Luka 1 - Chakfem (ckyc)

Guyen Luka sh'in r'an p'ee Tyofilos

¹ Longfwaann Tyofilos, gurum dhess mwopp y'aa saag r'an kaah bii w'u Naan l'e tihh ji gam naar mu se.

² Mwopp ran a bii w'u mwooh gyet naah bii mihhseh ni kihh yit ru sh'ee, yakhal mwopp dhen a mhidhakk mhi pwoo mihhse ni, mwopp yakshiiy nyi munn.

³ Pee'mhinyi, bhi bwoonrooh wu'an zag ih blihpshiiy bii ni mwopp weett kih kug nett-nett, bhi ih naah rett tihh ih sh'in r'an w'u tihh ih yakshiiy bii ni mwopp diy gha kihh shiipp, kihh shiipp

⁴ tihh ghi man zeenn mhi pwoo w'u gyet mwopp kamm diy gha seh.

Gu'lop satt le mwopp p'ee l'aa Yohanna Gu-Baptisma

⁵ Gyet yiiy bh'aar khi Hiridus, Miskakhamm Yahudiya, bhi m'ee prist w'u shumm nyi a Zakariya nhighin. Nyi gyet a m'ee prist w'u shappdhakk prist mhi Abijah. Mat khinyi gyet a m'ee reep w'u seghen khi Haruna; shumm nyi a Elizabet.

⁶ Mwopp weett vel kihh mis ra gyet a mhi-shigrett kihkyeen Naan; p'ee mwopp kihh tapp kihh shiiymwaan keeru dhighin W'aar khi Daah Naan, mwopp kihh kyeer pwoo khinyi rih-rett.

⁷ Dhangg baah mwopp kad l'aa mou, p'ee gyet Elizabet a zh'eer, yakhal mwopp weett vel kihh mis ra baa mwopp kwas dyarrang g'ok gurum.

⁸ Par'meeh puus shi, bhi kaarooh Zakariya kaah dhakk-prist kihkyeen Naan dang kakhar mhinin prist w'u tihngluh prist khimwopp,

⁹ bhi mwopp blihp nyi sh'i wangg'mang, sh'i wass mhi dhakk-prist, tihh dhel dum shaan mwoor'teghez diy dhighin LuhNaan ni.

¹⁰ Kaarooh pee wull p'ee shaan mwoor'teghez ni, bhi dw'uu gurum mhi-soyill Naan ni mwopp weett kaah dhangNaan kihfur LuhNaan ni.

¹¹ Bhi m'ee gu'lop khi Naan dyingg shin Zakariya rug, ji dharr koghob sarrsoh mhi ki'byin shaan mwoor'teghez ni.

¹² Kaarooh Zakariya naah nyi, bhi shoopshik nyi lapptam yakhal khighiy shwat nyi pwetd.

¹³ Dhangg gu'lop ni satt nyi le, “Tapp kihkhirmuut y'aa gha mou, Zakariya, p'ee Naan baa klihng dhangg keegha, yakhal mat gha Elizabet p'ee l'aa laa'em gha. Gha p'ee dhen shumm nyi a Yohanna.

¹⁴ Gha p'ee kad rettyit kihh tukhuppyaah, yakhal gurum mwopp dhess zag p'ee kad rettyit kihh rooh mwopp l'aa laa'em ni.

¹⁵ P'ee nyi p'ee p'ar put a gurum-shumm wu'yon kihkyeen Naan. Tapp diy shwaa am'anab kooh m'ee mwoz mou. Naan p'ee shep gam nyi sh'i Riin Wu'bhangg, bhi kudyi a bwut nhikhin.

¹⁶ Nyi p'ee shikhir kihh Zhepp Isra'ila mwopp dhess lhiba ja kihpee Naan khimwopp diy.

¹⁷ Nyi p'ee y'aa arr kyeenn Naan p'ee sh'in dhakk sh'i riin kihh maa'pee w'u kaa gyet Iliya sh'in dhakk dyishig seh. Nyi p'ee bheettnaar puup mwopp kihh zhepp ruh mwopp. Nyi p'ee shikhir kihh mhishiin-klihngpee tihh mwopp sh'in t'ong keeru diy sh'i shwan'soon w'u kaa mhi-shigrett mwopp kihh sh'in se. A kihhsheh bhi nyi p'ee dhakk gurum mwopp l'e p'ee ji khi Daah Naan.”

¹⁸ Bhi Zakariya nang phi gu'lop ni le, “A mihyeh a bii w'u p'ee l'e tihh ih man diy ih le bii mihhse ni p'ee sh'in ayeh? Ghi naah, baa ih kus, yakhal mat na baa kus zag.”

¹⁹ Bhi gu'lop ni lapp Zakariya le, “A a'n a Gebrel w'u ih kihh dharr a kihkyeen Naan twass. Naan lop a'n tihh ih shin'pwoo diy gha, tihh ih yak Pwoo'wurett mhize diy gha.

²⁰ Orr p'ee bhakhal pwoo gha, harr baah gha p'ee mak laa'pwoo mou seeh p'ar puus w'u bii mihhse ni mwopp gam diy dhangg. Bii mihhseh p'ee kad gha p'ee baah ghi pihhzeenn pwoo keena w'u mwopp p'ee p'ar gam kih shiipp g'am keeru seh mou.”

²¹ Dw'uu gurum w'u mwopp ja p'ee soyill Naan ni mwopp kaah tapp putt khi Zakariya. Bii ni aa'phi mwopp pee'rooh mwopp kad Zakariya tong pwetd dhighin LuhNaan ni.

²² Dhangg kaarooh put bhi baah mak laa'pwoo kihh mwopp mou, bhi mwopp man le naah a m'ee wanggriin dhighin LuhNaan ni. Dheeh kihh wiipp a sarr niy gurum ni mwopp kyekk, baah mak laa'pwoo kihh mwopp mou.

²³ A nyi seh, bhi kaarooh Zakariya gam t'eer mhi dhakk-prist keeniy, bhi waa dum tuluh keeniy pitt-pitt.

²⁴ Yemm dyi lee, bhi mat khinyi Elizabet gam ak. Zok sat p'ee tarr paad, baah dh'om put naar gurum mou, p'ee kihh satt le,

²⁵ “A bii w'u Daah Naan sh'in kihh a'n seh; naah zheell keena mwasseh, bhi m'ang bii naa'shoopp lhi'baa kaah nah naar gurum mwopp.”

Gu'lop khi Naan shep satt le mwopp p'ee l'aa Jesu

²⁶ Kaarooh ak khi Elizabet wull tarr peemeh, bhi Naan waa lop gu'lop keeniy w'u a Gebrel shi dyi lhisam Nazaret, w'u a m'ee khishikhitt w'u dhighin yill Galili.

²⁷ Lop nyi kihpee m'ee duann w'u baa mwopp le'sarr dyik mwopp kihh Yusufu, w'u a m'ee gurum w'u seghen khi Miskakhamm Dauda. Shumm reep nyi gyet a Maryamu.

²⁸ Kaarooh gu'lop ni ji dhel kihpee Maryamu diy, bhi satt nyi le, “Ih tog kihh yi 'y, n'aah nhi-kyeenpyaah kihkyeen Naan. Naan kihshag kihh yi.”

²⁹ Dhangg kaarooh Maryamu klihng bii wu gu'lop ni satt rah seh, bhi bii ni daam'pee nyi, harr yeeh nyi pwetd; yakhal kihh shwanshiiy togpee wu'kihhshe ni en ra.

³⁰ Bhi gu'lop ni satt nyi le, “Tapp lukhut t'u yi mou, Maryamu, p'ee yi kad kyeenpyaah kihkyeen Naan.

³¹ Yi naah, yi p'ee m'ang ak, yi l'aa laa'em; bhi yi p'ee peet shumm nyi a Jesu.

³² Nyi p'ee put a gurum-shumm wu'yon, yakhal mwopp p'ee kihh peet nyi a L'aa khi Naan W'u Mettweett. Daah Naan p'ee l'e tihh so-miskakhamm diy tong khi taghamlong khi Pukhun Dauda.

³³ Nyi p'ee so-miskakhamm kaah luh khi Yakub harr ngaa-ngaa; dhenglong khinyi kihh p'in kyes mou.”

³⁴ A nyi seh bhi Maryamu nang phi gu'lop ni le, “Ah, diy shitt a ranggyeh bhi bii mihhse sh'in bhi baah ih khi cham man mis mou ayeh?”

³⁵ Bhi gu'lop ni lapp nyi satt le, “Riin Wu'bhangg p'ee sam kaah yi, yakhal maa'pee khi Daah Naan W'u Mettweett p'ee lang'ryiin kaah yi. Pee'mhinyi, bhi mwopp p'ee kihh peet Gwoohbhangg w'u yi p'ee l'aa nyi seh a L'aa khi Naan.

³⁶ Yi naah mwasseh kihhshe se, bhi ninggkaam Elizabet kihh ak laa'wumis kih kuss keera. Elizabet shi w'u gyet gurum mwopp kihh peet zh'eer, bhi mwasseh kihhshe nyi kihh ak tarr peemeh.

³⁷ P'ee baah mee'bii a w'u maa'shin Naan mou.”

³⁸ Bhi Maryamu satt gu'lop ni le, “Uwou, a'n a kromm kih Naan, yet tihh sh'in kihh a'n kaa ghi satt seh.” Bhi gu'lop ni dhel yet nyi diy.

Maryamu dum luh nekhennkaam Elizabet

³⁹ Dhighin shiiy'teer mhizeh ni mwopp, bhi Maryamu yakhal abet k'aa dum m'ee khishikhitt w'u Pangg Yahudiya.

⁴⁰ Dum luh Zakariya. Kaarooh ji dhel kihfur, bhi tog kihh nekhennkaam Elizabet.

⁴¹ Kaarooh Elizabet klihng togpee khinyi, bhi l'aa w'u bwut Elizabet ni pwas zhullakk, bhi Naan gam Elizabet sh'i Riin Wu'bhangg.

⁴² Bhi laa'pwoo kihh dhekheh rah bhall-bhall le, “Yi a mat w'u Naan le'wurett yi mett kakhar shwarab mwopp weett! Yakhal Naan le'wurett l'aa w'u bwut yi seh a kihhsheh zag.

⁴³ Ai, m'ee kyeenpyaah m'aan ka'! A mihyeh l'e tihh harr nhikhin khi Gwoohyon keena ji togpee kihh a'n ayeh?

⁴⁴ P'ee kaarooh ih klihng dhekheh togpee keeyi, bhi l'aa w'u bwut na pwas zhullakk sh'i rettyit.

⁴⁵ Wu'rett khi Naan kaah yi, yi w'u yi pihhzeenn yi le bii w'u Naan satt seh p'ee gam.”

Maryamu kwoob Naan

⁴⁶ Bhi Maryamu satt le: “Seen na kwoob Daah Naan,

⁴⁷ yakhal riin na kad rettyit dhighin Naan, Gu'bham keena;

⁴⁸ p'ee naah chikhirr khi kromm Keeniy wu'baan kyekk. Wu naah, yakhal mwasseh kihhshe dhel dum kihkyeen, dheeh gurum weett p'ee kihh peet a'n a nhi-kad'wurett.

⁴⁹ P'ee Daah Naan W'u Mettweett sh'in n'an dhakk w'u mett bhall mhi satt p'ee a'n. Shumm Nyi a Wu'bhangg oou!

⁵⁰ Kaahdhoonn khinyi kaah mwooh kihh kihkhir Nyi, a sh'i gangg, sh'i gangg harr, harr.

⁵¹ Sh'in n'an dhakk w'u mett bhall mhi satt sh'i sarr niy. Pirryit mhi nhighil shut dhighin phitukhup ru chiit mwopp lhiduam seh zhong-zhong.

⁵² Sam kihh Daskakhamm mwopp kih Taghamlong keeru, bhi kok mwooh'baan dh'eer lhitwakhat pee w'u tihngg-tihngg.

⁵³ Gam bwut mhi kussum mwopp kihh biisoh wu'rett, dheeh shen mhilong mwopp lhidhel sarr ruh wu'fii paah-paah.

⁵⁴ Bham kromm keeniy Isra'ila, kaarooh kakkder kaahdhoonn keeniy, chiitt kihh bii w'u gyet choor puup mu mwopp seh.

⁵⁵ Kaa gyet choor satt Ibrahim le riy p'ee sh'in kaahdhoonn gw'ar kihh seghen khi'gwar harr ngaa-ngaa seh; kaa gyet satt puup mu mwopp seh.”

⁵⁶ Bhi Maryamu tong kihh nekhennkaam Elizabet kaa tarr kunn se, bhi waa sam dum tuluh keeru.

Elizabet l'aa Yohanna Gu-Baptisma

⁵⁷ Kaarooh tarr l'aa khi Elizabet wull, bhi l'aa, laa'wumis.

⁵⁸ Shaar'tong khinyi kihh wu'myaa nyi mwopp klihng rooh Naan kamm gag kaahdhoonn keeniy wu'dhess Elizabet, bhi mwopp sh'in rettyit kihshag kihh nyi.

⁵⁹ Kaarooh lhizhiw ni wull t'eer pwoghokunn, bhi mwopp ji p'ee gab nyi. Mwopp kihh t'ang l'e shumm l'aa ni a Zakariya, kih shumm pukhun,

⁶⁰ dhangg nhikhin khinyi shiih, satt le, “Haiyou, mwopp p'ee peet nyi a Yohanna.”

⁶¹ Gurum ni mwopp satt Elizabet le, “Ai baah wunn kihh m'ee gwooh mwopp kihh peet sh'i shumm w'u a Yohanna kih seen wu mou.”

⁶² A nyi seh, bhi mwopp wiipp sarr ruh puup khi lhizhiw ni, tihh mwopp nang diy kooh kyed kihh t'ang tihh mwopp l'e a shumm wu'rangg l'aa ni oh?

⁶³ Bhi Zakariya nang kong'ran phi mwopp, bhi sh'in r'an dyikihh le, “Shumm nyi a Yohanna.” Bhi aa'phi gurum ni mwopp weett.

⁶⁴ Abet, bhi Zakariya mak laa'pwoo dhak ser'seh, bhi y'aa kwoob Naan.

⁶⁵ Kihkhirmuut yak kapp shaar'tong khimwopp. Gurum mwopp mwan yak zhakhamm bii mihhseh weett koohneeh Pangg Yahudiya.

⁶⁶ Koohweeh w'u mihh klihng orr ni, bhi kihh shwan en niy le, “P'ar l'aa mhizeh ni mihh dharr gurum bhi nyi p'ee put a mihyeh kihhsheh?” P'ee mwopp naah kad sarr Naan kaah l'aa ni.

Koog w'u Zakariya sh'in sh'i wanggshiiy

⁶⁷ Bhi Naan gam Zakariya sh'i Riin Wu'bhangg, bhi satt sh'i wanggshiiy le:

⁶⁸ “Kwoobpee a mhi Daah Naan, Naan khi Isra'ila. P'ee ji tihh bham gurum keeniy mwopp diy, tihh put diy kihh mwopp pwoo shaar'lek khimwopp.

⁶⁹ Naan yakhal kihh Gag m'ee Kokhorong Gu'bham munn dhighin tihngluh khi kromm keeniy Dauda,

⁷⁰ chiitt kaa gyet satt mhi-wanggshiiy keeniy wu'bhangg w'u gyetshak tihh mwopp dyangg munn seh.

⁷¹ Tihh shwat munn diy aghaz shaar'lek keemu mwopp, tihh shwat munn diy shebhen mwooh kihh naah munn a nyall.

⁷² Tihh kamm kaahdhoonn keeniy diy puup mu mwopp, yakhal tihh kakkder gabshit keeniy wu'bhangg diy,

⁷³ w'u a choorbhelepp w'u gyet choor puup mu Ibrahim seh.

⁷⁴ Tihh put diy kihh munn sarr shaar'lek keemu mwopp, harr l'e tihh mu soyill diy riy noott kihkhirmuut

⁷⁵ dhighin mihhseh-wu'bhangg kihh shigrett kihkyeen niy, tihh mu soyill diy nyi kihhsheh dhighin t'eer mhi seen keemu mwopp weett.

⁷⁶ “Em na Oo, mwopp p'ee kihh peet gha a gu'wanggshiiy khi Naan W'u Mettweett. P'ee a gha p'ee y'aa arr ky'een Daah Naan, tihh ghi dhakk arr diy nyi.

⁷⁷ Tihh ghi kamm m'an mhi kad bh'am diy gurum khi Naan mwopp; bh'am w'u gurum mwopp p'ee kad nyi a sh'i fwah khi shigbis,

⁷⁸ Lhiwaa naahchikhirr khi Naan keemu. Lhiwaa a naahchikhirr khi Naan ni, bhi Peebhangg khinyi w'u put kih dhengNaan p'ee bhanggpee kaah muh.

⁷⁹ Tihh pihh Peebhangg diy mwooh kihh tong dhighin pee'kwoo, mwooh kihh tong a der ryiin muutt; tihh g'ong munn diy dhen kih arr tongkakhamm.”

⁸⁰ Yohanna ni yon, yakhal bhall dhighin riin niy zag. Y'aa tong dhighin dh'em, harr p'ar w'u y'aa dhakk diy bazh naar Zhepp Isra'ila mwopp.