Mathai 3 - Caekäcai Kangthae (Lemi)

Baptismae Johan ma thui saite älo

¹ Kätü käni qae ea Baptismae Johan lä Judae khö üng daithung kärang-a aetüng kha Säthaw üng angthang thui pa dy.

² Äni ma “Ae-ui ö lawi Säthaw ma pre pyng saite kätü lä tyng hethang aenai dy” näkha näpa.

³ Jangni-a buisaw Isaia ma Johan phüng lä thui rüng pa vi dy. Isaia ma, “Daithung kärang-a khimi lawngtä ma a kha thui pa vi. Äni ma, ‘Areng ly nae lolang mäcai rüng lawi. Äni tähang lolang mätaw pa lawi’ näkha thui ai” näkha näpa.

⁴ Baptismae Johan lä säphö känawngjang käsa mui hai aekhü saite kä-o rungrang aelawng kha angkeng-a mawiphö khabai aekheng vi. Äni üng käcakänei lä khakhö hai khawi tui vi.

⁵ Jerusalem märü üng khimi na, Judae khö angxynlyng na hai Jordan tävaw mityng üng khimi kä-awng mang na lä Johan tea ly ö vi.

⁶ Äni ce lä äma ce üng hunghö na khimi ce maw-a täphawng kha Jordan tävaw-a Johan ma baptismae py pa dy.

⁷ Johan ma Pharisai hai Sadukai awng mang saite na baptismae la hethang ly te nung pa vi. Äni ma “Nang ce lä bärui käsi hai aetawng vi. Baptismae lä te hai-a nang ce lä Säthaw ma dengpy saite aelawi haw y lyng.

⁸ Nang ce lä tüng saite kälu sa te hai-a ae-ui tätang näte mätü mang re.

⁹ Nang ce lä ‘Kai ce Abraham hai kaesui na kae vi’ näkha thui ö vi. Honi kä thui te hai lä Säthaw ma dengpy te üng aelawi haw y lyng. Säthaw lä hini kälung na tea mäteng ma Abraham kaesui kaebeng-a bälawng haw te vi.

¹⁰ Säthaw lä aetu süng kha äthai kung üng angjüng bälu hethang awng rüng te khimi lawngtä kätyng vi. Äni ma äthai aethai y saite äkung angxynlyng na bung bälu pang ea mai hai sawi vi ai.

¹¹ “Nang ce ae-ui te mätü hethang kai lä nang ce tea tui hai baptismae py vi dy. Kai leithung-a tyng saite lawngtä ma Muilaw Käcai hai, mai hai, baptismae py ai. Äni lä kai qawng-a haidae lengky vi. Kai lä äni üng kho painai mäteng ma süng hethang aeteng y.

¹² Äma üng kö-a caw mäsi hethang bäraw süngrüng saite khimi hai aetawng vi. Äni lä cawpai thung-a caw kangta na bung mäkawi pa vi ai. Cawfi bung lä dü y saite mai hai sawi vi ai” näkha näpa.

Johan ma Isu tea baptismae py saite

¹³ Tukha Isu lä Baptismae Johan te üng baptismae la hethang Kalile khö üng Jordan tävaw-a ly vi dy.

¹⁴ Baptismae Johan lä Isu tea baptismae py hethang ngai y. Äni ma “Kai lä nang tea baptismae py hethang aeteng y. Nang lä kai tea baptismae py hethang aeteng khaw vi” näkha näpa.

¹⁵ Tungaila Isu ma “Säthaw üng aely kängai mä-ai lä sa hethang kae. Tukätephüng-a vaihi kai tea baptismae py lawi” näkha näpa. Tukha Johan lä Isu tea baptismae py pa dy.

¹⁶ Isu lä baptismae la te hai qengtä ma tui thung üng aetha praw dy. Honi kätü khaw-a, käni lä aepä-awng kha Säthaw üng Muilaw aeja käthu te Isu lä nung vi. Muilaw Käcai lä bähö kätyng aeja käthu ea Isu qawng-a cu pa dy.

¹⁷ Käni mang Säthaw üng ätüng lä “Hini lä kai ma bälung aevaw saite Cäpaw vi. Äni tähang kai lä kawngphi vi” näkha näpa.