१ थेसलोनिकि 1 - चेपाङथेसलोनिकिलमकाय पावलको अभिबादन 1 इ चिथिखे ङा पावल, सिलास, र तिमोथिको तर्फसय खेना। निइ इ चिथिखे परमेस्वर आपा र प्रभु येसु ख्रिस्तहाङ बिस्वास जाह्ङो निङ थेसलोनिके सहरको मन्दलिको बिस्वासिलमकाय लेखओ खेनाङ्सु। परमेस्वरइ निङकाय अनुग्रह र धोमायो बइतेपनय। थेसलोनिकिलमको बिस्वास र रुवाङ 2 निखे निङ जुदाको लागि सधयले परमेस्वरकाय धन्नेबाद बइनाङ्सु, र निइ प्राथना जाह्ङ्तोक बेलाहाङ निङ जुदाकायले सम्झति निङको लागिमा प्राथना जाह्ङ्नाङ्सु। 3 धइतिदाह्य्सा गतहाइति निङइ लयको बिस्वासकाय बेबहारहाङ वान्तेआकानि, गतहाइति निङइ अरु बिस्वासिलमकाय रापोझ्यान्ते ओउमयकाय सहयोग जाह्ङ्साको लागि जोक्तो मेहेनत जाह्ङ्ति काम जाह्ङ्तेआकानि, र गतहाइति निको प्रभु येसु ख्रिस्तहाङ निङइ गमो निङको आसा मधिम त मुना त दाह्यो कुरालमकाय निइ निको परमेस्वर आपाको ङ्हा सम्झनाङ्सु। 4 ङाको राप्तो बिस्वासि होयालम, परमेस्वरइ निङकाय राप्सास्याउना, अनि लयको मान्ता स्याउसाको लागि परमेस्वरइ निङकाय छ्युह्ङ्सास्यावो मुना त दाह्यो कुरा निइ चिःनाङ्सु। 5 जब नि निङकहाङ पेओ खबर लात्ति वाङालाङ्सु, ओउ पेओ खबरहाङखे सब्दलम मात्र खेल तर जिःङमा खेतो, धइतिदाह्य्सा निइ तोओ कुरालमखे सत्यले खेना त दाह्य्ति पबित्र ग्वालामइ निङकाय माहा पेतोकुसि चिःताक्सास्यावो खेतो। अनि नि गतताह्ङो मान्ता खेनाङ्सु र गतहाइति निइ निङकाय सहयोग जाह्ङो खेङसुतो त दाह्यो कुरामा निङइ चिःओले मुतेनय। 6 जब निङइ परमेस्वरको आखरकाय सुइकार जाह्ङ्तेआकानि, निङ लयको रुवाङहाङ निइ जाह्ङो र प्रभु येसुइ जाह्ङ्सास्यावो बेबहार अनुसार याक्तेआकाय। ओउतस्याउतोक बेलाहाङ निङइ नाःतो दुख च्यउतेआकानि, तर पबित्र ग्वालामइ निङकाय आसताक्सा स्याउलेआ। 7 ओउतझ्यान्ते निङ माकेदोनिया र अखइया इलाकाहाङ मुओ जुदा बिस्वासिलमको लागि यातज्यो पेओ नमुना स्याउतेआकाय। 8 धइतिदाह्य्सा निङको कारनइले माकेदोनिया र अखइया इलाकाभरि प्रभुको आखर प्रचार स्यावो खेना। अनि देङेखे निङइ परमेस्वरहाङ गमो बिस्वासको खबरमा जुदा थाउको मान्तालमइले चिःति खायो मुनय। ओउतझ्यान्ते ओउ मान्तालमकाय इ बिसयहाङ अरु नाःतो तोसाकाय नि आबस्यक ताःङसुलु। 9 धइतिदाह्य्सा नि निङकहाङ वाङ्तोक बेलाहाङ दोह-दोह स्यावो खेतो, अनि मुर्तिलमकाय फेआक्तिको सत्य अनि जिउदो परमेस्वरको सेवा जाह्ङ्लाङ निङ गतहाइति परमेस्वरकताङ द्याह्न्तेआकाय त दाह्यो कुरा ओउ मान्तालम लयमयइले ल्हाको खेनय। 10 अनि निङइ परमेस्वरको चोः येसु लाङकासय वाङ्सास्याउना त दाह्य्ति ल्युह्ङ्तिमुओ कुरामा ओउमयइ ल्हाकाकानि। परमेस्वरइ येसुकाय सिओसय उह्ति च्योक्ताक्सास्यावा, अनि परमेस्वरइ जुदा मान्तालमकाय न्याय जाह्ङ्सास्यावो दिनहाङखे, ओउ येसुइले निकाय परमेस्वरको रिससय दल्ताक्सास्याउलेना। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.