१ तीमोथी 6 - चेपाङ1 जुदा बिस्वासि नोकरलमइखे लयको मालिकलमकाय मान-सम्मान जाह्ङ्साले परना। ओउतखेयाकाय मात्र सु मान्तालमइमा परमेस्वरको मय्ङ र निइ बयो स्यानरायकाय गाल बइसा खाइनिलि। 2 बिस्वासि नोकरलमको मालिकलम बिस्वासिले खेयाकायमा ओउमयकाय मान जाह्ङ्साले परना। ओउमयइ लयको मालिकलमको झन् नाःतो सेवा जाह्ङ्पानानि, धइतिदाह्य्सा ओउमयकाय फाइदा स्याउसा त तोओखे लयको राप्तो बिस्वासिलमको फाइदा स्याउसाले खेना। तिमोथि, नाङइ इ कुरालमले मान्तालमकाय स्यानु, र ओउ पालन जाह्ङ्साको लागि ओउमयकाय हउसला बयु। स्याताहा स्यानराय र सत्य धन-सम्पति 3 यदि कुनय मान्तालमइ बेग्लय खालको स्यानराय स्यान्नानि त खेया, ओउमयइखे निको प्रभु येसु ख्रिस्तको सत्य स्यानराय र निइ परमेस्वरकाय बइसा परओ भक्तिको स्यानरायकाय सुइकार जाह्ङो स्याउलेल। 4 ओउ बेग्लय खालको स्यानराय स्यानो मान्तालमखे लयमयले ङाःनाइसि, तर ओउमयइ दोङ्सिले दोह कुरामा चिःओ स्याउलेल। ओउतताह्ङो मान्तालमखे समस्या वान्सा झाक्नय र अनाबस्यक कुरालमहाङ बहस जाह्ङ्सा चाहनय। ओउतताह्ङो बेबहारइखे मान्तालमको माझहाङ चोःर्कायो, कायकायो, बेइजत र पेमालो सङ्खा मात्र वान्नउ। 5 र ओउतताह्ङो मान्तालमइ सधय समस्यालम मात्र वान्नानि। ओउमयको बिचार भ्रस्त स्याउना, र ओउमयइ सत्यताकाय फेतिखायो स्याउनय। ओउमयको बिचारहाङ परमेस्वरको भक्ति जाह्ङो कुराकायखे धन-सम्पति कमावो कुरा त म्हर्लेनय। 6 यदि नि लयमयकहाङ नाःओ कुरालमहाङ सन्तुस्त स्याउनातहि त खेयाखे, परमेस्वरको भक्ति जाह्ङो कुराइमा निकाय धनि जाह्ङ्लेनातहि। 7 धइतिदाह्य्सा नि इ सङ्सारहाङ नाःतोकहाङ निइ दोह थोकमा लात्ति वान्लेतह्य्निलि, र सितोकहाङ दोह थोकमा लात्ति आःल्लेतह्य्निलि। 8 ओउतझ्यान्ते यदि निकुसि लयकाय दाह्तो जेःगा र लावनाय मुना त खेया, ओहाङले नि सन्तुस्त स्याउसा परलेना। 9 तर धनि स्याउसा झाको मान्तालमखे परिछ्या र धारापहाङ परलेनय। ओउमयइ नाःतो खालको मुर्ख र माहा पेमालो थोकलमको इच्छ्या जाह्ङ्नानि, ओउतझ्यान्ते ओउमय जुगाङले म्हेत्ति वाइलेनय। 10 धइतिदाह्य्सा नाःतो धनि स्याउसा इच्छ्या जाह्ङो मान्तालमकहाङ जुदा खालको पेमालो दुस्त कुरालम स्याउलाङ वाङ्ना। गच्युक मान्तालमइखे धनि स्याउसा इच्छ्या जाह्ङोझ्यान्ते ख्रिस्तहाङ बिस्वास जाह्ङ्साले फेआकानि, र नाःतो दुख च्यवोझ्यान्ते दुखि स्यावो मुनय। तिमोथिकाय पावलको अन्तिम अर्थि 11 तर तिमोथि, नाङपाय परमेस्वरको मान्ता खेतेना, ओउतझ्यान्ते ओउतताह्ङो दुस्त कुरालमकसय नाङ दल्ति मुअ। परमेस्वर झाको अनुसारको कामलम जाह्ङु र धार्मिक्ताहाङ परमेस्वर लेखाले स्याउसा कोसिस जाह्ङु। बिस्वासिलो स्याव, र अरु मान्तालमकाय रापु। अनि समस्यालम वाङ्तोक बेलाहाङ धइरे जाह्ङु, र जुदा मान्तालमकुसि नम्र बेबहार जाह्ङु। 12 नाङइ जाह्ङो सत्य बिस्वासको लागि पेओ युद्ध जाह्ङु। लयइ ख्रिस्तहाङ जाह्ङो बिस्वासको बारेहाङ नाङइ नाःतो मान्तालमकाय तोतेआकान, र ओउतोक बेलाहाङले परमेस्वरइ नाङकाय अजम्बरि रुवाङको लागि गोत्तेआ। अनि द्याहखे, परमेस्वरइ नाङकाय बइसास्यावो ओउ अजम्बरि रुवाङकाय नाङइ पेतोहाइति बल्योकुसि पक्रति गमु। 13 जुदा थोककाय रुवाङ बइसास्यावो परमेस्वर, र पन्तियस पिलातसको ङ्हा लयको बिस्वासको पेओ गभाइ बइसास्यावो ख्रिस्त येसुको ङ्हा, ङाइ नाङकाय तोनेनाङ, 14 निको प्रभु येसु ख्रिस्त इ ल्हाउदयबाङहाङ फेरि द्याह्न्ति वाङ्माच्युकसम्म, परमेस्वरइ नाङकाय बइसास्यावो जुदा आग्याकाय नाङइ पेओ सुद्ध मनकुसि पालन जाह्ङु। ओउत जाह्ङ्तेनउ त खेयाकायखे सुइमा नाङकाय पेमातो जाह्ङ्तेआकान त दाह्य्ति गाल बइसा खाइलेतेल। 15 धइतिदाह्य्सा परमेस्वर मात्र राजालमकोमा राजा, प्रभुलमकोमा प्रभु, र निको सासक खेसास्याउना। ओउ परमेस्वरइले ख्रिस्त येसुकाय सहि समयहाङ निकहाङ थालाङ ल्होक्सास्याउना। 16 परमेस्वर मात्र गलमा सिमालो अजम्बरि खेसास्याउना, र परमेस्वरखे सु मनुवामा दाह्सा खाइमालो माहा थोङोहाङ याक्सास्याउना। सु मान्तालमइमा परमेस्वरकाय च्यवो नाःइलि, र च्यउसामा खाइनिलि। जुदा मान-सम्मान र जिःङ सधयभरिको लागि ओउ परमेस्वरकायले स्याउपाना। आमेन। 17 इ सङ्सारको धनि मान्तालमकाय ओउमयको अजम्बरि खेमालो धन-सम्पतिहाङ ङाःलाम र भर परलाम, तर निको रुवाङहाङ चाहओ आनन्दको लागि जुदा थोक बइसाखेओ परमेस्वरकहाङ मात्र ओउमयइ आसा-भरोसा गम्पानानि त दाह्य्ति स्यानु। 18 ओउमयको धन-सम्पति पेओ कामलम जाह्ङ्साको लागि मात्र प्रयोग जाह्ङ्पानानि त दाह्य्ति ओउमयकाय स्यानु। ओउमयखे पेओ कामलमको धनि स्याउपनय, र योःन्मय स्याउति लयकुस नाःओ थोकलम खान्चोहाङ परओ अरु मान्तालमकाय वेःति बइपानानि। 19 ओउतहाइतिले ओउमयइ लयमयको लागि सत्य धन-सम्पति त्युह्म्नानि, र ओउखे ओउमयको लोन्हेको रुवाङको लागि बल्यो तोस स्याउलेना, र ओउत जाह्ङ्तोकहाङखे ओउमयइ सत्य रुवाङ दोःलेनय। 20 तिमोथि, परमेस्वरइ नाङको जिम्माहाङ बइसास्यावो सत्य आखरकाय पेतोकुसि सुरछ्या जाह्ङ्ति गमु। परमेस्वरको नजरहाङ महत्वको खेमालो कुरालम, र मान्तालमइ “ग्यान” त तोओ तर ओउखे परमेस्वरको सत्य आखरको बिरोतहाङ खेना त खेयाखे ओउतताह्ङो कुरा साइसाकाय इन्कार जाह्ङु। 21 गच्युक मान्तालमखे ओउतताह्ङो मुर्ख कुराहाङ बिस्वास जाह्ङोझ्यान्ते, ख्रिस्तहाङ जाह्ङो बिस्वाससय लोन्हे परओ मुनय। परमेस्वरको अनुग्रह निङ जुदाकुसिले स्याउपाना। आमेन। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.