२ थेसलोनिकि 1 - चेपाङथेसलोनिकिलमकाय पावलको अभिबादन 1 इ चिथिखे ङा पावल, सिलास, र तिमोथिको तर्फसय खेना। निइ इ चिथिखे निको परमेस्वर आपा र प्रभु येसु ख्रिस्तहाङ बिस्वास जाह्ङो निङ थेसलोनिके सहरको मन्दलिको बिस्वासिलमकाय लेखओ खेनाङ्सु। 2 निको परमेस्वर आपा र प्रभु येसु ख्रिस्तइ निङकाय अनुग्रह र धोमायो बइतेपनय। परमेस्वरको न्याय र महिमा 3 ङाको राप्तो बिस्वासि होयालम, निइखे सधय निङको लागि परमेस्वरकाय धन्नेबाद बइसाले परनाङ्सु। अनि एत हाइसाखे निको लागि पेतो स्याउलेना, धइतिदाह्य्सा परमेस्वरहाङ निङको बिस्वास, र यात-अर्काको लागि निङको रापमय झन् नाःतो स्याउधय आलो मुना। 4 ओउतझ्यान्ते निइ परमेस्वरको मन्दलिलमको माझहाङ निङको बारेहाङ ङाःति नोःसा खाइनाङ्सु। जुदा खालको सतावत र दुखको बेलाहाङ निङइ सहतिमुओ र परमेस्वरहाङ बिस्वास जाह्ङ्तिमुओ कुराहाङमा नि ङाःलेनाङ्सु। 5 देङेखे निङ परमेस्वरको राज्यको मान्ता स्यावो कारनइले नाःतो दुख दोःति मुतेनय। इ जुदा थोकलमखे निङकाय परमेस्वरको राज्यहाङ ज्योतो जाह्ङ्साको लागि परमेस्वरइ जाह्ङ्साखेओ धार्मिक न्याय सहि खेना त दाह्यो कुराको प्रमान खेना। 6 परमेस्वरइखे निङकाय सतावत जाह्ङो मान्तालमकाय दन्द बइति सधय सहि तरिकासय मात्र न्याय जाह्ङ्सास्याउना। 7 अनि परमेस्वरइ निङकाय र निकायमा ओउ सतावतसय छुत्कारा बइसास्याउलेना। परमेस्वरइ इ कामखे प्रभु येसु लयको जिःङकालि लाङकादुतलमकुस ल्युङो म्हेःहाङ लाङकासय वाङ्सास्याउतोक बेलाहाङ जाह्ङ्सास्याउलेना। 8 परमेस्वरकाय सुइकार जाह्ङ्सा र निको प्रभु येसुको पेओ खबर पालन जाह्ङ्सा इन्कार जाह्ङो मान्तालमकायखे परमेस्वरइ दन्द बइसास्याउलेना। 9 ओउमयखे गलमा द्युम्मालो बिनासको दन्द दोःलेनय, अनि ओउमय निको प्रभुको नजर र ओउको महिमित जिःङसय जुगाङको लागि लोक्तो स्याउलेनय। 10 इ कुराखे प्रभु येसु लयकहाङ बिस्वास जाह्ङो लयको मान्तालमकसय सम्मानित स्याउलाङ वाङ्तोक बेलाहाङ स्याउलेना, अनि ओउमय मध्येहाङ निङमा परतेनय, धइतिदाह्य्सा निइ निङकाय तोओ कुराहाङ निङइमा बिस्वास जाह्ङ्तेआकानि। अनि ओउतस्याउतोक बेलाहाङखे प्रभु येसुहाङ बिस्वास जाह्ङो जुदा मान्तालम ग्याह्ङ्तो स्याउलेनय। 11 ओउतझ्यान्तेले निइ निङको लागि प्राथना जाह्ङ्नाङ्सु। परमेस्वरइ झाको रुवाङ याक्साको लागि ज्योतो स्याउतेपनय त दाह्य्ति निइ परमेस्वरकाय बिन्ति जाह्ङ्नाङ्सु। निङइ पेओ कामलमको लागि जाह्ङो इच्छ्या र निङको बिस्वासको जुदा कामलम परमेस्वरइ लयको जिःङ दुवारा पुरा जाह्ङ्ति बइतेपनय। 12 एतहाइतिले निङइ याको पेओ रुवाङ दुवारा निको प्रभु येसुको मय्ङको सम्मान स्याउना, र निङमा प्रभु येसुहाङ सम्मानित स्याउतेनय। इ जुदा थोकलमखे निको परमेस्वर र प्रभु येसु ख्रिस्तको अनुग्रह दुवारा मात्र सम्भब स्याउलेना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.