१ तीमोथी 5 - चेपाङराङ्गिलम, अगुवालम र नोकरलमको बारेहाङ सल्लाह 1 लयसय ताह्ङो पुःकाय जान्लाम, बरु लयको आपाकाय लेखाले मान जाह्ङ्ति बिन्ति जाह्ङु। अनि लयसय मयो मान्तालमकायखे लयको हउलमकाय लेखाले बेबहार जाह्ङु। 2 ओउतहाइतिले लयसय ताह्ङो मोम्चोलमकायखे लयको आमाकाय लेखाले, र लयसय मयो मोम्चोलमकायखे लयको हउद्याङलमकाय लेखाले सुद्ध मनइ बेबहार जाह्ङु। 3 सु सहयोगिमा नाःमालो राङ्गि मोम्चोलमकायखे मान जाह्ङ्तिले सहयोग जाह्ङु। 4 तर यदि कुनय राङ्गि मोम्चोको चोः चोःद्याङलम र मोःम-प्लोःमलम मुनय त खेया, ओउइ ओउमयको स्याहार जाह्ङोलेखाले ङ्हाखे ओउमयइले ओउको स्याहार जाह्ङ्ति परमेस्वरको सेवा जाह्ङ्सा स्यानपाइसि। धइतिदाह्य्सा ओउत जाह्ङो कुराहाङ परमेस्वर म्रोसा स्याउलेना। 5 लयको सुमा नाःमालो राङ्गि मोम्चोइखे लयको आसा-भरोसा परमेस्वरकहाङ मात्र गमो स्याउना। र ओउइ दिन-याह्दिङ त मा दाह्य्मात लयको सहयोगको लागि परमेस्वरकाय प्राथना जाह्ङ्तिले मुओ स्याउना। 6 तर लयको रुवाङ मोजमज्जा जाह्ङ्ति हुतो राङ्गि मोम्चोखे रुवाङहाङ स्याक्तिले मुयाकायमा ग्वालामहाङखे सिओ लेखाले स्याउना। 7 इ अर्थिलम पालन जाह्ङ्साको लागि जुदा बिस्वासिलमकाय स्यानु, अनि ओउमयइ पेमातो गल्ति जाह्ङो मुना त दाह्य्ति सु मान्तालमइमा गाल बइसा खाइलेनिलि। 8 तर यदि कुनय मान्ताइ लयको मान्तालमकाय, र बिसेस जाह्ङ्ति लयको माचरकाय दोह वास्तामा जाह्ङुलु त खेयापाय, ओउइ बिस्वासकाय इन्कार जाह्ङो स्याउना र ओउखे बिस्वास जाह्ङ्मालो मान्तालमसयमा माहा पेमातो स्याउलेना। 9 साथि बर्स उमेर दाहो राङ्गि मोम्चोकाय मात्र राङ्गि मोम्चोलमको सङ्ख्याहाङ थेङसा परना। र ओउखे यातचाक गोय्चोकुस मात्र बिह्या जाह्ङो स्याउसा परना। 10 अनि ओउखे पे-पेओ काम जाह्ङोझ्यान्ते जुदा मान्तालमकसयले मान दोःओ स्याउसा परना। ओउइ लयको चोः चोःद्याङलमकाय पेतोकुसि स्यासो र पाहुनालमकाय लयको किमहाङ सेवा-सत्कार जाह्ङो स्याउसा परना, अनि ओउइ अरु बिस्वासिलमको दोम हुर्ति सेवा जाह्ङो र खान्चोहाङ परओलमकाय सहयोग जाह्ङो स्याउसा परना। ओउतले अरु पेओ कामलम जाह्ङो स्याउसा परना। 11 तर मयो उमेरको राङ्गिलमकायखे राङ्गि मोम्चोलमको सङ्ख्याहाङ थेङजेलाम, धइतिदाह्य्सा ओउमयको जवानिपनको इच्छ्याको कारनइ ख्रिस्तको भक्ति जाह्ङ्साकाय फेआक्तिको फेरि बिह्या जाह्ङ्सा खाइनानि। 12 ओउतहाइति ओउमयइ ख्रिस्तहाङ जाह्ङो यातम् बाचाकाय म्हेःओझ्यान्ते ओउमय दोसि स्याउलेनय। 13 ओउच्युक मात्र खेल, यदि ओउमयकाय राङ्गि मोम्चोलमको सङ्ख्याहाङ थेङना त खेया, ओउमय मान्तालमको किम-किमहाङ आल्ति लयको समय खेरो वाइनानि र अरुकाय जवनानि, अनि मान्तालमकाय कुल काओ काम जाह्ङ्नानि र नोःसाले स्याउमालो कुरालममा नोःलेनय। 14 ओउतझ्यान्ते ओउ मयो उमेरको राङ्गि मोम्चोलमइखे फेरि बिह्या जाह्ङो, चोः चोःद्याङलम नाःओ, र ल-लयको किम स्याहार जाह्ङो ङा चाहनाङ। ओउतस्याउतोक बेलाहाङ बइरिलममा ओउमयको बिरोतहाङ नोःसा खाइलेनिलि। 15 धइतिदाह्य्सा केहि राङ्गि मोम्चोलमपाय ङ्हाखाले सय्तानकताङ द्याह्न्तिखायो मुनय। 16 यदि कुनय बिस्वासि मोम्चोको लयको मान्तालमकहाङ राङ्गि मोम्चोलम मुनय त खेया, मन्दलिकाय दोह भारमा परताक्मातो ओउइले ओउमयको स्याहार जाह्ङ्पनउ। ओउत हाइतोकहाङ दोङ्सिले सुमा नाःमालो राङ्गि मोम्चोकाय मन्दलिइ सहयोग जाह्ङ्सा खाइनउ। 17 लयइ जाह्ङ्सा परओ सेवाको जिम्मेवारि पेतोकुसि जाह्ङो मन्दलिको अगुवालम, र बिसेस जाह्ङ्ति परमेस्वरको आखर प्रचार जाह्ङो र स्यानो अगुवालमइखे झन् नाःतो मान-सम्मान स्याहार दोःसा परलेना। 18 धइतिदाह्य्सा “दाइ जाह्ङो स्याःको म्होतोङहाङ मोला लावलाम” र “काम जाह्ङो मान्तालमइखे ज्याला दोःसाले परना” त दाह्य्ति धर्मसास्त्रहाङ लेखओ मुना। 19 यदि कुनय मान्ताइ मन्दलिको अगुवाकाय गाल बइनउ त खेयाकायमा, निसचाक अथबा सुमजना साछि नाःमाच्युकसम्म ओउ कुराकाय सुइकार जाह्ङ्लाम। 20 तर कुनय अगुवालमइ दाःन्ति-दाःन्तिले पाप जाह्ङ्नानि त खेयाखे, मन्दलिको जुदा मान्तालमको ङ्हाहाङले ओउमयकाय जान्सा परना। ओउतखेयाकाय मात्र अरु अगुवालममा रइलेनय। 21 ङाइ नाङकाय परमेस्वर र ख्रिस्त येसु अनि पबित्र लाङकादुतको ङ्हा इ अर्थिलम पालन जाह्ङ्साको लागि आग्या जाह्ङ्नेनाङ। नाङइ ओउत हाइतोकहाङ सुकायमा छति बेबहार जाह्ङ्मात समान रुपहाङले न्याय जाह्ङु। 22 कुनय मान्ताकाय मन्दलिको अगुवाको रुपहाङ छ्युह्ङ्सासय ङ्हा, चाहओच्युक समय लेःति ओउकाय जाच जाह्ङु। यदि नाङइ ओउकाय हतारहाङ छ्युह्ङ्तेनउ र ओउइ पाप जाह्ङ्नउ त खेया, नाङमा ओउइ जाह्ङो पापको भागिदार स्याउलेतेना। ओउतझ्यान्ते अरुइ जाह्ङो पापको भागिदार स्याउजेलाम, बरु लयको रुवाङकाय सधय सुद्ध गमु। 23 तिः मात्र तुङ्ति मुलाम। बरु नाङ घरि-घरि तुक जिःको बेथा नाःओझ्यान्ते, तुक जिःको स्याक्साको लागि ओखतिको रुपहाङ मइतोकाय धाकसायको ङोतिःमा तुङु। 24 कुनय-कुनय मान्तालमइ जाह्ङो पापलमपाय पेतोकुसि चिःतोले स्याउना, र ओउतताह्ङो पापलमइ न्यायहाङमा दाक्नउ। तर कुनय मान्तालमको पापलमखे लोन्हेखा मात्र थालेना। 25 ओउतहाइतिले गच्युक मान्तालमइ जाह्ङो पेओ कामलममा ङ्हाखाले पेतोकुसि चिःतो स्याउना, र ङ्हाखाले पेतोकुसि चिःमालो गच्युक पेओ कामलमखे लोन्हे चिःतो स्याउलेना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.