Mathai 8 - Caekäcai Kangthae (Lemi)

Ängang käsi lawngtä bung Isu ma hawi sa pa

¹ Isu lä me anghung üng aerung käthu ea khimipui na lä äni leithung hui pa ö dy.

² Tukha ängang käsi mang saite khimi lawngtä lä ly kha Isu maw-a khokhö didü pa dy. Äni ma Isu tea “Areng ä, nang ma aely ngai dylä, kai bung hawi hai haw he kae” näkha näpa.

³ Isu la äma üng kö bäjang kha khimi känaw tea aela pa dy. Äni ma “Kai aely ngai cy. Hawi lawi sy” näpa. Qengtäma äni üng ängang käsi lä hawi praw pa vi dy.

⁴ Tupyng-a Isu ma äni tea, “Ämi tea lä hini phüng thui hang ba. Tungaila ly kha nang ma bung mäthykung na tea mätü ba. Tukha Mosi üng Ubädi kätyng mäthykung tea löci sa ba. Hikä sa te lä nang vaihi naw hawi dy näte khimi qütä ma mäny vi ai” näkha näpa.

Isu ma Rom reisae mätawngky üng mawsawng bung hawi sa pa

⁵ Isu lä Kapernawm märü-a kung tea Rom reisae cungvaitä bung pyng saite mätawngky lä äni tea ly kha säbawng hethang mäkai pa dy.

⁶ Rom reisae mätawngky ma “Särae ä, kai üng mawsawng lä tengxyng y kawngang naw vi. Äni lä ätabung aetae haw y käla ing-a awng te vi. Äni lä naw mätang phi vi dy” näkha näpa.

⁷ Isu ma äni tea “Kai ly kha äni tea hawi sa pa ai mang” näpa.

⁸ Tupyng-a reisae mätawngky ma “Särae ä, nang lä kai üng ing-a ly hethang aeteng y lyng. Nang üng lo bälangtä phai thui dylä, kai üng mawsawng lä naw te hawi raw ai mang.

⁹ Kai lä khimi üng aenae täkui-a awng saite khimi kae. Kai üng aenae täkui-a reisae na awng. Kai ma lawngtä tea ‘ly lawi’ nädylä äni lä ly vi. Kai ma äkälang reisae tea ‘Vawi lawi’ nädylä, äni lä vawi vi. Kai ma üng mawsawng tea ‘Hini kä sa nädylä äni lä sa vi’” näkha näpa.

¹⁰ Isu ma hini lo thai ea tengxyng y cangxei vi dy. Tukha äma leithung hui te khimipui na tea “Tängai ö, Isrelae khimi na thung-a mäteng ma hini kätangtä yng phi saite khimi bung kai aeting vai y.

¹¹ Kai ma nang ce tea thui ai dy, khimi kä-awng mang na lä käni düng känise pre kälang mang üng ly ö te vi. Säthaw lä äma üng pre-a Sanphrang sa te kätü-a mä-ai üng kangsi Abraham, Isaika, Jaeko ce hai äni ce mangtä aety kha pawi sa ö vi ai.

¹² Tungaila Säthaw üng khimi, Isrelae khimi na bung kävingky saite thung-a kädesö vi ai. Honi mityng-a äni ce lä tengxyng y rawpi te hai äfaw aemäkütang kha awng ö vi ai mang” näkha näpa.

¹³ Tupyng-a Isu ma Rom reisae mätawngky tea “Ing-a vawi lawi. Nang ma üng yng te kätyng mawsawng lä naw hawi vi dy” näkha näpa. Honi kätü khaw-a ma mawsawng lä naw hawi pa vi dy.

Isu ma khimi ce bung känaw käsaw hawi sa pa

¹⁴ Isu lä Peterae ing-a ly ea Peterae üng pä-i lä kawngang naw kha i nae qawng-a aesawng te nung pa vi dy.

¹⁵ Isu ma Peterae pä-i kö tea aela ea äpä-i lä naw hawi pa dy. Tupyng-a Peterae pä-i lä aetha praw ea äni ce tea käcakänei mäcaw pa dy.

¹⁶ Honi kädüng käni leng ea lä khimi ce ma angra kung saite khimi kä-awng mang na bung Isu tea nähai pa ö cu dy. Isu ma älo thui kha khimi ce te üng angra na bung mätho pang pa vi dy. Isu ma khimi ce üng känaw käsaw angxynlyng na hawi sa pa dy.

¹⁷ Caekäcai thung-a buisaw Isaia ma tärü rüng saite lä cungrü hai pa dy. “Äni ma mä-ai üng aethawdi saite hai känaw käsaw na tea hawi hai vi dy” näkha näpa.

Isu üng äkähui aelawng hethang ngai saite na

¹⁸ Isu lä äma tea säveng saite khimipui na bung nung ea äkähui na tea “Tuilipui rei mang-a aekae ö si” näpa.

¹⁹ Tukha Ubädi särae lawngtä ma Isu tea ly kha “Särae ä, Kai lä nang ly saite mityng qütä-a hui by ai” näkha näpa.

²⁰ Isu ma äni tea “Kivae na lä äkhaw awng. Tävaw na lä täbö awng. Tungaila Kai, Khimi üng Cäpaw, lä älö qu nae mäteng awng te y” näkha näpa.

²¹ Äkälang äkähui lawngtä ma “Areng ä, kai pä-ai üng äro bärung he sa mang re si. Tupyng-a kai ly kha nang leithung hui ai mang.”

²² Tungaila Isu ma äni tea “Nang lä kai leithung vaihi ma hui lawi. Kädü na ma äma ce üng äro tea bärung ö raw kae sy” näkha näpa.

Isu ma aeli kangcai tea ding hai pa

²³ Tupyng-a Isu lä bälawng qawng-a paw pa dy. Äkähui na lä äni hai mangtä hui ö dy.

²⁴ Qengtäma tuilipui-a aeli kangcai tho te aetawng kha tuileng na lä bälawng thung-a kung pa vi dy. Tungaila Isu lä i vi rawng.

²⁵ Äkähui na lä Isu tea ly ea i bälaw ö dy. Äni ce ma “Areng ä, mä-ai tea säbawng kü. Mä-ai lä dü ai dy hei” näkha näpa.

²⁶ Isu ma äni ce tea “Nang ce lä yng te aethaw awng ö y. Ätephüng-a ri ö te mei.” Tupyng-a Isu ma aetha kha aeli hai tuileng na tea särilo hai thui pa dy. Tukha aeli hai tuileng na lä ding king pa vi dy.

²⁷ Khimi ce lä cangxei ea “Hini lä makäti khimi vi nang mei. Aeli hai tuileng na mäteng ma äni üng lo tängai na ly” näkha äma ce tingtawi aethui ö dy.

Isu ma angra kung saite khimi lawng netä bung hawi sa pa

²⁸ Isu lä Kalile tuilipui rei mang-a tyng dy. Honi mityng lä Kerasene khimi ce üng khö vi. Angra kung saite khimi lawng netä lä täprawng mang üng tho kha Isu tea aeting pa dy. Änini lä tengxyng y aethaw awng kha khimi angxynlyng na ri ö bawi vi. Tukha ämi lä honi lolang mang ly vawng ö y.

²⁹ Änini ma Isu tea “Säthaw üng Cäpaw ä, nang lä kai ce tea ätemakä sa hethang ngai hai te mei. Säthaw üng kätü tyng y rawng ea kai ni tea dengpy hethang ly te dy mei” näkha näpa.

³⁰ Änini hai äjecäcaw hanglaw saite mityng-a o kanghö na lä raca ca kha awng.

³¹ Angra na ma Isu tea “Nang ma kai ce bung khimi te üng mätho dylä, honi o na thung-a kung hethang py kü jo” näkha näpa.

³² Isu ma angra na kung saite ni tea “Ly hawi lawi” näkha näpa. Tukha angra na lä khimi te üng tho kha o tea kung ö dy. Tupyng-a o kanghö na lä täkha pyng mang-a aehui käthu ö kha tuilipui thung-a aesänung kha dü king pa ö vi dy.

³³ O bung rui saite khimi na lä märü thung-a aehui ö kha äma ce tea aeting saite khimi na tea thui pa ö dy. Angra kung saite khimi lawng netä üng älawngsai lä thui pa ö dy.

³⁴ Tukha märü üng khimi angxynlyng na lä Isu bung nung hethang ly ö dy. Äni ce lä Isu bung nung ea äma ce khö üng thoja hethang mäkai pa ö dy.