Luka 7 - Chakfem (ckyc)

Pihhzeenn khi m'ee Kaptin khi Mhi'lek

¹ Bwoonrooh Jesu kyes satt bii mihhse weett gurum ni mwopp, bhi dhel dhighin tughuzyill Kafarnahum.

² M'ee Kaptin khi mhi'lek gyet nhighin, w'u kihh m'ee laa'dhakk keeniy w'u kihh wall laa'dhakk ni pwetd, dhangg laa'dhakk ni a gok biarr, dheeh kihh dhen a arr muutt.

³ Kaarooh Kaptin khi mhi'lek ni klihng bii w'u Jesu kihh sh'in, bhi dhang phi m'ee mwoohnan khi Zhepp Yahuda mwopp tihh mwopp dum dhang diy phi Jesu tihh ji bar laa'dhakk keeniy ni diy.

⁴ Kaarooh mwoohnan khi Zhepp Yahuda ni mwopp jawull kihpee Jesu diy, bhi mwopp so'kumbokk nyi mwopp le, “Kum'bokk, gwoh mhize ni mak rooh ghi sh'in bii mihhse nyi,

⁵ p'ee gwoh ni kihh wall yill keemu pwetd, harr dyik Luh'kang munn.”

⁶ Bhi Jesu yakhal dang mwopp. Kaarooh Jesu ji'wull kuss kihh luh khi Kaptin ni, bhi Kaptin ni lop m'ee shaar niy mwopp tihh mwopp dum diy dyangg Jesu le, “Gwoohyon, tapp ghi daam'pee sak mou. Ai a'n ih mak rooh harr gha p'ee ji luh nah mou.

⁷ A nyi a bii w'u l'e a'n ih naah ih mak ji kihkyeen gha sh'i kaah nah mou. Ghi shin'pwoo kyekk, bhi laa'dhakk keena ni p'ee kakhamm.

⁸ Wu'an sh'i kaah nah maah a'n ih der m'ee gwooh mett wu'an zag, yakhal wu'an zag kihh mhi'lek mwopp der na. Ih kihh satt m'ee mhi'lek ni ih le, ‘Ghi dum seh,’ bhi dum; ih kihh satt wu'zeh ih le, ‘Ghi ji se,’ bhi ji. Yakhal ih kihh satt laa'dhakk keena ih le, ‘Ghi sh'in bii mihhse,’ bhi nyi p'ee sh'in nyi.”

⁹ Kaarooh Jesu klihng bii w'u Kaptin ni satt, bhi aa'phi nyi kihh nyi. Bhi buakhar satt dw'uu gurum w'u mwopp dang niy le, “Ih kihh satt wunn, baah ih khi cham kad pihhzeenn w'u bhall kaa mihhse, kooh dhighin Zhepp Isra'ila mou.”

¹⁰ Kaarooh mwooh dyinn mwopp lop mwopp seh baduam luh Kaptin ni, bhi mwopp dum kad laa'dhakk w'u dyinn a gok shi seh baa kakhamm.

Jesu yakhal kihh laa'em khi m'ee mat'kaah

¹¹ L'ang dyi lee bwoon bii mihhse bhi Jesu dum m'ee tughuzyill w'u shumm nyi a Neyin, bhi zheppkamm khinyi kihh dw'uu gurum mwopp dhess dang nyi.

¹² Kaarooh ji'wull kuss phi fokhol'pang tughuzyill ni, bhi kang kihh gurum mwopp kihh put kihh m'ee kumm gurum, w'u gyet a nyi kyekk a laa'em khi nhikhin, yakhal mat ni gyet a mat'kaah. Dw'uu gurum w'u tughuzyill ni mwopp tuud pwat dang mat'kaah ni.

¹³ Kaarooh Daah Jesu naah mat'kaah ni bhi kaah nyi dhoonn khinyi. Bhi satt nyi le, “Yi nook wall.”

¹⁴ Bhi Jesu taah bwum kir'kwaa m'ang kumm ni, bhi mwooh kihh kir'kwaa ni mwopp ba dyarrang chipp. Bhi Jesu satt kumm gurum ni le, “Laa'em, a'n ih satt gha ih le, ghi yakhal.”

¹⁵ A nyi seh bhi gwooh dyinn a kumm shi phing yakhal tong, y'aa laa'pwoo. Bhi Jesu pihh nyi nhikhin khinyi.

¹⁶ Bhi khighiy shwat gurum ni mwopp pwetd, mwopp kwoob Naan, mwopp le, “M'ee gu'wanggshiiy wu'yon yakhal naar mu 'y, wunn'! Naan ji p'ee bham gurum keeniy mwopp e'h, mwopp'muun!”

¹⁷ Bhi pwookaah bii w'u Jesu sh'in seh piin koohneeh yill Yahudiya, kihh v'ur kwangpee w'u gaar'yill Yahudiya ni zag.

Yohanna Gu-Baptisma shenn l'op Jesu

¹⁸ Zheppkamm khi Yohanna mwopp yakshiiy bii mihhse mwopp weett nyi. Bhi peet vel dhighin zheppkamm keeniy ni mwopp,

¹⁹ lop mwopp lhidum kihpee Daah Jesu diy, tihh mwopp nang diy phi nyi le, “A gha a gwooh mu kihh le'yit p'ee naah ji khinyi seh aa'h, h'aa kooh mu gongg ji khi m'ee gwooh dyikk dyi ayeh?”

²⁰ Kaarooh zheppkamm khi Yohanna ni mwopp jawull kihpee Daah Jesu diy, bhi mwopp satt nyi le, “A Yohanna Gu-Baptisma lop munn kihpee gha diy 'y. Kihh nang le, ‘A gha a gwooh mu kihh le'yit p'ee naah ji khinyi seh aa'h, h'aa kooh mu gongg ji khi m'ee gwooh dyikk dyi ayeh?’ ”

²¹ Mwoorr pee mhizeh ni bhi Jesu bar gurum mwopp dhess pwoo v'ur shiin-kakhamm kihh v'ur shwal, kihh v'ur riin wu'bis mwopp, yakhal wangg yit mhivughum mwopp dhess.

²² Bhi satt zheppkamm khi Yohanna ni mwopp le, “Dum wu yakshiiy bii w'u wu naah, kihh bii w'u wu klihng se Yohanna. Wu satt nyi wu le, mhivughum mwopp kihh kad naahpee, kud mwopp kihh yakhal mwaan, mhilokhom mwopp kihh kad barr, mwopp pwat wu'bhangg; komduakhar mwopp klihngpee, mwooh mihmwarrap mwopp waa yakhal kihh seen; yakhal ih kihh satt Pwoo'wurett mhipyaah mwopp.

²³ Wu'rett khi Naan kaah gwooh baah pal dhighin pihhzeenn keeniy dhighin a'n mou.”

²⁴ Bwoon w'u zheppkamm khi Yohanna ni mwopp reen, bhi Jesu y'aa shin'pwoo kihh dw'uu gurum ni mwopp kaah Yohanna le, “Gyet wu pwat wu duam dh'em naah a mihyeh? Gyet wu duam naah a m'ee raz w'u piip kihh vling aa'?

²⁵ Kad a kihhsheh mou bhi gyet wu pwat wu duam naah a mihyeh? Gyet wu duam naah a m'ee gurum w'u kihh sh'in zhwatt sh'i loohkrhim aa'? Ai mwooh kihh sh'in zhwatt sh'i loohkrhim yakhal mwopp kihh sh'in t'ong mhi klihngshangg luhfwaann mwopp.

²⁶ Kad a kihhsheh mou, bhi gyet wu pwat wu duam naah a mihyeh? Gyet wu duam naah a m'ee gu'wanggshiiy aa'? Ee'h, ih kihh satt wunn, harr a gwooh mett gu'wanggshiiy maah.

²⁷ A gwoh mhize ni a gwoh gyet mwopp ran r'an kaah nyi mwopp le, “ ‘Ghi naah, a'n p'ee lop laa'lop keena ky'een gha, w'u nyi p'ee dhakk arr ji keegha dhangg ghi kihh ji.’

²⁸ “Ih kihh satt wunn, kwett dhighin gurum w'u shwarab la, bhi baah m'ee gwooh mett Yohanna Gu-Baptisma nhighin mou, weett kihhsheh bhi gwooh katmett-weett dhighin dhenglong khi Naan mett Yohanna ni.”

²⁹ Kaarooh gurum ni mwopp weett, kihhsheh kihh mhi-lappwapp mwopp klihng bii w'u Jesu satt seh, bhi mwopp satt le, “Naan a Gu-shin'dihhreh!” P'ee gyet wu'mwopp lapp ruh baptisma khi Yohanna.

³⁰ Dhangg Farisiiy kihh Mhikamm-w'aar mwopp shiih kihh shwan khi Naan p'ee shut shi'rooh mwopp shiih lapp baptisma khi Yohanna seh.

³¹ Daah Jesu satt le, “An p'ee kammshiiy gurum w'u gangg mhize ni mwopp a kihh mihyeh shi se? Kooh mwopp a kaah mihyeh shi se?

³² Mwopp a kaa zhepp w'u kihh kwangg t'eel kih luhtukk, mwopp kihh peet satt shag le, “ ‘Mu t'aa, t'aa, t'aa bhell wunn Dhangg baah wu sh'in tam mou; Mu wall, wall, wall wallmaab wunn, Dhangg baah wu wall mou.’

³³ T'o, wu naah, Yohanna Gu-Baptisma gyet ji, baah kihh so dhebhenn, kooh shwaa am'anab mou, bhi wu satt wu le, ‘Ai nyi a kihh mumullung dhighin shin.’

³⁴ Wu'an L'aa khi Gurum ih ji, ih kihh so dhebhenn yakhal ih kihh shwaa am'anab, bhi wu satt wu le, ‘Wu naah gag m'ee pram kihh gag m'ee g'u shwaa am'anab w'u kaa wu'dyikk, shaar khi mhi-lappwapp kihh mhi-shigbis mwopp.’

³⁵ Weett kihhsheh, mwopp kihh naah zeenn khi shwan'soon khi Naan a sh'i dhakk'shin khi mwooh kihh sh'in t'ong keeru a sh'i shwan'soon khi Naan ni.”

M'ee nhi-shigbis m'um mwoor'teghez Jesu

³⁶ Bhi kihmeh dhighin Farisiiy ni mwopp, w'u shumm nyi a Siman, nang Jesu p'ee dum soh luh niy, bhi Jesu dum.

³⁷ M'ee mat, w'u gyet sh'in t'ong mhi shigbis dhighin tughuzyill mhizeh ni, klihng rooh Jesu ji p'ee soh luh g'u Farisiiy ni, bhi ji kihh m'ee dleng pangg'krhim keera w'u kihh mwoor'teghez dhighin;

³⁸ ji dharr sh'i shiiy Jesu, pwenn kihbwoon nyi kihh sam wall diy. M'ang shiiy nyi log kihh yit'mwaa keera wu'ba'ba; yakhal kihh pwaas mwopp kihh shoopkaah rah; kihh dwaas shiiy nyi mwopp kihh pwoo ra, yakhal kihh m'um mwopp kihh mwoor'teghez w'u nyi kihh nyi seh.

³⁹ Dhangg kaarooh Siman, w'u a Farisiiy w'u nang Jesu p'ee soh seh, naah bii w'u mat mihhseh ni phi sh'in nyi, bhi ryeeh en niy le, “Ai kaddyinn gwoh mhize ni a m'ee gu'wanggshiiy w'u zeenn'zeenn bhi dyinn nyi p'ee man rooh kooh mat w'u phi bwum riy seh a weeh oh; yakhal kooh nyi a mat wu'kaarangg oh? P'ee mat ni a nhi-shigbis.”

⁴⁰ Bhi Jesu pring nyi le, “Siman, a'n kihh mee'bii p'ee satt gha.” Bhi Siman satt nyi le, “Uwou, Daah Gukamm, ghi satt a'n dhak e'h.”

⁴¹ Bhi Jesu satt nyi le, “M'ee gurum mwopp vel gyet kihh kaatt khi m'ee g'u pihh kaatt kaah ruh. Wu'zeh kihh kaatt mhi shaghal dinari dhaa paad, wu'zeh kihh mhi dinari laar paad.

⁴² Kaarooh baah m'ee mwopp kihh shaghal w'u p'ee kwat kaatt ni mou, bhi g'u pihh kaatt ni fwa mwopp weett vel. T'o, naah mag'gha, bhi a m'ee mwopp wu'rangg p'ee wall nyi mett?”

⁴³ Siman lapp nyi le, “Ih kihh naah a gwooh mwopp fwa wu'dhess nyi seh.” Jesu satt nyi le, “Ghi satt dihhreh.”

⁴⁴ Bhi shikhir kihpee mat ni diy, bhi satt Siman le, “Ghi naah mat mhize aa'? Ih ji luh gha, dhangg baah ghi dham sh'i san kihh am p'ee vwang shiiy nah mou, weett kihhsheh bhi mat mihhse m'ang shiiy nah log kihh yit'mwaa keera, yakhal pwaas mwopp kihh shoopkaah rah.

⁴⁵ Baah ghi kang a'n rih-rett sh'i dwaaspwoo mou; weett kihhsheh bhi mat mihhse, phi'wu ih ji diy, bhi baah nook dwaas shiiy nah mwopp sh'i pwoo ra mou.

⁴⁶ Baah ghi dhoghol a'n sh'i m'um mw'oor kaah nah mou; dhangg ghi naah, mat mihhse m'um kwag nah kihh mwoor'teghez keera.

⁴⁷ Pee'mhinyi bhi ih kihh satt gha, shigbis khinyi w'u mwopp dhess seh, a'n ih fwa mwopp nyi, a nyi a bii w'u l'e tihh wu'nyi sh'in wall wu'dhess. Gwooh lapp fwa mhi bii wu'lee, bhi wall mhi gwoh ni a lee zag.”

⁴⁸ A nyi seh, bhi Jesu satt mat ni le, “An ih fwa shigbis keeyi mwopp yi.”

⁴⁹ Bhi mwooh kaah soh dang nyi mwopp y'aa satt nyi shag le, “A wuyeh se kihhshe w'u harr kihh fwa shigbis kan?”

⁵⁰ Bhi Jesu satt mat ni le, “Pihhzeenn keeyi bham yi; mwan yi choorr-choorr.”