Mathai 6 - Caekäcai Kangthae (Lemi)

Mätang saite na tea säbawng te phüng

¹ “Nang ce lä kähawi sa tea khimi ce känung-a sa ö hang. Y dylä, Känipre-a awng saite nang ce üng Pä-ai ma nang tea ävang py hethang y dy.

² “Nang lä mätang saite na tea säbawng kätü-a, nang sa te khimi na tea thui hang ba. Khimi kähawi käjüng aesa saite na kätyng sa ö hang. Äni ce lä Judae na üng ingkäcai hai lolang kaeting-a mätang saite na tea säbawng ö te vi. Khimi ce ma äni ce tea tämö khai hethang honi kä sa ö vi. Tängai ö. Äni ce la khimi ce üng ävang dang pyng ö te vi dy. Säthaw ma äni ce tea ävang py te y.

³ Nang lä mätang saite na tea säbawng te kätü-a, nang rawijae na mäteng mäny hai hang.

⁴ Honi kätyng sa dylä, nang üng säbawng saite tea khimi ce mäny y lyng. Känipre-a awng saite nang üng Pä-ai ma kangru-a sa saite nung te phüng-a ävang py ai mang.

Säthaw tea aetang te phüng Isu ma mätu pa

⁵ “Nang lä aetang ea khimi kähawi käjüng käsa na kätyng sa hang. Äni ce lä khimi ce känung bawi-a Judae na üng ingkäcai hai lolang kaeting mityng-a aedaw kha aetang hethang ngai ö vi. Tängai ö. Äni ce la khimi ce üng ävang dang vi dy. Säthaw ma äni ce tea ävang py pa y dy.

⁶ Tukha nang ce aetang ea ingthung-a kung kha kätho aekhae teng. Ämi hai nung haw y saite nang üng Pä-ai Säthaw tea aetang. Nang üng Pä-ai ma kangru-a sa saite nung kha ävang py ai mang.

⁷ “Nang lä aetang ea älo aepe mang hang. Nang lä aedawng y käla älo awng mang-a thui hang. Säthaw bung mäny y saite na lä hini kä aetang vi. Äni ce lä älo sadui-a aepe kha aetang dylä, äma ce üng Säthaw ma tängai ai näkha aedawng ö te vi.

⁸ Nang lä äni ce kätyng sa hang. Nang üng Pä-ai lä nang mäkai y te kälang-a ma nang ngai saite na mäny pyng vi dy.

⁹ Tukha nang aetang te kätü-a hini kä thui ö. ‘Känipre üng kai ce üng Pä-ai ä, nang üng ämüng käcai tea khimi ce ma tämö khai sy.

¹⁰ Nang ma Sanphrang kätyng pyng sy. Känipre-a nang üng angtawtha na nang ma üng aely kängai kätyng sa vi. Älawngpre üng khimi na lä hini kätyng nang üng aely kängai sa sy.

¹¹ Kai ce üng käni qütä ca hethang py kü ba.

¹² Kai ce tea tämang saite khimi na hunghö kai ce bälawi te kätyng-a, kai ce üng hunghö bälawi kü ba.

¹³ Kai ce tea hunghö sa te khytä bärawi bäleng saite aeting hai jo hang ba. Setan ma kai ce tea bäja y hethang säbawng kü ba’ näkha näpa.”

¹⁴ Tukha Isu ma “Nang tea sa tämang saite khimi na üng hunghö bälawi dylä, Känipre-a awng saite nang ce üng Pä-ai la nang üng hunghö bälawi vi ai mang.

¹⁵ Tungaila nang tea tämang saite khimi na üng hunghö bälawi y dylä, nang üng Pä-ai la nang ma üng hunghö bälawi y lyng.

Böjae te phüng mätu te

¹⁶ “Nang lä böjae ea khimi kähawi käjüng aesa te kätyng mimai hawi y te sa ö hang. Äni ce lä böjae te khimi na mäny hethang ngai te phüng-a ämi aelae y käla mimai hawi y te kätyng sa ö vi. Tängai ö, äni ce lä khimi ce üng ävang dang vi dy. Säthaw ma äni ce tea ävang py y dy.

¹⁷ Nang ce lä böjae ea mimai aelae pang kha äsang aeso ping.

¹⁸ Honi kätyng sa dylä, nang ce üng böjae te ämi lä mäny he y. Ämi hai nung haw y saite nang üng Pä-ai lä kangru-a sa te nung kha ävang py ai.”

Vyngsai amäjy känetä phüng mätu pa

¹⁹ “Nang ma tähang älawngpre-a vyngsai na mätung hang. Älawngpre-a vyngsai mätung dylä, süngei hai dengkeng ca haw vi. Khimi ce lä ing-a kung kha vyng na bäru haw vi.

²⁰ Honi jüng-a nang ma tähang Känipre-a vyngsai na mätung kae. Honi vyngsai lä süngei dengkeng na ma ca haw y lyng. Honi lä theru na ma bäru haw te y.

²¹ Nang üng kätui awicae awng saite mityng-a nang üng bälung lä awng vi ai.

Ätabung üng kaevang

²² “Nang üng ämi lä ätabung üng kaevang vi. Nang üng ämi na hawi dylä, nang üng ätabung lä Säthaw üng kängai sa vi ai.

²³ Tungaila nang ämi hawi y dylä, nang üng ätabung angxynlyng na lä käving thung-a awng kha Säthaw üng kängai mäny haw y dy.

Säthaw hai älawngpre üng vyngsai na

²⁴ “Ämi mawsawng la ingkung lawng netä üng kälu sa mei haw y. Honi kä sa dylä, lawngtä tea tämö khai kha lawngtä tea lä mäthi y vi ai. Ingkung lawngtä tea esäre kha kälang lawngtä tea lä bälung aevaw ai. Nang lä qengtä ma Säthaw hai älawngpre üng tangkae tähang mawsawng sa mei haw y lyng.

Bälungbi hang

²⁵ “Nang lä älawng qawng-a hing hethang tähang bälungbi hang. Ätemakä ca ai mei. Ätemakä aekhu aena ai mei näkha bälungbi hang. Nang üng hing te lä käcakänei qawng-a aely lengky vi. Nang üng ätabung lä aekhu aena nae qawng-a ävang tingky.

²⁶ Tävaw na phüng aedawng mäsüng kae-e. Äni ce lä caw la e y. Caw la ae y. Caw na cawtai thung-a khai y. Tungaila Känipre üng mä-ai üng Pä-ai Säthaw ma äni ce tea mäcaw pa te vi. Nang lä tävaw na qawng-a ävang tingky vi.

²⁷ Nang lä bälungbi te hai-a mä-ai ma üng hing saite säning tea äjecäcaw ryng hai sei haw te y vi.

²⁸ “Nang lä aekhu aena nae tähang bälungbi hang. Daithung üng äcae hawi saite äpa na phüng aedawng mäsüng kae-e. Äni ce lä kälu la sa vai te y. Kä-o la aekhü vai te y.

²⁹ Tungaila vaihi kai ma nang ce tea thui ai dy. Tawngnang phi saite Solomon sanphrang mäteng ma honi äpa na kätyng äcae hawi saite kä-o na aekhu aena haw y.

³⁰ Säthaw lä daithung üng aeca tea äcae kähawi-a sa pa te vi. Honi aeca vaihi hing kha khawngdang lä khimi ce ma mai thung-a käde te kae vi. Tukä dylä, Säthaw lä nang tea ngai saite kä-o na py ai be. Nang ce lä Säthaw tea yng te di bärai ö te vi.

³¹ “Tukätephüng-a makä ca ai mei. Makä nei ai mei. Äte aekhu ai mei” näte bälungbi ö hang.

³² Säthaw bung mäny y saite khimi na hai hini na phüng-a, bälungbi ö te vi. Nang ce hini ngai vi näte Känipre üng nang ce üng Pä-ai Säthaw lä mäny vi.

³³ Säthaw üng pre hai aesui saite na phüng angcü-a aedawng mang ö. Säthaw üng aely kängai kätyng angcü-a awng. Tupyng-a hini angxynlyng na Säthaw ma nang ce tea py vi ai.

³⁴ Tukätephüng-a nang lä khawngdang tähang bälungbi y ma. Khawngdang üng bälung käbi tähang lä khawngdang ma aedawng kae. Vaini aeting saite bälung käbi na lä vaini tähang aelo khaw dy.