१ थेसलोनिकि 5 - चेपाङप्रभु वाङ्साखेओ दिनको लागि तयार स्याउति मुन 1 ङाको राप्तो बिस्वासि होयालम, प्रभु येसु गल द्याह्न्ति वाङ्सास्याउना त दाह्यो समयको बारेहाङ निइ निङकाय तोसाले परनालेखा नि ताःङसुलु। 2 धइतिदाह्य्सा याह्दिङको बेला अचानक कुःरेउ वाङोलेखाले प्रभु वाङ्साखेओ दिनमा निइ चिताउमालो बेलाहाङ वाङ्लेना त दाह्यो कुरापाय निङइ चिःओले मुतेनय। 3 मान्तालमइ “जुदा थोकले धोमाइतो र सुरछित मुना” त दाह्य्धय मुतोकहाङले, चोःतुक मोम्चोकाय अचानक बेथा लागओ लेखा ओउमयकहाङ बिनास वाङ्ना, र ओउमयइ बेनसा खाइलेनिलि। 4 तर ङाको राप्तो बिस्वासि होयालम, निङखे च्याकोहाङ याको मान्तालम लेखा खेतेइलि, ओउतझ्यान्ते ओउ दिनइखे निङकाय कुःरेउइ लेखा ग्याह्ङ्ताक्तेइलि। 5 धइतिदाह्य्सा निङ जुदाले थोङो र दिनको सन्तान खेतेनय। निखे च्याको र याह्दिङको मान्ता खेलेतहिलि। 6 ओउतझ्यान्ते निखे एःन्तिमुओ अरु मान्तालम लेखा स्याउलाम, बरु एःन्मात चनाखो स्याउति मुजेइ। 7 धइतिदाह्य्सा याह्दिङखेपाय एःनो र ङोतिः तुङ्ति ङोओ मान्तालमको समय खेना। 8 तर निखेपाय दिनको मान्ता खेनातहि, ओउतझ्यान्ते निखे चनाखो स्याउति मुसा परनातहि। निइ बिस्वास र रापमयकायखे ज्यानकाय सुरछ्या जाह्ङो छातिपाताको रुपहाङ लावसा परनातहि, र निको मुक्तिको आसाकायखे तालाङकाय सुरछ्या जाह्ङो तोपिको रुपहाङ ल्हुप्ति गम्सा परनातहि। 9 धइतिदाह्य्सा परमेस्वरइ निकाय लयको रिसहाङ दन्द बइसाको लागि छ्युह्ङ्सास्यावो खेलेल, तर निको प्रभु येसु ख्रिस्त दुवारा निकाय मुक्ति बइसाको लागि छ्युह्ङ्सास्यावो खेना। 10 ख्रिस्त निको लागिले सिसास्यावोझ्यान्ते, निखे इ ज्यानहाङ सियाकायमा स्याक्तिले मुयाकायमा, येसु द्याह्न्ति वाङ्सास्याउतोक बेलाहाङ निखे सधयको लागि येसुकुस स्याक्ति मुलेनातहि। 11 ओउतझ्यान्ते निङइ ङ्हाखाले जाह्ङ्धय वाङो अनुसारले, यातज्योइ अर्कोकाय हउसला बयो र बिस्वासहाङ बल्यो स्याउति मुसाको लागि सहयोग जाह्ङो काम जाह्ङ्नु। पावलको अन्तिम सल्लाह 12 ङाको राप्तो बिस्वासि होयालम, निङको माझहाङ माहा जोक्तो मेहेनत जाह्ङ्ति प्रभुको काम जाह्ङो र निङकाय ग्वालामि रुपहाङ अगुवाय जाह्ङो निङको अगुवालमकाय मान-सम्मान जाह्ङ्नु। 13 ओउमयइ जाह्ङो कामको कारनइ निङइ ओउमयकाय माहा ताह्ङो मान-सम्मान बइनु र ल्हुङतुकसयले राप्नु। अनि यात-अर्काकुस धोमाइतोकुसि याक्न। 14 ङाको राप्तो बिस्वासि होयालम, पेतोकुसि काम जाह्ङ्मालो अल्सि मान्तालमकाय दर्कति तोनु, रयो मान्तालमकाय साहसि स्याउसाको लागि हउसला बइनु, कमजोर मान्तालमकाय सहयोग जाह्ङ्नु, र जुदा मान्तालमकुस धइरे स्याउति मुन त दाह्य्ति निइ निङकाय बिन्ति जाह्ङ्सा चाहनाङ्सु। 15 निङ सुइमा पेमालो कामको होन्त बदला लेःओ काम जाह्ङ्लाम, बरु यात-अर्काको लागि अनि खाइच्युकसम्म जुदा मान्तालमको लागिले पेतो जाह्ङ्साकाय कोसिस जाह्ङ्नु। 16 सधय चोङाइति मुन। 17 जुदा समय प्राथना जाह्ङ्ति हुत्नु। 18 हरेक अबस्थालमहाङमा परमेस्वरकाय धन्नेबाद बइनु, धइतिदाह्य्सा निङ ख्रिस्त येसुको मान्तालमको लागिखे परमेस्वरको इच्छ्या इले खेना। 19 पबित्र ग्वालामकाय निङकहाङ काम जाह्ङ्साको लागि रोकलाम। 20 परमेस्वरको तर्फसय नोःओ कुराकाय इन्कार जाह्ङ्लाम। 21 तर ओउ जुदा कुराको जाच जाह्ङ्नु, अनि पेओ कुराहाङखे लागतिले मुन। 22 तर हरेक खालको पेमालो दुस्त थोकलमसयखे दल्तिले मुन। 23 धोमायो बइसास्यावो परमेस्वरइले निङकाय हरेक अबस्थालमहाङमा पबित्र जाह्ङ्तेपनय। ओउ परमेस्वरइले निको प्रभु येसु ख्रिस्त द्याह्न्ति वाङ्माच्युकसम्म निङको जुदा ग्वालाम, प्रान र ज्यानकाय दोह गल्तिमा नाःमातो जाह्ङ्ति बइतेपनय। 24 निङकाय गोत्सास्यावो परमेस्वर बिस्वासहाङ ज्योतो खेसास्याउना। ओउतझ्यान्ते ओउ परमेस्वरइले निङको लागि इ जुदा थोकलम जाह्ङ्ति बइसास्याउलेना। 25 ङाको राप्तो बिस्वासि होयालम, निको लागिमा प्राथना जाह्ङ्ति बइताङि। 26 निङइखे ओहाङको अरु जुदा बिस्वासि होयालमकायमा तुःम्ति अभिबादन जाह्ङ्नु। 27 इ चिथिखे जुदा बिस्वासि होयालमकाय पह्रति साइताक्नु त दाह्य्ति ङाइ निङकाय प्रभुको मय्ङहाङ बिन्ति जाह्ङ्सा चाहनाङ। 28 निको प्रभु येसु ख्रिस्तको अनुग्रह निङकुस स्याउपाना। आमेन। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.