुस मिलति परमेस्वर झाक्तोको धर्मि रुवाङ याक्सा कोसिस जाह्ङु, बिस्वासिलो स्याव, अरु मान्तालमकाय रापु र ओउमयकुस धोमाइतोकुसि याक। 23 तर मुर्ख र अग्यानि कुरालमकाय इन्कार जाह्ङु, धइतिदाह्य्सा ओउतताह्ङो कुरालमइ कायकायतो स्याउना त दाह्यो कुरापाय नाङइ चिःओले मुतेना। 24 प्रभुको सेवकलमइखे कायकायो काम जाह्ङ्सास्याउल, बरु जुदा मान्तालमकुसले नम्र स्याउति बेबहार जाह्ङ्सा परना। अनि ओउमयखे परमेस्वरको सत्यताकाय पेतोकुसि स्यान्साखायो गुरु, र लयको बिरोत जाह्ङो मान्तालमकुसमा मिलति मुसाखायो मान्ता स्याउसा परना। 25 ओउमयइखे लयको बिरोत जाह्ङो मान्तालमकाय अर्थि बइतोकहाङ नम्र स्याउति बेबहार जाह्ङ्सा परना। सायद ओउत हाइतोकहाङ परमेस्वरइ ओउ बिरोत जाह्ङो मान्तालमको ल्हुङतुककाय परिवर्तन जाह्ङ्सास्याउना, र ओउमयइ परमेस्वरको सत्यताकाय चिःसा खाइनानि। 26 अनि ओउमय पेतोकुसि चिःतो स्याउनय, र दुस्त सय्तानको बन्धनसय बेनसा खाइनानि। धइतिदाह्य्सा ओउ दुस्त सय्तानइ ओउमयकाय लयको इच्छ्या अनुसार काम जाह्ङ्ताक्साको लागि बन्धनहाङ गमो मुना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.