Mathai 22 - Caekäcai Kangthae (Lemi)

Aepawng saite pawi hai mätae pa

¹ Isu ma äni ce tea mätae saite hai älo na thui haile pa be dy.

² Äni ma “Säthaw üng pre lä hini hai aetawng vi. Sanphrang lawngtä lä äcäpaw üng aepawng pawi tähang aerü rüng dy.

³ Äni lä mawsawng na bung mätaw kha pawi-a ly hethang thangka angvüng na tea ka hai pa dy. Tungaila äni ce lä ly hethang ngai pa ö y.

⁴ Tupyng-a sanphrang ma mawsawng kälang na tea thangka angvüng na tea hini kä thui hai pa dy. ‘Kai lä Kädüngbö tähang sa rüng bawi dy. Kai üng raebawi mäte na hai ärung hawi saite raebawi na bung ra dy. Angxynlyng na lä khüng ycy dy. Aepawng pawi-a ly ö lawi’ näkha näpa.

⁵ Tungaila äni ce lä dawngcang y käla, äma ce ngai saite na sa ö vi. Lawngtä lä äma üng lai-a ly vi. Khimi kälang lawngtä lä kälu sa saite mang-a ly pa vi.

⁶ Kälang na ma lä sanphrang üng mawsawng na bung nerang kha bo ea bädü pa ö vi.

⁷ Sanphrang lä tengxyng y kädawtho pa dy. Äma üng reisae na bung mätaw kha khimi bädü saite na bung bädü hai king dy. Äni ce üng märü bung maisawi hai pa vi dy.

⁸ Tupyng-a mawsawng na tea ‘Aepawng pawi lä aerü rüng ngaila thangka angvüng na lä honi pawi-a ly hethang aeteng te y vi.

⁹ Lolang pui, lolang säla-a ly kha, nang ce aeting saite khimi na bung aepawng pawi-a ka ö’ näkha näpa.

¹⁰ Tukha mawsawng na lä lolang-a aeting saite khimi käsi, khimi kähawi angxynglyng na bung ka pa ö dy. Tukha aepawng saite mityng lä angvüng na hai kawipy pa dy.

¹¹ “Sanphrang lä angvüng angvaw na bung aeting hethang ly ea aepawng pawi hai aeteng saite kä-o aelawng y te khimi lawngtä bung nung pa dy.

¹² Sanphrang ma ‘Rawijae ä, makä nang lä aepawng pawi hai aeteng saite kä-o aelawng y käla kung mei’ näkha düng pa. Tukha hini khimi lä lo haetä lä mäthang pa y.

¹³ Tupyng-a sanphrang lä mawsawng na tea ‘Äni üng äkö hai äkho-a mäkhing ö kha ärang kävingky mang-a mätho ö la. Honi mityng-a khimi ce lä raw kha äfaw aemäkütang ea awng ö vi ai’ näkha näpa.”

¹⁴ Isu ma “Säthaw lä khimi awng mang-a ka vi. Tungaila äni ma re saite lä äjecäcaw kae” näkha näpa.

Sica sanphrang tea maimö py saite phüng

¹⁵ Tupyng-a Pharisai na lä aekäcö ea Isu lä tämang saite älo aepe dang hethang makä sa ai mei näkha aedüng ö dy.

¹⁶ Äni ce lä äma ce üng äkähui phütä na hai Herodae üng äpy na bung Isu tea mätaw pa dy. Äni ce ma “Särae ä, nang lä kätüng khaw ni thui te kai ce lä mäny vi. Nang lä khimi ce Säthaw üng älang kätüng kätyng awng hethang mätu te vi. Khimi ce ma nang phüng aethang khai ngaila nang lä dawngcang te y. Khimi ce üng mimai tea la kheng y.

¹⁷ Nang makä aedawng mei kai ce tea thui kü jo. Kai ce lä Sica sanphrang tea angko py sang mei, py sang y mei” näkha düng pa dy.

¹⁸ Tungaila Isu lä äni ce üng hawi y saite aedawng te na mäny pa vi. Äni ma “Nang ce lä khimi kähawi käjüng aesa saite na vi. Ätephüng-a kai tea käny näpi ö te vi mei.

¹⁹ Angko py hethang phawisae pjaetä kai tea mätü” näkha näpa. Tukha äni ce ma phawisae pjaetä nähai pa ö dy.

²⁰ Tukha Isu ma äni ce tea “Hini-a lä ämi üng äpung hai ämüng awng mei,” näkha düng pa.

²¹ Äni ce ma Isu tea “Sica sanphrang üng äpung hai ämüng vi” näkha mäthang pa. Tukha Isu ma “Sica sanphrang pyng saite lä Sica sanphrang tea py pa ö. Säthaw pyng saite na lä Säthaw tea py pa ö” näkha näpa.

²² Honi lo thai ea äni ce lä Isu tea cangxei ö vi dy. Tupyng-a äni ce lä Isu te üng thoja pa ö vi dy.

Kädü thung üng aetha saite phüng

²³ Honi käni-a kädü thung üng aetha haile te awng y näkha yng saite Sadukai phütä na lä Isu tea ly pa ö dy.

²⁴ Äni ce ma “Särae ä, Mosi ma äma üng Ubädi thung-a mä-ai tähang tärü te lä ‘Khimi lawngtä lä caw na dang y käla dü taqawi dylä, änawngpui bung äkangby na ma aekö hai he kae. Ätephüng-a mei nädylä dü saite äjä-ai üng amäjy aepreng hai he kae’ näkha näpa.

²⁵ Vaihi kai ce tea kangby jä-ai lawng säritä awng näre si. Äjä-aiky lä ingthawng sa kha caw na dang y käla dü vi. Tukha äni üng kangby kälengky lä äjä-ai üng nawngpui aekö hai dy.

²⁶ Honi kangby lä caw na dang y käla dü tynglyng pa. Hini kätyng äbaeni hai ämäthung kangby ni lä hini nawngmädi bung aekö hai kha caw na dang y käla dü be tynglyng pa vi. Tupyng-a kangby jä-ai lawng säritä na lä hini nawngmädi aekö hai bawi kha caw na dang y käla dü ö bawi vi dy.

²⁷ Kangkhüng-a honi nawngmädi lä dü by vi dy.

²⁸ Kädü üng aetha haile saite käni-a honi nawngmädi lä ämi üng nawngpui-a aelawng ai mei. Kangby jä-ai lawng säritä na lä äni hai aepawng bawi te vi” näkha düng pa.

²⁹ Isu ma äni ce tea “Nang ce lä Caekäcai tea mäny ö y. Säthaw üng haidae phüng la mäny ö y. Tukätephüng-a nang ce lä dawng tämang ö te dy.

³⁰ Khimi ce lä kädü thung üng aetha haile te kätü-a aepawng saite awng y ai dy. Äni ce lä Känipre üng angtawtha na kätyng aelawng ö vi ai.

³¹ Dü saite khimi na lä aetha haile ai te phüng Caekäcai thung-a, Säthaw ma thui te lä,

³² ‘Kai lä Abraham üng Säthaw, Isaika üng Säthaw, hai Jaeko üng Säthaw vi’ näpa. Hini na nang ce lä phai vai y mei. Tukätephüng-a honi Säthaw lä dü saite khimi na üng Säthaw y. Hing saite khimi na üng Säthaw kae.”

³³ Hini khimipui na thai ea lä äma üng mätae te lo phüng-a cangxei ö phi vi dy.

Särilo kälengky

³⁴ Pharisai na lä Isu ma Sadukai na älo qa haw y rungtä älo thui te thai ea aekäcö pa dy.

^35-36 Äni ce thung üng Ubädi särae lawngtä ma “Särae ä, Mosi üng Ubädi lo angxynglyng na thung-a särilo manita aely lengky mei” näkha käny te hai düng pa.

³⁷ Isu ma äni tea “‘Nang ce üng Areng Säthaw tea bälung mäke hai bälunghaesy te kaedawng angxynlyng na hai bälung aevaw hethang kae’ näkha näpa.

³⁸ Hini lä angcü üng äkälengky saite särilo dy.

³⁹ Äbaeni üng aely lengky saite särilo lä hini kätyng-a ‘Nang ma tea bälung aevaw te kätyng äpy äjae tea bälung aevaw hethang kae’ näpa.

⁴⁰ Honi särilo känetä lä Mosi üng Ubädi hai buisaw na üng lo angxynlyng na üng äkung pui vi dy” näkha näpa.

Mesia phüng düng pa

^41-42 Tukha Pharisai na lä mangtä aekäcö kha awng ea Isu ma äni ce tea düng pa dy. “Nang ce lä Mesia üng äphüng makä dawng ö mei. Äni lä ämi üng cäpaw mei” näkha düng pa. Äni ce ma “Äni lä Sanphrang Davidae üng cäpaw” näkha mäthang pa dy.

⁴³ Isu ma äni ce tea “Tudylä Sanphrang Davidae lä Muilaw Käcai hai Mesia tea ‘Areng’ näkha ätephüng-a ka te mei. Sanphrang Davidae ma, ‘Kai üng Areng tea Säthaw ma thui te vi.

⁴⁴ “Nang üng täre na bung nang üng, kho bäde täkui-a kai ma khai y rytä kai üng bangtang mang-a aety ba”’ näkha nä vi.

⁴⁵ “Davidae lä Mesia tea ‘Areng’ näkha ka vi dylä, Mesia lä makä sakha Davidae üng cäpaw-a aelawng haw ai mei” näkha düng pa.

⁴⁶ Isu tea ämi lä älo mäthang haw ö y dy. Honi käni üng hai aetawng kha Isu tea ämi lä älo düng ö vawng y dy.