Luka 24 - Chakfem (ckyc)

Jesu yakhal kih peemuutt

¹ Byitt-byitt p'ar puus wu'shee mhi shaptarr, bhi shwarab ni mwopp dum phi kihshirr Jesu kihh mwoor'teghez w'u mwopp dhakk seh.

² Bhi mwopp dum kad baa mwopp byirring elleng w'u phi kihshirr ni lhi'baa.

³ Dhangg kaarooh mwopp dhel dhighin kihshirr ni, bhi mwopp kad kumm Daah Jesu nhighin maah.

⁴ Kaarooh mwopp kaah yeeh shut kaah bii mihhseh, dheeh mwopp kad a m'ee gurum mwopp vel kihh dyarrang nhighin kuss sh'i shut kihh looh w'u mellep pyaah sakk-sakk.

⁵ Khighiy shwat mwopp pwetd, bhi mwopp kwarram kaah ruh yill. Gurum w'u vel mhizeh ni mwopp nang phi shwarab ni mwopp le, “A p'ee mihyeh bhi wunn phi lyap gwooh kihh seen naar mwooh mihmwarrap ayeh?

⁶ Ai baah nyi nihghinse dyi mou; baa yakhal kihh seen. Wu kakkder bii w'u deh satt wunn, bhi nyi kudyi kihshag kihh wunn Galili le,

⁷ ‘Nyi a ching tihh mwopp pihh L'aa khi Gurum sarr mhi-shigbis mwopp, mwopp pwas nyi kih sheepmuutt, dhangg nyi p'ee waa yakhal dyi kihh seen kih puus wu'kunn.’ ”

⁸ Bhi shwarab ni mwopp kakkder pwoo w'u deh Jesu satt runn seh ser'seh.

⁹ Kaarooh shwarab ni mwopp tong phi kihshirr ni mwopp baja, bhi mwopp yakshiiy bii mihhseh weett zheppkamm w'u kaghapaad baa'kihmeh seh, kihh kakhar gurum w'u mwopp dheeh dang mwopp weett.

¹⁰ Gyet a Maryamu Magdalin, kihh Yuwana, kihh Maryamu w'u a nhikhin khi Yakub, kihh pakk m'ee shwarab w'u dang mwopp dyi, a mwopp yakshiiy bii mihhse zhepp'lop khi Jesu ni mwopp.

¹¹ Dhangg baah zhepp'lop ni mwopp pihhzeenn bii w'u shwarab ni mwopp satt runn seh mou, p'ee bii w'u shwarab ni mwopp yakshiiy seh dheeh mwopp a kaa pwoo wu'buu se kyekk.

¹² Weett kihhsheh, bhi Bitrus shass yakhal, y'aa shu'shu dum phi kihshirr ni. Kaarooh dum kurum bhonggpee diy dhighin kihshirr ni, bhi naah a zaall fwaat linen w'u deh mwopp wum Jesu kihh nyi kyekk kihh l'e kihshag m'ee koghob. Bii mihhseh aa'phi nyi pwetd, bhi waa'baa.

Jesu dyingg shin gurum vel kih arr Emmawus

¹³ P'ar mihhseh ni bhi m'ee mhi-dumdang Jesu mwopp vel kihh dum Emmawus, w'u a m'ee kwangyill w'u zh'ong khinyi kihh Urshalima a kaa kilomita kaghapaad baa'kihmeh se.

¹⁴ Mwopp kaah laa'pwoo kihh shag kaah bii w'u taah seh.

¹⁵ Kaarooh mwopp kaah l'aa orr nyi, mwopp kaah shwanshiiy bii mihhseh kihh shag, bhi Jesu sh'i kaah niy ji y'aa mwopp arr mwaan, bhi mwopp sokihkyeen kihh mwaan dangshag,

¹⁶ dhangg Naan byir'yit mwopp tapp mwopp naah nyi man.

¹⁷ Bhi Jesu nang phi mwopp le, “Wunn phi shwan a shiiy mihyeh kihhsheh pwetd arr mwaan dangshag?” Bhi mwopp ba dyarrang dhighin wadphitukhup.

¹⁸ Bhi kihmeh dhighin mwopp, w'u shumm nyi a Kilyobas, nang phi nyi le, “A wu'gha kyekk a mhizeb Urshalima w'u baah ghi man bii w'u mwopp sh'in nhighin dhighin t'eer mihhse aa'?”

¹⁹ Bhi Jesu nang phi mwopp le, “A mee'mihyeh mwopp?” Bhi mwopp lapp nyi le, “A pwookaah Jesu Gu-Nazaret e'h. Deh nyi a gu'wanggshiiy w'u bhall-bhall dhighin kamm khinyi, kihh dhakk'shin khinyi zag. Naan man yakhal zhepp gurum weett zag mwopp man a kihhsheh.

²⁰ Prist wu'nan kihh mhi-kihkyeen keemu mwopp pihh nyi sarr dyeell tihh mwopp shandyeell muutt diy nyi, bhi mwopp pwas nyi kih sheepmuutt.

²¹ Dhangg deh wu'munn mu kihh le'pan mu le a nyi p'ee bham Isra'ila, dhangg munn a dhighin t'eer wu'kunn se shinn phi'wu mwopp sh'in bii mihhseh ni diy.

²² “Dhangg ghi naah, baah bii mihhseh a kihhsheh kyekk mou, pakk shwarab w'u mwopp kihshag kihh munn mwopp pihh aa'pwoo munn pwetd. Mwopp mya dwam phi kihshirr ni byitt-byitt,

²³ dhangg mwopp kad kumm Jesu ni maah. Bhi mwopp baja dyangg munn le runn naah m'ee wanggriin mhi m'ee mhi'lop khi Naan nw'aa, bhi nw'aa satt runn le Jesu ni gw'ar kihh seen e'h.

²⁴ Bhi pakk gurum keemu zag mwopp dum phi kihshirr ni, bhi mwopp dum kad bii ni mwoorr a kihhsheh kaarooh shwarab ni mwopp yakshiiy seh, dhangg mwopp naah Daah Jesu ni sh'i kaah niy mou.”

²⁵ Bhi Jesu satt mwopp le, “Kai, wunn a mwenn pwetd. Baah phitukhup wu kihh klakk pihhzeenn kapp bii w'u gyet Mhi-wanggshiiy mwopp satt mou!

²⁶ Kan wu man rooh deh nyi a ching tihh Kristi ni shwaazheell bii mihhse mwopp weett dhangg kihh dhel dhighin tihghindhess keeniy maah?”

²⁷ Bhi Jesu yakshiiy bii w'u Ran'Wubhangg satt kaah niy mwopp, phi'wu shee diy W'aar mhi Musa dum putt r'an khi kakhar Mhi-wanggshiiy mwopp weett.

²⁸ Kaarooh mwopp wull kuss kihh kwangyill w'u gurum mihhseh ni mwopp kihh dum diy, bhi Jesu wu'nyi sh'in kaarooh nyi p'ee dum dhidhel se.

²⁹ Dhangg gurum mihhseh ni mwopp dy'iin sh'i nyi pwetd mwopp le, “Ghi teer luh muh; baa kan'sihkhin kihh t'ang sh'in; puus dheeh a arr r'u.” Bhi Jesu dum p'ee teer luh mwopp.

³⁰ Kaarooh Jesu tong p'ee so soh kihshag kihh mwopp, bhi m'ang gihkhill gutt, pihh plangg Naan, bhi trep pihh mwopp.

³¹ Bhi yit mwopp wangg, mwopp naah nyi man, bhi yakhal wonn dyiiz nhighin kihyit mwopp.

³² Bhi mwopp satt shag le, “Kan a kihhsheh shi dyinn mu kad phitukhup mu kihh sowus diy, kaarooh dyinn nyi laa'pwoo kihh munn kih arr seh, yakhal kihh yakshiiy pwoo khi Naan munn s'ang?”

³³ A nyi seh, bhi mwopp shikhir yakhal dyi abet, mwopp baduam Urshalima. Mwopp dum kad kakhar zhepp'lop khi Jesu w'u kaghapaad baa'kihmeh seh mwopp kaah k'ang kihshag, kihhsheh kihh kakhar mwooh dang mwopp.

³⁴ Mwopp kaah l'aa orr yaghal kih peemuutt khi Jesu le, “Nyi a zeenn e'h wunn'!, Daah Jesu yakhal kih peemuutt, harr dyingg shin Siman e'h!”

³⁵ Bhi mwooh vel mhizeh mwopp yakshiiy bii w'u dyinn taah kad runn kih arr seh, kihh rooh dyinn mwopp naah Jesu man kaarooh nyi trep gihkhill gutt seh.

Jesu dyingg shin mhi-dumdang niy

³⁶ Kaarooh mwopp kudyi kaah yakshiiy bii mihhseh, bhi Jesu sh'i kaah niy rug dharr naar mwopp, bhi satt mwopp le, “Tongkakhamm dhen kihshag kihh wunn!”

³⁷ Bhi bhaann chaat bwut mwopp, yakhal lukhut t'u mwopp pwetd, mwopp kihh ryeeh le runn phi naah a m'ee daazhiiy.

³⁸ Dhanggbhi Jesu satt mwopp le, “A mihyeh l'e bhi lukhut t'u wunn, yakhal wu kihh takhar bii mihhse dhighin phitukhup wu ayeh?

³⁹ Wu naah sarr nah mwopp kihh shiiy nah mwopp zag; a a'n sh'i kaah nah. Wu bwum a'n tihh wu man diy; a m'ee daazhiiy wu'rangg kihh kwed kihh lwaa kihh yess kaa wu naah a'n kihh nyi se?”

⁴⁰ Kaarooh satt kihhsheh, bhi dyingg sarr niy kihh shiiy niy mwopp naah.

⁴¹ Dhangg kaarooh harr mwasseh baah mwopp pihhzeenn mou lhiwaa rettyit kihh aa'pwoo, bhi nang phi mwopp le, “Wunn kihh mee'bii nihghinse p'ee s'o aa'?”

⁴² Bhi mwopp pihh reb bott sherep w'u wu'wus nyi,

⁴³ bhi lapp so kihyit mwopp weett.

⁴⁴ Bhi satt mwopp le, “A mihhse a bii w'u deh ih satt wunn, bhi ih kudyi kihshag kihh wunn ih le; dhen a ching tihh kapp bii w'u mwopp ran kaah nah dhighin W'aar mhi Musa, kihh R'an khi Mhi-wanggshiiy mwopp, kihh rooh dhighin KoogNaan zag gam.”

⁴⁵ Bhi wangg en mwopp tihh mwopp mak manshiiy Ran'Wubhangg diy.

⁴⁶ Bhi satt mwopp le, “A mihhse a bii w'u rih-ran dhighin Ran'Wubhangg le Kristi ni p'ee shwaazheell, dhangg waa yakhal kih peemuutt kih puus wu'kunn.

⁴⁷ Bhi mwopp p'ee kihh satt pwooNaan mhi tu'wapp p'ee fwah khi shigbis dhighin shumm nyi Seghen'gurum w'u dhighin yill ni weett. Wu shee satt pwooNaan ni a Urshalima.

⁴⁸ A wunn sh'i kaah wuh wu naah bii mihhse mwopp kihh yit wu.

⁴⁹ Wu naah, a'n p'ee lop gwooh Daa bwakhatbhelepp nyi wunn seh lhisam wunn; wu to`ng dhighin khishikhitt Urshalima harr tihh Naan pihh maa'pee keeniy diy wunn dhangg.”

Jesu baa'kaa dum kih dhengNaan

⁵⁰ Kaarooh Jesu lang'arr kihh zheppkamm keeniy ni mwopp lhipwat Urshalima harr mwopp dum wull kuss kihh Betani, bhi eep sarr niy phikihtihngg le'wurett diy mwopp.

⁵¹ Kaarooh nyi kaah le'wurett mwopp, bhi yet mwopp, bhi Naan m'ang nyi lhi'kaa dum kih dhengNaan.

⁵² Bhi zheppkamm ni mwopp soyill nyi, dhangg mwopp wakba Urshalima sh'i rettyit w'u maa'satt.

⁵³ Mwopp kihh dum kang kihfur LuhNaan chitt p'ee kwoob Naan.