१ तीमोथी 2 - चेपाङ1 तिमोथि, ङ्हाखेपाय जुदा मान्तालमकाय प्राथना जाह्ङ्साको लागि ङाइ नाङ र अरु बिस्वासिलमकाय बिन्ति जाह्ङ्नेनाङ्स। ओउमयकाय सहयोग जाह्ङ्सा र आसिक बइताक्साको लागि निङइ परमेस्वरकाय बिन्ति जाह्ङ्नु, र ओउमयको लागि परमेस्वरकाय धन्नेबाद बइनु। 2 बिसेस जाह्ङ्ति राजालम र सासन जाह्ङो अरु ताह्ङो हाकिमिलमको लागि प्राथना जाह्ङ्नु, ओउत हाइतोकहाङ नि धोमाइतोकुसि याक्सा दोःनातहि र परमेस्वर झाक्तोको पेओ काम जाह्ङ्सा खाइनातह्य्नि। 3 ओउतताह्ङो प्राथनाखे माहा पेतो स्याउना र निको मुक्तिदाता परमेस्वरमा आससा स्याउना। 4 जुदा मान्तालमइ मुक्ति दोःओ र लयको सत्यताको बारेहाङ चिःओ परमेस्वर चाहसास्याउना। 5 परमेस्वर यातज्योले मात्र खेसास्याउना, अनि परमेस्वर र मान्तालमको माझहाङ मेलमिलाप वान्सास्यावोमा यातज्योले खेसास्याउना। ओउ मेलमिलाप वान्सास्यावो मनुवाखे ख्रिस्त येसु खेसास्याउना। 6 जुदा मान्तालमकाय ओउमयको पापलमसय दल्ताक्साको लागि येसुइ बलिदानको रुपहाङ लयको रुवाङ बइसास्यावा। इखे परमेस्वरइ सङ्सारको मान्तालमकाय सहि समयहाङ बइसास्यावो खबर खेना। 7 ओउतझ्यान्ते अरु जातिको मान्तालमकाय बिस्वास र सत्यको इ खबर तोति बइसाको लागि परमेस्वरइ ङाकाय प्रचारक र खबरदुतको रुपहाङ छ्युह्ङ्सास्यावा। ङाइ तोओ कुराखे सत्यले खेना, ङाइ माःओ नाःङल। 8 ओउतझ्यान्ते आराधना जाह्ङो हरेक थाउलमहाङ गोय्चो मान्तालमइखे ल-लयको पबित्र क्रुत लाङकाताङ च्युनाक्तिको यात-अर्काकुस रिस वाङ्काइमात र बिबाद जाह्ङ्काइमात प्राथना जाह्ङ्पानानि त दाह्यो ङा चाहनाङ। 9 मोम्चो मान्तालमइमा लयकाय त्याक्तो र मान्तालमइ पेतो ताःसितो नाय लावपाइसि त दाह्यो ङा चाहनाङ। अनि ओउमयइ लयको म्याङ तिस्ति, महङ्गो नायलम लावति, र सुन अथबा मोतिको गहनालम लावति लुःङजेःओ काम जाह्ङ्जेलाम। 10 बरु परमेस्वरको भक्ति जाह्ङो मोम्चोलमइखे लयमयइ जाह्ङो पे-पेओ कामलम दुवारा लयमयको रुवाङकाय सजाउपाइसि। 11 हरेक मोम्चोलमइ मन्दलिको अगुवालमइ स्यानो स्यानरायकाय मधिम त साइति ध्यान बइति स्यानपाइसि। 12 मोम्चोलमइ गोय्चो मान्तालमकाय स्यानो र लयको अधिनहाङ गमो कुराकायखे ङाइ अनुमति बइङल। बरु ओउमयइ मधिम त मुति साइपानानि। 13 धइतिदाह्य्सा ङ्हाखेपाय परमेस्वरइ आदमकायले जाह्ङ्सास्यावो खेना, ओहाङसयको लोन्हे मात्र हवाकाय जाह्ङ्सास्यावो खेना। 14 अनि सय्तानको धोकाहाङ परओखे आदम खेल तर हवा खेना। ओउ हवाइले सय्तानको धोकाहाङ परति पाप जाह्ङाकान। 15 यदि हवा, अनि अरु जुदा मोम्चोलमइमा ख्रिस्तहाङ बिस्वास जाह्ङ्तिले मुनय, र अरुकाय राप्नानि, अनि नम्र र पबित्र स्याउति याक्नय त खेयाखे, परमेस्वरइ ओउमयकाय बालाख नाःओ माध्यम दुवारा दल्ताक्सास्याउलेना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.