१ तीमोथी 4 - चेपाङस्याताहा स्यानरायको बारेहाङ अर्थि 1 लोन्हेको समयहाङ केहि मान्तालमइखे ख्रिस्तको सत्य बिस्वासकाय फेनानि त दाह्य्ति पबित्र ग्वालामइ निकाय पेतोकुसि तोसास्यावो मुना। ओउमयपाय माःरेउ ग्वालामलमको लोन्हे लागनय र लानलमको स्यानरायकाय पालन जाह्ङ्नानि। 2 ओउतताह्ङो स्यानराय स्यानो मान्तालमखे स्याताहालम खेनय, अनि ओउमयको बिचारखे धाहो फालामइ दार्ति सिओ लेखाले स्याउना। 3 ओउमयइपाय मान्तालमइ बिह्या जाह्ङ्सास्याउल र कुनय-कुनय जेःगालममा जेःसा स्याउल त दाह्य्ति स्यान्नानि। तर ख्रिस्तहाङ बिस्वास जाह्ङ्ति सत्य कुरा चिःओलमइखे परमेस्वरकाय धन्नेबाद बइति ओउ थोकलम जेःसा स्याउना, धइतिदाह्य्सा परमेस्वरइ ओउ थोकलममा जेःसाको लागिले जाह्ङ्सास्यावो खेना। 4 परमेस्वरइ स्रिस्ति जाह्ङ्सास्यावो जुदा थोकले पेतो मुना। र यदि निइ परमेस्वरकाय धन्नेबाद बइति जेःनातह्य्नि त खेया जुदा थोकले पेतो स्याउना। 5 धइतिदाह्य्सा परमेस्वरको आखर र निइ जाह्ङो प्राथना दुवाराले ओउ थोकलम जेःसाकाय ज्योतो स्याउलेना। ख्रिस्त येसुको पेओ सेवक 6 तिमोथि, यदि नाङइ इ कुरालमको बारेहाङ अरु बिस्वासिलमकाय पेतोकुसि तोतेनउ त खेया, नाङखे ख्रिस्त येसुको पेओ सेवकले स्याउतेना। अनि नाङइ पालन जाह्ङ्धय वाङो निको बिस्वासको पेओ स्यानरायइले नाङकाय बिस्वासहाङ बल्यो जाह्ङ्तेना। 7 तर परमेस्वरकसय वाङो खेमात मुर्ख मान्तालमइ मात्र बिस्वास जाह्ङो स्याताहा कुरालमकायखे नाङइ इन्कार जाह्ङ्साले परतेना। बरु परमेस्वर झाक्तोको रुवाङ याक्साको लागि नाङ लयकाय तालिम बइस। 8 “ज्यानको तालिम जाह्ङ्धार्नापाय केहि कुराहाङ मात्र पेतो स्याउना, तर परमेस्वर झाक्तोको रुवाङ याक्धार्नाखे जुदा कुराहाङले पेतो स्याउना। धइतिदाह्य्सा इ कुराइखे मान्ताकाय इ रुवाङहाङमा र लोन्हे वाङ्साखेओ रुवाङहाङमा सहयोग जाह्ङ्लेनउ।” 9 इ कुराखे बिस्वास जाह्ङ्सा ज्योओ कुराले खेना, र जुदाइले इ कुराकाय सुइकार जाह्ङ्सा परलेना। 10 निइ माहा जोक्तो मेहेनतकुसि काम जाह्ङ्नातह्य्नि, धइतिदाह्य्सा निइ जिउदो परमेस्वरकहाङ आसा-भरोसा गमो मुनातहि। ओउ परमेस्वरखे जुदा मान्तालमको, र बिसेस जाह्ङ्ति बिस्वास जाह्ङोलमको मुक्तिदाता खेसास्याउना। 11 ङाइ लेखओ इ जुदा कुरालम मान्तालमकाय स्यानु र पालन जाह्ङ्ताक्साको लागि आग्या बयु। 12 नाङ अझसम्मले जवान मुतेना, तर खेयाकायमा जुदा मान्तालमइ नाङकाय मन्दलिको अगुवाको रुपहाङले मान जाह्ङ्तेपाना। बिस्वासिलम गतहाइति याक्सा परना त दाह्यो कुरा ओउमयकाय छ्यान्ति बयु। अनि नाङ दोह नोःतेना, दोह जाह्ङ्तेनउ, मान्तालमकाय गतहाइति राप्तेनउ, परमेस्वरकाय गतहाइति बिस्वास जाह्ङ्तेनउ, अनि गतहाइति रुवाङहाङ सुद्ध स्याउति याक्तेना त दाह्यो कुराहाङखे नाङ बिस्वासिलमको लागि यातज्यो नमुना स्याव। 13 ङा नाङकहाङ वाङ्माच्युकसम्म, नाङइ मन्दलिको मान्तालमकाय धर्मसास्त्र पह्रति साइताकु, अनि ओउमयकाय ख्रिस्तको पेओ खबरको बारेहाङ स्यानु र आग्या पालन जाह्ङ्ताकु। 14 अगमबक्तालमइ नोःतोकहाङ र मन्दलिको अगुवालमइ नाङको तालाङहाङ क्रुत झाम्ति आसिक बइतोकहाङ, परमेस्वरइ नाङकाय बइसास्यावो ग्वालामि बरदानकाय नाङइ जुगाङमा म्हेःजेलाम। 15 ङाइ तोओ इ जुदा कुरालमकाय नाङइ पेतोकुसि पालन जाह्ङु, अनि नाङइ झन्-झन् पेतोकुसि परमेस्वरको सेवा जाह्ङो जुदा मान्तालमइ च्यउपानानि। 16 नाङ गतहाइति याक्तेना र नाङइ गतहाइति स्यान्तेनउ त दाह्यो कुराहाङ नाङ होसियार स्याव र इ कुरा जाह्ङ्साकाय जुगाङमा फेलाम। यदि नाङइ ओउत जाह्ङ्तेनउ त खेया नाङ लयमा दल्तेना र नाङको स्यानराय सायो मान्तालमकायमा दल्ताक्तेनउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.