२ तीमोथी 1 - चेपाङतिमोथिकाय पावलको अभिबादन 1 इ चिथिखे ख्रिस्त येसुको खबरदुत स्याउसाको लागि परमेस्वरइ लयको इच्छ्या दुवारा छ्युह्ङ्सास्यावो ङा पावलको तर्फसय खेना। परमेस्वरइ ख्रिस्त येसुहाङ बिस्वास दुवारा बाचा जाह्ङ्सास्यावो रुवाङको बारेहाङ अरु मान्तालमकाय ल्हाक्ति छ्यान्साको लागि ङाकाय ल्होक्सास्यावो खेना। 2 ङाइ इ चिथिखे ङाको लयको राप्तो चोः लेखाले ताह्ङो तिमोथिकाय लेखओ खेनाङ। परमेस्वर आपा र निको प्रभु येसु ख्रिस्तइ नाङकाय अनुग्रह, योःन्मय र धोमायो बइतेपाना। धन्नेबाद र हउसला 3 तिमोथि, जब ङाइ नाङकाय दिनखामा याह्दिङखामा ङाको प्राथनाहाङ सम्झनेनाङ, ङाको पुर्खालमइ जाह्ङोलेखा ङाइ सुद्ध मनकुसि सेवा जाह्ङो परमेस्वरकाय ङाइ धन्नेबाद बइनाङ। 4 ङाइ नाङको मिक्तिःकाय सम्झनाङ, र नाङकाय क्रुस्सा इच्छ्या जाह्ङ्नाङ, धइतिदाह्य्सा फेरि नाङकाय क्रुस्सा दोःयाकाय ङा आन आसचाङ खेतो। 5 ङाइ नाङकहाङ मुओ सत्य बिस्वासकाय सम्झनाङ, ओउ बिस्वासखे नाङको बजे लोइस र नाङको आमा युनिसकहाङमा खेतो। अनि ओउतताह्ङो बिस्वास अझले नाङकुस मुलेना त दाह्यो कुराहाङ ङा पक्का मुनाङ। 6 ओउतझ्यान्ते ङाइ लयको क्रुत नाङको तालाङहाङ झाम्तोकहाङ परमेस्वरइ नाङकाय बइसास्यावो ग्वालामि बरदानकाय जिउदोले गमु त दाह्य्ति ङाइ नाङकाय सम्झाउनेनाङ। 7 धइतिदाह्य्सा परमेस्वरइ निकाय रयोको ग्वालाम खेल, तर जिःङ, रापमय, र लयको मनकाय अनुसासनहाङ गमो ग्वालाम बइसास्यावो मुना। 8 ओउतझ्यान्ते निको प्रभुको बारेहाङ मान्तालमकाय गभाइ बइसा जुगाङमा रासलाम, अनि ओउतले ङा प्रभुको लागि झेलकनहाङ परओको बारेहाङमा रासलाम। बरु ङाकुसले पेओ खबरको लागि दुख दोःसाकाय तयार स्याव, अनि ओउ दुख सहसाको लागिखे परमेस्वरइले जिःङ बइसास्याउलेना। 9 निइ जाह्ङो कामको कारनइ खेल, तर परमेस्वरको उदेस्य र अनुग्रहको कारनइ जाह्ङ्धार्ना परमेस्वरइले निकाय दल्ताक्सास्यावा र लयको मान्ता स्याउसाको लागि गोत्सास्यावा। इ अनुग्रहखे सङ्सारको सुरु स्याउसासय ङ्हाखाले परमेस्वरइ येसु ख्रिस्तहाङ निको लागि बइसास्यावो खेतो। 10 तर देङेखे ख्रिस्त येसु निकाय दल्ताक्लाङ वाङ्सास्यावो मुना, र ओउसयले परमेस्वर गच्युक योःन्मय र अनुग्रहि खेसास्याउना त दाह्यो कुरा निइ चिःसा खाइनातह्य्नि। ख्रिस्तइ सिमयको जिःङकाय बिनास जाह्ङ्सास्यावा, र पेओ खबर दुवारा गलमा सिमालो अजम्बरि रुवाङ छ्यान्ति बइसास्यावा। 11 मान्तालमकाय ओउ पेओ खबर तोति बइसाको लागिले परमेस्वरइ ङाकाय प्रचारक, खबरदुत र गुरुको रुपहाङ छ्युह्ङ्सास्यावो खेना। 12 ओउतझ्यान्तेले देङे ङा इहाङ झेलकनखा दुख दोःति मुनाङ। तर इ कुराहाङखे ङा जुगाङमा रासङल, धइतिदाह्य्सा ङाइ सुकाय बिस्वास जाह्ङो मुनाङ त दाह्यो कुरा ङाइ पेतोकुसि चिःओ मुनाङ। परमेस्वरइ दोह कुरा ङाकाय बिस्वास दुवारा सुम्पति बइसास्यावो मुना, ओउ कुराखे लय द्याह्न्ति वाङ्माच्युकसम्म ख्रिस्तइले सुरछ्या जाह्ङ्ति गम्सास्याउना त दाह्यो कुराहाङमा ङा पक्का मुनाङ। 13 ङाइ नाङकाय स्यानो सत्य आखरकाय पेतोकुसि नमुनाको रुपहाङ ओमपाइति गमु। अनि नाङखे नाङकहाङ मुओ ख्रिस्त येसुको बिस्वास र रापमय अनुसार याक। 14 परमेस्वरइ नाङकाय बिस्वास दुवारा सुम्पति बइसास्यावो सत्य आखरकाय, निकहाङ याक्सास्यावो पबित्र ग्वालामको जिःङ दुवारा पेतोकुसि सुरछ्या जाह्ङ्ति गमु। 15 एसिया इलाकाको जुदा बिस्वासिलमइ ङाकाय फेओ कुरापाय नाङइ चिःओले मुतेना। ओउमय मध्येहाङ फुगेलस र हर्मोगेनसमा परनाच। 16 ओनेसिफरस र ओउको माचरकाय प्रभुइ योःन्मय बइसास्याउपाना, धइतिदाह्य्सा ओउइ गच्युक पल्त ङाकहाङ वाङ्ति ङाकाय हउसला बयो मुना। ङा झेलकनहाङ परओ कारनइ, ओउ जुगाङमा रासो नाःलेल। 17 जब ओउ रोमहाङ वाङा, ओउइ ङाकाय ङाइमाच्युकसम्म जुदा थाउहाङ बोःङाताङ। 18 परमेस्वरइ जुदा मान्तालमकाय न्याय जाह्ङ्सास्यावो दिनहाङ, प्रभुइ ओउकाय योःन्मय बयो स्याउपाना त दाह्य्ति ङाइ प्राथना जाह्ङ्नाङ। ङा एफिससहाङ मुतोकहाङ ओउइ ङाकाय गच्युक सहयोग जाह्ङाताङ त दाह्यो कुरामा नाङइ चिःओले मुतेना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.