१ थेसलोनिकि 4 - चेपाङपरमेस्वरकाय म्रोताको रुवाङ 1 द्याह अन्तिमहाङ, ङाको राप्तो बिस्वासि होयालम, निइ निङकाय स्यानो अनुसार परमेस्वरकाय म्रोताको खालको रुवाङ याक्साको लागि निइ निङकाय प्रभु येसुको मय्ङहाङ माहा जोक्तो बिन्ति जाह्ङ्नेनाङ्सु। निङपाय ङ्हामा ओउतले याको खेतेनय, तर अझ नाःतो ओउतहाइतिले याक्साको लागि निइ निङकाय हउसला बइसा चाहनाङ्सु। 2 धइतिदाह्य्सा प्रभु येसुको अधिकार दुवारा निइ निङकाय बयो अर्थिलमपाय निङइ चिःओले मुतेनय। 3 परमेस्वरखे निङ पबित्र स्यावो र जुदा खालको बेभिचारको पापसय पेतोकुसि दल्तिमुओ चाहसा स्याउलेना। 4 निङ हरेक मान्तालमइ ल-लयको ज्यानकाय गतहाइति अधिनहाङ गम्सा परना अनि गतहाइति पबित्र र मान-सम्मान दोःसा ज्योओ स्याउति याक्सा परना त दाह्यो कुरा चिःसा परलेतेनय। 5 निङखे परमेस्वरकाय तह्य्मालो मान्तालम लेखा लयको मनको मात्र इच्छ्या अनुसार बेभिचार जाह्ङ्ति याक्लाम। 6 लयको बिस्वासि होयाकाय ओउको माचाकुस बेभिचार जाह्ङ्ति धोका बइलाम। ओउत जाह्ङोलमकाय प्रभुइ दन्द बइसास्याउना त दाह्यो कुरापाय निइ ङ्हाखाले निङकाय माहा जोक्तो दर्कति तोतिखायो मुनाङ्सु। 7 धइतिदाह्य्सा परमेस्वरइ निकाय असुद्ध स्याउति याक्साको लागि खेल, तर पबित्र स्याउति याक्साको लागि गोत्सास्यावो मुना। 8 ओउतझ्यान्ते इ नेमलम पालन जाह्ङ्सा इन्कार जाह्ङो मान्तालमइखे, मान्तालमइ स्यानो स्यानरायकाय मात्र खेल, तर लयकाय पबित्र ग्वालाम बइसास्यावो परमेस्वरकायले इन्कार जाह्ङो स्याउना। 9 तर बिस्वासिलमको माझहाङ यात-अर्काको लागि रापमय स्याउसा परना त दाह्योको बारेहाङखे निइ लेखसा परनालेखा ताःङसुलु, धइतिदाह्य्सा यातज्योइ अर्कोकाय राप्सा परना त दाह्यो कुरापाय परमेस्वर लयइले निङकाय स्यान्सा स्यावो मुना। 10 खासहाङ निङइ ङ्हाखाले माकेदोनिया इलाकाभरिको जुदा बिस्वासिलमकाय लयको रापमय छ्यान्तिखायो मुतेनय। तर खेयाकायमा ङाको राप्तो बिस्वासि होयालम, निङइ ओउमयकाय अझले नाःतो राप्नु त दाह्य्ति निइ निङकाय बिन्ति जाह्ङ्सा चाहनाङ्सु। 11 निइ निङकाय ङ्हाखाले तोओ अनुसार, अरु मान्तालमकुस धोमाइतोकुसि याक्साको लागि कोसिस जाह्ङ्नु। अनि अरुको कामकाय वास्ता जाह्ङ्मात लयको कामकाय मात्र ध्यान बइनु र लयको क्रुतइले मेहेनत जाह्ङ्ति काम जाह्ङ्नु। 12 ओउत जाह्ङ्तोकहाङ, बिस्वास जाह्ङ्मालो मान्तालमइमा निङकाय मान-सम्मान जाह्ङ्तेनय, र निङ लयकाय चाहओ थोकलमको लागि अरु मान्तालमकुस भर परसामा परतेइलि। प्रभु वाङ्साखेओ कुराको आसा 13 ङाको राप्तो बिस्वासि होयालम, निङको ङ्हाखाले सितिखायो बिस्वासि होयालमकाय लोन्हे दोह स्याउना खेचा त दाह्योको बारेहाङ निङइ चिःओ नि चाहनाङ्सु। ओउत चिःतोकहाङ निङइ ओउमयको लागि दोह आसा-भरोसामा नाःमालो मान्तालम लेखा सोक जाह्ङ्सा परलेतिइलि। 14 धइतिदाह्य्सा येसु सिसास्यावा र रुवाङहाङ फेरिले उह्ति च्योक्सास्यावा त दाह्यो कुराहाङ निइ बिस्वास जाह्ङातह्य्नि, र येसु द्याह्न्ति वाङ्सास्याउतोक बेलाहाङ ङ्हाखाले सितिखायो बिस्वासि होयालमकायमा परमेस्वरइ येसुकुसले द्याःन्ति वान्सा स्याउलेना त दाह्यो कुराहाङमा निइ बिस्वास जाह्ङ्नातह्य्नि। 15 प्रभुइ निकाय स्यान्सास्यावो कुराले देङे निइ निङकाय तोधय मुनाङ्सु। प्रभु वाङ्साखेओ दिनसम्म स्याक्तिमुओ निखे, ओउ ङ्हाखाले सितिखायो मान्तालमसय ङ्हा प्रभुकाय क्रुस्सा दोःलेतहिलि। 16 धइतिदाह्य्सा प्रभु लयले हुकुमको ताह्ङो आवाज, मुख्य लाङकादुतको हाउनय र परमेस्वरको तुरहिको आवाजकुसि लाङकासय काःम्ताङ ग्ल्युह्ङ्ति वाङ्सा स्याउलेना। अनि ङ्हाखाले सितिखायो बिस्वासिलमखे जुदासय ङ्हा तेससय उह्ति च्योक्लेनय। 17 ओहाङसयको ओउ समयसम्म स्याक्तिमुओ निखे, प्रभुकाय फेलबाङखा क्रुस्साको लागि ओउ ङ्हाखाले सितिखायो बिस्वासिलमकुस ब्रकले मुसहाङ क्रुस्काइनातहि। ओउ बेलाहाङसयखे नि सधयको लागि प्रभुकुसले स्याउनातहि। 18 ओउतझ्यान्ते एतताह्ङो सब्दलमसयले यातज्योइ अर्कोकाय हउसला बइकायो काम जाह्ङ्नु। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.