Luka 22 - Chakfem (ckyc)

Yahuda Iskaryoti dh'om seett kihh Jesu

¹ Kaarooh Ku'khur Gutt-gaw, w'u a Ku'khur w'u mwopp kihh peet Ku'khur Mettkaah, wull kuss,

² bhi prist wu'nan kihh Mhikamm-w'aar mwopp y'aa t'ang arr w'u tihh mwopp byaah t'u Jesu diy dhakhatt lakham-lakham, p'ee mwopp kihh kihkhir gurum mwopp.

³ Bhi Shetan dhel phitukhup Yahuda Iskaryoti, w'u gyet nyi a kihmeh dhighin zheppkamm khi Jesu w'u kaghapaad baa'vel seh.

⁴ A kihhsheh bhi Yahuda ni yakhal dum kihpee prist wu'nan mwopp, kihh mhi-kihkyeen khi mhitapp LuhNaan mwopp, dum bheett arr w'u tihh seett diy kihh Jesu mwopp.

⁵ Bii mihhseh rettyit mwopp pwetd, bhi mwopp bwakhatbhelepp le runn p'ee pihh shaghal gw'ar.

⁶ Yahuda dh'om zag, bhi y'aa rengg arr w'u tihh pihh Jesu diy sarr mwopp, mwoorr pee w'u baah dw'uu gurum mwopp dhess nhighin mou.

Soh'teer mhi Gabshit wu'pwooh

⁷ Sh'i Ku'khur Gutt-gaw, p'ar puus w'u mwopp kihh gab laa'tihm bii'zhukhum mhi Mettkaah diy,

⁸ bhi Jesu lop Bitrus mwopp kihh Yohanna lhidum khishikhitt Urshalima, satt mwopp le, “Dum wu dhakk pee w'u munn p'ee so soh Mettkaah ni diy.”

⁹ Bhi mwopp nang phi nyi le, “Gwoohyon, ghi kihh dh'om tihh mu dhakk pee ni a nihyeh?”

¹⁰ Jesu lapp mwopp le, “Wu dum dhighin khishikhitt ni, bhi kaarooh mihh wunn kudyi ji dhel dhighin khishikhitt ni, bhi m'ee gurum w'u kihh pyeel am p'ee ji kad wunn. Wu langdang nyi harr tuluh w'u dum dhel diy.

¹¹ Mihh wu dum wu wull tuluh ni, bhi wu nang phi guluh ni wu le, ‘Gukamm kihh nang le, Luhmhizeb shi w'u a'n p'ee so soh Mettkaah kihshag kihh zheppkamm keena diy a nihyeh?’

¹² Bhi nyi p'ee dum kammpee m'ee k'om luhdhengg w'u kaam-kaam, a w'u dhidhakk dhen wunn. Wu dhakk shed ni nhighin.”

¹³ Bhi mwopp y'aa arr, mwopp dum kad nyi a kihhsheh mwoorr kaarooh Jesu yakshiiy mwopp seh. Bhi mwopp dhakk soh Mettkaah ni nhighin.

¹⁴ Kaarooh pee wull p'ee so soh Mettkaah ni, bhi Jesu kihshag kihh zhepp'lop keeniy mwopp kwangg p'ee so soh ni.

¹⁵ Bhi satt mwopp le, “Phideh mhirakhatt mhi so Mettkaah mhize kihshag kihh wunn dhangg ih kihh shwaazheell kihh yakhal diy bwut na!

¹⁶ Ih kihh satt wunn, baah a'n p'ee so nyi dyi mou, harr seeh p'ar w'u mwopp gam shiiy khinyi diy dhighin dhenglong khi Naan.”

¹⁷ Kaarooh Jesu m'ang l'aa zhangg ni, bhi pihh plangg Naan, bhi satt mwopp le, “Wu lapp mihhse wu shap kooh a meeh muh wu'rangg.

¹⁸ P'ee ih kihh satt wunn, baah a'n p'ee shwaa bii w'u a am'anab dyi mou harr seeh dhenglong khi Naan ji dhangg.”

¹⁹ Yakhal m'ang gihkhill gutt ni, kaarooh pihh plangg Naan, bhi trep pihh mwopp, bhi satt le, “Mihhse a shoopshik na, w'u ih pihh p'ee wunn; wu kihh sh'in mihhse p'ee p'an kihh a'n.”

²⁰ A kihhsheh dyi zag, bwoonrooh mwopp so soh'teer ni, bhi m'ang l'aa zhangg ni, bhi satt le, “Mihhse a zhangg mhi Gabshit Wu'pwooh sh'i teghem nah w'u ih dheer p'ee wunn.

²¹ Hah, dhangg sarr gwooh p'ee seett kihh a'n kaah soh dang na mwasseh kihhshe se!

²² L'aa khi Gurum p'ee mwan kaa Naan gyet shep shwan dhen seh. Dhangg mak kihh gwooh seett kihh L'aa khi Gurum ni dihkhillihkk.”

²³ Bhi zheppkamm ni mwopp y'aa nang nyi phi shag kooh kyed a meeh ruh wu'rangg p'ee sh'in bii wu'kihhsheh oh.

²⁴ Kaarooh mwopp nhighin bhi m'ee kakhann yakhal naar zhepp'lop ni mwopp kaah kooh kyed a m'ee mwopp wu'rangg a gwoohyon w'u mett kakhar mhinin mwopp weett oh.

²⁵ Bhi Jesu satt mwopp le, “Daskakhamm mhi Seghen'gurum mwopp kihh ten'dyikihh mwopp, dhangg mhi yakhal bhi mwopp kihh satt le wai a runn a m'ee mhi-naahzheell khi gurum hoo-wuh'wah!

²⁶ Dhangg tapp wu'wunn wu sh'in kihhsheh mou. Kop kihhsheh, bhi gwooh mett wunn weett p'ee dhen shin a kaa gwoohshomm wunn weett se. Yakhal gu'kihkyeen keewu dhen shin a kaah laa'dhakk keewu se.

²⁷ “Ih kihh nang pwoo wu, a wuyeh a gwoohyon? A gwooh kihh tong pwoo ki'byin soh p'ee soh aa'h, h'aa a laa'dhakk w'u kihh shap soh ayeh? Ai a gwooh kihh tong phi ki'byin mett. Dhangg wu'an se naar wu a kaa laa'dhakk se.

²⁸ A wunn a mwooh wu dyarrang dang na dhighin kammpee w'u a shwaa weett.

²⁹ Kaarooh Daa bwakhat miskakhamm a'n se, bhi wu'an a bwakhat miskakhamm wu'wunn a kihhsheh zag,

³⁰ tihh wu so wu shwaa diy pwoo ki'byin soh keena kihshag kihh a'n dhighin dhenglong keena, yakhal wu kwangg kih taghamlong dhakk-sihhra kaah seghen khi Isra'ila w'u kaghapaad baa'vel seh.”

³¹ Jesu satt Siman le, “Siman, Siman, Shetan baa dhang pee tihh lapp wunn diy pun kaa y'ee dhebhenn se.

³² Dhangg baa ih dhangNaan p'ee gha, tapp pihhzeenn keegha diy taah kat mou. Mihh ghi baah ghi ji, bhi ghi le'sarrbhall kakhar em'nangg mwopp.”

³³ Dhanggbhi Siman pring Jesu le, “Gwoohyon, baa a'n ih dhakk san p'ee lang'dang gha kooh a luh'shakhat, h'aa kooh a muutt kyerrengg!”

³⁴ Bhi Jesu pring nyi le, “Bitrus, ih kihh satt gha, gha p'ee shiihshig man a'n yit kunn shishinn se, dhanggbhi dool kihh peetpee!”

³⁵ Bhi Jesu nang phi mwopp le, “Deh ih lop wunn satt pwooNaan noott daam'shaghal, kooh kwaghashag wu'vel, bhi deh mee'bii wonn wunn mihngg?” Mwopp lapp nyi le, “Haiyou, deh mee'bii wonn munn mou.”

³⁶ Bhi Jesu satt mwopp le, “Dhangg mwasseh, mihh wunn kihh daam'shaghal, bhi wu m'ang, harr kihh kullug zag; yakhal mihh gha dheng g'oo, bhi ghi seett kihh bh'aar keegha tihh ghi seett diy.

³⁷ Nyi a rih-ran le: ‘Mwopp m'ang nyi a kihmeh dhighin mhi-shigbis.’ Ih kihh satt wunn, nyi a ching tihh r'an mihhseh ni gam kaah nah. Ih kihh satt wunn, bii w'u mwopp ran kaah nah kuss gam.”

³⁸ Bhi zheppkamm khinyi mwopp satt nyi le, “Gwoohyon, ghi naah, munn kihh g'oo se vel e'h.” Bhi pring mwopp le, “Pwoo ni dharr kihhsheh.”

Jesu dhangNaan kih Bwum Paatt

³⁹ Jesu put dhel dum kih Bwum Paatt kaa kihh lokhot sh'in nyi seh, bhi zheppkamm khinyi mwopp dumdang nyi.

⁴⁰ Kaarooh dum wull, bhi satt zheppkamm keeniy ni mwopp le, “Wu dhangNaan tapp'baa wu pal dhighin zhwaan'pee mou.”

⁴¹ Bhi wu'nyi shang dum diy kihkyeen mwopp lee, kaah vhidpee bhekhen kihmeh se, bhi sam kurum kih fr'um niy, bhi dhangNaan satt le,

⁴² “Daa, mihh nyi a sh'i dh'om keegha, bhi ghi m'ang zhangg zheell mhizeh lhi'baa kaah nah. Weett kihhsheh, bhi tapp ghi sh'in a p'an maan'nah mou, ghi sh'in a mag'gha.”

⁴³ Bhi m'ee gu'lop khi Naan put phikihtihngg, dyingg shin nyi, le'sarrbhall nyi.

⁴⁴ Kaarooh Jesu dhighin wadphitukhup bis-bis, bhi y'aa dhangNaan pwetd, harr wunn khinyi w'u kihh dyong sam yill dheeh a kaa teghem se.

⁴⁵ Kaarooh yakhal yill kihpee dhangNaan ni dum kihpee zheppkamm keeniy mwopp diy, bhi dum kad mwopp a s'aam p'ee wadphitukhup.

⁴⁶ Bhi nang phi mwopp le, “Wunn s'aam a ranggyeh? Wu yakhal wu y'aa dhangNaan, tapp'baa wu pal dhighin zhwaan'pee.”

Mwopp y'aa Jesu

⁴⁷ Kaarooh Jesu kudyi kaah laa'pwoo, bhi m'ee dw'uu gurum mwopp tullum japrep. Yahuda, w'u a kihmeh dhighin zheppkamm khi Jesu w'u kaghapaad baa'vel seh, a nyi lang'arr kihh mwopp. Bhi taah dum kihpee Jesu, tihh tog diy kihh nyi sh'i dwaaspwoo.

⁴⁸ Bhi Jesu nang phi nyi le, “Hah, Yahuda, gha p'ee seett kihh L'aa khi Gurum a sh'i dwaaspwoo mihngg?”

⁴⁹ Kaarooh zheppkamm khi Jesu mwopp naah bii w'u kihh t'ang yaghal, bhi mwopp nang phi nyi le, “Gwoohyon, mu chaat kih mwopp kihh g'oo bwaatt?”

⁵⁰ Bhi kihmeh dhighin zheppkamm ni mwopp twed tall kom m'ee kromm khi Prist Wu'yon kihh g'oo keeniy koghob sarrsoh ming yill.

⁵¹ Dhangg Jesu satt mwopp le, “Wu yet mwopp diy! Wu nook!” Bhi bwum kom gwoh ni, bar nyi diy.

⁵² Bhi Jesu nang phi prist wu'nan ni mwopp, kihhsheh kihh mhi-kihkyeen khi mhitapp LuhNaan ni mwopp, kihhsheh kihh mwoohnan w'u mwopp ja p'ee y'aa riy seh, le, “An a m'ee guteepee w'u dheeh wu pwat dang na kihh g'oo kihh dughul aa'?

⁵³ An kihshag kihh wunn kooh phiranggyeh kihfur LuhNaan dhangg baah wu y'aa a'n mou. Dhangg mihhse a pee mug'wuh, w'u a pee sokokhorong mhi pee'kwoo.”

Bitrus shiihshig man Jesu

⁵⁴ Bhi mwopp y'aa Jesu, mwopp dum kihh nyi luh Prist Wu'yon. Bitrus l'ang kihbwoon mwopp zhong-zhong.

⁵⁵ Kaarooh mwopp dhaan wus kihnaar k'om mwopp kwangg shi'pwoo, bhi Bitrus tong dang mwopp zag.

⁵⁶ Kaarooh wus bhanggpee, bhi m'ee laa'reep w'u a kromm naah Bitrus kihh tong phi wus. Laa'reep ni dyee nyi rih-rett, bhi satt le, “Gwoh mhize dyinn kihshag kihh Jesu.”

⁵⁷ Bhi Bitrus shiihshig le, “Yi laa'reep mhize ka'! Baah ih man nyi mou!”

⁵⁸ L'ang dyi lee bhi m'ee gwooh dyikk naah Bitrus bhi satt le, “Wu'gha zag a kihmeh dhighin gurum khinyi.” Bhi Bitrus pring nyi le, “Kai, gha! Baah a'n a kihmeh dhighin mwopp mou.”

⁵⁹ L'ang dyi lee, kaa gonggpee kihmeh se, bhi m'ee gurum waa satt dyi zag le, “Baah m'ee satt kihhshe, gwoh mhizeh dyinn kihshag kihh Jesu ni, p'ee wu'nyi zag a Gu-Galili.”

⁶⁰ Bhi Bitrus pring nyi le, “Kai, gha! Baah ih man bii w'u gha phi laa'pwoo kaah seh mou!” Dhangg kaarooh Bitrus kaah laa'pwoo, bhi dool peetpee.

⁶¹ Bhi Daah Jesu buakhar naah Bitrus zihng-ng-ng, bhi Bitrus kakkder pwoo w'u dyinn satt riy le: “Dhanggbhi dool kihh peetpee shishinn se, bhi gha p'ee shiihshig man a'n yit kunn.”

⁶² Bhi Bitrus put dum kihtekhell, bhi shwat wall dhekk-dhekk.

Mwopp nwang'zhung Jesu

⁶³ Bhi mwooh mwopp l'e mwopp tapp Jesu ni mwopp y'aa nwang'zhung nyi, yakhal mwopp kihh sram nyi.

⁶⁴ Mwopp kihh bwakhat yit nyi, dhangg mwopp kihh nang phi nyi le, “Ghi sh'in wanggshiiy munn, a m'ee muh wu'rangg shud gha?”

⁶⁵ Mwopp m'ang nyi fullup shipwetd.

Jesu tekhem To'ng-Mhi'nan

⁶⁶ Kaarooh byitt m'ang, bhi To'ng-Mhi'nan khi Zhepp Yahuda, kihhsheh kihh prist wu'nan, kihh Mhikamm-w'aar mwopp tong, bhi mwopp l'e tihh mwopp ji diy kihh Jesu tekhem ru.

⁶⁷ Bhi mwopp nang phi nyi le, “Mihh a gha a Kristi shi, bhi ghi sihh-satt munn fyaad.” Jesu pring mwopp le, “Kooh dyinn ih sihh-satt wunn maah, bhi wunn p'ee pihhzeenn a'n mou.

⁶⁸ Yakhal mihh ih sh'in t'al pwoo wu, bhi wunn p'ee dh'om lapp nyi a'n mou.

⁶⁹ Dhangg yakhal mwasseh kihhshe bhi L'aa khi Gurum p'ee tong Sarrsoh khi Naan w'u Bhallmett-weett.”

⁷⁰ Bhi mwopp nang phi nyi le, “Dheeh kan a gha a L'aa khi Naan shi seh sihng?” Bhi Jesu lapp mwopp satt le, “Wu satt a nyi seh pwetd.”

⁷¹ Bhi mwopp satt shag le, “Kakkrooh mu kihh dheeh lyap m'ee mhi-tupp'pwoo dyi a p'ee mihyeh, wunn'? Ai baa mu klihng satt bii niy kihh pwoo niy.”