१ तीमोथी 3 - चेपाङमन्दलिको अगुवालम 1 “यदि कुनय मान्ताइ मन्दलिहाङ बिस्वासिलमको अगुवा स्याउसा इच्छ्या जाह्ङ्नउ त खेया, ओउइ माहा पेओ कामको इच्छ्या जाह्ङ्नउ” त दाह्यो कुराखे, बिस्वास जाह्ङ्सा ज्योओ कुराले खेना। 2 ओउतझ्यान्ते मन्दलिको अगुवाखे सुइमा गाल बइसा खाइमातो स्याउसा परना। ओउखे यातयज्यो मात्र माचाको पाचा स्याउसा परना, र ओउखे लयको मन र रुवाङको अनुसासनहाङ मुसा खाइसा परना। ओउतले ओउखे मान-सम्मान दोःसा ज्योतो स्याउसा परना, अनि अरुको सेवा-सत्कार जाह्ङ्सा, र अरुकाय पेतो स्यान्सा खाइतो स्याउसा परना। 3 ओउखे नाःतो ङोतिः तुङो मान्ता स्याउसा स्याउल। ओउपाय रिसाहा मान्ता स्याउसा स्याउल, बरु भलाद्मि स्याउसा परना। ओउ अरुकुस कायकाइति वाहो मान्ता स्याउसा स्याउल, र धन-सम्पतिको लोभ जाह्ङो मान्तामा स्याउसा स्याउल। 4 ओउखे लयको जुदा माचरलमकाय पेतोकुसि स्यास्सा, अनि लयको चोः चोःद्याङलमकाय लयइ तोओ कुराको सम्मान र आग्या पालन जाह्ङ्ताक्सा खायो मान्ता स्याउसा परना। 5 धइतिदाह्य्सा यदि कुनय मान्ताइ लयको माचरलमकाय गतहाइति स्याहार्सा परना त दाह्यो कुराले चिःउलु त खेया, ओउइ परमेस्वरको मन्दलिको मान्तालमकाय गतहाइति स्याहार्सा खाइचउ र? 6 अगुवाखे भखर मात्र प्रभुहाङ बिस्वास जाह्ङो नया बिस्वासि स्याउसा स्याउल, ओउत स्याउना त खेयापाय ओउ ङाःनास र दुस्त सय्तानइ लय ङाःतोक बेलाहाङ परमेस्वरकसय दन्द दोःओ लेखाले ओउइमा दन्द दोःलेना। 7 ओउच्युक मात्र खेल, अगुवाखे मन्दलि भन्दा बाहिरको मान्तालमइमा मान जाह्ङो मान्ता स्याउसा परना, ओउत खेयाकाय मात्र ओउको अपमान स्याउल र दुस्त सय्तानको धारापहाङ परल। मन्दलिको दिकनलम 8 ओउतहाइतिले मन्दलिहाङ सेवा जाह्ङो दिकनलममा बिस्वासिलो र मान-सम्मान दोःसा ज्योओ स्याउसा परना। ओउमयखे नाःतो ङोतिः तुङो र धन-सम्पतिको लोभ जाह्ङो स्याउसा स्याउल। 9 ओउमयकुस सुद्ध बिचार स्याउसा परना, र परमेस्वरइ छ्यान्सास्यावो सत्य आखरकाय ओउमयइ पेतोकुसि बिस्वास जाह्ङ्सा परना। 10 ओउमयकाय दिकनको रुपहाङ छ्युह्ङ्सासय ङ्हाखे ओउमयको जाच स्याउसा परना। अनि जाच जाह्ङ्तोकहाङ ओउमयको दोह गल्तिमा ङाइल त खेयाकाय मात्र ओउमयइ दिकनको रुपहाङ सेवाको काम जाह्ङ्सा खाइनानि। 11 ओउतहाइतिले दिकनलमको माचालममा अरुकाय जवमालो र पेओ चालचलनको स्याउसा परना। ओउमय लयको मनको अनुसासनहाङ मुसा परना र लयइ जाह्ङो हरेक कुरालमहाङ इमान्दार स्याउसा परना। 12 मन्दलिको सेवा जाह्ङो दिकनलमकोखे या-यातज्यो मात्र माचा स्याउसा परना, अनि लयको चोः चोःद्याङलम र माचरलमकाय पेतोकुसि स्यास्सा खायो स्याउसा परना। 13 दिकनको रुपहाङ पेतोकुसि सेवा जाह्ङो मान्तालमइखे अरु मान्तालमकसय मान-सम्मान दोःलेनय, र लयमयइ ख्रिस्त येसुहाङ जाह्ङो बिस्वासको बारेहाङ साहसकुसि मान्तालमकाय तोसा खाइलेनानि। बिस्वासको सत्यता 14 देङे ङा नाङकाय इ चिथि लेखधय मुनाङ, र रेह्न्तोले नाङकहाङ वाङाक्तिको नाङकाय क्रुस्सा ङाइ आसा जाह्ङो मुनाङ। 15 तर यदि ङा नाङकहाङ रेह्न्तो वाङ्सा खाइङल त खेयाकायमा, परमेस्वरको माचरलम गतहाइति याक्सा परना त दाह्यो कुरा नाङइ चिःओ ङा चाहनाङ। परमेस्वरको माचर त तोओखे जिउदो परमेस्वरको मन्दलि, अनि सत्य आखरको तोस र धुर्कुन खेना। 16 निको बिस्वासको महान् रहस्यको कुराकाय सुइमा इन्कार जाह्ङ्सा खाइलेनिलि, ओउखे देङे परमेस्वरइ निको लागि छ्यान्ति बइसास्यावो मुना— “ख्रिस्तपाय मनुवाको रुपहाङ थालाङ वाङ्सास्यावा, र ओउ धर्मि खेसास्याउना त दाह्यो कुरा पबित्र ग्वालामइ छ्यान्सास्यावो मुना, अनि ओउकाय लाङकादुतलमइमा च्यवाथय। जाति-जातिलमको माझहाङ ओउको प्रचार स्यावा, सङ्सारको मान्तालमइ ओउकाय बिस्वास जाह्ङाथय, र परमेस्वरइ ओउकाय महिमाहाङ लाङकाताङ च्युन्ति आःल्सास्यावा।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.